Reveleyshən 3 - Vengo (Babungo)

Ŋwaꞌlə tɨ́ nshəŋtə vɨɨ Kristo fɨ shɨ Sardis

¹ Nyɔꞌ ŋwaꞌlə, tɔ̀ŋ tɨ́ nshiiŋii Nwi faŋ ŋwə lùu shɨ Sardis, nyɔꞌ laa lee, «Wə ntɨə faŋ vəzwitə və Nwi kwatia nə məjwiŋ kwatia lùu ghɔ ŋwə nə, gì laa lee, «Mə kɨɨ nə vənu və. Vɨɨ gisə laa a bwey, tɨ́ ghɔ lùu ŋku fa.

² Yenə fɨ mbweysə, kwàŋ wutə maa vɨɨ mbɨə faŋ vəŋ kəə kɨ kukə nə. Mə kee ta ye nu faŋ a yɨsə ŋkə baw yikəꞌ Nwi kùꞌnə me.

³ Lumə faŋ nu Kristo nə jwì zìꞌ ghɔ ghɔ, faŋ a nə zɔ̀ nu kɔ́ nə. Nɨniŋ, kwiinə fwi yə, baa jia nu kɔ́. A kee kaw kɨ shi nə yikɨꞌ me, buu mə taa nyɔꞌtə jwi yaa ndɔꞌ maa yighee faŋ a kee yikɨɨ laa mə taa jwi yɨ ghɔ me.

⁴ Luu nə, mə kɨɨ nə vaŋ-mbusə vɨɨ fɨ taa ŋwaa viŋ, shɨ Sardis, faŋ vəŋ kee bɨsə fwisə vəŋ nə nu bwə me. Yia vɨ vɨɨ vɔ́ ndɔ kɨ toꞌ mɔ́ꞌ, mɔꞌ njwisə fusə, buꞌ laa vəŋ kùꞌnə tɨ́ Nwi.

⁵ Wə ntɨə faŋ ŋwə tɨ̀ŋnə, wèꞌ maa nu kaŋ, kɨ ghɔꞌ nu bwə, buu vɨ ndɔ mɔꞌ njwisə fusə maa ŋwə. Mə nyɔꞌ yizii yi taa ŋwaꞌlə məbwey vəlwaŋ, kee ndɔ baa ndɨɨsə me. Mə biŋ yizii yi vɨsɨ Tii ŋwaa, baa nə vɨsɨ nshiisə-ŋiisə Nwi.»

⁶ Wə ntɨə faŋ tuulə ghi lùu shɔ, zɔ nu ŋkɨə faŋ Zwitə Ley Nwi gisə tɨ́ vəməshəŋtə və vɨɨ Nwi!»

Ŋwaꞌlə tɨ́ nshəŋtə vɨɨ Kristo fɨ shɨ Filadelfia

⁷ Nyɔꞌ ŋwaꞌlə, tɔ̀ŋ tɨ́ nshiiŋii Nwi faŋ ŋwə lùu shɨ Filadelfia laa, «Wə ntɨə faŋ ŋwə bàw shɨlə, baa luu ŋkee wuu yinsəŋ, faŋ ŋkwa fwàŋ Deyvid lùu ghɔ ŋwə nə, faŋ ŋwə ŋaꞌsə, kaꞌ wə kee fəŋ me; ŋwə fəŋ, kaꞌ wə kee ŋaꞌsə me. Ŋwə gi laa lee,

⁸ «Mə kɨɨ nə vənu və. Ye mɔɔ, mə ŋaꞌsə shuufwə, meꞌtə zizi tɨ́ ghɔ, kaꞌ wə kee baa fəŋ me. Mə ŋaꞌsə tɨ́ ghɔ nɨniŋ nə, buꞌ laa wutə kə lùu kətɨtiꞌ. Luu nə, a jìa yigisə nyaa, kee twèy mə me.

⁹ Zɔ nu ŋkɨə faŋ mə taa kɨ yɨsə maa vɨɨ vì fɨ taa ŋii nshəŋtə Satan, faŋ vəŋ gisə laa vəŋ lùu vɨɨ Jus nə, kee bee lùu me, sɨɨ luu ba. Mə taa yɨsə vəŋ jwi ye ghɔ, tùŋ vətɔ vəyəə vəŋ nsi vɨsɨ ghɔ, taa kɨ kɨɨ laa mə kaw ghɔ.

¹⁰ Mə yɨsə nɨniŋ buꞌ laa a jìa nu kaŋ faŋ ŋkə kɔ wutə tɨ́ ghɔ maa məjia fwi yə taa ŋɨꞌ. Nɨniŋ, mə ndɔ gaŋtə ghɔ nɨzi maa yighee njyə faŋ nu məbweꞌsə vɨɨ ndɔ fuu taa mbi yinshə maa məmɔŋ vɨɨ vənshə.

¹¹ Mə taa yasə jwi. Jia nu ŋkɨə faŋ ŋkə lùu ghɔ ghɔ, laa kɨ wə fi vəkeynə və me.

¹² Wə ntɨə faŋ ŋwə jia fwi yi, kee mèꞌtə nu Nwi me, buu mə ndɔ tə ŋwə maa ntɔŋ ŋii Nwi, ŋwə kee baa fùu fɨ maa shəŋ kɔ́ taa ŋii Nwi me. Mə ndɔ nyɔꞌ yizii Nwi ŋwaa maa ŋwə, baa nə yizii shɨ Nwi ŋwaa, faŋ lùu shɨ Jerusalem kəfikə, faŋ ŋkə ndɔ siꞌ fɨ taa yizɔ, fɨ ghɔ Nwi ŋwaa, siꞌ jwi nsi, baa nyɔ̀ꞌ yizii yifinə nyaa maa ŋwə nɨzi.»

¹³ Wə ntɨə faŋ tuulə ghi lùu shɔ, ŋwə zɔ nu ŋkɨə faŋ Zwitə Ley Nwi gisə tɨ́ vəməshəŋtə və vɨɨ Nwi!»

Ŋwaꞌlə tɨ́ nshəŋtə vɨɨ Kristo fɨ shɨ Laodosia

¹⁴ Nyɔꞌ ŋwaꞌlə, tɔ̀ŋ tɨ́ nshiiŋii Nwi faŋ ŋwə lùu shɨ Laodosia, nyɔꞌ laa lee, «Wə ntɨə faŋ ŋwə goꞌsə yighee muꞌ nə, ŋgwə faŋ ŋwə nə ku buꞌ nu yinsəŋ ki, nə ŋwə faŋ ŋwə nə shɔɔ vɨsɨ, buu Nwi taa bɔŋ mbi, gì laa lee,

¹⁵ «Mə kɨɨ nə njɨɨnə yə; a kee yɨyoonə me, kee nɨndɔŋ me. Ŋkə nə bàw laa a yoonə, tɨꞌnə me ndɔŋ.

¹⁶ Nɨniŋ, faŋ a luu nɨntəŋ nə, kee nɨndɔŋ me, kee yɨyoonə me, mə taa tu ghɔ fɨ shuu mə.

¹⁷ A gisə laa a lùu tɨɨ ka, baa gù mfuꞌ, kee bəə fa me. A kee bee kɨɨ laa a lùu mbəə faŋ ŋwə bə̀ə gəŋsə nə mənɔŋ-bwaŋnə Nwi me. A luu wuu sɨ fɨsə, baa lùu nə ntɨŋ.

¹⁸ Mə tɨsə ghɔ laa a ywaŋ goolə fɨ ghɔ mə, faŋ vɨ twàŋ taa wi, ŋwə ley. Nɨniŋ laa a gu mfuꞌ. Bàw a ywaŋ njwisə fusə fɨ ghɔ mə, kɨ mɔꞌ laa a kee kɨ duꞌ nə ntɨŋ sɨ vɨɨ, tɔ kə dɨɨ me. Ywaŋ fɔ sɨ fɨsə fɨ ghɔ mə, wìŋsə sɨ ghə shɔ, yuu kɨ yenə vədɨꞌ.

¹⁹ Mə sɔꞌ vɨɨ mbɨə faŋ mə kaw vəŋ, saŋ vəŋ, laa vəŋ kwiinə fwisə vəŋ. Nɨniŋ, yasə kɔꞌlə kwiinə fwi yə!

²⁰ Viŋ zɔ! Mə luu shuufɔ viŋ, buꞌtə. Wə faŋ ŋwə zɔ gɨ nyaa, ŋàꞌsə shuufɔ wi shee, buu mə taa ŋii shɔ, yè ŋwə, yia ŋwə zɨ, mə zɨ yia ŋwə.

²¹ Wə ntɨə faŋ ŋwə jia fwi yi, kee mèꞌtə nu Nwi me, sheꞌ faŋ mə nə jìa fwi nyaa nɨzi, ziꞌ tɨ́ shi yiku nə, buu mə ndɔ biŋ laa yia ŋwə duꞌ fuu ŋkaw mə, kɨ sɔꞌ mbi mɔ́ꞌ, sheꞌ faŋ yia Tii ŋwaa duꞌ fuu ŋkaw ŋwə, kɨ sɔꞌ nə.»

²² Wə ntɨə faŋ ŋwə kìi tuulə ghi zɔ, ŋwə zɔ nu ŋkɨə faŋ Zwitə Nwi gi tɨ́ vəməshəŋtə və vɨɨ Nwi!»