Reveleyshən 5 - Vengo (Babungo)

Nu ŋwaꞌlə faŋ kəŋ vəlay vəmɔ́ꞌ lùu fuu yi kwatia

¹ Mə kɨ ye, yè ŋwaꞌlə mɔ́ꞌ ghɔ wə ntɨə faŋ ŋwə nə dùꞌ fuu ŋkaw kɔ́ nə, ŋwə jia maa kwiŋ maꞌnə wi, tɨ́ vɨ nyɔꞌ tey wi nə yiba yi, tə̀ kəŋ vəlay vəmɔ́ꞌ fuu yi kwatia.

² Mə ye nɨniŋ, kɨ nii yè nshiiŋii Nwi weꞌ mɔ́ꞌ. Ŋwə gi ŋkee nə gɨ yishaꞌsə laa, «Kuꞌnə ndə maa məŋaꞌsə ŋwaꞌlə ghɔ́, shoꞌ vəlay vi?»

³ Ŋwə gi nɨniŋ, tuu wə nə kee lùu shɔ faŋ ŋwə kùꞌnə maa məŋaꞌsə ŋwaꞌlə ghɔ́ ndeynə me. Wə nə kee lùu shɔ yizɔ me, kee lùu shɔ shɨ nsi me, kee lùu shɔ ŋiꞌ nsi me, faŋ kaꞌ ŋwə ŋaꞌsə ŋwaꞌlə ghɔ́ ndeynə me.

⁴ Mə gwia dɨdɨꞌ faŋ vɨ kee yè tuu wə muꞌ faŋ kaꞌ ŋwə ŋaꞌsə ŋwaꞌlə ghɔ́ ndeynə me.

⁵ Wə muꞌ fɨ taa ŋwaa vɨɨ taa vɔ́ faŋ vəŋ nə dùꞌ yifi nə, gi tɨ́ mə laa, kɨ mə baa gwia me. «Ye mɔɔ, bikəə wì faŋ ŋwə fùu fɨ ŋiꞌ ŋii Juda, wee wee fwàŋ Deyvid, ghɔꞌ vənu vənshə. Kaꞌ ŋwə ŋaꞌsə ŋwaꞌlə ghɔ́, shòꞌ vəlay vi kwatia nə.»

⁶ Mə kɨ nii yè wə faŋ ŋwə lùu yaa wee-bi-njɨɨ faŋ ŋwə tɨ̀ŋ nɨntəŋ ŋwaa vəŋkaw vɔ́, tɨ́ vətɔ vəbweyvə vɔ́ yishwe nə vɨɨ taa vɔ́ kia ŋwə, bi yɔ́ kəꞌ yaa vɨ nii zɨzwi, ndaw si nə luu shɔ kwatia, nə sɨ ghi kwatia. Luu ŋkee vəzwitə və Nwi kwatia faŋ ŋwə tɔ̀ŋ, mbə gə maa vəshəŋ vənshə fɨ taa mbi.

⁷ Bi yɔ́ jwi, fì ŋwaꞌlə ghɔ́ fɨ ghɔ wə ntɨə faŋ ŋwə dùꞌ fuu ŋkaw kɔ́ nə, fɨ maa kwiŋ maꞌnə wi.

⁸ Ŋwə jwi fi nɨniŋ, vətɔ vəbweyvə vɔ́ yishwe nə vɨɨ taa vì njɔsə-yishwe muu-mbɔɔ gu nsi vɨsɨ ŋwə, tɨ́ wə kɨ kii ndəə-ntɨ, wə kɨ kii ndəə-ntɨ, baa nə vəkay faŋ vɨ naysə nə goolə, nə vətɔ lwàŋ taa tey yi, luŋsə baw baw. Vətɔ və luŋsə vɔ́ lùu məshɔꞌtə Nwi, faŋ vɨɨ ley Nwi nə shɔ̀ꞌtə Nwi shɔ nə.

⁹ Vəŋ nə zwà nyay yifi laa, «A kùꞌnə maa məfi ŋwaꞌlə ghɔ́, shoꞌ vəlay vi, buꞌ laa a nə bìŋ vɨ zwi ghɔ, a ku, ywàŋ vɨɨ nə mənshi mə, yɨsə vɨɨ fɨ maa təkuu tə vɨɨ tənshə, nə təghaŋ tənshə, nə fɨ maa ŋgwisə vɨɨ vənshə, nə fɨ maa məshɨ mənshə, lùu vɨɨ Nwi.

¹⁰ A baytə vəŋ maa yifwàŋ Nwi, vəŋ gu vɨɨ məfeꞌ Nwi nɨzi, ndɔ kɨ sɔꞌ shɨ nsi.»

¹¹ Mə baa kɨ ye, yè nshiisə-ŋiisə Nwi səyaŋ, faŋ nsə kia ŋkaw kɔ́, nə vətɔ vəbweyvə vɔ́ nə vɨɨ taa vɔ́, nwaa vəŋ nə luu ŋkaŋsə ŋkaŋsə, nə vəmalia vəmalia. Mə kɨ nii zɔ̀ gɨ vəŋ.

¹² Vəŋ gi ŋkee nə gɨ yishaꞌsə laa, «Bi njyə faŋ vɨ nə zwì tɔ vɨɨ nə, kùꞌnə maa məzɨ yifwàŋ yi, nə yikwalə Nwi, baa nə yitɔfə, nə wutə. Bàw vɨ kɨ kɔ feenə tɨ́ ŋwə, bəŋsə ŋwə, shɔꞌtə ŋwə!»

¹³ Mə baa kɨ nii zɔ̀ vətɔ vənshə faŋ Nwi nə bɔ̀ŋ, mbɨə faŋ mbə lùu yizɔ, nə mbɨə faŋ mbə lùu shɨ nsi, nə mbɨə faŋ mbə lùu taa mamuu, ŋkee vətɔ vənshə faŋ mbə lùu shɔ nə, mbə gi laa, «Nsiŋ kɨ shɔꞌtə Nwi faŋ ŋwə dùꞌ fuu ŋkaw, nə bi-njɨɨ yɔ́, kɔ feenə tɨ́ vəŋ, bəŋsə vəŋ. Vəŋ kɨ sɔꞌ nsiŋ maa vəshi və mbi vənshə, kee kìi ki me.»

¹⁴ Vətɔ vəbweyvə vɔ́ yishwe nə, gi laa, «Ŋkə lùu nɨniŋ.» Vɨɨ taa vɔ́ nɔŋ nsi, kɨ bəŋsə Nwi.