Reveleyshən 6 - Vengo (Babungo)

Faŋ Yeso Kristo nə shòꞌ vəlay ntɔfə

¹ Mə baa kɨ nii yè faŋ bi-njɨɨ yɔ́ shoꞌ mfɔŋ lay fɨ maa vəlay vì kwatia nə, baa zɔ̀ faŋ wə muꞌ fɨ taa ŋwaa vətɔ vəbweyvə vɔ́ yishwe nə, tii laa, «Jwi!» Gɨ yi nə duŋ yaa yibay.

² Mə ndeynə, yè nyaa-yikoꞌ yimɔ́ꞌ yifusə fuu, wuu məkoꞌ wi jia yiŋwiŋ, bèe yisɔꞌ tɔ ŋwə yaa shwenə wuu məghɔꞌ yighaw, fùu nɨniŋ yaa wuu məghɔꞌ yighaw, gə kɨ ghɔꞌ yighaw.

³ Yiŋkii kɨ me, ŋwə baa kɨ shoꞌ lay mɔ́ꞌ, lwesə vəlay vəbɔɔ. Wuu mɔ́ꞌ fɨ taa ŋwaa vətɔ vəbweyvə vɔ́ gi laa, «Jwi!»

⁴ Nyaa-yikoꞌ yimɔ́ꞌ kɨ nii fùu, faŋ nyə bày laa bəə, fùu, tɨ́ vɨ nùŋ wuu koꞌ wi laa ŋwə kɨ ndisə məduꞌ-nyɔŋ fɨ shɨ nsi. Vɨ nə kɔ̀ baꞌ yighaw kwalə tɨ́ ŋwə. Ŋwə fuu yɨsə vɨɨ nə zwilə yiŋwaa yivəŋ, vəŋ vəŋ.

⁵ Bi-njɨɨ yɔ́ kɨ shoꞌ vəlay lwesə vətia, mə zɔ wuu mɔ́ꞌ fɨ taa ŋwaa vətɔ vəbweyvə vɔ́, ŋgwə lwesə vətia, gi ŋkii laa, «Jwi!» Mə ndeynə, ye nyaa-yikoꞌ yifəŋ, wuu məkoꞌ wi jia kilo ghɔ ŋwə.

⁶ Mə kɨ nii zɔ̀ gɨ wə fuu fɨ taa ŋwaa vətɔ vəbweyvə vɔ́ yishwe nə. Ŋwə gì laa, «Vɨ fiŋ kay bee maa ŋkaŋ, nə say tia maa ŋkaŋ. Gə fɨ maa məluꞌ nə məŋgwə, kɨ kɔŋ mbə me.»

⁷ Ŋwə shoꞌ vəlay lwesə yishwe, mə zɔ gɨ wuu mɔ́ꞌ fɨ taa ŋwaa vətɔ vəbweyvə vɔ́, ŋgwə lwesə yishwe. Nyə gi ŋkii laa, «Jwi!»

⁸ Mə ndeynə, yè nyaa yikoꞌ yimɔ́ꞌ faŋ nyə nɨndɔɔlə. Wuu məkoꞌ wi lùu yiku, shɨ yiku beꞌsə ŋwə. Vɨ gaasə vɨɨ fɨ taa mbi vəshəŋ yishwe, kɔ̀ shəŋ kəmuꞌ tɨ́ ŋwə, kɔ̀ wutə tɨ́ ŋwə maa məndisə vəŋ nə baꞌ yighaw, baa nə jɨŋ, nə vəza, nə nyaasə bwəsə fɨ shɨ nsi.

⁹ Ŋwə shoꞌ vəlay lwesə tee, mə ye vəzwitə və vɨɨ mbɨə faŋ vɨ nə zwilə vəŋ buꞌ nu Nwi, nə buꞌ məbiŋ vəŋ faŋ vəŋ nə bìŋ yizii Kristo ntee nə. Vəŋ duꞌ ŋiꞌ shəŋ məkɔ Nwi,

¹⁰ yùmə nəŋay laa, «Tɨɨ mbi faŋ a bàw shɨlə, baa lùu wuu yinsəŋ, a ndɔ baa tay kɨkə, buu sɔꞌ vɨɨ fɨ shɨ nsi, yuu kwaŋ vəŋ taa nsɔꞌ buꞌ laa vəŋ nə zwìlə yia nə?»

¹¹ Vɨ kɨ nii kɔ̀ njwi yimɔ́ꞌ yifusə tɨ́ wə tɨ̀ me wə fɨ taa ŋwaa vəŋ, nàysə tɨ́ vəŋ laa vəŋ shəŋ ŋwaa tɨtiꞌ, gə̀ kɔ̀ tɨ́ yighee njyə faŋ nwaa vəŋ taa lwaŋ, faŋ vɨ ndɔ baa zwilə vaŋ-nshwi vəŋ, vɨɨ faꞌ Nwi, mbɨə faŋ vɨ ndɔ baa zwilə vəŋ yuu vɨ nə zwìlə viŋ nə.

¹² Mə kɨ ye, yè faŋ ŋwə shoꞌ vəlay lwesə ntɔfə, nsi kɨ nii nə̀ꞌnə ŋkee nəŋay, shɨshwi fəŋ yaa njwi faŋ vɨ bà nə nyuŋsə fəŋsə, ŋuu kiasə kɨ bɨbay yaa mənshi.

¹³ Məjwiŋ fɨ taa yizɔ fiŋkə nsi, yaa vətaŋ və tɨ faŋ mbə kee ta yibay me, yaa kɨ fiŋkə fɨ fuu tɨ faŋ fɨɨ shɔɔ nəŋay, nəꞌsə tɨ kɔ́.

¹⁴ Yizɔ shɨshɔɔ yaa vɨ yaa kɨ kelə yighaŋ nə, baŋsə sənshə nə vəshəŋ və nsi ndɔ fɨ maa vəshəŋ vəvəŋ, shə̀ŋtə gə̀.

¹⁵ Nɨniŋ, vəfwàŋ fɨ shɨ nsi, nə vɨɨ məsɔꞌ shɨ nsi, nə vətɨɨ və vəsogeꞌ, nə mfuꞌsə nə vəshɨꞌ, nə vɨɨ vənshə, vəbuꞌ nə vɨɨ faŋ vəŋ dùꞌ tɔ vəŋ, gə ndènə taa təŋɔŋ nə taa ŋoꞌsə fuu baŋsə,

¹⁶ gisə tɨ́ baŋsə nə yighɔsə laa, «Viŋ gukə maa yia, ndɨə yia fɨ ghɔ wə ntɨə faŋ ŋwə duꞌ fuu ŋkaw yizɔ nə, nə fɨ ghɔ bi-njɨɨ yɔ́, faŋ fwi yi shəsə nə,

¹⁷ buꞌ laa shi məshəsə kwalə vəŋ kùꞌnə maa məsɔꞌ mbi yinshə. Sii kaꞌ tɨŋ ndə yizɔ?»