Reveleyshən 13 - Vengo (Babungo)

Nu nyaa yibwə faŋ nyə bweꞌsə vɨɨ

¹ Mə kɨ ye, yè nyaa nə koꞌ fɨ taa mamuu nə ndaw si yighuŋ nə vətɔ vi kwatia, nə təsɔꞌ tə vəfwàŋ yighuŋ maa ndaw si, nə təzii məndasə Nwi maa vətɔ vi.

² Nyaa yɔ́ faŋ mə nə ye nə, nə fɨ̀nə bɔɔ, ghuu ghi fɨnə ghuu nyaa yibwə yimɔ́ꞌ, shuu wi fɨnə shuu bikəə. Zɔ-ŋgu-yibay yɔ́ kɔ wutə kwalə ki nə kenə ki tɨ́ nyaa yɔ́,

³ kɔ̀ tɔ kəmɔ́ꞌ tɨ́ ŋwə nə dɨꞌ kwalə maa tɔ kɔ́ yuu vɨ nə zwì ŋwə shɔ, luu nə, vɨ shuꞌ dɨꞌ yi kɔ́, ŋkə bwaŋnə. Nyaa yɔ́ fuu, mbi yinshə jɔmə nyə, shuu vəŋ yɔŋ maa ŋwə, vəŋ gwenə ŋwə.

⁴ Vəŋ baa bəŋsə zɔ-ŋgu-yibay yɔ́, buꞌ laa nyə kɔ́ wutə ki tɨ́ nyaa yɔ́. Vəŋ baa luu bə̀ŋsə nyaa yɔ́, gì laa, «Sii lùu ndə yaa nyaa yɔ́, sii kaꞌ nywenə ndə nywenə nyaa yɔ́?»

⁵ Vɨ kɔ shuu tɨ́ nyaa yɔ́, nyə nə gisə vənu vəkwalə nə ndisə. Vɨ nə nùŋ nyə laa nyə kɨ sɔꞌ mbi maa yiŋuu njɔsə-bɔɔ muu-yinshwe.

⁶ Nyə ŋaꞌsə shuu wi maa mənda Nwi, ndasə yizii Nwi, nə vəbee vi nə vɨɨ mbɨə faŋ vəŋ lùu yizɔ nə.

⁷ Vɨ biŋ tɨ́ ŋwə laa ŋwə kɨ ŋii yighaw maa vɨɨ ley Nwi, ghɔꞌ vəŋ. Vɨ kɔ wutə tɨ́ ŋwə maa məsɔꞌ ŋgwisə vɨɨ vənshə nə təkuu tə vɨɨ tənshə, nə təghaŋ tənshə, nə məshɨ mənshə.

⁸ Vɨɨ vənshə fɨ taa mbi faŋ vɨ kee nyɔ̀ꞌ təzii təvəŋ taa ŋwaꞌlə məbwey vəlwaŋ me, bəŋsə nyaa yɔ́. Ŋwaꞌlə məbwey vəlwaŋ ghɔ́ lùu ŋgwə wee-bi-njɨɨ yɔ́, faŋ vɨ nə zwì ŋwə nə. Vɨ nə nyɔ̀ꞌ təzii tə vɨɨ vi taa ŋwaꞌlə ghɔ́ shù fɨ faŋ Nwi nə bɔ̀ŋ mbi.

⁹ Wə ntɨə faŋ ŋwə kìi tuulə zɔ, ŋwə zɔ!

¹⁰ Kɨ luu Nwi nuŋsə wə maa məŋii taa ŋii mfiŋ, buu ŋwə ndɔ ŋii mfiŋ. Kɨ luu Nwi nuŋsə wə laa vɨ zwi ŋwə nə baꞌ yighaw, buu vɨ ndɔ zwi ŋwə nə baꞌ yighaw. Bàw laa vɨɨ ley Nwi kɨ jiatə fwisə vəŋ, nùŋsə fwisə vəŋ sheꞌ maa Nwi buꞌ nu kɔ́.

Nu nyaa yimɔ́ꞌ faŋ nyə fùu fɨ shɨ nsi

¹¹ Mə baa yè nyaa yimɔ́ꞌ fùu fɨ shɨ nsi. Ndaw si səbɔɔ fɨ̀nə nsə wee-bi-njɨɨ, nyə gi yaa zɔ-ŋgu-yibay.

¹² Nyaa yɔ́ fuu, kɨ sɔꞌ mbi maa yizii nyaa njyə vɨsɨ yi, baa nə wutə ki kənshə, yɨ̀sə nsi ghɔ vɨ vɨɨ mbɨə faŋ vəŋ shì shɔ nə, kɔ feenə tɨ́ nyaa njyə vɨsɨ yì, faŋ dɨꞌ bwə ki nə bwàŋnə fɨ maa nyə nə.

¹³ Nyə yɨsə vəshwenə vəkwalə, baa yɨsə wisə fuu fɨ yizɔ, fiŋkə nsi sɨ vɨɨ.

¹⁴ Nyə bweꞌsə vɨɨ fɨ taa mbi, buꞌ vəshwenə vɔ́ faŋ vɨ nə kɔ̀ tɨ́ ŋwə nə, laa ŋwə kɨ yɨsə vɨsɨ nyaa yinjii yɔ́, baa gisə tɨ́ vɨɨ faŋ vəŋ lùu taa mbi, laa vəŋ naysə fənyia, fɨꞌ maa nyaa yɔ́, faŋ vɨ nə gwìa ŋwə nə baꞌ, ŋwə bwey nə.

¹⁵ Vɨ baa kɔ̀ wutə tɨ́ ŋwə maa məkɔ zwitə tɨ́ fənyia fɨ nyaa fɔ́, fənyia fɨ nyaa fɔ́ nə gisə. Ŋwə baa yɨsə laa vɨ zwilə vɨɨ vənshə faŋ vəŋ kee bə̀ŋsə fənyia fɨ nyaa fɔ́ me,

¹⁶ baa yɨ́sə laa vɨɨ vənshə, faŋ luu vɨɨ kwalə, tɨꞌnə me vɨɨ tɨtiꞌ, nə vɨɨ təka, tɨꞌnə me mbəəsə, nə vaŋ shɨ, tɨꞌnə me vəbuꞌ, shwee yisɨ ŋgwia maa ghɔ vəŋ maꞌnə, tɨꞌnə me mbootɔ vəŋ.

¹⁷ Nɨniŋ laa kaꞌ wə kee baa kɨ ywaŋ fa, tɨꞌnə me fiŋ fa me, maa laa ŋwə kìi shwenə kɔ́ me. Shwenə kɔ́ lùu yizii nyaa yɔ́, tɨꞌnə me kii sɨ ŋwaꞌlə yizii yi.

¹⁸ Lùu nu yitɔfə; wə ntɨə faŋ sɨ ghi ley, bàw ŋwə kɨɨ nə ŋiꞌ nyaa yɔ́. Vɨ say ŋwaꞌlə ghɔ́, ŋwə fuu yaa yizii wə. Ki sɨ ŋwaꞌlə ghɔ́ lùu yiwa ntɔfə nə njɔsə-ntɔfə muu-ntɔfə.