Matiu 24 - Vengo (Babungo)

Faŋ Yeso naysə vənu faŋ mbə ndɔ gay yighee yiba

¹ Yeso kɨ nii fùu fɨ taa ŋii Nwi yikwalə, kɨ gə vɨsɨ, vɨɨ məzwetə nu ki shəŋtə jwì yɨ ŋwə, də̀ tɨ́ ŋwə faŋ vɨ nə bɔ̀ŋ ŋii Nwi yɔ́, nyə baw.

² Ŋwə bəŋsə tɨ́ vəŋ laa, «Viŋ ndèynə vətɔ vɔ́ vənshə mu? Viŋ zɔ! Mə naysə tɨ́ viŋ yinsəŋ laa, vɨ ndɔ sɔꞌ ŋii nyə̀ yinshə. Vɨ kee ndɔ meꞌtə tuu ŋkee ŋoꞌ yimuꞌ, nyə nɔŋ fuu liŋ wi me.»

³ Vəŋ shɔɔ gə̀ dùꞌ fuu baŋ vətɨ və məŋgwə. Vəŋ kɨ dùꞌ yifi, vɨɨ məzwetə nu Yeso shəŋtə jwi yɨ ŋwə, sheꞌ vəŋ vəŋ, gì tɨ́ ŋwə laa, «Naysə yighee njyə faŋ nu kɔ́ ndɔ gay tɨ́ yia, nə shwenə ŋkɨə faŋ ŋkə ndɔ də laa yighee kɨkuꞌ faŋ a ndɔ bəŋ jwi, baa nə faŋ mbi ndɔ ndwə nə.»

⁴ Yeso bəŋsə tɨ́ vəŋ laa, «Viŋ tɔfə buꞌ vɨ ndɔ bweꞌsə viŋ.

⁵ Vɨɨ vəyaŋ ndɔ fuu taa mbi, kɨ tii təzii təvəŋ maa yizii nyaa, gisə laa vəŋ lùu Kristo, wuu məbweysə vɨɨ Nwi, kɨ bweꞌsə vɨɨ vəyaŋ shɔ.

⁶ Yighee njyə faŋ viŋ ndɔ kɨ zɔ nu yighaw, baa zɔ̀ lumə yighaw, kɨ fwi siŋ lɔꞌ me. Vənu vɔ́ ndɔ ghaa gay nɨniŋ. Luu nə, vəndwə və mbi kee ta kùꞌnə maa yighee yɔ́ me.

⁷ Shɨ ndɔ fuu gə kɨ kəə kəmɔ́ꞌ nə yighaw. Yifwàŋ kɨ kəə yimɔ́ꞌ nə yighaw. Jɨŋ koo məshɨ məshɨ. Nsi kɨ nəꞌnə vəshəŋ vəshəŋ.

⁸ Vənu vɔ́ vənshə ndɔ luu vənzi və ŋɨꞌ njyə faŋ nyə ndɔ gay mbi, buu mbi kɨ nii yindwə. Nyə ndɔ baa lùu yaa nu wəzwi faŋ ŋwə ndɔŋmə wee, zɔ məza.

⁹ Yiŋkii ndɔ kɨ shɔɔ, vɨ jiatə viŋ, kɔ̀ maa vəshəŋ və ŋɨꞌ, zwìlə viŋ. Vɨɨ kɨ bee viŋ taa məshɨ mənshə buꞌ nu yizii kaŋ.

¹⁰ Nɨniŋ, vɨɨ vəyaŋ fɨ taa ŋwaa viŋ suꞌtə ghuu vəŋ fɨ yiba jɨŋ mə. Vɨɨ mɔ́ꞌ kɨ bɨsə təzii tə vɨɨ mɔ́ꞌ. Vɨɨ mɔ́ꞌ kɨ bee vɨɨ mɔ́ꞌ.

¹¹ Vɨɨ məsɨɨ təba maa yigisə Nwi fuu mbi vəyaŋ, kɨ bweꞌsə vɨɨ vəyaŋ.

¹² Faŋ nu mətwey ntɨsə Nwi ndɔ kɨ gə vɨsɨ vɨsɨ nə, nu ŋkawnə bwa fɨ taa fwisə vɨɨ vəyaŋ.

¹³ Luu nə, wə ntɨə faŋ ŋwə jia fwi yi, nùŋ sheꞌ maa Nwi, zìꞌ maa vəndwə, ndɔ bwey.

¹⁴ Nu mɔ́ꞌ lùu laa vɨ ndɔ fɨꞌtə ntɔŋ yijəə buꞌ nu yifwàŋ yizɔ taa mbi yinshə. Vɨɨ fɨ taa məshɨ mənshə ndɔ zɔ ntee, buu vəndwə və mbi ndɔ kuꞌnə.

¹⁵ Viŋ zɔ! Yighee njyə faŋ viŋ ndɔ ye ŋkee fa bwə faŋ ŋkə bɨ̀sə taa ŋii Nwi, duꞌ maa shəŋ ley Nwi, sheꞌ faŋ nshiiŋii-sɔghɔ Daniel nə fɨꞌtə nə,

¹⁶ bàw vɨɨ mbɨə faŋ vəŋ ndɔ luu shɨ Judia, nyɨŋkə, koꞌ gə̀ ndènə taa təkweꞌ. Wə ntɨə faŋ ŋwə tii shəŋ ŋwaꞌlə kə̀, ŋwə kɨ ywiitə, kɨɨ nə ŋiꞌ ki.

¹⁷ Wə faŋ ŋwə ndɔ duꞌ tɔ ŋii maa yighee yɔ́, kɨ ŋwə baa siꞌ gə ndi vətɔ fɨ taa ŋii me.

¹⁸ Wə faŋ ŋwə ndɔ luu taa biisə, kɨ ŋwə baa kuunə maa məndi njwi yindiŋ yi me. Bàw viŋ nyɨŋkə sheꞌ yighee muꞌ.

¹⁹ Ŋkə ndɔ luu ŋkee kəbwə tɨ́ vəki gɔsə, baa nə tɨ́ vəki faŋ vəŋ nyɔŋsə vaŋ.

²⁰ Viŋ kɨ shɔꞌtə Nwi laa kɨ yighee mənyɨŋ yɔ́ kee ndɔ luu maa yighee gwə me, tɨꞌnə me maa shi zwisə Nwi me.

²¹ Mə gì nɨniŋ buꞌ laa vɨɨ ndɔ ye ŋɨꞌ ŋkee dɨdɨꞌ maa yighee yɔ́. Shù fɨ maa vənzi və mbi, faŋ Nwi nə bɔ̀ŋ mbi nə, jwi ziꞌ ndwə, ŋɨꞌ yimɔ́ꞌ nə kee ta fùu yaa yinjii me, yimɔ́ꞌ kee ndɔ baa fùu yaa yinjii me.

²² Luu nə, Nwi ndɔ shia vəshi vɔ́ buꞌ vɨɨ mbɨə faŋ ŋwə shòꞌ vəŋ nə. Ŋwə nəə toꞌ kee ndɔ shia vəshi vɔ́ me, buu kaꞌ tuu wə muꞌ kee ndɔ bwey me.

²³ Ndɔ luu maa yighee yɔ́, wə kɨ luu gì tɨ́ viŋ laa, viŋ ye Kristo, wuu məbweysə vɨɨ Nwi, feenə, tɨꞌnə me fiŋnə, kɨ viŋ biŋ me.

²⁴ Vɨɨ ndɔ fuu vəyaŋ faŋ vəŋ sɨɨ ba, gisə laa vəŋ luu Kristo, tɨꞌnə me nshiisə-ŋii sɔghɔ. Vəŋ ndɔ də vəshwenə və shuu yɔŋvə maa məyɨ laa vɨɨ ndi jɨɨ, mɔŋ ŋkee maa məbweꞌsə vɨɨ mbɨə faŋ Nwi shoꞌ vəŋ nə.

²⁵ Nɨniŋ, mə duꞌtə mə naysə tɨ́ viŋ buu yighee taa kuꞌ.

²⁶ Vɨ ndɔ kɨ luu naysə tɨ́ viŋ laa Kristo luu taa tɔɔ waꞌsə, kɨ viŋ gə shɔ me. Kɨ luu laa vɨ gì laa, «Ye ŋwə taa ŋii,» kɨ viŋ biŋ me.

²⁷ Yighee njyə faŋ Wuu yinsəŋ Nwi ndɔ baa bə̀ŋ jwì, vɨ ndɔ kɨ gwəkə ye ŋwə maa vəshəŋ vənshə. Ŋkə ndɔ luu sheꞌ yaa yibay faŋ nyə yaa kɨ ndɔ fɨ kwiŋ ntɔŋ-shɨshwi, ndwaꞌlə gə ziꞌ kwiŋ mfiŋ-shɨshwi.

²⁸ Shəŋ ŋkɨə faŋ ŋku nyaa nɔ̀ŋ shɔ, lùu shəŋ ŋkɨə faŋ vəbaba-ŋkɔŋ-me taa kɨ baytə shɔ nɨzi.

²⁹ Sheꞌ yighee njyə faŋ vəshi və ŋɨꞌ yɔ́ ndɔ kɨ mè, shɨshwi ndɔ fəŋ, ŋuu kee baa kɔ̀ məley wi me. Məjwiŋ fiŋkə fɨ taa yizɔ. Vəwutə faŋ mbə lùu yizɔ nə, nəꞌnə.

³⁰ Shwenə Wuu yinsəŋ Nwi kɨ nii fùu taa yizɔ. Vɨɨ məshɨ mənshə fɨ taa mbi gwia, kɨ ye Wuu yinsəŋ Nwi ghɔ́, faŋ ŋwə bəŋ jwì fɨ fuu mbɔꞌ fɨ taa yizɔ, nə wutə nə feenə yaŋ.

³¹ Ŋwə ndɔ jwi nɨniŋ, tɔ̀ŋ nshiisə-ŋiisə si nə yisaw yikwalə faŋ vɨ taw ŋkee nəŋay. Nshiisə-ŋiisə sɔ́ baytə vɨɨ mbɨə faŋ vɨ shòꞌ fɨ taa mfaysə mbi sənshə, nə fɨ maa vəndwə və mbi vənshə.

³² Viŋ zwetə nu fɨ maa yigisə tii kɔ̀ŋ tɨ taŋ. Yighee njyə faŋ vəvi yaa kɨ tɔŋkə vəfi, viŋ kɨ nii yikɨɨ laa bɨŋ taa shəŋ.

³³ Sheꞌ nɨniŋ, yighee njyə faŋ viŋ ye vənu vɔ́ vənshə gay, viŋ kɔꞌ kɨ nii kɨɨ laa vəndwə və mbi lùu nshənə.

³⁴ Viŋ zɔ! Mə naysə tɨ́ viŋ yinsəŋ laa, ŋgwi nyə̀ kee taa mè me, buu vənu vɔ́ gay vənshə.

³⁵ Yizɔ ghɔ nsi ndɔ me, luu nə, yigisə nyaa kee mè me.

³⁶ Nɨniŋ, shi kɔ́ faŋ vənu vɔ́ ndɔ gay nə, tɨꞌnə me yighee yɔ́, kaꞌ wə kee kɨɨ me. Ŋkee nshiisə-ŋiisə Nwi nə Wee Nwi, kee kɨ̀ɨ nə shi kɔ́ me, kɨɨ sheꞌ tɨta Nwi nɨnɔŋ wi.

³⁷ Yighee njyə faŋ Wuu yinsəŋ Nwi ndɔ baa bəŋ jwì, ŋkə ndɔ luu sheꞌ faŋ ŋkə nə lùu maa vəshi və Noa.

³⁸ Vɨɨ ndɔ kɨ yɨsə sheꞌ faŋ vɨ nə yɨ̀ maa yighee Noa, buu muu fuu, ndìsə vəŋ nə. Vəŋ nə zɨzɨ, ndɔ nɨnu, vɨ nəə ndaa, baa kɔ̀ məndaa fu, gə ziꞌ maa shi ŋkɨə faŋ Noa nə ŋìi taa bay.

³⁹ Vəŋ nə kee yikɨɨ me, gə ziꞌ maa yighee njyə faŋ muu nə fùu, ndìsə vəŋ vənshə. Ŋkə ndɔ luu sheꞌ nɨniŋ maa yighee njyə faŋ Wuu yinsəŋ Nwi ghɔ́ ndɔ bəŋ jwì nə.

⁴⁰ Maa yighee yɔ́, vɨɨ vəbɔɔ ndɔ luu taa biisə, vɨ ndi wə muꞌ, mèꞌtə wuu mɔ́ꞌ.

⁴¹ Vəki vəbɔɔ ndɔ kɨ gɔ bee maa shəŋ kəmuꞌ, vɨ ndi wə muꞌ, mèꞌtə wuu mɔ́ꞌ.

⁴² Nɨniŋ, viŋ kɨ shi nə yikɨꞌ, buꞌ laa viŋ kee kɨɨ nə shi ŋkɨə faŋ Tɨta wiŋ ndɔ jwi shɔ nə me.

⁴³ Viŋ zɔ! Tɨɨ ŋii toꞌ kɨɨ nə yighee njyə faŋ ndɔꞌ taa kɨ jwi shɔ fu ŋwə, buu ŋwə kɨkɨꞌ, kee biŋ laa ndɔꞌ ghɔ́ bɨꞌ ŋii yi, ŋii me.

⁴⁴ Sheꞌ nɨniŋ, bàw viŋ kɨ shi nə yikɨꞌ nɨzi, buꞌ laa Wuu yinsəŋ Nwi ndɔ baa bəŋ jwi maa yighee faŋ viŋ kee bɨꞌtə laa ŋwə jɨjwi me.»

Yigisə tii buꞌ wuu faꞌ jəə nə wuu faꞌ bwə

⁴⁵ Yeso baa kɨ tii yigisə tii yimɔ́ꞌ tɨ́ vəŋ, gì laa lee, «Bàw viŋ lùu yaa wuu faꞌ yinsəŋ, baa lùu yaa wuu yitɔfə, faŋ tɨɨ faꞌ wi nùŋsə ŋwə tɔ vɨɨ faꞌ vi, laa ŋwə kɨ kɔ fazɨ tɨ́ vəŋ maa yighee yijəənə.

⁴⁶ Mənɔŋ-bwaŋnə tɔ wuu faꞌ ŋgwə faŋ tɨɨ faꞌ wi kɨ jwi, ŋwə nə yɨ̀ nɨniŋ.

⁴⁷ Mə naysə tɨ́ viŋ yinsəŋ laa tɨɨ faꞌ wi taa meꞌtə vətɔ vi vənshə tɨ́ wuu faꞌ ghɔ́, laa ŋwə kɨ ndeynə.

⁴⁸ Luu nə, wuu faꞌ bwə kɨ luu gi fɨ taa fwi ŋwə laa, «Tɨɨ faꞌ ŋwaa tày,»

⁴⁹ kɨ nii tèy kɨ saŋ vɨɨ faꞌ vəmɔ́ꞌ, zɨ, ndɔ nu, ghɔ vɨ vɨɨ faŋ vəŋ nu məluꞌ, mbə shɔɔ sɨ vəŋ.

⁵⁰ Tɨɨ faꞌ wuu faꞌ ghɔ́ ndɔ jwi maa shi kəmɔ́ꞌ, baa nə maa yighee yimɔ́ꞌ faŋ wuu faꞌ ghɔ́ kee bɨꞌtə nɨniŋ me, kee yikɨɨ me.

⁵¹ Tɨɨ faꞌ wi ghɔ́ taa kɨ jwi, jwì nùꞌ məŋkɔ, kɔ̀ tɨ́ ŋwə, kwàŋ ŋwə taa ŋwaa vɨɨ məboꞌ ŋwaa, ŋwə ŋii taa shəŋ faŋ yigwia lùu shɔ yiyaŋ, vəŋ kɨ kwə gɨꞌ vəŋ shɔ.»