Reveleyshən 15 - Vengo (Babungo)

Faŋ nshiisə-ŋiisə Nwi kwatia jwi nə ŋɨꞌ tɨ́ vɨɨ

¹ Mə baa kɨ ye, yè shwenə kwalə mɔ́ꞌ, ŋkee shwenə nu shuu yɔŋ yizɔ. Nshiisə-ŋiisə Nwi kwatia nə vəndwəsə və ŋɨꞌ ghɔ vəŋ kwatia faŋ fwi Nwi yishəsə ndɔ ndwə shɔ.

² Mə baa yè fa mɔ́ꞌ nɨzi. Ŋkə nə luu yaa mamuu, kɨꞌ yaa ŋwaꞌlə məye sɨ, wàsə nə wisə. Nshiisə-ŋiisə Nwi nsɨə faŋ nsə nə ghɔ̀ꞌ nyaa yɔ́ nə fənyia fi, nə wə ntɨə faŋ vɨ nə sày yizii yi nə sɨ ŋwaꞌlə nə. Nshiisə-ŋiisə Nwi sɔ́ nə dùꞌ yɨ mamuu yɔ́, jìa vəndəə və Nwi ghɔ vəŋ,

³ zwà nyay Mose, wuu faꞌ Nwi, nə nyay wee-bi-njɨɨ ghɔ́, laa, «Nu ŋkɨə faŋ a yɨsə, lùu nu kwalə, luu ŋkee nu shuu yɔŋ mɔɔ, tɨta Nwi Nshɔɔ-mbi, jɨɨsə sə bɔ̀ŋsə, baa lùu yinsəŋ mɔɔ, fwàŋ ŋgwisə vɨɨ vənshə.

⁴ Wə ntɨə faŋ ŋwə kee fee yizii yə, bəŋsə ghɔ me, sii lùu ndə, Mɔꞌmbi? A bàw shɨlə, sheꞌ ghɔ nɨnɔŋ wə. Vɨɨ vənshə fɨ taa mbi ndɔ jwi kɨ bəŋsə ghɔ, buꞌ vənu mbɨə faŋ a yɨsə vəloomə, mbə fuu yikəꞌ vɨɨ.»

⁵ Yiŋkii kɨ shɔɔ, mə ye vɨ ŋaꞌsə shuu ŋii Nwi, faŋ luu ŋkee vəbee və mətwelə ŋiꞌ nu Nwi yizɔ.

⁶ Nshiisə-ŋiisə Nwi sɔ́ faŋ nsə nə jia vənu və ŋɨꞌ vɔ́ kwatia nə, fuu fɨ taa ŋii yɔ́, mɔ̀ꞌ njwisə fusə faŋ nsə ley kəndwaꞌlə, kà təŋii təvəŋ nə kɔtə goolə.

⁷ Wə muꞌ fɨ taa ŋwaa vətɔ vəbweyvə vɔ́ yishwe nə, kɔ vəkay və goolə kwatia tɨ́ vəŋ, tɨ́ mbə lwaŋkə nə ŋɨꞌ fɨ ghɔ Nwi faŋ ŋwə bwey, goꞌsə yighee muꞌ nə.

⁸ Fəndɨꞌ kɨ nii lwàŋ taa ŋii Nwi yɔ́, buꞌ faŋ yikwalə Nwi nə wutə ki nə ŋìi shɔ. Nə kɨ kaꞌ wə kee ŋìi taa ŋii Nwi yɔ́ maa yighee yɔ́ me, gə ziꞌ maa yighee njyə faŋ vənu və ŋɨꞌ vɔ́ kwatia nə, faŋ mbə nə luu ghɔ nshiisə-ŋiisə Nwi sɔ́ kwatia nə, ndɔ mè.