Reveleyshən 22 - Vengo (Babungo)

Muu mə məbwey vəlwaŋ faŋ mbə ndɔ fɨ ghɔ Nwi

¹ Nshiiŋii Nwi yɔ́ baa də̀ muu mə məbwey shee, mbə nə fùu fɨ maa kenə Nwi ghɔ bi-njɨɨ yɔ́, ndwaꞌlə yaa ŋwaꞌlə məye sɨ,

² siꞌ shɔɔ fɨ nɨntəŋ jɨɨ yikwalə shɨ yɔ́. Maa kwiŋ tɨ̀ me kwiŋ fɨ mbɨɨ muu yɔ́, vətɨ və məbwey luu shɔ, faŋ vətaŋ koonə fuu yi ghee njɔsə-bɔɔ taa ŋuꞌ, yighee muꞌ taa ŋuu, vəvi və tɨ vɔ́ luu maa məshuꞌ vəza fɨ maa vɨɨ tətɔŋ fu.

³ Kaꞌ a kee yè tuu ŋkee fa faŋ Nwi kee yikaw me taa shɨ yɔ́ me. Kenə Nwi ghɔ bi-njɨɨ yɔ́ lùu taa shɨ yɔ́, vɨɨ faꞌ vi bəŋsə ŋwə.

⁴ Vəŋ ye yikəꞌ yi. Vɨ nyɔ̀ꞌ yizii yi mbootɔ vəŋ.

⁵ Fu vətuꞌ kee lùu shɔ me. Vɨ kee kəə təkiꞌ me, tɨꞌnə me shɨshwi, buꞌ laa tɨta Nwi bee yaa kiꞌ tɨ́ vəŋ. Vəŋ sɔꞌ mbi yaa vəfwàŋ ghee nshə, kee kìi ki me.

Faŋ nə tɔ̀ŋ nshɨ-tɔ Yeso tɔ̀ŋ nshiiŋii Nwi maa Jɔn maa mənaysə vənu vɔ́ tɨ́ ŋwə

⁶ Nshiiŋii Nwi yɔ́ baa kɨ gi shee laa, «Yigi nyə̀ luu ŋkee yinsəŋ. Tɨta Nwi faŋ ŋwə kɔ̀ Zwitə ki tɨ́ nshiisə-ŋii sɔghɔ, tɔ̀ŋ nshiisə-ŋiisə si maa mədə nu ŋkɨə faŋ ŋkə ndɔ yasə gay.

⁷ Viŋ zɔ! Yeso gì laa yi taa yasə jwi. Mənɔŋ-bwaŋnə lùu tɨ́ vɨɨ mbɨə faŋ vəŋ nùŋsə yigisə shuu Nwi yɔ́ fɨ taa ŋwaꞌlə ŋwə̀.»

⁸ Luu mə, Jɔn, faŋ mə yè, baa zɔ̀ vənu və̀ vənshə. Yighee njyə faŋ mə nə zɔ̀ vənu vɔ́, baa yè mètə, mə kɨ nii gù ghuu nshiiŋii Nwi yɔ́ faŋ ŋwə nə də̀ vənu vɔ́ shee nə, bə̀ŋsə ŋwə.

⁹ Luu nə, ŋwə gi shee laa, kɨ mə yɨ me, baa nə laa yi lùu wuu faꞌ Nwi yaa mə, nə yaa vaŋ-nshwi vaŋ, faŋ vəŋ luu nshiisə-ŋii sɔghɔ, nə vɨɨ vənshə faŋ vəŋ nùŋsə yigi nyə̀ fɨ taa ŋwaꞌlə ŋwə̀, baa nə laa, bàw mə kɨ bəŋsə luu Nwi.

¹⁰ Ŋwə nə baa gì laa, kɨ mə ndɨə yigi yɔ́ fɨ taa ŋwaꞌlə ŋwə̀ me, buꞌ laa yighee lùu nshənə faŋ vənu vɔ́ taa gay.

¹¹ Kaꞌ wə faŋ ŋwə yɨsə vənu vəbwəvə, kɔꞌ kɨ yɨyɨsə vənu vəbwəvə. Wə ntɨə faŋ ŋwə bɨ̀ dɨdɨꞌ, toꞌ sheꞌ maa jɨɨ yi. Luu nə, wə faŋ ŋwə yɨsə vənu vəjəəvə, kɔꞌ kɨ yɨyɨsə sheꞌ vənu vəjəəvə. Wə ntɨə faŋ ŋwə lùu wuu loomə, taa goꞌ loomə. Wə ntɨə faŋ ŋwə lùu wuu jəə tɨ́ Nwi, bàw mètə.

¹² Yeso gì laa, «Viŋ zɔ! Mə taa yasə jwi, kɨ jwi, jwì nə vəkeynə ghɔ mə, maa məkɔ tɨ́ vɨɨ vənshə maa vəfaꞌ vəvəŋ.

¹³ Mə lùu vənzi baa lùu vəndwə, lùu wuu vɨsɨ nə wuu yiba, baa lùu mətey nə məmetə.

¹⁴ Mənɔŋ-bwaŋnə tɨ́ vɨɨ mbɨə faŋ vəŋ sɔ̀ njwisə vəŋ, nsə ley, tɨ́ kaꞌ vəŋ kìi wutə maa məkwə fɨ maa vətaŋ tɨ və məbwey, baa nə maa məshɔɔ fɨ shuu ŋkɔꞌ, ŋìi taa shɨ yɔ́.

¹⁵ Vɨɨ mbɨə faŋ vəŋ lùu fu fɨ taa ŋkɔꞌ, lùu vɨɨ bwənə, nə vɨɨ ŋay, nə vɨɨ mətii vəki, nə vɨɨ məzwilə vɨɨ, nə vɨɨ faŋ vəŋ bəŋsə vənwi vədayday, nə vɨɨ təba, faŋ vəŋ kàw təba, baa yɨsə nu təba.»

¹⁶ «Lùu mə, Yeso, faŋ mə tɔ̀ŋ wuu ntɔŋ ŋwaa maa mənaysə vənu vɔ́ tɨ́ vɨɨ fɨ taa vəməshəŋtə və vɨɨ Nwi. Mə lùu wuu ŋiꞌ ŋiinə fwàŋ Deyvid, baa lùu fəjwiŋ fɨ taa nshia-ndoo-mbisɨ.»

¹⁷ Zwitə Ley Nwi nə wəzwi məndaa (faŋ ŋwə kɨꞌ Kristo nə), gì laa, «Jwi!» Wə ntɨə faŋ ŋwə zɔ, taa baa luu gì laa, «Jwi!» Wə ntɨə faŋ too muu ywèy ŋwə, ŋwə jwi. Wə ntɨə faŋ ŋwə kəə muu mə məbwey, jwi fi, vɨ kɔ tɨ́ ŋwə dayday.

¹⁸ Mə Jɔn, faŋ mə nyɔ̀ꞌ ŋwaꞌlə ŋwə̀, tɨsə vɨɨ vənshə faŋ vəŋ zɔ yigisə shuu Nwi nyə̀ fɨ taa ŋwaꞌlə ŋwə̀, laa wə kɨ luu kùꞌsə nu shɔ, buu Nwi ndɔ kuꞌsə ŋɨꞌ tɨ́ wə ghɔ́, sheꞌ yuu njyə faŋ vɨ nyɔ̀ꞌ nàysə taa ŋwaꞌlə ŋwə̀ nə.

¹⁹ Kɨ luu wə fuusə nu fɨ taa yigisə Nwi faŋ vɨ nyɔ̀ꞌ nə, buu Nwi ndɔ fuusə ŋwə fɨ maa vətaŋ vi fɨ fuu tɨ məbwey, fùusə ŋwə fɨ taa shɨ yɔ́, faŋ lùu shɨ ley tɨ́ Nwi nə, shìa ŋwə nɨniŋ fɨ maa nu jəə ŋkɨə faŋ vɨ nyɔ̀ꞌ taa ŋwaꞌlə ŋwə̀ nə.

²⁰ Wə ntɨə faŋ ŋwə fɨꞌtə nu kɔ́ ntee, gì laa, «Yinsəŋ, mə taa yasə jwi.» Luu sheꞌ nɨniŋ. «Tɨta Yeso, jwi!»

²¹ Tɨta Yeso tu mənɔŋ-bwaŋnə tɔ viŋ vənshə!