Matiu 27 - Vengo (Babungo)

¹ Kɨ luu ŋkee taa nshia-ndoo-mbisɨ, vɨɨ kwalə məfeꞌ Nwi ghɔ vəshɨꞌ vənshə baa fàynə, kà nu kɔ́ kɔ̀ŋ Yeso maa məzwi ŋwə.

² Vəŋ ka ŋwə, ndì ŋwə, tɔ̀ŋ ŋwə tɨ́ goməna Pilate.

Faŋ Judas Iskariot nə kù

³ Faŋ Judas, wə ntɨə faŋ ŋwə nə fìŋ Yeso nə, ye laa vɨ shìa laa vɨ zwi Yeso, ŋwə luŋ kɔŋ nu bwə ki, ndì ŋkaŋsə muu-mbɔɔ faŋ ŋwə nə fìŋ Yeso shɔ nə, gə̀ baa bə̀ŋsə tɨ́ vɨɨ kwalə məfeꞌ Nwi nə vəshɨꞌ,

⁴ gì laa, «Mə yɨ̀ nu bwə faŋ mə nə fìŋ wuu məmbuꞌ nə.» Vəŋ gi laa, «Kee lùu nu kia me. Luu ŋkɨɨ nu.»

⁵ Ŋwə mɔꞌ ka ghɔ́ nsi taa ŋii Nwi yikwalə, kɨ nii yindɔ, gə̀ sɨŋsə.

⁶ Vɨɨ kwalə məfeꞌ Nwi ndi ka ghɔ́, gì laa, «Kaꞌ vɨ kee kwàŋ taa ka ŋii Nwi me, buꞌ laa lùu ka mənshi.»

⁷ Vəŋ duꞌ nsi gì, kɨ nii ndì ka ghɔ́, ywàŋ tay shɔ fɨ ghɔ wuu məbɔŋ vəntɨɨ, ndì maa shəŋ mətəə vəndɔ.

⁸ Lùu ŋiꞌ nu ŋkɨə faŋ vɨ tii tay kɔ́ nə tay fənshi, kɔ tɔ və-ndee.

⁹ Nɨniŋ, ŋkə faynə maa nu ŋkɨə faŋ nshiiŋii-sɔghɔ Jeremaya nə nàysə laa, «Mə nə ndì ŋkaŋsə sɔ́ muu-ntia, shwaŋ wi faŋ vaŋ Isirayl nə tə nə,

¹⁰ ndì kɔ̀ maa tay wuu məbɔŋ vəntɨɨ, faŋ Nwi nə nàysə shee nə.»

Faŋ goməna Pilate nə shia nsɔꞌ tɔ Yeso

¹¹ Nɨniŋ, Yeso tɨŋ vɨsɨ Goməna. Goməna bitə tɨ́ ŋwə laa, «A luu fwàŋ vɨɨ Jus mu?» Yeso gi laa, «Gì ghɔ nɨniŋ.»

¹² Vɨɨ kwalə məfeꞌ Nwi nə vəshɨꞌ fɨ taa shɨ gi vənu tɔ ŋwə, ŋwə kee kɔ̀ bəŋsə me.

¹³ Goməna Pilate gi tɨ́ ŋwə laa, «Maa a zɔ̀ vənu vəweꞌvə faŋ vəŋ gì kɔ̀ŋ ghɔ nə?»

¹⁴ Luu nə, Yeso kee kɔ̀ bəŋsə tuu maa nu kəmuꞌ me. Nu kɔ́ ghɔꞌ goməna.

¹⁵ Ŋkə nə luu laa maa yighee yitianə yɔ́, goməna Pilate yaa kɨ fuusə wuu ŋii mfiŋ muꞌ, faŋ vɨɨ Jus bìtə tɨ́ ŋwə, ŋwə kɔ tɨ́ vəŋ.

¹⁶ Maa yighee yɔ́ wuu ŋii mfiŋ kwalə mɔ́ꞌ nə luu shɔ, faŋ vɨ nəə tii ŋwə nə Barabas.

¹⁷ Faŋ vɨɨ nə bàytə shɔ nə, goməna Pilate gi tɨ́ vəŋ laa, «Viŋ kəə laa mə fuusə ndə tɨ́ viŋ? Bàw mə fuusə Barabas mu, mu Yeso faŋ vɨ tii ŋwə nə Kristo nə?»

¹⁸ Ŋwə nə gì nɨniŋ buꞌ laa ŋwə nəə kɔꞌ kɨɨ laa vəŋ nə ghɨ̀ꞌ Yeso ghɨghɨꞌ, buu kɔ ŋwə maa nsɔꞌ.

¹⁹ Kɨ luu maa yighee yɔ́, faŋ goməna nə dùꞌ fuu ŋkaw məshia nsɔꞌ nə, zu wi tɔŋ ntɔŋ tɨ́ ŋwə laa, kɨ ŋwə kwaŋ ghɔ maa nu nsɔꞌ wuu ley wì me, laa nu ki nii ghaysə yi dɨdɨꞌ ndee taa njyəə.

²⁰ Luu nə, vɨɨ kwalə məfeꞌ Nwi ghɔ vəshɨꞌ dɔɔ laa vɨɨ vɔ́ bitə Barabas, baa nə laa vɨ zwi Yeso.

²¹ Goməna baa gì tɨ́ vəŋ laa, «Fɨ maa vɨɨ və̀ vəbɔɔ nə, viŋ kəə laa mə fuusə ndə tɨ́ viŋ?» Vəŋ gi laa Barabas.

²² Goməna Pilate gi tɨ́ vəŋ laa, «Mə kɨ luu fùusə Barabas, buu mə taa yɨ kə nə Yeso faŋ vɨ tii ŋwə nə Kristo?» Vəŋ vənshə gi laa bàw vɨ bey ŋwə fuu fəŋkɔꞌ fə ŋkɨꞌsə.

²³ Ŋwə gi laa buꞌ kə, baa nə laa, ŋwə sii yɨ̀ kə bwə? Vəŋ baa mètə kɨ yɨyumə laa vɨ bey ŋwə fuu fəŋkɔꞌ fə ŋkɨꞌsə.

²⁴ Faŋ Pilate nə ye laa nu kee fùu fɨ maa yigisə yi me, baa ye laa yumə koꞌ yaŋ dɨdɨꞌ, ŋwə bitə muu, sɔ̀ ghɔ yi shɔ vɨsɨ nwaa vɨɨ vɔ́, gì laa, «Viŋ ye, mə kee kìi nu kɔ̀ŋ nu mənshi mə wə ŋwə̀ me, mə lùu məmbuꞌ, luu ŋkiŋ nu.»

²⁵ Vɨɨ vɔ́ vənshə bəŋsə laa, «Mənshi mi ndɔ koꞌ tɔ yia nə vaŋ via.»

²⁶ Nɨniŋ, ŋwə fuusə Barabas, kɔ̀ tɨ́ vəŋ, ndì Yeso, gì laa vɨ saŋ ŋwə nə vəmfa, gə̀ bey ŋwə fuu fəŋkɔꞌ fə ŋkɨꞌsə.

Faŋ vəsogeꞌ nə tàw Yeso

²⁷ Vəsogeꞌ və goməna kɨ nii ndì Yeso, ŋìi nə ŋwə ntoꞌ goməna, tìi nwaa vəsogeꞌ vənshə, vəŋ faynə, kia ŋwə,

²⁸ shòꞌtə njwi si, mɔ̀ꞌ njwi yibay maa ŋwə,

²⁹ ndɔ ba yisɔꞌ fɨ maa nyawsə, bèe tɔ ŋwə laa lùu yisɔꞌ vəfwàŋ, ndɔ̀ ndì dəə, kɔ̀ ghɔ ŋwə kwiŋ maꞌnə, jwi tùŋ vətɔ vəyəə vəvəŋ nsi vɨsɨ ŋwə, gisə laa, «Yia shɔꞌtə ghɔ mɔɔ, fwàŋ vɨɨ Jus,» taw ŋwə nɨniŋ,

³⁰ baa shèꞌ mənti maa ŋwə, ndɔ̀ fì dəə kɔ́ fɨ ghɔ ŋwə, sàŋ tɔ ŋwə.

³¹ Faŋ vəŋ taw ŋwə mètə, ndɔ̀ shòꞌ njwi yibay yɔ́ fɨ maa ŋwə, mɔ̀ꞌ ŋkee nsii njwisə maa ŋwə, kɨ nii ndì ŋwə, gə̀ nə ŋwə maa məbey fuu fəŋkɔꞌ fə ŋkɨꞌsə.

Faŋ vɨ nə bèy Yeso fuu fəŋkɔꞌ fə ŋkɨꞌsə

³² Faŋ vəŋ nəə koꞌ gə, fàynə ghɔ vɨ wə mɔ́ꞌ fɨ shɨ Kirene, yizii yi luu Saymon. Vəŋ dɔɔ wə ghɔ́ laa ŋwə shaꞌ fəŋkɔꞌ fə ŋkɨꞌsə fə Yeso.

³³ Vəŋ gə nɨniŋ, zìꞌ maa shəŋ kəmɔ́ꞌ faŋ vɨ tii nə Golgota, faŋ lùu laa shəŋ ghutə tɔ wə.

³⁴ Vəŋ kɔ məluꞌ tɨ́ ŋwə faŋ vɨ nə wàsə mbiŋ taa tey yi, laa ŋwə nu. Ŋwə mɔŋ məluꞌ mbɔ́, kee bee nu me.

³⁵ Vəŋ kɨ nii bey ŋwə fuu fəŋkɔꞌ fə ŋkɨꞌsə, ndì njwisə si, tùŋ beꞌ maa məgaatə,

³⁶ kɨ nii dùꞌ nsi, kɨ ndeynə ŋwə.

³⁷ Ŋwaꞌlə nsɔꞌ wi faŋ vɨ nə nyɔ̀ꞌ tɔ fəŋkɔꞌ fə ŋkɨꞌsə fi luu laa, «Lùu Yeso, fwàŋ vɨɨ Jus nə.»

³⁸ Vɨ nə baa bèy vəndɔꞌ vəmɔ́ꞌ vəbɔɔ yɨ ŋwə, ŋgwə muꞌ maa kwiŋ maꞌnə wi, ŋgwə muꞌ maa kwiŋ ŋkwii.

³⁹ Vɨɨ mbɨə faŋ vəŋ nə shɔɔ fɨ yifi, nəꞌsə yitɔ yivəŋ, taw ŋwə,

⁴⁰ gi laa, «Aŋ ghɔ, faŋ kaꞌ a sɔ̀ꞌ ŋii Nwi yikwalə, baa fìanə maa vəshi vətia, bweysə ŋwaa wə ndwə. Kɨ luu laa a lùu Wee Nwi, siꞌ fɨ fuu fəŋkɔꞌ fəŋkɨꞌsə fə.»

⁴¹ Sheꞌ nɨniŋ, vɨɨ kwalə məfeꞌ Nwi, ghɔ vɨ vɨɨ mədeesə ŋwaꞌlə Nwi nə vəshɨꞌ taw ŋwə nɨzi,

⁴² ndɔ gisə laa, «Ŋwə nəə bweysə vɨɨ day, kee kɨɨ bweysə nshɨ-tɔ wi me. Kɨ luu laa ŋwə luu fwàŋ vɨɨ Isirayl, bàw ŋwə siꞌ fɨ fuu fəŋkɔꞌ fə ŋkɨꞌsə ndwə, buu nsiŋ kɨ nii bìŋ ŋwə.

⁴³ Ŋwə nə nùŋ fwi yi maa Nwi, bàw Nwi bweysə ŋwə ndwə, faŋ Nwi kàw ŋwə, fɔnə ŋwə yaa gi laa yi lùu Wee Nwi.»

⁴⁴ Vəndɔꞌ mbɨə faŋ vɨ nə bey ghɔ vɨ vəŋ mɔ́ꞌ nə, nə ndasə ŋwə sheꞌ nɨniŋ nɨzi.

Faŋ Yeso nə kù

⁴⁵ Kɨ lùu maa yizɔ buꞌtə, vədɨꞌ fəŋ ŋkee yaa nɨntəŋ vətuꞌ maa vəshəŋ vənshə, gə ziꞌ maa vəshɨshwi vətia.

⁴⁶ Kɨ luu maa vəshɨshwi vətia, Yeso yumə ŋkee nəŋay laa, «Eli, Eli, lama sabatani,» faŋ lùu laa, «Nwi ŋwaa, Nwi ŋwaa, a mèꞌtə mə buꞌ kə?»

⁴⁷ Vɨɨ mbɨə faŋ vəŋ nə tɨ̀ŋ yifi nə, zɔ, gì laa ŋwə tii nshiiŋii-sɔghɔ Elias.

⁴⁸ Wə muꞌ fɨ taa ŋwaa vɨɨ vɔ́ nyɨŋ gə̀ ndì kushaa, bèy taa kəŋ məluꞌ məmɔ́ꞌ nee, sɔ tɔ fəntɨ, kɔ̀ tɨ́ ŋwə laa ŋwə nu.

⁴⁹ Luu nə, vɨɨ mɔ́ꞌ gi laa, «Meꞌtə, nsiŋ taa ye laa Elias taa jwi bweysə ŋwə mu?»

⁵⁰ Yeso baa kii yumə ŋkee nəŋay, zwitə ki kɨ nii yime, ŋwə ku.

⁵¹ Sheꞌ yighee yɔ́ njwi yikwalə faŋ vɨ nə shìanə shəŋ ley Nwi fɨ ghɔ shəŋ məduꞌ vɨɨ taa ŋii Nwi yikwalə nə, seenə vəway vəbɔɔ, tèy fɨ tɔ yi, gə kɔ ŋiꞌ yi. Nsi nəꞌnə, təghɔsə seekə,

⁵² təswi tə vɨɨ ŋaꞌnə, vɨɨ ley Nwi vəyaŋ ywey fɨ shɨ yiku.

⁵³ Yighee njyə faŋ Yeso nə ywèy fɨ shɨ yiku, vɨɨ vɔ́ fuu fɨ taa təswi təvəŋ, gə̀ taa shɨ, fùu yikəꞌ vɨɨ vəyaŋ.

⁵⁴ Tɨɨ vəsogeꞌ ghɔ vɨ vɨɨ vi faŋ vəŋ nə dùꞌ, kɨ ndeynə Yeso nə, ye mənəꞌnə nsi ghɔ́, baa nə vənu vənshə faŋ mbə nə gày, vəŋ fee dɨdɨꞌ, gì laa, «Ŋkee yinsəŋ, nə luu ŋkee Wee Nwi nə.»

⁵⁵ Vəki nə luu shɔ vəyaŋ faŋ vəŋ nə bèꞌsə Yeso shù fɨ shɨ Galilii, toꞌ faꞌ tɨ́ ŋwə. Vəŋ nə tɨ̀ŋ ntaŋ, kɨ ye.

⁵⁶ Wə muꞌ fɨ taa ŋwaa vəki vɔ́ nə luu Meri Madalin, wuu mɔ́ꞌ luu Meri, nshu Jeyms ghɔ Josef, wuu mɔ́ꞌ luu nshu vaŋ Zebedii.

Faŋ vɨ nə tə̀ə Yeso

⁵⁷ Kɨ lùu laynəfu, tɨɨ ka mɔ́ꞌ jwi faŋ ŋwə nə ndɔ̀ fɨ ntɨꞌ Arimatia, yizii yi lùu Josef. Ŋwə nə baa lùu wuu məzwetə nu Yeso.

⁵⁸ Ŋwə ndɔ gə̀ maa goməna Pilate, gə̀ ndwàŋ ŋku ŋwaa Yeso fɨ ghɔ ŋwə. Goməna Pilate biŋ laa vɨ kɔ tɨ́ ŋwə.

⁵⁹ Ŋwə gə ndì ŋku Yeso, ndìŋ taa njwi yiley,

⁶⁰ gə̀ kwaŋ ŋkee taa swi ŋwə faŋ ŋwə nə tàw fɨ taa ŋoꞌ, ndɔ̀ bɨ̀ŋsə nshɨ-ŋoꞌ, nùŋ shuu swi yɔ́, ndɔ̀.

⁶¹ Meri Madalin ghɔ Meri ŋgwii-wə nə luu yifi, dùꞌ yɨ swi yɔ́.

⁶² Fu baa kɨ lee, faŋ shi məlootə ŋwaa maa yitianə Pasa nə shɔ̀ɔ nə, vɨɨ kwalə məfeꞌ Nwi nə vɨɨ Farisii gə yè goməna Pilate,

⁶³ gì laa, «Tɨta, yia lumə laa wuu təba wì nə gì maa yighee njyə faŋ ŋwə nəə kɨ bii mbi, laa yi taa ywey fɨ shɨ yiku faŋ vəshi vətia taa shɔɔ.

⁶⁴ Nɨniŋ, ŋkə bàw laa a yɨsə vɨ kɨ shii swi ghɔ́, zìꞌ maa vəshi vɔ́ vətia nə, buꞌ vɨɨ məzwetə nu ki taa gə shaw ŋwə, bàꞌsə, yuu naysə tɨ́ vɨɨ laa ŋwə ywèy fɨ shɨ yiku, yuu mənay ghɔ́ yaŋ shɔ̀ɔ ŋgwə vɨsɨ.»

⁶⁵ Goməna Pilate gi tɨ́ vəŋ laa, «Ye vɨɨ məshii vədɨꞌ viŋ feenə. Viŋ ndi vəŋ, gə̀ yɨ̀sə vɨ kɨ shii yuu ŋkə kuꞌnə tɨ́ viŋ.»

⁶⁶ Vəŋ gə, gə̀ nùŋsə vəsogeꞌ vɔ́ maa məshii, baa fəŋ ndɔ shwènə shuu swi ghɔ́ ŋkee jəə.