Matiu 23 - Vengo (Babungo)

Faŋ Yeso nə gi kɔ̀ŋ vɨɨ mədeesə ŋwaꞌlə Nwi baa nə vɨɨ Farisii

¹ Yiŋkii kɨ shɔɔ, Yeso gi tɨ́ nwaa vɨɨ vəyaŋ faŋ vəŋ nə bàytə yɨ ŋwə, ghɔ vɨ vɨɨ məzwetə nu ki laa,

² «Vɨɨ mədeesə ŋwaꞌlə Nwi ghɔ vɨ vɨɨ Farisii dùꞌ fuu ŋkaw Mose, kɨ deesə ntɨsə Mose.

³ Vənu vənshə faŋ vəŋ naysə tɨ́ viŋ, viŋ jia, kɨ yɨsə. Luu nə, kɨ viŋ kɨ yɨsə faŋ vəŋ yɨsə me, buꞌ laa vəŋ gɨgisə, kee yɨyɨ me.

⁴ Vəŋ kà vətɔ vədɨɨvə, koꞌsə mbəꞌ vɨɨ, tɨ́ nshɨ-tɔ vəŋ kee kàw maa məkɔŋ vəbiꞌ vɔ́ tuu tɨtiꞌ me.

⁵ Gə fɨ maa vənu vəjəəvə vənshə faŋ vəŋ yɨsə nə, vəŋ yɨsə sheꞌ laa vɨɨ kɨ ye. Vəŋ nyɔ̀ꞌ ŋwaꞌlə vəŋ maa məlumə Nwi fuu waytə gɔ yizisə, ka nsaysə dəsə maa njwisə vəŋ maa məlumə ntɨsə Nwi, luu nə, yɨsə vənu vɔ́ sheꞌ laa vɨɨ kɨ ye vəŋ.

⁶ Vəŋ baa luu kaw maa məduꞌ vɨsɨ taa ŋii yitianə, baa dùꞌ fuu vəŋkaw vəkwalə taa ndɔꞌ Nwi,

⁷ baa kaw laa vɨɨ kɨ shɔꞌtə vəŋ taa təwiŋ, tii vəŋ nə vɨɨ mədeesə vəkwalə.

⁸ Gə fɨ maa viŋ, kɨ viŋ biŋ laa vɨɨ kɨ tii viŋ nə vɨɨ mədeesə vəkwalə me, buꞌ laa wuu mədeesə wiŋ luu sheꞌ muꞌ, lùu Nwi. Viŋ vənshə kɨ nii lùu vaŋ-nshwi.

⁹ Kɨ viŋ tii wə mɔ́ꞌ nə tii wiŋ fɨ shɨ nsi nyə̀ me, buꞌ laa tii wiŋ lùu Nwi faŋ ŋwə lùu yizɔ.

¹⁰ Kɨ viŋ biŋ laa vɨɨ kɨ tii viŋ nə vətɨɨ jɨɨ me, buꞌ laa tɨɨ jɨɨ wiŋ luu sheꞌ muꞌ, lùu Kristo.

¹¹ Wə ntɨə faŋ ŋwə lùu wuu kwalə taa ŋwaa viŋ, bàw ŋwə luu wuu faꞌ wiŋ.

¹² Wə ntɨə faŋ ŋwə koꞌsə ŋwaa wi, vɨ ndɔ suꞌsə ŋwə nsi. Wə ntɨə faŋ ŋwə suꞌsə ŋwaa nsi, vɨ ndɔ koꞌsə ŋwə yizɔ.»

Faŋ Yeso nə kwàŋ ndwaŋ tɔ vɨɨ mədeesə ŋwaꞌlə Nwi baa nə vɨɨ Farisii

¹³ Yeso nə baa gì laa lee, «Ndwaŋ tɔ viŋ, vɨɨ mədeesə ŋwaꞌlə Nwi nə vɨɨ Farisii; viŋ lùu vɨɨ məboꞌ ŋwaa. Viŋ fəŋ shuu yifwàŋ fɨ yizɔ fɨ ghɔ vɨɨ. Nshɨ-tɔ wiŋ kee ŋìi shɔ me. Gə fɨ maa vɨɨ mbɨə faŋ vəŋ kəə ŋii shɔ, viŋ fəŋ vəŋ.

¹⁴ Ndwaŋ tɔ viŋ, vɨɨ mədeesə ŋwaꞌlə Nwi nə vɨɨ Farisii; viŋ lùu vɨɨ məboꞌ ŋwaa. Viŋ fi ndɔꞌ fɨ ghɔ vəki ŋkusə, zɨ, ndɔ shɔ̀ꞌtə Nwi nə təgi təyaŋ, tay dɨdɨꞌ maa məboꞌ sɨ vɨɨ. Nɨniŋ, nsɔꞌ njyə faŋ Nwi ndɔ kwaŋ maa viŋ, ndɔ weꞌ shɔ̀ɔ ki.

¹⁵ Ndwaŋ tɔ viŋ, vɨɨ mədeesə ŋwaꞌlə Nwi nə vɨɨ Farisii; viŋ toꞌ gə̀ maa vəshəŋ vənshə, shɔɔ fɨ fuu mamuu nə fɨ fuu nsi yinshə laa viŋ kiasə wə muꞌ, ŋwə gu wuu məbiŋ Nwi wiŋ. Luu nə, yighee njyə faŋ ŋwə kìasə nɨniŋ, viŋ yɨ̀sə ŋwə gù wuu bwə, shɔ̀ɔ viŋ taa nu bwə ghee bɔɔ, ndɔ ŋii taa shəŋ vəŋku və nsisə vəbwəvə taa wi.

¹⁶ Ndwaŋ tɔ viŋ, vɨɨ sɨ fɨsə, faŋ viŋ kəə də̀ jɨɨ tɨ́ vɨɨ nə. Viŋ gisə laa, wə kɨ luu lɨꞌtə nu maa yizii ŋii Nwi yikwalə, buu kaꞌ vɨ shìasə. Luu nə, ŋwə kɨ lɨꞌtə maa goolə fɨ taa ŋii Nwi yɔ́, buu ŋkə taa lùu kəweꞌ.

¹⁷ Viŋ vəmfaw, vɨɨ sɨ fɨsə, sii kwàlə kə? Kwàlə goolə mu, mu ŋii Nwi faŋ nyə yɨsə goolə ghɔ́ gù fa Nwi?

¹⁸ Viŋ baa gisə laa, kɨ luu wə lɨꞌtə nu maa shəŋ məkɔ Nwi, kee lùu nu me. Luu nə, ŋwə lɨꞌtə maa fa məkɔ Nwi faŋ vɨ nùŋsə fuu yi nə, buu lùu nu weꞌ.

¹⁹ Viŋ lùu vɨɨ sɨ fɨsə! Sii shɔ̀ɔ ŋkɨə? Shɔ̀ɔ fa məkɔ Nwi kɔ́ mu? Bey. Maa shɔ̀ɔ shəŋ məkɔ Nwi faŋ ŋkə yɨsə fa kɔ́ gu fa Nwi.

²⁰ Wə faŋ ŋwə lɨ̀ꞌtə shəŋ məkɔ Nwi, buu ŋwə lɨ̀ꞌtə shəŋ kɔ́ nə vətɔ vənshə faŋ mbə lùu fuu yi nə.

²¹ Wə ntɨə faŋ ŋwə lɨꞌtə yizii ŋii Nwi, buu ŋwə lɨꞌtə ghɔ Nwi faŋ ŋwə shi taa ŋii Nwi yɔ́.

²² Wə ntɨə faŋ ŋwə lɨ̀ꞌtə yizɔ, buu ŋwə lɨ̀ꞌtə luu kenə Nwi, nə Nwi faŋ Nwi dùꞌ fuu yi nə.

²³ Ndwaŋ tɔ viŋ, vɨɨ mədeesə ŋwaꞌlə Nwi nə vɨɨ Farisii, viŋ lùu vɨɨ məboꞌ ŋwaa! Viŋ kɔ way kəmuꞌ fɨ taa vəway yighuŋ tɨ́ Nwi, kɔ ŋkee fɨ maa vətɔ və taa biisə vəghilə. Luu nə, viŋ shìasə maa məzɔnə nu ŋkɨə faŋ ŋkə lùu kəkwalə fɨ taa ntɨsə Nwi, yaa nu loomə, nə nu məkee gəŋsə, nə mənuŋ fwi maa Nwi. Bàw viŋ yɨsə yimbii vənu, kee kɨ manə vəmɔ́ꞌ me.

²⁴ Viŋ lùu vɨɨ sɨ fɨsə faŋ vəŋ kəə də̀ jɨɨ tɨ́ vɨɨ. Viŋ yaa kɨ fuusə nyɨnjwi fɨ taa məluꞌ, bee kii mèlə nyaa yikwalə.

²⁵ Ndwaŋ tɔ viŋ, vɨɨ mədeesə ŋwaꞌlə Nwi nə vɨɨ Farisii, viŋ lùu vɨɨ məboꞌ ŋwaa. Viŋ sɔ̀ ndawsə nə vəkay fɨ fu, luu nə, taa tey wi lwaŋ nə vətɔ vəbwəvə.

²⁶ Aŋ ghɔ, wuu Farisii, wuu sɨ fɨsə, bàw a sɔ taa ndaw wə ŋkəə, buu mbɨɨ yi taa ley nɨzi.

²⁷ Ndwaŋ tɔ viŋ, vɨɨ mədeesə ŋwaꞌlə Nwi nə vɨɨ Farisii, viŋ luu vɨɨ məboꞌ ŋwaa. Viŋ fɨ̀nə təswi faŋ vɨ zwìsə nə fɨŋ. Ntə luu ŋkee təjəə fɨ fu, luu nə, taa tey wi luu ŋkee bwə, baa lwàŋ nə vəwutə vəŋku və vɨɨ.

²⁸ Luu sheꞌ faŋ viŋ dùꞌ yikəꞌ vɨɨ, yaa vɨɨ faŋ vənu vəvəŋ lùu vəloomə. Luu nə, məfuŋsə ŋwaa nə nu mətwey ntɨsə Nwi lwàŋ taa fwisə viŋ.

²⁹ Ndwaŋ tɔ viŋ, vɨɨ mədeesə ŋwaꞌlə Nwi nə vɨɨ Farisii, viŋ lùu vɨɨ məboꞌ ŋwaa. Viŋ bɔŋ təswi tə nshiisə-ŋii sɔghɔ fɨ ywaŋ-vɨsɨ, bɔ̀ŋ vətɔ vəjəəvə fuu təswi tə vɨɨ loomə,

³⁰ ndɔ gisə laa viŋ nəə toꞌ luu mbi maa yighee vətɨɨ viŋ, buu viŋ vɨ vəŋ nə kee fàynə ghɔ maa məzwilə nshiisə-ŋii sɔghɔ sɔ́ me.

³¹ Nɨniŋ, viŋ bìŋ ntee laa viŋ lùu vaŋ vɨɨ vɔ́ faŋ vəŋ nə zwìlə nshiisə-ŋii sɔghɔ nə.

³² Viŋ ndɔ baa kùꞌsə nu bwə vətɨɨ viŋ vɔ́, yɨ̀sə ŋkə lwaŋ taa mfɨꞌ.

³³ Aŋ viŋ, zɔsə nə vaŋ-zɔsə vəshay, viŋ sii taa nyɨŋ nsɔꞌ Nwi kɨkə, laa kɨ vɨ kee mɔꞌ viŋ taa shəŋ vəŋku və nsisə vəbwəvə taa wi me?»

Faŋ vɨɨ Isirayl ndɔ ye ŋɨꞌ buꞌ laa vəŋ nə shìasə Yeso

³⁴ Yeso nə baa gì tɨ́ vɨɨ vɔ́ laa, «Viŋ zɔ! Nwi gì laa yi ndɔ tɔŋ nshiisə-ŋii sɔghɔ, nə vɨɨ yitɔfə, nə vɨɨ mədeesə ŋwaꞌlə Nwi tɨ́ viŋ, viŋ zwilə vəmɔ́ꞌ fɨ taa ŋwaa vəŋ, bey vəmɔ́ꞌ fuu fəŋkɔꞌ fə ŋkɨꞌsə, saŋ vəmɔ́ꞌ fɨ taa ŋwaa vəŋ taa ndɔꞌ Nwi ghiŋ, ndɔ shoꞌ ghuu vəŋ, vəŋ kɨ nyɨŋ fɨ shɨ tɔŋ, gə shɨ tɔŋ day.

³⁵ Nɨniŋ, mənshi mə vɨɨ loomə vənshə fɨ taa mbi faŋ vɨ zwìlə vəŋ nə, ndɔ koꞌ tɔ viŋ. Vɨ ndɔ kwaŋ viŋ taa nsɔꞌ buꞌ vɨɨ vɔ́ faŋ vɨ zwìlə vəŋ nə, tèy fɨ maa Abel faŋ nu ki nə luu kəloomə nə, gə ziꞌ maa Zakaraya, wee Barakias, faŋ viŋ nə zwì ŋwə yɨ shəŋ məkɔ Nwi nə.

³⁶ Mə naysə ŋkee nu yinsəŋ tɨ́ viŋ laa, vənu vɔ́ vənshə ndɔ koꞌ tɔ ŋgwisə yiŋ.

³⁷ Aŋ Jerusalem, Jerusalem, a zwìlə nshiisə-ŋii sɔghɔ, tùmə vɨɨ mbɨə faŋ Nwi tɔ̀ŋ tɨ́ ghɔ, nə ŋoꞌsə. Mə nəə kəə fàynə vaŋ və ghee yaŋ, yaa nshɨ ŋgu yaa kɨ kuutə vaŋ vi taa ghalə ŋwə nə. Luu nə, viŋ kee biŋ me.

³⁸ Nɨniŋ, mə naysə tɨ́ viŋ laa yishuu yindɔꞌ yiŋ ndɔ goꞌ dayday.

³⁹ Mə baa naysə tɨ́ viŋ laa, zì ndee, viŋ kee ndɔ baa ye mə me, gə ziꞌ maa shi ŋkɨə faŋ viŋ ndɔ gi laa, «Mənɔŋ-bwaŋnə tɨ́ wə ntɨə faŋ ŋwə jɨjwi maa yizii tɨta Nwi.»