Reveleyshən 11 - Vengo (Babungo)

Faŋ vɨɨ məfɨꞌtə nu Nwi vəbɔɔ nə fùu

¹ Vɨ kɨ nii kɔ̀ mfɨꞌ shee yaa yigiŋ, gì shee laa mə ndɔ yizɔ, fɨ̀ꞌ ŋii Nwi yikwalə, nə shəŋ məkɔ Nwi, nə vɨɨ mbɨə faŋ vəŋ shɔꞌtə Nwi yifi.

² Luu nə, mèꞌtə nɨntəŋ fu faŋ ŋwə kìa ŋii Nwi nə, kee fɨ̀ꞌ me, buꞌ laa Nwi kɔ̀ tɨ́ vɨɨ tətɔŋ fu. Vəŋ taa kɨ jeꞌtə shɨ Jerusalem, faŋ nə luu shɨ ley tɨ́ Nwi nə, maa təŋuu njɔsə-bɔɔ muu-yinshwe.

³ Mə taa yɨsə vɨɨ məfɨꞌtə nu kaŋ vəbɔɔ kɨ gisə nu ŋkɨə faŋ mə taa kɨ kwaŋ shuu vəŋ maa vəshi ŋkaŋ nə yiwa yibɔɔ nə muu-ntɔfə. Vəŋ ndɔ kɨ mɔꞌ njwisə məluŋ.

⁴ Vɨɨ məfɨꞌtə nu kaŋ vɔ́ vəbɔɔ nə, lùu yaa vətɨ və məŋgwə vəbɔɔ, nə təkiꞌ təbɔɔ faŋ ntə tɨ̀ŋ vɨsɨ Tɨɨ-mbi.

⁵ Kɨ luu wə nə kəə ndɨə vəŋ, buu wisə taa fuu fɨ taa shuu vəŋ, bɨsə vɨɨ mbeenə vəŋ. Nɨniŋ, wə faŋ ŋwə taa kəə jɨɨ maa məndɨəsə vəŋ, vɨ taa zwi ŋwə.

⁶ Nwi kɔ wutə tɨ́ vəŋ maa məfəŋ yizɔ laa kɨ yighuu siꞌ maa vəshi mbɨə faŋ vəŋ fɨꞌtə yigisə Nwi me, baa kɔ̀ wutə tɨ́ vəŋ maa məkiasə muu fɨ shɨ nsi, mbə gù mənshi, baa nə maa məkɔ ŋɨꞌ shɨ nsi yighee tɨ̀ me yighee faŋ vəŋ kàw.

⁷ Vəŋ ndɔ kɨ metə maa məfɨꞌtə yigisə Nwi nɨniŋ nə, buu nyaa njyə faŋ nyə ndɔ fuu fɨ taa wee-nsi-yibay, ndɔ tuŋ yighaw ghɔ vəŋ, ghɔꞌ vəŋ, zwìlə vəŋ.

⁸ Vəŋku və ŋwaa vəvəŋ nɔŋ jɨɨsə shɨ Jerusalem, ŋkee taa shɨ kwalə ŋkɨə faŋ vɨ nə bey tɨta vəŋ shɔ fuu fəŋkɔꞌ fə ŋkɨꞌsə nə. Nɨniŋ, vɨ kɨ tii shɨ kɔ́ nə Sodom, tɨꞌnə me Ijip, (buꞌ faŋ ŋkə bɨ sheꞌ yaa məshɨ mbɔ́.)

⁹ Vɨɨ mɔ́ꞌ faŋ vəŋ ndɔ̀ fɨ taa ŋgwisə vɨɨ vənshə, nə ŋiinə vɨɨ vənshə, nə təghaŋ tənshə, nə məshɨ mənshə, ye vəŋku vəvəŋ maa vəshi vətia nə bɨꞌ, kee biŋ laa wə ndi ŋku vəŋ, gə̀ təə me.

¹⁰ Vɨɨ fɨ taa mbi taa kɨ ŋaytə ŋkee dɨdɨꞌ buꞌ yiku vɨɨ vɔ́ vəbɔɔ nə. Vəŋ ndɔ kɔ vətɔ tɨ́ vəliŋ vəvəŋ buꞌ laa vɨɨ vɔ́ vəbɔɔ faŋ nə luu nshiisə-ŋii sɔghɔ nə, yaa kɨ jwi nə ŋɨꞌ yiyaŋ tɨ́ vɨɨ fɨ taa mbi.

¹¹ Vəshi vɔ́ vətia kɨ shɔɔ, nə bɨꞌ, zwitə məbwey ndɔ fɨ ghɔ Nwi, ŋìi taa ŋwaa vəŋ, vəŋ ndɔ, tɨ̀ŋnə yizɔ, vɨɨ mbɨə faŋ vəŋ ye vəŋ, fee ŋkee dɨdɨꞌ.

¹² Vɨɨ vɔ́ vəbɔɔ zɔ gɨ wə gì tɨ́ vəŋ fɨ taa yizɔ ŋkee nəŋay laa, «Viŋ koꞌ jwì feenə.» Vəŋ ŋii taa mbɔꞌ, kòꞌ yizɔ, vɨɨ mbeenə vəŋ kɨ ndeynə vəŋ.

¹³ Sheꞌ maa yighee yɔ́, nsi nəꞌnə ŋkee dɨdɨꞌ, waytə shɨ kɔ́ muꞌnə, gù nsi, goꞌ vəwaytə buumuꞌ. Faŋ nsi nə nə̀ꞌnə nə, vɨɨ kukə ŋkaŋsə kwatia, bətə vɨɨ faŋ vəŋ nə gòꞌ, fee, ndɔ bə̀ŋsə Nwi fɨ yizɔ.

¹⁴ Nɨniŋ, ŋɨꞌ yinjii shɔɔ, lwèsə ghee ŋɨꞌ bɔɔ. Viŋ zɔ! Ŋɨꞌ yimɔ́ꞌ taa yasə baa jwi, lwesə ghee tia.

Faŋ nshiiŋii Nwi lwesə kwatia nə tàw yisaw yi

¹⁵ Nshiiŋii Nwi lwesə kwatia kɨ nii tàw yisaw yi, gɨsə vɨɨ gi fɨ yizɔ ŋkee nəŋay laa, «Yighee jwi kùꞌ faŋ tɨta ŋwaa-nsiŋ, ghɔ wə ntɨə faŋ ŋwə nə shòꞌ ŋwə nə, ndɔ kɨ sɔꞌ mbi yinshə. Yifwàŋ yivəŋ ndɔ goꞌsə yighee muꞌ.»

¹⁶ Vɨɨ taanə vì njɔsə-yishwe muu-mbɔɔ faŋ vəŋ nə dùꞌ fuu vəŋkaw vəvəŋ vɨsɨ Nwi nə, gukə nsi, tùŋ təkəꞌ təvəŋ nsi, bə̀ŋsə Nwi,

¹⁷ gì laa, «Yia bwaŋ ghɔ, tɨta Nwi, Nshɔɔ-mbi, faŋ a nə luu shɔ maa yighee vɨsɨ, baa lùu shɔ ndwə, buꞌ laa a ndì wutə kə, faŋ ŋkə shɔ̀ɔ ki, kɨ sɔꞌ mbi yaa yifwàŋ yə.

¹⁸ Fwisə vɨɨ məshɨ məshɨ nə shə. Fwi yə baa lùu shə, jia vəŋ. Yighee kùꞌ maa məsɔꞌ vəŋku vənsisə, baa nə maa məkey vɨɨ faꞌ və, nshiisə-ŋii sɔghɔ sə, nə vɨɨ mbɨə faŋ vəŋ ley vɨsɨ ghɔ, nə vɨɨ mbɨə faŋ vəŋ nəə fee yizii yə, vɨɨ kwalə nə vɨɨ faŋ vəŋ kee lùu nu me. Yighee kùꞌ maa məndisə vɨɨ mbɨə faŋ vəŋ nəə bɨsə shɨ nsi nə.»

¹⁹ Shuu ŋii Nwi fɨ yizɔ ŋaꞌnə, vɨ ye ŋwaꞌ məkee Nwi taa ŋii yɔ́. Yibay bwələ, yumə fuu, yighuu duŋ, nsi nəꞌnə, wey kwalə fiŋkə fɨ yizɔ.