Reveleyshən 18 - Vengo (Babungo)

Faŋ shɨ Babilɔn ndɔ ndi

¹ Yiŋkii kɨ shɔɔ, mə ye nshiiŋii Nwi yimɔ́ꞌ faŋ ŋwə ndɔ fɨ yizɔ, sìꞌ nsi, tɨ́ Nwi kɔ wutə kwalə tɨ́ ŋwə. Ŋwə nə ndwàꞌlə, mbi ley.

² Ŋwə luꞌ ŋkee nəŋay laa, «Babilɔn, shɨ kwalə kì ndì. Ŋkə ndì, gù shəŋ shi tɨ́ vəzwitə vəbwəvə, gù ŋii mfiŋ tɨ́ vəzwitə vəbwəvə vənshə, nə tɨ́ mənwə məbwəmə faŋ vɨ bee mbə nə.

³ Shɨ kɔ́ ndì nɨniŋ, buꞌ laa vəŋ nə kɔ̀ məluꞌ mə vəswaŋ tɨ́ vɨɨ fɨ taa məshɨ mənshə, vəŋ nu. Vəfwàŋ fɨ taa mbi yinshə nə shì ghɔ vɨ wəzwi ghɔ́. Vɨɨ məbeꞌlə təwiŋ fuꞌ ka buꞌ vətɔ və shwaŋ ndɔŋnə vi shɔ̀ɔ ki.»

⁴ Mə baa kɨ zɔ gɨ wə baa gì fɨ yizɔ laa, «Viŋ fuu fɨ shɨ yɔ́, ŋgwisə vɨɨ vaŋ, laa kɨ viŋ mɔꞌ ŋwaa wiŋ taa nu bwə faŋ shɨ kɔ́ yɨ̀sə nə me, yuu ŋii taa ŋɨꞌ njyə faŋ Nwi ndɔ kɔ tɨ́ shɨ kɔ́ nə.

⁵ Nu bwə ŋkɨə faŋ shɨ kɔ́ yɨ̀sə, ŋkə shɔ̀ɔ ki, koꞌ zìꞌ yizɔ. Nwi lumə vənu vəmbuulə faŋ vəŋ yɨsə nə.

⁶ Viŋ yɨ maa ŋwə, sheꞌ faŋ ŋwə nə yɨ̀ maa viŋ nə, ndɔꞌ ŋwə ghee bɔɔ shɔ̀ɔ faŋ ŋwə nə lòotə tɨ́ viŋ nə.

⁷ Viŋ kɔ ŋɨꞌ tɨ́ ŋwə yiyaŋ shɔ̀ɔ faŋ məzɨ ŋwaa nə vətɔ vəjəəvə faŋ ŋwə nə zɨ̀ ŋwaa wi shɔ nə, buꞌ laa ŋwə bɨꞌtə fɨ taa fwi ŋwə laa yi duꞌ feenə yaa fwàŋ, kee lùu zu ŋku me, kee ndɔ kii nu məluŋ me.

⁸ Nɨniŋ, ŋɨꞌ yi ndɔ jwi shi kəmuꞌ, nə yiku, nə məluŋ, nə jɨŋ, vɨ baa twàŋ vəŋ nə wisə, buꞌ laa tɨta Nwi faŋ ŋwə kwàŋ shɨ kɔ́ taa nsɔꞌ nə, weꞌ.

⁹ Vəfwàŋ fɨ taa mbi faŋ ghɔ vɨ shɨ kɔ́ nəə zɨnə vəswaŋ, zɨ̀ vətɔ vəjəəvə ghɔ vɨ vəŋ, ndɔ gwia shɨŋsə, buꞌ faŋ vəŋ ye fəndɨꞌ, faŋ shɨ kɔ́ kɨɨ nə.

¹⁰ Vəŋ taa tɨŋ ntaŋ kɨ fee ŋɨꞌ yɔ́, faŋ Nwi kɔ tɨ́ shɨ kɔ́ nə, gisə laa, «Wii, shɨ kwalə Babilɔn, shɨ kwalə weꞌnə, nsɔꞌ jìa ghɔ maa kuŋtə yighee nee nə!»

¹¹ Vɨɨ məbeꞌlə yiwiŋ fɨ taa mbi gwia buꞌ ŋwə, buꞌ laa wə kee baa ywaŋ vətɔ vəvəŋ me.

¹² Vətɔ və yiwiŋ vɔ́ lùu vətɔ faŋ vɨ fìanə fɨ maa goolə nə siliva, nə mbɨə faŋ vɨ nàysə nə ŋoꞌsə ndwaꞌlə, nə vətaŋ və me, nə njwisə silik, nə njwisə baysə, nə njwisə səjəəsə səmɔ́ꞌsə, nə vətɨ və shwaŋ ndɔŋnə vənshə, nə vətɔ vənshə faŋ vɨ kɔ̀ŋ fɨ maa yisaw nsee, baa nə fɨ maa vətɨ və shwaŋ ndɔŋnə, nə vətɔ vənshə faŋ vɨ yə̀ŋ fɨ maa bwey bay nə vəbwey, nə mbɨə faŋ vɨ shwə̀tə fɨ maa ŋoꞌsə jəəsə,

¹³ nə fəlɔŋ fə tɨ, nə ŋkee fəlɔŋ, nə lamenda, nə ndiŋ, nə məluꞌ, nə məŋgwə, nə bee-nə-mbwii, nə say ghinə, nə nyaasə-məndɨɨ, nə bisə-njɨɨsə, nə nyaasə-koꞌsə, nə vəkaalə, nə vəbuꞌ, nə ŋkee vɨɨ.

¹⁴ Nɨniŋ, vətɔ vəjəəvə vənshə faŋ shɨ kɔ́ nə kàw nə, ndi fɨ ghɔ vəŋ. Yiyaŋ yi nə vətɔ və məkoꞌsə ŋwaa vəŋ ndì, vɨ kee ndɔ baa ye mbə me.

¹⁵ Vɨɨ məbeꞌlə yiwiŋ faŋ vəŋ nə yàŋ fɨ ghɔ shɨ kɔ́ buꞌ məbeꞌlə yiwiŋ vəŋ, tɨŋ ntaŋ, buꞌ laa vəŋ fee ŋɨꞌ njyə faŋ nyə jìa shɨ kɔ́ nə, gwia kɨ shɨŋsə,

¹⁶ gisə laa, «Wii, wii, shɨ kwalə kə̀ faŋ ŋkə nəə mɔꞌ njwisə ka, nə njwisə baysə, baa shuŋ vətɔ və goolə, nə wey, nə vətɔ vəjəəvə vəmɔ́ꞌ,

¹⁷ yiyaŋ yə ndì maa wee-fɨ-mbuu-yighee nee.» Vɨɨ mədɔŋsə vəbay vənshə, nə vɨɨ vənshə faŋ vəŋ tɔŋ gə njɨɨ yi fɨ taa bay, nə vɨɨ faꞌ taa mamuu vənshə tɨŋ ntaŋ,

¹⁸ kɨ yumə, buꞌ faŋ vəŋ yè fəndɨꞌ faŋ mfə koꞌ fɨ shɨ yɔ́, gì laa, «Shɨ kəmɔ́ꞌ sii lùu fə faŋ ŋkə fɨ̀nə ŋkə?»

¹⁹ Vəŋ kuŋ vəbu, yumə, luŋ, gisə laa, «Wii, wii! Ye shɨ kwalə kə̀! Vɨɨ vənshə faŋ vəŋ kìi vəbay nə ka, kii sheꞌ buꞌ shɨ kə̀. Wii, ŋkə ndì kənshə sheꞌ maa kuŋtə yighee nee.»

²⁰ Luu nə, viŋ kɨ ŋaytə buꞌ shɨ kɔ́, mɔɔ yizɔ, viŋ vɨ vɨɨ Nwi, nə vɨɨ ntɔŋ Kristo, nə nshiisə-ŋii sɔghɔ, buꞌ laa Nwi shìa nsɔꞌ tɔ shɨ kɔ́ faŋ vəŋ nə yɨnə viŋ nə.»

²¹ Nshiiŋii Nwi yimɔ́ꞌ kɨ nii shàꞌ nshɨ-ŋoꞌ nee yaa yiti bee, mɔ̀ꞌ taa mamuu, gì laa, «Vɨ ndɔ mɔꞌ shɨ Babilɔn sheꞌ nee nə wutə, ŋkə ndi, wə kee baa ye ŋkə me.

²² Vɨ kee ndɔ baa zɔ gɨ mbuꞌsə ndəə taa shɨ yɔ́ me, tɨꞌnə me vɨɨ məzwa nyaysə, tɨꞌnə me vɨɨ mətaw ndaw, tɨꞌnə me vɨɨ mətaw təsaw. Vɨ kee baa yè vɨɨ məshwətə vətɔ me, tɨꞌnə me zɔ gɨ yiti bee yə me.

²³ Kiꞌ kee ndɔ baa bee shɔ me, gɨ wəndɔŋ məndaa nə wəzwi məndaa kee ndɔ baa luu shɔ me. Nsɔꞌ Nwi jia shɨ kɔ́ buꞌ laa vɨɨ məbeꞌlə yiwiŋ fɨ shɨ yɔ́ nə luu vəshɨꞌ fɨ taa mbi. Shɨ kɔ́ nə bweꞌsə mbi yinshə nə mfi yi.

²⁴ Mənshi mə nshiisə-ŋii sɔghɔ, nə mənshi mə vɨɨ Nwi, nə mənshi mə vɨɨ vənshə, faŋ vɨ nə zwìlə vəŋ taa mbi, vɨ nə tu sheꞌ taa shɨ yɔ́.»