Reveleyshən 20 - Vengo (Babungo)

Faŋ vɨ ka tɨɨ vəzwitə vəbwəvə taa wee-nsi-yibay, vɨɨ Kristo sɔꞌ mbi maa ŋuꞌ ŋkaŋ

¹ Mə kɨ nii yè nshiiŋii Nwi yimɔ́ꞌ siꞌ jwì fɨ yizɔ nə ŋkwa wee-nsi-yibay nə sumə dɨɨ ghɔ ŋwə.

² Ŋwə jwi jìa zɔ-ŋgu-yibay faŋ lùu zɔ yimwa yì, baa lùu Satan, tɨɨ vəzwitə vəbwəvə, ka ŋwə maa ŋuꞌ ŋkaŋ,

³ mɔ̀ꞌ ŋwə taa wee-nsi-yibay, fəŋ shuu wi, tə̀ lay fuu yi, laa kɨ ŋwə ndɔ baa kɨ bweꞌsə vɨɨ me, gə ziꞌ tɨ́ yighee njyə faŋ ŋuꞌ ŋkaŋ yɔ́ ndɔ mè. Ŋuꞌsə sɔ́ ndɔ mè, vɨ baa kèꞌtə ŋwə, ŋwə fuu dùꞌnə maa wee-fɨ-kuŋtə yighee tɨtiꞌ.

⁴ Mə baa yè yiley vəŋkaw və məsɔꞌ mbi. Vɨɨ fuu dùꞌ fuu vəŋkaw vɔ́, Nwi nuŋ vəŋ maa vɨɨ məshia nsɔꞌsə. Mə kɨ nii yè vəŋku və vɨɨ mbɨə faŋ vɨ nə shètə yitɔ yivəŋ, buꞌ faŋ vəŋ nə biŋ nu Kristo ntee, baa fɨꞌtə nu Nwi tɨ́ vɨɨ nə. Nə luu vəŋku və vɨɨ mbɨə faŋ vəŋ nə kee bə̀ŋsə nyaa yì nə fənyia fi me, kee biŋ laa vɨ shwey ŋgwia vəŋ mbootɔ vəŋ me, tɨꞌnə me ghɔ vəŋ me. Vəŋ ywey, kɨ sɔꞌ mbi ghɔ vɨ Kristo ŋuꞌ ŋkaŋ.

⁵ Bətə vəŋku və vɨɨ kee ta ywey me, gə kɔ tɨ́ yighee njyə faŋ ŋuꞌ ŋkaŋ yɔ́ shɔ̀ɔ. Luu mfɔŋ məyweysə vɨɨ fɨ shɨ yiku.

⁶ Mənɔŋ-bwaŋnə tɨ́ wə ntɨə faŋ ŋwə ndɔ ywey maa yighee yɔ́, ghɔ vɨ vɨɨ vɨsɨ nə, ŋwə luu ŋkee wuu Nwi. Yiku lwesə ghee bɔɔ kee ndɔ jia vɨɨ vɔ́ me, vəŋ ndɔ kɨ feꞌ Nwi nə Kristo, ghɔ vɨ Kristo kɨ sɔꞌ mbi maa ŋuꞌ yɔ́ ŋkaŋ nə.

Faŋ Satan ndɔ baa fuu, vɨ mɔꞌ ŋwə taa wi

⁷ Ŋuꞌ ŋkaŋ yɔ́ ndɔ me, vɨ keꞌtə Satan, ŋwə fuu fɨ taa ŋii mfiŋ ŋwə,

⁸ fùu gə̀, kɨ bweꞌsə vɨɨ fɨ maa vəlɨ və mbi yishwe, bweꞌsə ŋkee Gɔg ghɔ Magɔg, shə̀ŋtə vəŋ maa yighaw. Nwaa vəŋ luu ŋkee yaŋ yaa waꞌsə fɨ taa mamuu.

⁹ Vəŋ koꞌ shɨ nsi, kìa nwaa vɨɨ Nwi, nə shɨ ŋkɨə faŋ Nwi kaw. Wisə kɨ nii fùu fɨ yizɔ, ndìsə vəŋ.

¹⁰ Vɨ mɔꞌ tɨɨ vəzwitə vəbwəvə, faŋ ŋwə nə bwèꞌsə vɨɨ vɔ́ nə, taa shəŋ wisə kwalə, faŋ ŋwə kɨɨ, lumə ki zwilə vɨɨ nə, maa shəŋ ŋkɨə faŋ nyaa yi ghɔ wuu məsɨɨ təba wi lùu shɔ nɨzi nə. Vəŋ ye ŋɨꞌ shɔ vətuꞌ nə shɨshwi maa vəshi və mbi vənshə, ki kee ndɔ luu shɔ me.

Nu nsɔꞌ maa yighee vəshə

¹¹ Mə baa kɨ nii yè kenə kwalə kəfusə nə wə faŋ ŋwə dùꞌ fuu yi, nsi nə yizɔ nyɨŋ fɨ yikəꞌ ŋwə. Shəŋ nə kee baa lùu shɔ, tɨ́ kaꞌ nsi ghɔ yizɔ dùꞌ shɔ me.

¹² Mə kɨ nii yè vəŋku vənsisə vəkwalə nə vətiitə, vəŋ tɨŋ vɨsɨ kenə kɔ́. Vɨ ŋaꞌsə vəŋwaꞌlə, baa ŋaꞌsə ŋwaꞌlə mɔ́ꞌ faŋ lùu ŋwaꞌlə məbwey vəlwaŋ. Vɨ sɔꞌ vəŋku vənsisə maa nu ŋkɨə faŋ vəŋ nə yɨ̀sə, faŋ vɨ nə nyɔ̀ꞌ taa vəŋwaꞌlə vɔ́.

¹³ Nɨniŋ, mamuu bəŋsə vəŋku və vɨɨ faŋ mbə lùu tey yi nə. Yiku baa nə shɨ yiku bəŋsə vɨɨ mbɨə faŋ mbə lùu taa ghɔ vəŋ. Vɨ sɔꞌ vənu və vɨɨ faŋ vəŋ nəə yɨsə tɔ tɔ,

¹⁴ kɨ nii mɔ̀ꞌ yiku ghɔ shɨ yiku taa shəŋ wi kwalə. Lùu məku faŋ wə ndɔ ku lwesə ghee bɔɔ taa shəŋ wi ghɔ́.

¹⁵ Wə tɨ̀ me wə faŋ vɨ nə kee nyɔ̀ꞌ yizii yi taa ŋwaꞌlə məbwey vəlwaŋ me, vɨ mɔꞌ ŋwə taa wi yɔ́.