Reveleyshən 1 - Vengo (Babungo)

Vəndwə və vənu

¹ Ŋwaꞌlə ŋwə̀ lùu ŋwaꞌlə kɔ̀ŋ vənu faŋ mbə nə ndènə fɨ ghɔ vɨɨ, Nwi ndi kɔ̀ ghɔ Yeso Kristo laa ŋwə də nu ŋkɨə faŋ ŋkə taa ghaa yasə gay tɨ́ vɨɨ faꞌ vi. Yeso nə tɔ̀ŋ wuu ntɔŋ wi maa nu kɔ́, ŋwə gə də̀ shwenə ki tɨ́ wuu faꞌ wi Jɔn.

² Wuu faꞌ wi ghɔ́ fɨꞌtə yigisə Nwi yɔ́ tɨ́ vɨɨ, baa nə nu ŋkɨə faŋ Yeso Kristo nə də̀ tɨ́ ŋwə, faŋ ŋwə nə ye ŋwə nə yisɨ nə.

³ Mənɔŋ-bwaŋnə tɔ wə ntɨə faŋ ŋwə tìi nu ŋkɨə faŋ Nwi nə gì laa ŋkə taa gay nə, baa nə tɔ vɨɨ mbɨə faŋ vəŋ zɔ, jìa nu ŋkɨə faŋ mə ŋwaꞌlə taa ŋwaꞌlə ŋwə̀, buꞌ laa yighee vənu vɔ́ lùu nshənə.

Shɔꞌtə Jɔn tɨ́ vəməshəŋtə və vɨɨ Nwi kwatia fɨ nsi Asia

⁴ Lùu mə, Jɔn, faŋ mə tɔ̀ŋ ŋwaꞌlə ŋwə̀ tɨ́ vəməshəŋtə və vɨɨ Nwi kwatia fɨ nsi Asia. Mənɔŋ-bwaŋnə tɔ viŋ nə məduꞌ-nyɔŋ fɨ ghɔ Nwi faŋ ŋwə nə luu shɔ fɨshi, baa lùu shɔ ndwə, ndɔ baa jwi maa yighee yiba nə. Mənɔŋ-bwaŋnə baa lùu tɔ viŋ fɨ ghɔ vəzwitə vəleyvə kwatia mbɨə faŋ mbə lùu vɨsɨ yɨ ŋkaw Nwi,

⁵ baa nə fɨ ghɔ Yeso Kristo faŋ ŋwə nə də̀ yinsəŋ Nwi ŋkee yiley, fì vɨsɨ maa məywey fɨ shɨ yiku, sɔꞌ vəfwàŋ fɨ shɨ nsi nɨzi. Ŋwə baa luu kàw nsiŋ, kù tɔ nsiŋ maa məbweysə nsiŋ fɨ taa vənu vəbwəvə vaŋ-nsiŋ,

⁶ nàysə yifwàŋ tɨ́ nsiŋ, yɨ̀sə nsiŋ luu vɨɨ məfeꞌ Nwi tɨ́ Nwi tii wi. Nsiŋ kɔ feenə tɨ́ ŋwə. Ŋwə kwàlə shɔɔ, gòꞌsə yighee muꞌ. Ŋkə lùu nɨniŋ.

Faŋ Kristo ndɔ baa bəŋ jwi mbi

⁷ Viŋ zɔ! Kristo ndɔ bəŋ jwi fɨ taa mbɔꞌ, vɨɨ vənshə ye ŋwə nə sɨ vəŋ. Ŋkee vɨɨ mbɨə faŋ vəŋ nə zwì ŋwə nə, ndɔ ye ŋwə nɨzi. Ŋiꞌ ŋii tɨ̀ me ŋiꞌ ŋii fɨ taa mbi ndɔ gwia buꞌ ŋwə. Ɔŋ, lùu faŋ ŋkə ndɔ luu. Ŋkə gòꞌsə nee.

⁸ Tɨta Nwi Nshɔɔ-mbi, faŋ ŋwə nə luu shɔ yighee vɨsɨ, baa lùu shɔ ndwə, ndɔ jwi yighee yiba nɨzi, ŋwə nə gì laa lee, «Lùu mə lùu vənzi, baa lùu vəndwə və vənu.»

Faŋ Yeso nə fùu yikəꞌ Jɔn shɨ Patmɔs

⁹ Lùu mə, Jɔn, weenshu wiŋ, faŋ nsiŋ ye ŋɨꞌ, ndɔ zɨ nu yifwàŋ Nwi mɔ́ꞌ, baa jìa fwi saŋ-nsiŋ maa ŋɨꞌ fɨ yiba Yeso, faŋ mə nyɔꞌ ŋwaꞌlə ŋwə̀ tɨ́ viŋ. Vɨ nə nùŋsə mə maa wee-shəŋ nsi mɔ́ꞌ nɨntəŋ mamuu, yizii shəŋ kɔ́ lùu Patmɔs. Vɨ nùŋsə mə buꞌ laa mə nəə fɨꞌtə nu Nwi, baa bìŋ nu Yeso ntee.

¹⁰ Kɨ luu maa shi zwisə Nwi mɔ́ꞌ, Zwitə Ley Nwi ŋii maa mə, mə zɔ gɨ wə gi fɨ yiba jɨŋ mə nəŋay yaa gɨ yisaw.

¹¹ Gɨ yɔ́ gi laa mə nyɔꞌ nu ŋkɨə faŋ mə ye taa ŋwaꞌlə, tɔ̀ŋ tɨ́ vəməshəŋtə və vɨɨ Nwi kwatia. Vəməshəŋtə kwatia vɔ́ luu mbə fɨ shɨ Efesɔs, nə fɨ shɨ Smirna, nə fɨ Pergamum, nə fɨ Tiateyra, nə fɨ Sardis, nə fɨ Filadelfia, nə fɨ Laodosia.

¹² Faŋ mə nə zɔ gɨ yɔ́ nɨniŋ nə, mə kiasə ŋwaa maa məndeynə wə ghɔ́ faŋ ŋwə gisə shee nə. Mə kiasə ŋwaa ŋwaa, ye təkiꞌ kwatia faŋ lùu ntə goolə,

¹³ yè wə mɔ́ꞌ faŋ ŋwə fɨnə Wuu yinsəŋ Nwi. Ŋwə nə dùꞌ nɨntəŋ ŋwaa təkiꞌ tɔ́, mɔ̀ꞌ dalə maa ŋwə, kà təŋii ti nə kɔtə goolə .

¹⁴ Tɔ ki ghɔ vɨ nyuŋsə tɔ si nə fɨfusə yaa fwəsə wuŋ, fu laa buu, sɨ ghi lùu yaa wisə biinə.

¹⁵ Ghuu ghi lùu yaa bwey bay faŋ vɨ fuusə fɨ taa bɨꞌ ndaa-dɨŋ. Gɨ yi lùu yaa gɨ muu məyaŋmə.

¹⁶ Ŋwə nə jìa məjwiŋ kwatia maa kwiŋ maꞌnə wi. Baꞌ yighaw shəsə fuu fɨ shuu ŋwə. Yikəꞌ yi ndwaꞌlə yaa shɨshwi faŋ ŋwə bee yizɔ buꞌtə ŋkee nə wutə.

¹⁷ Mə kɨ ye ŋwə, gù ghuu ŋwə yaa ŋku wə. Ŋwə mɔꞌ ghɔ ki maꞌnə maa mə, gì laa, «Kɨ ghɔ fee me, lùu mə, faŋ mə nə luu vɨsɨ, baa lùu yiba,

¹⁸ baa luu ŋkee wuu bwey. Mə nə ku, lùu ndwə, mə bwèy gòꞌsə yighee muꞌ. Ŋkwa yiku, nə ŋkwa shɨ vəŋku vənsisə lùu ghɔ mə, tɨ́ kɨ kaꞌ mə ŋaꞌsə baa fə̀ŋ shuu wi.

¹⁹ Zɔ mɔɔ! Nyɔꞌ nu ŋkɨə faŋ a ye, nə ŋkɨə faŋ ŋkə lùu ndwə, baa nə ŋkɨə faŋ ŋkə ndɔ jwi.

²⁰ Zɔ ŋiꞌ məjwiŋ kwatia faŋ a yè ghɔ mə, nə ŋiꞌ təkiꞌ kwatia, faŋ lùu ntə goolə nə. Ŋiꞌ məjwiŋ mbɔ́ lùu nshiisə-ŋiisə Nwi kwatia faŋ nsə ndeynə vəməshəŋtə və vɨɨ Nwi vì kwatia nə. Təkiꞌ tɔ́ kwatia lùu vəməshəŋtə vɔ́ kwatia.»