Reveleyshən 17 - Vengo (Babungo)

Nu wəzwi sakə

¹ Nshiiŋii Nwi yimɔ́ꞌ fɨ taa ŋwaa nshiisə-ŋiisə Nwi kwatia faŋ vəkay və ŋɨꞌ nə lùu ghɔ vəŋ nə, jwi gì shee laa mə jwi, yi də nsɔꞌ njyə faŋ nyə ndɔ ŋii maa wəzwi sakə wì, faŋ lùu shɨ ŋkɨə faŋ vɨ nə fia mbɨɨ muu məyaŋmə nə.

² Vəfwàŋ fɨ taa mbi nəə shi nə wəzwi sakə ghɔ́. Vɨɨ fɨ taa mbi ghɨghenə buꞌ məluꞌ mə vəswaŋ faŋ mbə ndɔ̀ fɨ ghɔ wəzwi ghɔ́.

³ Nshiiŋii Nwi yɔ́ gi nɨniŋ, ndì mə fɨ taa zwitə, gə̀ nə mə taa tɔɔ waꞌsə. Mə ziꞌ shɔ, yè wəzwi faŋ ŋwə kòꞌ fuu nyaa yibay, faŋ vɨ nə nyɔ̀ꞌ təzii məndasə Nwi mbɨɨ ŋwaa yi. Yitɔ yi luu kwatia, ndaw si yighuŋ.

⁴ Wəzwi ghɔ́ mɔ̀ꞌ njwisə shwaŋ ndɔŋnə nə vətɔ və goolə nə vətɔ və shwaŋ ndɔŋnə vəmɔ́ꞌ maa ŋwə, ndɔ̀ jìa ndaw goolə ghɔ ŋwə. Ndaw yɔ́ lwaŋ nə vətɔ vəbwəvə nə vətɔ və sakə, buꞌ faŋ ŋwə nəə toꞌ vəsakə nə vənwi vədayday nə.

⁵ Vɨ nə nyɔ̀ꞌ yizii yi mbootɔ ŋwə yaa yigisə tii. Nyə lùu laa, «Babilɔn kwalə, nshu vɨɨ mətii vəki, baa nə vətɔ və vənwi vədayday fɨ mbi yinshə.»

⁶ Mə kɨ ye, yè wəzwi ghɔ́, tɨ́ ŋwə nu mənshi mə vɨɨ ley Nwi nə mənshi mə vɨɨ mbɨə faŋ vəŋ nəə biŋ Yeso ntee, vɨ zwìlə vəŋ nə. Mə ye nɨniŋ, shuu ŋwaa yɔŋ.

⁷ Nshiiŋii Nwi yɔ́ gi shee laa, «Shuu wə yɔ̀ŋ buꞌ kə? Naꞌ, mə fɨꞌtə ŋiꞌ nu wəzwi ghɔ́ tɨ́ ghɔ nə ŋiꞌ nyaa yɔ́ faŋ ŋwə kòꞌ fuu yi nə, nə vətɔ vi kwatia, nə ndaw si yighuŋ nə.

⁸ Nyaa yɔ́ faŋ a ye nə, nə fɔŋ lùu fa faŋ ŋkə lùu kəbwey. Luu nə, nyə kee baa lùu mbi ndwə me. Nɨniŋ, nyə ndɔ baa koꞌ fɨ taa wee-nsi-yibay, baa lùu shɔ, kɨ nii yindi. Shuu vɨɨ fɨ taa mbi yɔŋ faŋ vəŋ yè nyaa yɔ́ faŋ nyə nə luu shɔ, kee baa lùu shɔ nə me, ndɔ baa lùu shɔ. Luu nə, taa yɔŋ sheꞌ shuu vɨɨ mbɨə faŋ vɨ kee nyɔ̀ꞌ təzii təvəŋ taa ŋwaꞌlə məbwey vəlwaŋ me, yuu vɨ nə nyɔ̀ꞌ təzii tə vɨɨ Nwi taa ŋwaꞌlə ghɔ́ shù fɨ faŋ Nwi nə kìasə kɨ bɔŋ mbi nə.

⁹ Lùu nu wuu tɔ ley faŋ yitɔfə yi lùu shɔ. Yitɔ yɔ́ kwatia nə, lùu baŋsə kwatia, faŋ wəzwi ghɔ́ dùꞌ fuu yi nə, baa lùu vəfwàŋ kwatia nɨzi.

¹⁰ Mbə tee gùkə, ŋgwə muꞌ kɨ bii sɔꞌ shɨ. Wuu mɔ́ꞌ kee ta yijwi me. Ŋwə ndɔ jwi, tay sheꞌ maa kuŋtə yighee.

¹¹ Gə̀ fɨ maa nyaa yɔ́ faŋ nyə nə luu shɔ, kee baa lùu shɔ nə me, lùu vəfwàŋ lwesə yifɔŋ. Luu nə, ŋwə nə luu sheꞌ fɨ maa nsə kwatia sɔ́ nə. Ŋwə ndɔ gə ziꞌ shəŋ yiku.

¹² Ndawsə sɔ́ yighuŋ faŋ a ye nə, lùu vəfwàŋ yighuŋ, faŋ vəŋ kee ta zɨ̀ vəŋkaw me. Vəŋ ndɔ duꞌnə, sɔꞌ shɨ maa kuŋtə yighee yimuꞌ ghɔ vɨ nyaa yɔ́.

¹³ Mbə yighuŋ vɔ́ kii sheꞌ nu kəmuꞌ, kɔ wutə vəŋ tɨ́ nyaa yɔ́.

¹⁴ Vəŋ ndɔ ŋii yighaw maa bi-njɨɨ yɔ́, bi-njɨɨ yɔ́ faŋ lùu Kristo nə, ghɔꞌ vəŋ, buꞌ laa ŋwə lùu tɨɨ vɨɨ məsɔꞌ mbi, baa luu fwàŋ vəfwàŋ. Ŋwə ndɔ ghɔꞌ vəfwàŋ vɔ́ ghɔ vɨ vɨɨ vi faŋ Nwi nə tii vəŋ, shoꞌ vəŋ nə, buꞌ faŋ vəŋ nə jìa nu ki, nùŋ fwisə vəŋ maa ŋwə.»

¹⁵ Nshiiŋii Nwi yɔ́ baa kɨ gi shee laa, «Yishuu yimuu yiyaŋnə yɔ́ faŋ a yè maa shəŋ ŋkɨə faŋ wəzwi sakə ghɔ́ dùꞌ nə, lùu ŋgwisə vɨɨ, nə tənwaa tə vɨɨ vəyaŋ, nə məshɨ, nə təghaŋ.

¹⁶ Gə fɨ maa ndawsə sɔ́ yighuŋ nə nyaa yɔ́ faŋ a ye nə, nsə ndɔ bee wəzwi ghɔ́, fì vətɔ vənshə faŋ ŋwə kìi, mèꞌtə ŋwə nə ntɨŋ, ndɔ kwə mbasə ŋwaa wi, twàŋ ŋwə nə wisə.

¹⁷ Vəŋ yɨ nɨniŋ buꞌ laa Nwi kwàŋ nu taa fwisə vəŋ laa vəŋ yɨ sheꞌ maa ŋkitə yi, baa fàynə maa fa kəmuꞌ, faŋ lùu laa vəŋ kɔ nu yifwàŋ vəŋ tɨ́ nyaa yɔ́, gə ziꞌ maa yighee njyə faŋ nu ŋkɨə faŋ Nwi nə gì, faynə.

¹⁸ Gə̀ fɨ maa wəzwi ghɔ́ faŋ a ye nə, lùu shɨ kwalə kɔ́ faŋ ŋkə sɔꞌ vəfwàŋ fɨ taa mbi nə.»