Reveleyshən 9 - Vengo (Babungo)

¹ Nshiiŋii Nwi lwesə tee kɨ nii tàw yisaw yi, mə ye fəjwiŋ faŋ mfə fiŋ fɨ taa yizɔ nsi, vɨ kɔ ŋkwa wee-nsi yibay tɨ́ ŋwə.

² Ŋwə ŋaꞌsə wee-nsi yibay ghɔ́, fəndɨꞌ fuu fɨ fuŋ yaa ŋkee fəndɨꞌ fɨ taa bɨꞌ ndaa kwalə. Fəndɨꞌ fɔ́ fəŋsə shɨshwi, baa fə̀ŋsə fɨɨ.

³ Ŋweysə fuu fɨ taa fəndɨꞌ fɔ́, gù fuu nsi, vɨ kɔ wutə tɨ́ nsə yaa wutə vəŋaa vəkwalə.

⁴ Vɨ naysə tɨ́ nsə laa kɨ nsə bɨsə təgay fɨ shɨ nsi me, tɨꞌnə me fa faŋ ŋkə tɨta yaa vətɨ me, laa nsə kɨ gə sheꞌ maa vɨɨ mbɨə faŋ vəŋ kee kìi shwenə Nwi mbootɔ vəŋ me.

⁵ Vɨ nə baa nàysə laa nsə yɨnə vɨɨ maa yiŋuu tee, luu nə, kee zwìlə vəŋ me. Ŋɨꞌ njyə faŋ nsə kɔ̀ tɨ́ vɨɨ nə, lùu yaa njyə vəŋaa vəbwəvə faŋ mbə yaa kɨ tələ vɨɨ nə.

⁶ Ndɔ luu maa vəshi vɔ́, wə kɨ kəə ku, kee ye yiku me. Vɨɨ kɨ kəə laa vəŋ kukə, yiku nyɨŋ fɨ yɨ vəŋ.

⁷ Gə̀ fɨ maa ŋkɨꞌnə ŋweysə sɔ́, nsə nə lùu yaa nyaasə-koꞌsə, faŋ nsə lòotə ŋwaa maa məgə yighaw. Fa mɔ́ꞌ nə luu shɔ maa yitɔ yivəŋ yaa yisɔꞌ vəfwàŋ, faŋ vɨ nàysə nə goolə. Təkəꞌ təvəŋ luu yaa ntə vɨɨ.

⁸ Nyuŋsə tɔ vəŋ ghɨɨ yaa nyuŋsə tɔ vəki, gɨꞌ vəŋ luu yaa gɨꞌ bikəə.

⁹ Vəŋ mɔꞌ njwi yighaw faŋ vɨ ta shuu njyoꞌ wi nə bwey. Ghalə ghi gisə yaa vəkaalə vəyaŋvə faŋ vɨ shùŋ ŋiꞌ nyaasə-koꞌsə, nsə nə suŋ, gə̀ yighaw.

¹⁰ Nsə nə kìi nsaysə yaa vəŋaa vəmɔ́ꞌ, baa nə mətələ vəŋ. Wutə məndɨəsə wə maa yiŋuu tee luu sheꞌ taa nsaysə vəŋ.

¹¹ Fwàŋ ŋweysə sɔ́ nə luu tɨɨ wee-nsi bay. Yizii yi maa ghaŋ Hibru lùu laa Abadɔn; yizii yi maa ghaŋ Griis lùu laa Apɔliɔn, faŋ lùu laa wuu məbɨsə.

¹² Nɨniŋ, mfɔŋ ŋɨꞌ nə shɔ̀ɔ, ghee ŋɨꞌ baa gòꞌ bɔɔ.

¹³ Nshiiŋii Nwi lwesə ntɔfə, taw yisaw yi, mə zɔ gɨ yimɔ́ꞌ fuu fɨ maa təsaw yishwe faŋ ntə nə luu mbɨɨ shəŋ məkɔ Nwi faŋ vɨ nə bɔ̀ŋ nə goolə nə, vɨsɨ Nwi.

¹⁴ Gɨ yɔ́ gi tɨ́ nshiiŋii Nwi lwesə ntɔfə faŋ ŋwə kìi yisaw yɔ́ laa, «Keꞌtə kuu fɨ maa nshiisə-ŋiisə Nwi sì yishwe faŋ vɨ nə shùŋnə vəŋ shuu muu məkwalə mə Yufreytis.»

¹⁵ Nɨniŋ, vɨ keꞌtə nshiisə-ŋiisə Nwi sɔ́ yishwe, faŋ vəŋ nəə kɨꞌ yighee vəŋ, nə shi vəŋ, nə ŋuu vəŋ, nə ŋuꞌ vəŋ maa məfuu, zwìlə way kəmuꞌ fɨ taa vəway və vɨɨ fɨ taa mbi vətia.

¹⁶ Nwaa vɨɨ məkoꞌ nyaasə fɨ shuu yighaw vəŋ nə luu ŋkaŋsə yighuŋ, vəshəŋ ŋkaŋsə yighuŋ ghee bɔɔ. Lùu faŋ mə nə zɔ ki vəŋ nə.

¹⁷ Ŋkɨꞌnə nyaasə koꞌsə sɔ́ nə vɨɨ məkoꞌ vɔ́ faŋ mə nə ye nə, nə lùu tɨ́ nee: njwisə yighaw nə luu maa vəŋ faŋ vɨ nàysə nə bwey, səmɔ́ꞌ luu səbay yaa wisə, səmɔ́ꞌ luu səndɔɔlə yaa yizɔ, səmɔ́ꞌ luu yaa ŋkwilii bay. Yitɔ yi nyaasə koꞌsə sɔ́ luu yaa yitɔ yi bikəə. Wisə nə fəndɨꞌ baa nə lumə bwə faŋ ŋkə zwilə vɨɨ nə fùu fɨ shuu nsə.

¹⁸ Vətɔ və ŋɨꞌ vɔ́ vətia, faŋ mbə nə fùu fɨ shuu nyaasə sɔ́ nə, faŋ nə luu wisə nə fəndɨꞌ nə solfa nə, zwilə nwaa muꞌ fɨ taa yinwaa yi vɨɨ yitia, mèꞌtə yinwaa yibɔɔ.

¹⁹ Wutə nyaasə sɔ́ luu shuu nsə, baa nə nsaysə vəŋ. Nsaysə vəŋ luu yaa zɔsə, nə vətɔ vəvəŋ shɔ, tɨ́ kaꞌ vəŋ ndɨ̀ə wə shɔ.

²⁰ Betə vɨɨ faŋ kəŋ ŋɨꞌ ghɔ́ kee zwìlə vəŋ nə me, kee bee kwìinə fwisə vəŋ me, kee mèꞌtə vənu vəbwəvə vəŋ faŋ vəŋ nəə yɨsə nə ghɔ vəŋ nə me, kɨ bɨbəŋsə vəzwitə vəbwəvə nə vənwi vədayday faŋ vəŋ nə fìa fɨ maa goolə, tɨꞌnə me fɨ maa tiəŋ, tɨꞌnə me fɨ maa bwey bay, nə mbɨə faŋ vɨ nə shwə̀ fɨ maa ŋoꞌsə, nə mbɨə faŋ vɨ nə shwə̀ fɨ maa fəŋkɔꞌ. Vəŋ bəŋsə vətɔ vɔ́ faŋ mbə kɔlə kee yɨyenə me, kee zɨzɔ me, kee tɨtoꞌ me.

²¹ Vəŋ kee bee kìasə fɨ maa nu bwə vəŋ me, tɨꞌnə me fɨ maa nu ŋay me, kɨ zɨzwilə vɨɨ, tii vəki, shaw vətɔ.