Reveleyshən 21 - Vengo (Babungo)

Nu yizɔ yifinə ghɔ nsi yifi

¹ Mə kɨ nii yè yizɔ yifinə nə nsi yifi fuu, tɨ́ yizɔ njyə vɨsɨ nə nsi njyə vɨsɨ yaa shɔ̀ɔ nə, mamuu nɨzi kee baa lùu shɔ me.

² Mə baa yè shɨ ley Nwi, faŋ lùu shɨ Jerusalem kəfikə. Ŋkə siꞌ jwi fɨ yizɔ fɨ ghɔ Nwi, tɨ́ vɨ la ŋkə yaa vɨ yaa kɨ la wəzwi məndaa, buu kɔ̀ tɨ́ ndəə wi.

³ Mə zɔ gɨ wə gi fɨ fuu kenə kɔ́ nəŋay laa, «Viŋ ye vəbee və Nwi taa ŋwaa vɨɨ. Nwi ndɔ kɨ shi taa ŋwaa vəŋ, vəŋ luu ŋgwisə vɨɨ vi. Ŋkee nshɨ-tɔ Nwi lùu ghɔ vɨ vəŋ,

⁴ tɔ̀ŋsə mənsɨ fɨ sɨ vəŋ. Yiku kee baa lùu shɔ me. Məluŋ nə yigwia nə ŋɨꞌ kee baa lùu shɔ me, buꞌ laa mbi yimwa shɔ̀ɔ.»

⁵ Wə ntɨə faŋ ŋwə nə dùꞌ fuu kenə məsɔꞌ mbi nə, gì laa, «Mə yɨ̀sə vənu vənshə gu vəfi,» baa gì shee laa mə nyɔꞌ vənu vɔ́ taa ŋwaꞌlə buꞌ laa mbə lùu vəbi, baa luu ŋkee nu yinsəŋ.

⁶ Ŋwə nə baa gì shee laa, «Ŋkə gay nɨniŋ. Gì mə nɨniŋ, faŋ mə lùu vɨsɨ, nə yiba. Mə lùu vənzi, baa lùu vəndwə. Mə taa kɨ kɔ muu mə məbwey faŋ mbə fuu fɨ taa koꞌ-fɨ-nsi, tɨ́ wə faŋ fwi yi yɔ̀ŋ. Mə kɔ muu mbɔ́ sheꞌ dayday.

⁷ Wə ntɨə faŋ ŋwə jìa fwi yi, twèꞌ maa nu Kristo, buu ŋwə ndɔ ndi fɨ maa muu mbɔ́. Mə kɨ nii luu Nwi wi, ŋwə luu ŋwiŋ ŋwaa.

⁸ Gə̀ fɨ maa vɨɨ mbɨə faŋ vəŋ nyɨŋkə, baa twey nu Kristo, nə vɨɨ məyɨ vənu vəbwəvə, nə vɨɨ məzwilə vɨɨ, nə vɨɨ mətii vəki, nə vɨɨ vəfɔ vəbwəvə, nə vɨɨ məbiŋ vənwi vədayday, nə vɨɨ təba vənshə, shəŋ vəŋ luu shəŋ ŋkɨə faŋ wisə bii fɨ fuŋ, lumə ki zwilə vɨɨ, faŋ lùu shəŋ yiku lwesə ghee bɔɔ.»

Nu shɨ Jerusalem fi

⁹ Nshiiŋii Nwi yimuꞌ fɨ taa ŋwaa nshiisə-ŋiisə Nwi kwatia, faŋ nsə nə kìi vəkay və ŋɨꞌ kwatia nə, jwi yɨ mə, gì laa, «Jwi feenə, mə də wəzwi məndaa wee-bi-njɨɨ ghɔ́ tɨ́ ghɔ.»

¹⁰ Ŋwə ndi fwi nyaa, gə̀ nə nyə fuu baŋ yimɔ́ꞌ nee yidə, də̀ shɨ Jerusalem faŋ lùu shɨ Nwi kəkwalə nə shee. Ŋkə siꞌ jwì fɨ ghɔ Nwi yizɔ,

¹¹ nɨndwaꞌlə yaa Nwi ndwaꞌlə ŋkee yaa wey faŋ shwaŋ wi luu ŋkee ndɔŋ, bee ndɔ ley twenə.

¹² Ŋkee ŋkɔꞌ yikwalə faŋ vɨ nə bɔ̀ŋ nə təley tə ŋoꞌsə, kìa shɨ kɔ́. Yishuu təley tə ŋoꞌsə sɔ́ luu njɔsə-bɔɔ. Nshiisə-ŋiisə Nwi njɔsə-bɔɔ tɨŋ fuu yishuu yifwə yɔ́ njɔsə-bɔɔ nə. Vɨ nyɔ̀ꞌ təzii tə vɨɨ yikuu Isirayl njɔsə-bɔɔ maa təshuu təŋkɔꞌ tɔ́.

¹³ Maa lɨ kəmuꞌ təshuu luu shɔ tətia, tətia fɨ ntɔŋ-shɨshwi, tətia yikwii-təŋ, tətia yikwii-kwi, tətia mfiŋ-shɨshwi.

¹⁴ Vɨ bɔ̀ŋ mfaysə ŋkɔꞌ yɔ́ nə ŋoꞌsə njɔsə-bɔɔ, faŋ vɨ nyɔ̀ꞌ təzii tə vɨɨ ntɔŋ bi-njɨɨ yɔ́ mbɨɨ yi.

¹⁵ Nshiiŋii Nwi njyə faŋ nyə nə gì shee nə, kii fəntɨ fə mfɨꞌ fɨ goolə ghɔ ŋwə, maa məfɨꞌ shɨ kɔ́, nə yishuu yi nə mbɨɨ si.

¹⁶ Shɨ kɔ́ luu ŋgɔŋsə yishwe maa yibuŋ yi, kwiŋ muꞌ kee shɔ̀ɔ kwiŋ mɔ́ꞌ me. Nshiiŋii Nwi yɔ́ fɨꞌ shɨ kɔ́ nə fəntɨ fə mfɨꞌ fi fɔ́, shɨ kɔ́ də̀ vəkilomita ŋkaŋsə bɔɔ nə yiwa yishwe. Mədə wi nə məgha wi nə tɨ wi luu sheꞌ nɨndɨŋ.

¹⁷ Nshiiŋii Nwi yɔ́ baa fɨ̀ꞌ yiley ŋoꞌsə yɔ́ faŋ nyə nə kìa shɨ kɔ́ nə. Nyə luu kwiŋ njɔsə-yishwe muu-yinshwe maa mədə wi, faŋ vɨ fɨ̀ꞌ nə mfɨꞌ vɨɨ. Mfɨꞌ nshiisə-ŋiisə Nwi luu sheꞌ nɨndɨŋ.

¹⁸ Vɨ bɔŋ ŋkɔꞌ yi yɔ́ nə ŋoꞌsə jəəsə faŋ vɨ tii nə jasper, bɔ̀ŋ shɨ kɔ́ nə goolə, faŋ ŋwə lèy yaa ŋwaꞌlə məye sɨ.

¹⁹ Vɨ nə bɔ̀ŋ ŋkɔꞌ yɔ́ fuu ŋkee ŋoꞌsə faŋ nsə nɨndwaꞌlə, baa luu taŋ taŋ. Yizii mfɔŋ ŋoꞌ luu jasper, yimɔ́ꞌ faŋ nyə beꞌsə luu safia, lwesə vətia luu kalsedon, lwesə yishwe luu imeral,

²⁰ lwesə tee luu onis, lwesə ntɔfə luu kanelian, lwesə kwatia luu krisolit, lwesə yifɔŋ luu beril, lwesə buumuꞌ luu topas, lwesə yighuŋ luu krisopras, lwesə njɔ-yimuꞌ luu jasint, lwesə njɔsə-bɔɔ luu ametis.

²¹ Yishuu yɔ́ njɔsə-bɔɔ nə, luu wey njɔsə-bɔɔ. Shuu tɨ̀ me shuu vɨ taw fɨ maa yiwey yimuꞌ. Jɨɨ fɨ taa shɨ yɔ́ luu goolə, lèy yaa ŋwaꞌlə məye sɨ.

²² Mə kee yè ŋii Nwi taa shɨ yɔ́ me, buꞌ laa nshɨ-tɔ Nwi, tɨta Nshɔɔ-mbi lùu taa ŋwaa vəŋ, ghɔ bi-njɨɨ yɔ́.

²³ Shɨ kɔ́ kee baa kəə shɨshwi, tɨꞌnə me ŋuu, maa məbee me, buꞌ laa feenə Nwi bee shɔ. Bi-njɨɨ yɔ́ luu kiꞌ wi.

²⁴ Vɨɨ tətɔŋ fu toꞌ ye vədɨꞌ buꞌ məley wi. Vəfwàŋ fɨ shɨ nsi jwi nə yifwàŋ vəŋ sheꞌ tɨ́ shɨ kɔ́.

²⁵ Yishuu yiŋkɔꞌ fɨ shɨ yɔ́ tɨŋ zizi nə shɨshwi, vɨ kee fɨfay me, buꞌ laa fu vətuꞌ kee baa lùu shɔ me.

²⁶ Vɨɨ tətɔŋ fu jwi nə yikwalə vəŋ, baa nə feenə vəŋ tɨ́ shɨ kɔ́.

²⁷ Tuu fa faŋ ŋkə kee lùu kəley me, kee ŋìi taa shɨ yɔ́ me, tɨꞌnə me wə faŋ ŋwə yɨsə vənu vəbwəvə, tɨꞌnə me sɨɨ təba me. Ndɔ ŋii sheꞌ vɨɨ mbɨə faŋ təzii təvəŋ lùu taa ŋwaꞌlə məbwey vəlwaŋ faŋ ŋwə lùu ghɔ bi-njɨɨ yɔ́ nə, ŋii taa shɨ yɔ́.