Reveleyshən 12 - Vengo (Babungo)

Nu wəzwi faŋ ŋwə mɔ̀ꞌ shɨshwi yaa njwi nə zɔ-ŋgu-yibay

¹ Shwenə nu kwalə kəmɔ́ꞌ kɨ nii fùu taa yizɔ. Luu wəzwi faŋ ŋwə nə mɔ̀ꞌ shɨshwi yaa njwi, ŋuu luu ŋiꞌ ghuu ŋwə, məjwiŋ njɔsə-bɔɔ laytə tɔ ŋwə yaa məsɨŋ.

² Ŋwə nə luu gɔsə, yumə məza məbi, ye ŋɨꞌ maa məbi, nɨndɔmə.

³ Shwenə nu kəmɔ́ꞌ baa fùu taa yizɔ, luu zɔ-ŋgu-yibay yikwalə faŋ nyə bày laa bəə. Yitɔ yi nə luu kwatia, ndawsə si yighuŋ, nə təsɔꞌ tə vəfwàŋ kwatia tɔ yitɔ yɔ́.

⁴ Nsay yi saŋ waytə məjwiŋ fɨ taa vəwaytə vətia, mɔ̀ꞌ nsi. Zɔ-ŋgu-yibay yɔ́ tɨŋnə vɨsɨ wəzwi ghɔ́, faŋ ŋwə kɨꞌ məbi nə, laa ŋwə taa kɨ bi wee ghɔ́, ŋwə kwə.

⁵ Wəzwi ghɔ́ bi wee-wəndɔŋ faŋ ŋwə ndɔ kɨ sɔꞌ mbi yinshə nə mbay bwey. Vɨ ndi ŋwiŋ wi ghɔ́, gə̀ nə ŋwə tɨ́ Nwi, yɨ ŋkaw Nwi taa yizɔ.

⁶ Wəzwi ghɔ́ nyɨŋ gə̀ taa tɔɔ waꞌsə maa shəŋ faŋ Nwi nə nàysə, nùŋ tɨ́ ŋwə, laa vɨ kɨ zəsə ŋwə yifi maa vəshi ŋkaŋ nə yiwa yibɔɔ nə muu-ntɔfə.

Yighaw Maykel, nshiiŋii taa mbuꞌ Nwi, ghɔ Satan

⁷ Yighaw kɨ nii fùu yizɔ, Maykel (faŋ lùu nshiiŋii taa mbuꞌ) ghɔ vɨ vɨɨ vi nə nywenə ghɔ vɨ zɔ-ŋgu-yibay nə vɨɨ vi.

⁸ Nshiisə-ŋiisə Nwi ghɔꞌ zɔ-ŋgu-yibay nə vɨɨ vi, vəŋ kee baa kìi tuu wee-fɨ-shəŋ yizɔ me.

⁹ Vɨ ndi nshɨ zɔ-ŋgu-yibay ghɔ́, mɔ̀ꞌ shɨ nsi. Luu ŋkee zɔ yimwa yɔ́ faŋ vɨ tìi nə tɨɨ vəzwitə vəbwəvə, baa nə Satan, wuu məbweꞌsə mbi yinshə. Ŋwə fiŋ fɨ taa yizɔ, fìŋ shɨ nsi, ghɔ vɨ nshiisə-ŋii si.

¹⁰ Mə kɨ nii zɔ gɨ wə gi fɨ yizɔ ŋkee nəŋay laa, «Nu məbweysə vɨɨ faŋ Nwi bweysə vɨɨ nə, baa nə wutə ki, baa nə yifwàŋ yi fuu ntee ndwə, baa nə wutə Kristo maa məsɔꞌ mbi yinshə. Vɨ ghɔ̀ꞌ wə ntɨə faŋ ŋwə yaa kɨ kwaŋ vaŋ-nshwi vaŋ-nsiŋ taa nsɔꞌ, wuu məbweꞌsə vɨɨ faŋ ŋwə kɔ̀ŋtə vəŋ tɨ́ Nwi ŋwaa-nsiŋ vətuꞌ nə shɨshwi.

¹¹ Vaŋ-nshwi vaŋ-nsiŋ vɔ́ baa luu ghɔꞌ ŋwə nɨzi buꞌ mənshi mə wee-bi-njɨɨ ghɔ́, buꞌ faŋ vəŋ nə bìŋ nu Kristo ntee, kàw ŋwə shɔɔ məbwey vəŋ, biŋ ŋwə, zìꞌ tɨ́ yiku.

¹² Nɨniŋ, yizɔ ŋaytə ghɔ vɨ vɨɨ vənshə faŋ vəŋ lùu yizɔ nə. Luu nə, ŋɨꞌ shɨ nsi nə fuu mamuu, buꞌ laa tɨɨ vəzwitə vəbwəvə siꞌ gə̀ shɔ, yè viŋ, tɨ́ fwi yi shə dɨdɨꞌ, buꞌ faŋ ŋwə kɨɨ laa yighee yi tuŋsə̀.»

¹³ Zɔ-ŋgu-yibay yɔ́ kɨ ye laa vɨ mɔ̀ꞌ nyə shɨ nsi, nyə ŋii maa məshoꞌ ghuu wəzwi ghɔ́ faŋ ŋwə nə bì wee-wəndɔŋ nə.

¹⁴ Luu nə, vɨ kɔ ghalə tɨ́ wəzwi ghɔ́ bɔɔ, faŋ lùu ghalə mbuꞌ kwalə, tɨ́ kaꞌ ŋwə vɨɨlə, nyɨ̀ŋ fɨ ghɔ zɔ yɔ́, gə̀ taa tɔɔ waꞌsə maa shəŋ ŋkɨə faŋ vɨ taa kɨ zəsə ŋwə shɔ maa wee-fɨ-kuŋtə yighee nə bɨꞌ.

¹⁵ Zɔ yɔ́ tu muu yaa muu məshɔɔmə fɨ shuu nyə fɨ yiba jɨŋ wəzwi ghɔ́, tɨ́ kaꞌ mbə kwasə ŋwə.

¹⁶ Luu nə, shɨ nsi gaŋtə wəzwi ghɔ́, ŋaꞌsə shuu wi, mè muu mbɔ́ faŋ zɔ yɔ́ tù fɨ shuu nyə nə.

¹⁷ Nɨniŋ, njyoꞌ zɔ yɔ́ lia maa wəzwi ghɔ́, ŋwə bəŋ gə̀ kɔ̀ꞌsə yighaw maa bətə vaŋ wəzwi ghɔ́, faŋ lùu vɨɨ mbɨə faŋ vəŋ nùŋsə ntɨsə Nwi, baa bìŋ nu Yeso ntee. Nyə kɨ nii gə tɨŋnə fuu waꞌsə taa mamuu.