Reveleyshən 19 - Vengo (Babungo)

Faŋ məŋaytə lùu yizɔ, buꞌ faŋ Nwi shìa nsɔꞌ tɔ shɨ Babilɔn

¹ Yiŋkii kɨ shɔɔ, mə zɔ gɨ yimɔ́ꞌ yaa gɨ vɨɨ vəyaŋ fɨ yizɔ, gi ŋkee nəŋay. Vəŋ gi laa, «Nsiŋ kɨ bəŋsə Nwi ŋwaa-nsiŋ faŋ ŋwə yaa kɨ bweysə vɨɨ, baa bàw shɨlə, ndɔ weꞌ nɨzi.

² Ŋwə shia nsɔꞌ maa jɨɨ yinsəŋ, nyə loomə nɨzi. Ŋwə kwàŋ nsɔꞌ maa wəzwi ŋgwə faŋ ŋwə nəə toꞌ vəsakə dɨdɨꞌ nə, bɨsə mbi nə nu vəsakə ki. Nwi baa kwàŋ ŋwə taa nsɔꞌ buꞌ laa ŋwə nəə zwilə vɨɨ faꞌ Nwi.»

³ Vəŋ baa kɨ gì laa, «Məbəŋsə lùu tɨ́ Nwi buꞌ fəndɨꞌ faŋ mfə fuu fɨ maa wisə ŋgwə faŋ ŋwə twaŋ shɨ kwalə kɔ́ nə. Mfə koꞌ yizɔ yighee muꞌ, ki kee lùu shɔ me.»

⁴ Vɨɨ taa vɔ́ njɔsə-yishwe muu-mbɔɔ nə, nə vətɔ vəbweyvə vɔ́ yishwe nə, nɔŋ nsi, bə̀ŋsə Nwi faŋ ŋwə dùꞌ fuu kenə ki, gì laa, «Lùu nɨniŋ, nsiŋ kɨ bəŋsə Nwi!»

⁵ Gɨ wə gi fɨ fuu kenə kɔ́ laa, «Viŋ bəŋsə Nwi ŋwaa-nsiŋ, viŋ vəbuꞌ və Nwi vənshə, faŋ viŋ fee ŋwə nə, viŋ vɨɨ tɨtiꞌ nə vɨɨ kwalə.»

⁶ Mə baa zɔ̀ gɨ yimɔ́ꞌ yaa nwaa vɨɨ vəyaŋ, luu yaa muu məyaŋmə, baa nə yaa məbwələ yibay, vəŋ gi laa, «Nsiŋ kɨ bəŋsə Nwi, buꞌ laa tɨta Nwi Nshɔɔ-mbi, faŋ lùu Nwi ŋwaa-nsiŋ nə, tey kɨ sɔꞌ mbi.

⁷ Nsiŋ kɨ ŋaytə, shɨꞌ, bəŋsə yizii yi, buꞌ laa yighee məndaa wee-bi-njɨɨ kùꞌ, zu wi duꞌtə ŋwə lootə ŋwaa wi.

⁸ Vɨ kɔ njwi yifusə faŋ nyə ley, kɨ ndwaꞌlə tɨ́ ŋwə, ŋwə mɔꞌ.» Njwi yifusə yɔ́ lùu nu ŋkɨə faŋ vɨɨ Nwi nə yɨ̀sə, ŋkə loomə.

⁹ Nshiiŋii Nwi yɔ́ gi tɨ́ mə laa mə nyɔꞌ laa, «Mənɔŋ-bwaŋnə lùu tɨ́ vɨɨ mbɨə faŋ Nwi tii vəŋ maa yitianə wee-bi-njɨɨ yɔ́,» baa kɨ gì laa, «Luu ŋkee yigisə Nwi yinsəŋ nə.»

¹⁰ Mə gu ghuu ŋwə maa məbəŋsə ŋwə. Ŋwə gi shee laa, kɨ mə yɨ nɨniŋ me, laa yi lùu wuu faꞌ Nwi yuu mə, baa nə yaa vaŋ-nshwi vaŋ, faŋ vəŋ fɨꞌtə nu Yeso nə, baa nə laa mə kɨ bəŋsə luu nshɨ-tɔ Nwi. Nu məfɨꞌtə nu Yeso lùu nu Zwitə Ley Nwi faŋ ŋkə kwaŋ yigisə shuu Nwi taa fwisə vɨɨ.

Faŋ Kristo ndɔ jwi ndisə vɨɨ ntɔŋ tɨɨ vəzwitə vəbwəvə

¹¹ Mə kɨ nii yè yizɔ ŋaꞌnə, baa yè nyaa-yikoꞌ yifusə shɔ, nə wə mɔ́ꞌ fuu yi. Yizii wə ghɔ́ faŋ ŋwə nə kòꞌ fuu nyaa yɔ́ nə, lùu «Yinsəŋ». Ŋwə sɔꞌ nsɔꞌsə vɨɨ səloomə, ndɔ tùŋ yighaw yiloomə.

¹² Sɨ ghi luu yaa wisə biinə. Ŋwə bee təsɔꞌ tə vəfwàŋ tɔ ŋwə təyaŋ, vɨ nyɔꞌ yizii yi shɔ faŋ kaꞌ tuu wə kee kɨɨ me, kɨɨ sheꞌ ŋwə.

¹³ Ŋwə mɔ́ꞌ njwi faŋ vɨ shù taa mənshi. Vɨ tii yizii yi laa «Yigisə-Nwi».

¹⁴ Shuu yighaw nshiisə-ŋiisə Nwi beꞌsə ŋwə, koꞌ fuu nyaasə-koꞌsə səfusə, mɔ̀ꞌ njwisə faŋ nsə fù laa buu, baa ley.

¹⁵ Baꞌ yighaw shəsə fuu fɨ shuu ŋwə, tɨ́ kaꞌ ŋwə ghɔ̀ꞌ mbi shɔ. Ŋwə taa kɨ sɔꞌ mbi nə mbay bwey, kaŋ vətaŋ və məluꞌ taa yibɨɨ məkaŋ məluꞌ njyə faŋ Nwi Nshɔɔ-mbi jìa vɨɨ bwənə shɔ nə fwi yishəsə yi.

¹⁶ Vɨ nyɔꞌ maa njwi yi maa yiŋii yi laa, «Fwàŋ vəfwàŋ, nə Tɨɨ vɨɨ məsɔꞌ mbi.»

¹⁷ Mə baa yè nshiiŋii Nwi yimɔ́ꞌ, ŋwə tɨŋ taa shɨshwi, yùmə ŋkee nəŋay tɨ́ mənwə faŋ mbə vɨɨlə fɨ nɨntəŋ yizɔ laa, «Viŋ baytə jwi feenə maa shəŋ ŋkɨə faŋ Nwi taa tia viŋ nə vətɔ vəyaŋvə nə.

¹⁸ Viŋ taa kwə mbasə ŋwaa vəfwàŋ, nə mbasə ŋwaa vətɨɨ vəsogeꞌ, nə mbasə ŋwaa vɨɨ weꞌnə, nə mbasə nyaasə-koꞌsə nə vɨɨ məkoꞌ nsə, nə mbasə ŋwaa vaŋ shɨ vənshə nə mbasə ŋwaa vəbuꞌ, nə ŋgwə vɨɨ tɨtiꞌ nə ŋgwə vɨɨ kwalə.»

¹⁹ Mə baa ye nyaa yɔ́ ghɔ vəfwàŋ fɨ mbi nə shuu yighaw vəŋ, tɨ́ vəŋ shəŋtə maa məgə yighaw maa wuu nyaa-yikoꞌ wì ghɔ shuu yighaw wi.

²⁰ Vɨ jia nyaa yɔ́, baa jìa wuu məsɨɨ təba wì faŋ ŋwə nəə naysə vəshwenə və shuu yɔŋvə vɨsɨ ŋwə, bweꞌsə vɨɨ shɔ nə, mbɨə faŋ vəŋ nə kìi shwenə nyaa yɔ́, nə vɨɨ mbɨə faŋ vəŋ nəə bəŋsə fənyia fə nyaa yɔ́ nə. Vɨ ndi nyaa yɔ́, ghɔ wuu ntɔŋ wi, vəbwey, mɔ̀ꞌ taa shəŋ wi kwalə faŋ ŋwə kɨɨ, lumə ki zwilə vɨɨ.

²¹ Vɨ zwilə bətə vɨɨ nə baꞌ yighaw ŋkɨə faŋ ŋkə fuu fɨ shuu wuu məkoꞌ nyaa-yikoꞌ ghɔ́ nə. Mənwə mənshə zwə fɨ maa mbasə vəŋ.