Reveleyshən 2 - Vengo (Babungo)

Ŋwaꞌlə tɨ́ nshəŋtə vɨɨ Kristo fɨ shɨ Efesɔs

¹ Nyɔꞌ ŋwaꞌlə, tɔ̀ŋ tɨ́ nshiiŋii Nwi faŋ ŋwə lùu shɨ Efesɔs, nyɔꞌ laa lee, «Wə ntɨə faŋ ŋwə jìa məjwiŋ mbɔ́ kwatia ghɔ ŋwə, maa kwiŋ maꞌnə wi, baa toꞌ fɨ taa ŋwaa təkiꞌ tɔ́ kwatia, faŋ lùu ntə goolə nə, gì laa,

² «Mə kɨɨ nə vənu və, nə vəfaꞌ faŋ a faꞌ tɨ́ Nwi nə wutə nə, baa kɨ̀ɨ faŋ a jìa fwi yə taa ŋɨꞌ, baa bèe vənu vəbwəvə, mɔ̀ŋ vɨɨ mbɨə faŋ vəŋ gi laa vəŋ lùu vɨɨ ntɔŋ Kristo, luu nə, kee lùu me. A mɔŋ vəŋ, ye laa vəŋ lùu vɨɨ təba mu.

³ Mə kɔꞌ kɨɨ laa a jìa fwi yə taa ŋɨꞌ, bìꞌ vətɔ vədɨɨvə maa nu yizii kaŋ, kee bwa me.

⁴ Luu nə, nu ŋkɨə faŋ mə kee kaw me, lùu laa a mèꞌ ŋkawnə yə faŋ a nə kìi yighee vɨsɨ.

⁵ Bàw a lumə nu ŋkɨə faŋ a gù ŋkə, kwìinə fwi yə, baa kɨ yɨsə nu ŋkɨə faŋ a nəə yɨsə yighee vɨsɨ nə. A kee yɨ nɨniŋ me, kee kwìinə fwi yə me, buu mə taa jwi ye ghɔ, sùꞌtə kiꞌ wə fɨ maa shəŋ ŋkɨə faŋ ŋwə lùu shɔ nə.

⁶ Luu nə, a yɨ̀sə nu mɔ́ꞌ faŋ ŋkə kùꞌnə. Lùu faŋ a bèe vəfaꞌ və vɨɨ Nikolaytən, sheꞌ faŋ mə bee nɨzi.»

⁷ Wə ntɨə faŋ ŋwə kìi tuulə zɔ, ŋwə zɔ nu ŋkɨə faŋ Zwitə Ley Nwi gisə tɨ́ vəməshəŋtə və vɨɨ Nwi. Mə taa kɔ məbwey vəlwaŋ tɨ́ wə ntɨə faŋ ŋwə ghɔꞌ nu bwə, zəsə ŋwə fɨ maa tɨ məbwey ŋkɨə faŋ ŋkə lùu taa ŋkɔꞌ Paradays faŋ luu ŋkɔꞌ Nwi.»

Ŋwaꞌlə tɨ́ nshəŋtə vɨɨ Kristo fɨ shɨ Smirna

⁸ Nyɔꞌ ŋwaꞌlə, tɔ̀ŋ tɨ́ nshiiŋii Nwi faŋ ŋwə lùu shɨ Smirna, nyɔꞌ laa lee, «Wə ntɨə faŋ ŋwə nə luu vɨsɨ, baa lùu yiba nə, ŋwə faŋ ŋwə nə kù, baa ywèy fɨ shɨ yiku, gì laa,

⁹ «Mə kɔꞌ kɨɨ nə ŋɨꞌ yə, nə bəə kə. Luu nə, a kìi yiyaŋ maa jɨɨ yiday. Mə kɨɨ nə ndisə vɨɨ nɨzi, faŋ vəŋ ndasə ghɔ shɔ nə. Lùu vɨɨ faŋ vəŋ gì laa vəŋ lùu vɨɨ Jus. Luu nə, vəŋ kee lùu vɨɨ Jus yinsəŋ me. Ŋii məshəŋtə vəŋ lùu ŋii məshəŋtə Satan, tɨɨ vəzwitə vəbwəvə.

¹⁰ Kɨ fee ŋɨꞌ njyə faŋ a taa ye nə me. Tɨɨ vəzwitə vəbwəvə Satan taa kwaŋ fɨ maa viŋ taa ŋii mfiŋ, laa vɨ mɔŋ viŋ. Viŋ taa kɨ ye ŋɨꞌ maa vəshi yighuŋ. Viŋ kii fwi yiweꞌ, twèꞌ maa nu Kristo, zìꞌ tɨ́ yiku, buu ŋwə ndɔ key viŋ nə məbwey vəlwaŋ.»

¹¹ Wə ntɨə faŋ tuulə ghi lùu shɔ, ŋwə zɔ nu ŋkɨə faŋ Zwitə Ley Nwi gisə tɨ́ vəməshəŋtə və vɨɨ Nwi! Wə ntɨə faŋ ŋwə jìa fwi yi taa ŋɨꞌ, kee kɨ twey Kristo me, buu ŋwə ndɔ ku, baa ywey, kaꞌ yiku lwesə ghee bɔɔ kee ndɔ kɔŋ ŋwə me.»

Ŋwaꞌlə tɨ́ nshəŋtə vɨɨ Kristo fɨ shɨ Pergamum

¹² Nyɔꞌ ŋwaꞌlə, tɔ̀ŋ tɨ́ nshiiŋii Nwi faŋ ŋwə lùu shɨ Pergamum, nyɔꞌ laa lee, «Wə ntɨə faŋ ŋwə kìi baꞌ yighaw shəsə nə, gì laa lee,

¹³ «Mə kɔꞌ kɨɨ nə shəŋ ŋkɨə faŋ a shi shɔ nə. Lùu shəŋ ŋkɨə faŋ ŋkaw Satan, tɨɨ vəzwitə vəbwəvə, lùu shɔ. Luu nə, a kee bìŋ ŋwə me; a jìa luu yizii nyaa. A nə kee ta twey maa məbiŋ nu kaŋ me. A nə jìa nu kaŋ ŋkee maa yighee njyə faŋ vɨ nə zwi Antipas, faŋ ŋwə nə bìŋ nu kaŋ ntee nə fwi yijəə nə, shɨ viŋ, faŋ Satan shi shɔ nə.

¹⁴ Luu sheꞌ wee-nu faŋ ŋkə kee baw too mə me. Nu kɔ́ lùu laa, vɨɨ mɔ́ꞌ fɨ taa ŋwaa viŋ jìa nu Balaam, faŋ ŋwə nə dèesə tɨ́ Balak faŋ ŋkə bàw maa məkɔꞌsə vɨɨ Isirayl, yɨsə vəŋ yɨ nu bwə, zɨ fazɨ faŋ lùu fazɨ vəŋku vənwi, baa tii vəki.

¹⁵ Vɨɨ baa lùu shɔ taa ŋwaa viŋ faŋ vəŋ jia nu Nikolaytən.

¹⁶ Kwiinə fwi yə! A kee kwiinə me, buu mə taa yasə jwi yɨ ghɔ, tùŋ yighaw yia vɨ vəŋ nə baꞌ yighaw ŋkɨə faŋ ŋkə fuu fɨ shuu mə nə.»

¹⁷ Wə ntɨə faŋ tuulə ghi lùu shɔ, ŋwə zɔ nu ŋkɨə faŋ Zwitə Ley Nwi gisə tɨ́ vəməshəŋtə və vɨɨ Nwi! Mə taa kɔ fazɨ Nwi mana, ŋkɨə faŋ ŋkə nə ndènə fɨ ghɔ vɨɨ nə, tɨ́ wə ntɨə faŋ ŋwə ghɔ̀ꞌ nu bwə. Mə baa luu kɔ ŋoꞌ yifusə tɨ́ ŋwə faŋ vɨ nyɔꞌ yizii yifinə maa ŋoꞌ yɔ́, faŋ wə kee kɨ̀ɨ nə yizii yɔ́ me, kɨɨ sheꞌ wuu məfi.»

Ŋwaꞌlə tɨ́ nshəŋtə vɨɨ Kristo fɨ shɨ Tiateyra

¹⁸ Nyɔꞌ ŋwaꞌlə, tɔ̀ŋ tɨ́ nshiiŋii Nwi faŋ ŋwə lùu shɨ Tiateyra, nyɔꞌ laa lee, «Wee Nwi faŋ sɨ ghi bii yaa wisə, ghuu ghi luu yaa bwey bay faŋ vɨ fùusə fɨ taa bɨꞌ ndaa-dɨŋ laa,

¹⁹ «Mə kɔꞌ kɨɨ nə vənu və, baa nə ŋkawnə yə, faŋ a kaw vɨɨ shɔ nə. Mə kɨɨ faŋ a nùŋ fwi yə maa mə, gàŋtə vɨɨ ŋɨꞌ, jìa fwi yə taa ŋɨꞌ. Mə baa kɨɨ laa a faꞌ vəfaꞌ vəyaŋ maa yighee ndwə, shɔ̀ɔ faŋ a nəə faꞌ maa yighee vɨsɨ.

²⁰ Luu nə, nu mɔ́ꞌ shɔ faŋ ŋkə kee bàw shee me. Nu kɔ́ lùu laa a bìŋ Jezebel, wəzwi wì faŋ ŋwə gì laa yi lùu nshiiŋii-sɔghɔ, faŋ ŋwə deesə nu ki tɨ́ vɨɨ, bweꞌsə vɨɨ vaŋ, vəŋ toꞌ tii vəki, zɨ vətɔ faŋ vɨ feꞌ vənwi vədayday shɔ nə.

²¹ Mə nə kɔ̀ yighee tɨ́ ŋwə maa məkwiinə fwi yi. Luu nə, ŋwə kee biŋ maa məkwiinə me, yuu meꞌtə nu sakə faŋ ŋwə yɨsə nə me.

²² Nɨniŋ, mə taa mɔꞌ ŋwə fuu fwaŋ nə za, ghɔ vɨ vɨɨ mbɨə faŋ ghɔ vɨ vəŋ shi nə, vəŋ ye ŋɨꞌ faŋ nyə shɔ̀ɔ wutə. Mə taa yɨsə nɨniŋ, faŋ vəŋ kee kwìinə fwisə vəŋ, mèꞌtə vənu vəbwəvə faŋ ghɔ vɨ vəŋ yɨ nə me.

²³ Mə taa zwilə vaŋ vi. Nɨniŋ laa vəməshəŋtə və vɨɨ Nwi vənshə taa kɨɨ laa mə lùu wə ntɨə faŋ mə kɨɨ nə mbɨꞌtə vɨɨ, baa nə nu ŋkɨə faŋ vəŋ kəə. Mə taa ndɔꞌ wə tɨ̀ me wə sheꞌ maa nu ŋkɨə faŋ ŋwə nə yɨ̀sə.

²⁴ Gə fɨ maa viŋ, bətə vɨɨ fɨ shɨ Tiateyra, faŋ viŋ kee bìŋ nu kɔ́ me, mə kee taa kɔ ntɨ yiday tɨ́ viŋ me, buꞌ laa viŋ kee kɨ̀ɨ nə ŋiꞌ nu njyoꞌ Satan kɔ́ me, faŋ vɨɨ mbii-wə gisə laa vəŋ kɨɨ nə ŋiꞌ nu nə.

²⁵ Mə gi tɨ́ viŋ sheꞌ laa viŋ kɨ jia nu ŋkɨə faŋ ŋkə lùu ghɔ viŋ nə, gə kɔ tɨ́ shi ŋkɨə faŋ mə ndɔ jwi.

²⁶ Wə ntɨə faŋ ŋwə jìa nu kaŋ, kee mèꞌtə me, gə kɔ maa vəndwə, buu mə ndɔ kɔ wutə məsɔꞌ vɨɨ tətɔŋ fu tɨ́ ŋwə.

²⁷ Ŋwə sɔꞌ vəŋ nə mbay bwey, nyeꞌtə vəŋ yaa shɔꞌ vəntɨɨ.

²⁸ (Mə ndɔ wutə kɔ́ tɨ́ ŋwə,) sheꞌ faŋ Tii ŋwaa nə kɔ̀ shee nə. Mə baa kɔ fəjwiŋ fɨ taa nshia-ndoo-mbisɨ tɨ́ ŋwə nɨzi.»

²⁹ Wə faŋ ŋwə kìi tuulə ghi zɔ, ŋwə zɔ nu ŋkɨə faŋ Zwitə Ley Nwi gì tɨ́ vəməshəŋtə və vɨɨ Nwi!»