Matiu 2 - Vengo (Babungo)

Faŋ vɨɨ məkɨɨ nə məjwiŋ nə jwi yè Yeso

¹ Yighee njyə faŋ vɨ nə bì Yeso ntɨꞌ Betelehem, shɨ Judia, maa yighee fwàŋ Herod, vɨɨ məkɨɨ nə məjwiŋ ndɔ fɨ kwiŋ ntɔŋ-shɨshwi, jwi Jerusalem,

² jwi bìtə laa, «Wee ŋgwə faŋ vɨ bì ŋwə maa fwàŋ vɨɨ Jus nə bə? Yia nə yè fəjwiŋ fi fuu faŋ yia nə luu ntɔŋ-shɨshwi. Yia jwi laa yia jwi shɔ̀ꞌtə ŋwə.»

³ Fwàŋ Herod zɔ nu kɔ́, gwəkə, fèe ghɔ vɨ ntɨꞌ Jerusalem yinshə.

⁴ Ŋwə baytə vɨɨ kwalə məfeꞌ Nwi nə vɨɨ mədeesə ŋwaꞌlə Nwi faŋ vəŋ nə luu shɨ ŋwə vənshə, bìtə tɨ́ vəŋ laa vɨ ndɔ bi Kristo, wuu məbweysə vɨɨ Nwi fə?

⁵ Vəŋ bəŋsə tɨ́ ŋwə laa, «Ntɨꞌ Betelehem fɨ shɨ Judia. Lùu nɨniŋ buꞌ laa nshiiŋii-sɔghɔ nə ŋwàꞌlə laa,

⁶ «Aŋ ghɔ, ntɨꞌ Betelehem fɨ shɨ Judia, a kee bee luu tɨtiꞌ fɨ maa ntɨꞌsə Judia me, buꞌlaa tɨɨ məsɔꞌ vɨɨ ndɔ fuu fɨ ghɔ ghɔ, kɨ shiinə ŋgwisə vɨɨ Isirayl.»

⁷ Fwàŋ Herod zɔ nɨniŋ, tìi vɨɨ məkɨɨ nə məjwiŋ vɔ́ maa shuŋ, kɨ təəmə yighee njyə faŋ fəjwiŋ fɔ́ nə fùu shɔ fɨ ghɔ vəŋ ŋkee jəə,

⁸ kɨ nii tɔ̀ŋ vəŋ ntɨꞌ Betelehem, gì laa, «Viŋ gə kə̀ə wee ghɔ́ ŋkee bisə-ŋii. Viŋ taa ye ŋwə, viŋ bəŋ jwì nàysə shee, tɨ́ kaꞌ mə gə shɔ̀ꞌtə ŋwə nɨzi.»

⁹ Vəŋ zɔ nu ŋkɨə faŋ fwàŋ gì nə, gə̀ nə ŋwaa vəŋ. Faŋ vəŋ gə̀ nɨniŋ, fəjwiŋ mfɨə faŋ vəŋ nə yè faŋ vəŋ nə luu kwiŋ ntɔŋ-shɨshwi nə, fi vɨsɨ fɨ ghɔ vəŋ, gə̀ tɨ̀ŋnə tɔ shəŋ ŋkɨə faŋ wee ghɔ́ nə luu shɔ.

¹⁰ Vəŋ ye fəjwiŋ fɔ́, ŋàytə ŋkee dɨdɨꞌ,

¹¹ shɔɔ gə̀ ŋìi taa ŋii yɔ́, yè wee ghɔ́ ghɔ nshu wi Meri. Vəŋ guŋnə nsi, bə̀ŋsə wee ghɔ́, keꞌtə vətɔ vəvəŋ, kèy wee ghɔ́ nə goolə, baa nə ndiŋ, nə məŋgwə mə lamenda (faŋ nə luu ŋkee vətɔ və shwaŋ ndɔŋnə.)

¹² Faŋ vəŋ nə luu yifi, njyəə shi vəŋ. Nwi tɨ vəŋ taa njyəə laa kɨ vəŋ baa bəŋ gə yɨ fwàŋ Herod me. Nɨniŋ, vəŋ shɔɔ fɨ maa jɨɨ yiday, gə̀ shɨ vəŋ.

Faŋ Nwi nə bwèysə Yeso fɨ ghɔ fwàŋ Herod

¹³ Vəŋ ndɔ nɨniŋ, njyəə shi Josef. Nshiiŋii Nwi jwi maa ŋwə taa njyəə, gì tɨ́ ŋwə laa, «Ndɔ fɨ nsi, ndì wee ŋwə̀ ghɔ nshu wi, nyɨŋ gə̀ shɨ Ijip, gòꞌ shɔ, zìꞌ maa yighee njyə faŋ mə ndɔ naysə tɨ́ ghɔ, buꞌ laa fwàŋ Herod shoꞌ ghuu wee ŋwə̀ maa məzwi ŋwə.»

¹⁴ Josef ndɔ yizɔ sheꞌ vətuꞌ shi kɔ́, ndì wee ghɔ́, ghɔ nshu wi, nyɨŋ gə̀ nə vəŋ shɨ Ijip.

¹⁵ Vəŋ gə dùꞌ shɔ, zìꞌ maa yighee njyə faŋ fwàŋ Herod nə kù. Nɨniŋ, ŋkə faynə nə nu ŋkɨə faŋ tɨta Nwi nə yɨ̀sə nshiiŋii-sɔghɔ nə naysə fɨshi. Ŋwə nə nàysə laa, «Mə Nwi tii ŋwiŋ ŋwaa fɨ shɨ Ijip.»

¹⁶ Fwàŋ Herod kɨ ye laa vɨɨ məkɨɨ nə məjwiŋ vɔ́ nə bwèꞌsə yi, njyoꞌ yi lia dɨdɨꞌ, ŋwə tɔŋ vəsogeꞌ, vəŋ gə zwìlə vaŋ-vəndɔŋ vəbwavə vənshə fɨ ntɨꞌ Betelehem nə fɨ maa kwiŋ ghɔ́ nshə, mbɨə faŋ vɨ bɨ kɨ bɨbi vəŋ, gə ziꞌ tɨ́ mbɨə faŋ vəŋ lùu ŋuꞌsə bɔɔ, buꞌ laa nə luu yighee njyə faŋ ŋwə nə tə̀əmə fɨ ghɔ vɨɨ məkɨɨ nə məjwiŋ vɔ́.

¹⁷ Nu kɔ́ kɨ nii fàynə maa nu ŋkɨə faŋ nshiiŋii-sɔghɔ Jeremaya nə naysə̀.

¹⁸ Ŋwə nə gì laa lee, «Yumə koꞌ fɨ ntɨꞌ Rama, gwia shɨŋsə dɨdɨꞌ. Rahel gwia vaŋ vi, kee biŋ laa vɨ shɨŋsə ŋwə me, buꞌ laa vaŋ vi kee baa lùu shɔ me.»

¹⁹ Yighee njyə faŋ fwàŋ Herod nə kù, njyəə baa kɨ shi Josef shɨ Ijip. Nshiiŋii Nwi baa kɨ jwi maa ŋwə taa njyəə,

²⁰ gì tɨ́ ŋwə laa, «Ndɔ yizɔ, ndì wee ghɔ́, ghɔ nshu wi, viŋ vɨ vəŋ bəŋ gə̀ shɨ Isirayl, buꞌ laa vɨɨ mbɨə faŋ vəŋ nəə kəə zwi wee ghɔ́ nə, kukə̀.»

²¹ Ŋwə ndɔ fɨ nsi, ndì wee ghɔ́, ghɔ nshu wi, ghɔ vɨ vəŋ bəŋ gə̀ shɨ Isirayl.

²² Luu nə, ŋwə kɨ zɔ laa Arkileyɔs zɨ̀ tɔ tii wi Herod, sɔꞌ shɨ Judia, ŋwə fee maa məgə shɔ. Nwi gi tɨ́ ŋwə taa njyəə laa ŋwə gə luu kwiŋ Galilii.

²³ Ŋwə kɨ nii shɔ̀ɔ gə̀ shɨ Galilii, gə̀ kɨ shi maa ntɨꞌ yimɔ́ꞌ faŋ vɨ tii nə Nazaret. Nɨniŋ, ŋkə faynə maa nu ŋkɨə faŋ nshiiŋii-sɔghɔ nə nàysə laa, vɨ taa kɨ tii ŋwə nə wuu Nazarini.