Matiu 28 - Vengo (Babungo)

Faŋ Yeso nə ywèy fɨ shɨ yiku

¹ Faŋ shi zwisə Nwi nə shɔ̀ɔ, shuu leefu maa mfɔŋ shi fɨ taa yiwiŋ, Meri Madalin, nə Meri ŋgwii-wə gə maa məye swi ghɔ́.

² Vəŋ kɨ gə nɨniŋ, nsi gwəkə nə̀ꞌnə ŋkee nəŋay, buꞌ laa nshiiŋii Nwi siꞌ fiizɔ, jwì bɨ̀ŋsə ŋoꞌ yɔ́ bàꞌsə, dùꞌ fuu yi.

³ Ŋkɨꞌnə yi nəə nɨndwaꞌlə yaa yibay, njwisə si fu laa buu.

⁴ Vɨɨ məshii swi ghɔ́ fee, kɨ lɔꞌ, gù yaa vəŋku və vɨɨ.

⁵ Nshiiŋii Nwi yɔ́ gi tɨ́ vəki vɔ́ laa, «Kɨ viŋ fee me! Mə kɔꞌ kɨɨ laa viŋ kəə Yeso faŋ vɨ nə bèy ŋwə fuu fəŋkɔꞌ fə ŋkɨꞌsə nə.

⁶ Ŋwə kee lùu feenə me; ŋwə ywey fɨ shɨ yiku sheꞌ faŋ ŋwə yaa naysə nə. Viŋ jwi, yè shəŋ ŋkɨə faŋ ŋwə nə nɔ̀ŋ shɔ.

⁷ Viŋ kɨ nii gə̀ titi, gə̀ nàysə tɨ́ vɨɨ məzwetə nu ki laa ŋwə ywey fɨ shɨ yiku, baa nə laa ŋwə shɔɔ vɨsɨ viŋ, kɨ gə shɨ Galilii. Viŋ taa ye ŋwə yifi. Maa viŋ zɔ̀ nu ŋkɨə faŋ mə gì tɨ́ viŋ.»

⁸ Vəŋ ndɔ fɨ shuu swi yɔ́ titi, nə məfee, baa nə məŋaytə yaŋ, nyɨŋ gə̀ nàysə tɨ́ vɨɨ məzwetə nu Yeso.

⁹ Vəŋ gə nɨniŋ, ghɔ vɨ Yeso faynə. Ŋwə shɔꞌtə vəŋ laa, «Viŋ kɨ ŋaytə mɔɔ!» Vəŋ shəŋtə gə̀ yɨ ŋwə, gu ghuu ŋwə, jìa ghuu ghi, bə̀ŋsə ŋwə.

¹⁰ Yeso gi tɨ́ vəŋ laa, «Kɨ viŋ fee me! Viŋ gə nàysə tɨ́ vaŋ-nshwi vaŋ laa vəŋ gə shɨ Galilii, buu vəŋ taa ye mə yifi.»

¹¹ Faŋ vəŋ nə ndɔ kɨ gə, nshiisə sɔ́ jwi, gə̀ ŋìi taa shɨ, nàysə vənu mbɨə faŋ mbə nə gày vənshə tɨ́ vɨɨ kwalə məfeꞌ Nwi.

¹² Vɨɨ kwalə məfeꞌ Nwi ghɔ vəshɨꞌ baytə shəŋ muꞌ maa məgi kɔ̀ŋ nu kɔ́, kɨ nii kɔ̀ ka yaŋ tɨ́ vəsogeꞌ vɔ́,

¹³ gì tɨ́ vəŋ laa, vəŋ naysə tɨ́ vɨɨ laa vɨɨ məzwetə nu Yeso nii jwì vətuꞌ, fùusə ŋku ki faŋ vəŋ nii bɨbwey,

¹⁴ baa nə laa, «Kɨ luu goməna taa zɔ nɨniŋ, yia taa jwi bwasə fwi yi, tɨ́ kaꞌ ŋwə kee kə̀ə viŋ nə nsɔꞌ me.»

¹⁵ Vəsogeꞌ vɔ́ fi ka ghɔ́, yɨ̀ faŋ vɨ nàysə tɨ́ vəŋ nə. Nɨniŋ, yigi yɔ́ saynə taa ŋwaa vɨɨ Jus kɔ tɔ və-ndee.

Faŋ Yeso nə fùu yikəꞌ vɨɨ məzwetə nu ki shɨ Galilii

¹⁶ Gə fɨ maa vɨɨ məzwetə nu Yeso njɔ-yimuꞌ nə, vəŋ ndɔ gə̀ shɨ Galilii, gə̀ kòꞌ fuu baŋ njyə faŋ Yeso yaa naysə tɨ́ vəŋ.

¹⁷ Vəŋ ziꞌ yifi, ye ŋwə, gwènə ŋwə. Luu nə, vɨɨ mɔ́ꞌ kɨ bɨbɨꞌtə.

¹⁸ Yeso shəŋtə gə̀ yɨ vəŋ, gì tɨ́ vəŋ laa, «Nwi kɔ̀ wutə kənshə shee fɨ taa yizɔ nə fɨ nsi.

¹⁹ Viŋ gə taa məshɨ mənshə fɨ taa mbi, kɨ yɨsə vɨɨ gu vɨɨ məzwetə nu kaŋ. Viŋ kɔ muu mə Nwi tɨ́ vəŋ maa yizii tɨta Nwi, nə yizii Wee (Nwi), baa nə yizii Zwitə Ley,

²⁰ deesə vəŋ maa mənuŋsə vənu vənshə faŋ mə yaa nàysə tɨ́ viŋ nə. Viŋ kɨ lumə laa mə taa luu yɨ viŋ ghee nshə, gə ziꞌ maa vəndwə və mbi.»