Reveleyshən 16 - Vengo (Babungo)

Nshiisə-ŋiisə Nwi kwatia tutə vəkay və ŋɨꞌ kwatia, mbə kɔ ŋɨꞌ shɨ nsi

¹ Mə kɨ nii zɔ gɨ wə gi ŋkee nəŋay fɨ taa ŋii Nwi yɔ́, gì tɨ́ nshiisə-ŋiisə Nwi sɔ́ kwatia laa, «Viŋ gə tu vəkay və ŋɨꞌ və Nwi vì kwatia nə shɨ nsi!»

² Nɨniŋ, mfɔŋ nshiiŋii Nwi fi vɨsɨ, gə̀ tù kay ki shɨ nsi, ŋgwisə vədɨꞌ koo vɨɨ mbɨə faŋ vəŋ nə kìi shwenə nyaa yɔ́ maa vəŋ, baa bə̀ŋsə fənyia fi nə.

³ Nshiiŋii Nwi beꞌsə səbɔɔ, tu kay ki taa mamuu, mbə kiasə gù yaa mənshi mə ŋku wə. Vətɔ vəbweyvə vənshə faŋ mbə lùu taa mamuu kukə.

⁴ Nshiiŋii Nwi beꞌsə sətia tu kay ki taa muu mə shɔɔmə, nə taa vəkoꞌ-fɨ-nsi, mbə kiasə gù mənshi.

⁵ Mə kɨ nii zɔ nshiiŋii Nwi njyə faŋ ŋwə sɔꞌ muu nə, gi laa, «A luu ŋkee wuu loomə, mɔɔ Nwi, faŋ a nə luu shɔ yighee vɨsɨ, baa lùu shɔ ndwə. A bàw shɨlə, buꞌ faŋ a shìa nu kɔ́ nee.

⁶ Vɨɨ nə zwìlə vɨɨ ley və, nə nshiisə-ŋii sɔghɔ sə, tùtə mənshi məvəŋ nɨniŋ. A baa luu kɔ̀ mənshi tɨ́ vəŋ laa vəŋ nu. Ŋkə kùꞌnə tɨ́ vəŋ nɨniŋ.»

⁷ Mə baa zɔ shəŋ məkɔ Nwi gi laa, «Ɔŋ mɔɔ, tɨta Nwi Nshɔɔ-mbi, a shìa nu kəbinə, kəloomə.»

⁸ Nshiiŋii Nwi lwesə yishwe tu kay ki shuu shɨshwi ŋwə twaŋ vɨɨ yaa wisə.

⁹ Faŋ məndɔŋ nə kɔlə twàŋ vɨɨ nɨniŋ nə, vəŋ kɨ nɨndasə yizii Nwi faŋ ŋwə kìi wutə maa ŋɨꞌ yɔ́. Vəŋ kee bee kwìinə fwisə vəŋ me, kee kɨ bəŋsə Nwi me.

¹⁰ Nshiiŋii Nwi lwesə tee tu ŋkii kay fuu kenə nyaa yɔ́, mfiŋsə gu maa yifwàŋ yi. Vɨɨ kwə gɨꞌ, ndɔ̀ŋmə vənditə vəvəŋ, buꞌ məza yaŋ faŋ vəŋ nə zɔ̀.

¹¹ Nɨniŋ, vəŋ nda Nwi fɨ yizɔ, buꞌ məza vəŋ ghɔ́ nə vədɨꞌ vəvəŋ, kee kìasə fɨ maa jɨɨsə bwəsə vəŋ me.

¹² Nshiiŋii Nwi lwesə ntɔfə tu kay ki taa muu məshɔɔmə məkwalə Yufreytis, mbə yɔŋ. Nɨniŋ laa jɨɨ luu yiŋaꞌsə tɨ́ vəfwàŋ faŋ vəŋ jwi nə yighaw fɨ ntɔŋ-shɨshwi.

¹³ Mə kɨ nii yè vəzwitə vəbwəvə vətia faŋ mbə nə luu yaa vənyɨnshaŋ, mbə fuu fɨ taa shuu zɔ-ŋgu-yibay, nə fɨ shuu nyaa yɔ́, nə fɨ shuu nshiiŋii-sɔghɔ, wuu təba ghɔ́.

¹⁴ Luu vəzwitə vəbwəvə və Satan, faŋ mbə yɨsə vənu və shuu yɔŋvə. Mbə fuu gə maa vəfwàŋ fɨ shɨ nsi, maa məshəŋtə vəŋ maa mətuŋ yighaw maa shi kwalə Nwi Nshɔɔ-mbi.

¹⁵ Viŋ kɨ lumə yigi Kristo faŋ ŋwə nə gì laa lee, «Viŋ zɔ! Mə ndɔ jwi maa yighee faŋ wə kee yikɨɨ me, sheꞌ yaa ndɔꞌ. Mənɔŋ-bwaŋnə tɨ́ wə ntɨə faŋ ŋwə shi nə yikɨꞌ, shìŋnə njwi si laa kɨ ŋwə ndɔ toꞌ nə ntɨŋ, tɔ ki dɨɨ taa ŋwaa vɨɨ me.»

¹⁶ Nɨniŋ, vəzwitə vəbwəvə shəŋtə vəfwàŋ vɔ́ shəŋ mɔ́ꞌ faŋ vɨ tii shəŋ kɔ́ nə Armagedɔn maa ghaŋ Hibru.

¹⁷ Nshiiŋii Nwi lwesə kwatia tu kay ki taa fɨɨ, gɨ yikwalə fuu fɨ fuu kenə fɨ taa ŋii Nwi laa, «Ŋkə mè.»

¹⁸ Yighuu duŋ, gɨsə fuu, yibay bwələ, nsi nəꞌnə ŋkee nəŋay. Shù fɨ faŋ Nwi nə bɔ̀ŋ wə, nsi nə kee ta nə̀ꞌnə nɨniŋ me. Nə luu ŋkee nsi yinəꞌnə yibwənə.

¹⁹ Vɨ seenə shɨ kwalə kɔ́ vəway vətia, məshɨ mə mbi ndi. Nwi lumə shɨ kwalə Babilɔn, kɔ ndaw məluꞌ məshəsə tɨ́ ŋwə laa ŋwə nu. Məluꞌ məshəsə mbɔ́ luu fwi Nwi yishəsə, nə nsɔꞌ Nwi yiweꞌ.

²⁰ Vəshəŋ və nsi faŋ mbə lùu nɨntəŋ muu vənshə, nyɨŋkə. Baŋsə kee baa lùu shɔ me.

²¹ Yiwey faŋ nyə dɨ̀ɨ yaa ŋkee vənshɨ-və-ŋoꞌsə kwalə, fiŋkə fɨ taa yizɔ, gùkə tɔ vɨɨ. Luu nə, vɨɨ ndasə Nwi, buꞌ wey ghɔ́ faŋ ŋə kɔ ŋɨꞌ tɨ́ vəŋ nə, buꞌ laa ŋɨꞌ yɔ́ shɔ̀ɔ ki.