Reveleyshən 4 - Vengo (Babungo)

Faŋ Jɔn nə yè Nwi fuu ŋkaw Nwi yizɔ

¹ Yiŋkii kɨ shɔɔ, mə ye shuufɔ mɔ́ꞌ ŋaꞌnə maa məŋii taa yizɔ, baa zɔ̀ gɨ wə ghɔ́ faŋ mə nə fɔŋ zɔ̀ yighee vɨsɨ nə, nyə baa gi shee ŋkee yaa yisaw, laa lee, «Koꞌ jwì feenə, mə də nu ŋkɨə faŋ ŋkə taa gay maa yighee yiba tɨ́ ghɔ.»

² Zwitə Nwi gwəkə gù maa mə, mə ye ŋkaw yizɔ faŋ nə luu ŋkaw məsɔꞌ mbi. Wə duꞌ fuu ŋkaw kɔ́.

³ Gə fɨ maa wə ntɨə faŋ ŋwə nə duꞌ fuu ŋkaw kɔ nə, a ndeynə ŋwə, ŋwə fɨnə yiwey yifəŋnə nə yifusə nə yibaynə, tɨ́ kuluŋ kia ŋkaw kɔ́, a yɨye ŋkə fɨnə ŋoꞌ yindwaꞌlə.

⁴ Vəŋkaw və wutə vəmɔ́ꞌ njɔsə-yishwe muu-mbɔɔ kia ŋkaw kɔ́, vɨɨ taa njɔsə-yishwe muu-mbɔɔ duꞌ fuu vəŋkaw vɔ́, mɔ̀ꞌ njwisə fusə maa vəŋ, bèe təsɔꞌ tə goolə tɔ vəŋ.

⁵ Yibay bwələ fɨ maa ŋkaw kɔ́, gɨsə baa luu fùu fɨ fuŋ nɨzi, nə gɨ yimɔ́ꞌ faŋ nyə duŋ yaa yibay. Təkiꞌ təmɔ́ꞌ kwatia nə luu vɨsɨ ŋkaw kɔ́, bee fɨ fuŋ. Lùu vəzwitə və Nwi kwatia.

⁶ Vɨsɨ ŋkaw kɔ́, fa mɔ́ꞌ nə luu shɔ yaa mamuu, bee yaa ŋwaꞌlə məye sɨ. Vətɔ vəbweyvə vəmɔ́ꞌ yishwe nə dùꞌ mbɨɨ ŋkaw kɔ́, kìa ŋkaw kɔ́, nə sɨ yaŋ maa vətɔ vəbweyvə vɔ́ fɨ vɨsɨ nə fɨ yiba.

⁷ Vətɔ vəbweyvə vɔ́ nə fɨnə nyaasə səmɔ́ꞌ. Njyə vɨsɨ nə fɨnə bikəə. Njyə faŋ nyə beꞌsə fɨnə mbaw. Njyə faŋ nyə baa beꞌsə lwesə sətia, yikəꞌ yi fɨnə yikəꞌ wə. Njyə faŋ nyə beꞌsə lwesə yishwe kəꞌ yaa mbuꞌ.

⁸ Nyaa tɨ̀ me nyaa fɨ taa nyaasə sɔ́ yishwe nə, nə kìi ghalə ntɔfə, nə sɨ vəŋ lwaŋ fɨ fu nə fɨ taa tey yi. Nsə gisə vətuꞌ nə shɨshwi, kee shɨshia me, gisə laa, «Məley, məley, məley lùu tɨta Nwi Nshɔɔ-mbi. Ŋwə nə luu shɔ yighee vɨsɨ, baa lùu shɔ ndee, ndɔ jwi maa yighee yiba nɨzi.»

⁹ Vətɔ vəbweyvə vɔ́ nə bə̀ŋsə Nwi nɨniŋ, kɔ̀ feenə nə məbwaŋ tɨ́ Nwi faŋ ŋwə nə dùꞌ fuu ŋkaw kɔ́ nə, faŋ ŋwə lùu wuu bwey, gòꞌsə yighee muꞌ. Yighee tɨ̀ me yighee faŋ vətɔ vəbweyvə vɔ́ nəə bəŋsə Nwi nɨniŋ nə,

¹⁰ vɨɨ taa vɔ́ njɔsə-yishwe muu-mbɔɔ nə, nɔŋ nsi vɨsɨ wə ntɨə faŋ ŋwə nə dùꞌ fuu ŋkaw kɔ́ nə, bəŋsə ŋwə faŋ ŋwə lùu bwey maa vəshi və mbi və̀ vənshə, ndɔ goꞌsə yighee muꞌ nə. Vəŋ shoꞌtə təsɔꞌ fɨ tɔ vəŋ, mɔ̀ꞌ vɨsɨ ŋkaw kɔ́, gì laa,

¹¹ «Tɨta, Nwi wia, a kùꞌnə tɨ́ kaꞌ vətɔ vənshə kɨ bəŋsə ghɔ, kɔ̀ feenə tɨ́ ghɔ. A kìi wutə kənshə, fɔnə nə bɔ̀ŋ ghɔ bɔ̀ŋ vətɔ vənshə. Mbə nə fùu taa mbi, kɨ nii lùu shɔ, buꞌ faŋ nə gì ghɔ nɨniŋ.»