Matiu 3 - Vengo (Babungo)

Nu Jɔn, wuu məkɔ muu mə Nwi

¹ Nə luu maa ŋuꞌsə mbi sɔ́, Jɔn, wuu məkɔ muu mə Nwi, fuu kɨ fɨꞌtə nu Nwi tɔɔ waꞌsə,

² gisə laa, «Viŋ kwiinə fwi siŋ, buꞌ laa nu yifwàŋ yizɔ luu nshənə.»

³ Nɨniŋ, Jɔn nə luu ŋkee wə ntɨə faŋ nshiiŋii-sɔghɔ Aysaya nəə gisə kɔ̀ŋ ŋwə laa, «Gɨ wə luꞌ fɨ tɔɔ waꞌsə laa vɨ lootə jɨɨ Mɔꞌmbi, bɔ̀ŋsə fɔꞌ wi ŋwə neꞌtə.»

⁴ Nshɨ-tɔ Jɔn nəə mɔꞌ sheꞌ njwi faŋ vɨ nə bà nə nyuŋsə nyaa kamelə, shuŋ kɔtə gɔ ŋiꞌ ŋwə, (sheꞌ faŋ nshiisə-ŋii sɔghɔ yaa kɨ mɔꞌ nə.) Fazɨ ki nə luu sheꞌ ŋweysə nə zɔsə fɨ taa tɔɔ.

⁵ Ŋwə nə luu shɔ taa tɔɔ waꞌsə, vɨɨ Jerusalem ghɔ vɨ vɨɨ Judia vənshə nə vɨɨ vənshə fɨ kwiŋ Jordan fuu kɨ gə ye ŋwə,

⁶ biŋ vənu vəbwəvə vəŋ ntee. Ŋwə kɔ muu mə Nwi tɨ́ vəŋ taa muu mə Jordan.

⁷ Luu nə, ŋwə kɨ ye vɨɨ vəyaŋ fɨ taa nwaa vɨɨ Farisii nə fɨ taa nwaa vɨɨ Sadusii, faŋ vəŋ nə jwì maa məfi muu mə Nwi fɨ ghɔ ŋwə, ŋwə gi tɨ́ vəŋ laa, «Aŋ viŋ, vaŋ-ŋkakɨ, sii nàysə ndə tɨ́ viŋ laa kaꞌ viŋ fùu fɨ taa nsɔꞌ Nwi faŋ Nwi ndɔ kwaŋ maa vɨɨ nə?

⁸ Bàw viŋ yɨ vənu faŋ mbə kuꞌnə yaa vɨɨ faŋ vəŋ kwìinə fwisə vəŋ.

⁹ Kɨ viŋ kɨ bɨꞌtə fɨ taa fwisə viŋ maa məgi laa kaꞌ nu kee baa bɨ̀ tɨ́ viŋ me, buꞌ faŋ Abraham lùu tii wiŋ nə. Mə naysə tɨ́ viŋ laa kaꞌ Nwi ndì ŋoꞌsə sə̀, kìasə, nsə gu vaŋ Abraham.

¹⁰ Viŋ zɔ! Vɨ duꞌtə vɨ nuŋsə njaŋ nsi ŋiꞌ vətɨ. Tɨ tɨ̀ me tɨ faŋ ŋkə kee kwàanə vətaŋ vəjəəvə me, vɨ taa gwia, twàŋ taa wi.»

¹¹ Jɔn baa gi laa, «Mə kɔ muu mə Nwi tɨ́ viŋ laa viŋ kɨ kwiinə fwi siŋ. Luu nə, wə ntɨə faŋ ŋwə jwi fiiba mə, kìi wutə shɔ̀ɔ mə. Mə kee bee kùꞌnə ŋkee maa məshaꞌ gɔsə si me. Ŋwə ndɔ kɔ luu Zwitə Ley Nwi tɨ́ viŋ, nə wisə.

¹² Ŋkə ndɔ luu sheꞌ yaa nu wuu məfetə ŋɨŋee, faŋ nsì məfetə ŋɨŋee lùu ghɔ ŋwə, ŋwə ndɔ fetə ŋɨŋee wi, nùŋsə ŋkee jəə taa ŋii, ndɔ shəŋtə vəghɔ vi, twàŋ taa wi faŋ ŋwə kee yaa kɨ ndɨɨnə me.»

Faŋ Yeso nə fì muu mə Nwi fɨ ghɔ Jɔn

¹³ Nə luu maa yighee yɔ́, Yeso ndɔ fɨ shɨ Galilii, jwì yɨ Jɔn mbɨɨ muu mə Jordan maa məfi muu mə Nwi.

¹⁴ Jɔn fəŋ ŋwə, gì laa, «Ŋkə nə bàw mə fi muu mə Nwi fɨ ghɔ ghɔ. Sii yɨ̀ kə laa a bee kii jwì maa mə?»

¹⁵ Yeso bəŋsə tɨ́ ŋwə laa, «Meꞌtə ŋkə lùu nɨniŋ ndwə. Bàw ŋkə luu nɨniŋ laa sɨ kɨ yɨsə vənu vənshə faŋ Nwi kàw.» Nɨniŋ, Jɔn biŋ, mèꞌtə ŋwə.

¹⁶ Yeso fi muu mə Nwi, fùu fɨ taa muu, sheꞌ yighee yɔ́ shuu yizɔ ŋaꞌnə, ŋwə ye Zwitə Ley Nwi siꞌ jwì yaa bɔŋsə, tɨ̀ŋnə tɔ ŋwə.

¹⁷ Gɨ Nwi gi fɨ taa yizɔ laa, «Lùu ŋwiŋ ŋwaa nə faŋ mə kàw. Ŋwə baw shee.»