Matiu 17 - Vengo (Babungo)

Faŋ ŋwaa Yeso nə kìasə, kɨ nɨndwaꞌlə

¹ Vəshi kɨ shɔɔ ntɔfə, Yeso ndi Pita nə Jeyms nə Jɔn, weenshu Jeyms, ghɔ vɨ vəŋ koꞌ fuu baŋ yidə yimɔ́ꞌ sheꞌ vəŋ vəŋ.

² Vəŋ ziꞌ yifi, ŋwaa Yeso kiasə fɨ yikəꞌ vəŋ, yikəꞌ yi bee yaa shɨshwi, njwisə si fu laa buu.

³ Mose ghɔ Elias, faŋ lùu nshiisə-ŋii sɔghɔ fɨ ywaŋ-vɨsɨ nə, gwəkə fùu sɨ vəŋ, tɨ̀ŋnə yɨ Yeso, ghɔ vɨ vəŋ nə gisə.

⁴ Pita gi tɨ́ Yeso laa, «Tɨta, ŋkə bàw laa yia lùu feenə nɨzi. Kɨ luu a biŋ, mə fianə təta tətia feenə, ŋgwɨɨ muꞌ nə ŋgwə Mose muꞌ, nə ŋgwə Elias muꞌ.»

⁵ Faŋ ŋwə nəə kɨ bii gisə, mbɔꞌ yiley yimɔ́ꞌ jwi shìtə vəŋ, gɨ Nwi fuu fɨ taa mbɔꞌ yɔ́, gì laa, «Lùu ŋwiŋ ŋwaa nə, faŋ mə kàw. Ŋwə bàw shee nɨzi. Viŋ kɨ zɔnə ŋwə!»

⁶ Vɨɨ məzwetə nu Yeso zɔ, gùkə tuŋ tuŋ, fee ŋkee dɨdɨꞌ.

⁷ Yeso shəŋtə jwi yɨ vəŋ, kɔ̀ŋ vəŋ, gì laa, «Viŋ ndɔ yizɔ! Kɨ viŋ baa fee me!»

⁸ Vəŋ ŋaꞌsə sɨ vəŋ, kee baa yè wə me, ye sheꞌ Yeso nɨnɔŋ wi.

⁹ Vəŋ kɨ nii sìꞌ fɨ fuu baŋ yɔ́. Yeso gi tɨ́ vəŋ laa kɨ vəŋ naysə nu ŋkɨə faŋ vəŋ nii ye tɨ́ wə me, gə ziꞌ maa yighee njyə faŋ yi ndɔ ywey fɨ shɨ yiku.

¹⁰ Vəŋ bitə tɨ́ ŋwə laa, «Sii yɨ̀ kə vɨɨ mədeesə ŋwaꞌlə Nwi gi laa Elias ndɔ ghaa jwi ŋkəə, buu wuu məbweysə taa jwi?»

¹¹ Ŋwə bəŋsə tɨ́ vəŋ laa, «Lùu nɨniŋ, Elias jwi ŋkəə, bɔ̀ŋsə vənu vənshə, mbə neꞌtə.

¹² Luu nə, mə naysə tɨ́ viŋ laa, Elias nə duꞌtə ŋwə jwi. Luu nə, vɨɨ nə kee kɨ̀ɨ nə ŋwə me, yɨ nu ŋkɨə faŋ vəŋ nə kàw maa ŋwə. Gə fɨ maa Wuu yinsəŋ Nwi, ŋwə ndɔ ye ŋɨꞌ fɨ ghɔ vəŋ sheꞌ nɨniŋ.»

¹³ Vɨɨ məzwetə nu ki zɔ, kɨ̀ɨ laa ŋwə gì tɨ́ vəŋ buꞌ Jɔn, wuu məkɔ muu mə Nwi.

Faŋ Yeso nə bwèysə weembwa faŋ ŋwə nəə zasə nə kəŋgu

¹⁴ Vəŋ jwi zìꞌ yɨ nwaa vɨɨ mɔ́ꞌ faŋ vəŋ nə shə̀ŋtə shəŋ muꞌ. Wə mɔ́ꞌ jwi yɨ Yeso, jə̀ vətɔ vəyəə vi nsi vɨsɨ ŋwə,

¹⁵ gì tɨ́ ŋwə laa, «Tɨta, kee gəŋsə ŋwiŋ ŋwaa faŋ ŋwə zasə nə kəŋgu, ye ŋɨꞌ ŋkee yiyaŋ. Ghee yaŋ ŋwə gu taa wi, tɨꞌnə me taa muu.

¹⁶ Mə nə jwì nə ŋwə tɨ́ vɨɨ məzwetə nu kə, vəŋ kee kɨɨ shuꞌ ŋwə me.»

¹⁷ Yeso gi laa, «Aŋ viŋ, ŋgwisə vɨɨ faŋ viŋ kee nùŋ fwi maa Nwi me. Nsiŋ sii taa shi tày kɨkə? Nsiŋ sii taa mwəsə ndəəkə? Viŋ jwi nə wee ghɔ́ shee!»

¹⁸ Vɨ jwi nə wee ghɔ́ tɨ́ Yeso, ŋwə shə tɨ́ zwitə bwə kɔ́ faŋ ŋkə nə luu taa ŋwaa wee ghɔ́, ŋkə fuu fɨ maa ŋwə, wee ghɔ́ bwaŋnə. Shù fɨ maa yighee yɔ́, kəŋgu kee baa mɔꞌ ŋwə me.

¹⁹ Vɨɨ məzwetə nu Yeso jwi yɨ ŋwə fɨ taa vəndenə, gì laa, «Sii nii yɨ̀ kə laa kaꞌ yia kee fùusə ŋkə me?»

²⁰ Ŋwə gi tɨ́ vəŋ laa, «Luu buꞌ faŋ viŋ kee nùŋ fwi maa Nwi, wèꞌ shɔ me. Viŋ zɔ! Mə naysə tɨ́ viŋ yinsəŋ laa, viŋ nii toꞌ nùŋ fwi maa Nwi sheꞌ tɨtiꞌ, sheꞌ yaa mfɨꞌ ŋɨꞌ fulɨsɨgaa, buu kaꞌ viŋ gì tɨ́ baŋ nyə̀ laa nyə muꞌnə gə̀ maa shəŋ kɨkee, buu nyə taa ndɔ yɨ nɨniŋ. Sheꞌ nɨniŋ, kaꞌ nu kee baa ghɔ̀ꞌ viŋ me.

²¹ Gə fɨ maa zwitə bwə kɔ́, kaꞌ kəŋ zwitə kɔ́ kee fùu fɨ taa wə me, maa tɨ̀ lɨꞌ sheꞌ faŋ wə dùꞌ kɨ buꞌ ghɔ tɨ́ Nwi, baa baŋ fazɨ nɨzi me.»

Faŋ Yeso nə bèsə nu ŋɨꞌ ki faŋ nyə ndɔ ŋii maa ŋwə

²² Vəŋ baa kɨ ziꞌ shɨ Galilii, vɨɨ məzwetə nu Yeso duꞌ sheꞌ yɨ Yeso, ŋwə gi tɨ́ vəŋ laa, «Vɨ ndɔ kɔ Wuu yinsəŋ Nwi taa ghɔ vɨɨ,

²³ vəŋ zwi ŋwə. Vəshi kɨ ziꞌ vətia, ŋwə ywey.» Vəŋ zɔ nɨniŋ, luŋ ŋkee dɨdɨꞌ.

Nu yiwa tee faŋ Yeso ghɔ Pita nə mɔ̀ꞌ

²⁴ Vəŋ kɨ ziꞌ ntɨꞌ Kapernaum, vɨɨ mbɨə faŋ vɨ yaa kɨ mɔꞌ ka tasə ŋii Nwi tɨ́ vəŋ, jwi ye Pita, gì tɨ́ ŋwə laa, «Tii wiŋ kee mɔ̀ꞌ tasə ghɔ́ yimu?»

²⁵ Pita gi laa ɔŋ, kɨ ziꞌ shuufɔ, Yeso gi tɨ́ ŋwə laa, «A sii bɨ̀ꞌtə laa kə? Vəfwàŋ fɨ mbi fi tasə fɨ ghɔ vəndə? Vəŋ fi fɨ ghɔ vaŋ binə mu, mu fɨ ghɔ vɨɨ dayday?»

²⁶ Ŋwə laa fɨ ghɔ vɨɨ dayday. Yeso gi tɨ́ ŋwə laa, «Faŋ ŋkə lùu nɨniŋ, buu vaŋ vəŋ binə kee məmɔꞌ me, mu lee?

²⁷ Luu nə, ŋkə kee baw laa nsoo yɨ nu faŋ ŋkə taa bɨ tɨ́ vəŋ me. Nɨniŋ, bàw a gə taa muu, mɔ̀ꞌ tasə koꞌsə fɨ taa muu. Mfɔŋ su faŋ nyə koꞌ, a ŋaꞌsə shuu wi. A taa ye ka shuu nyə. A ndi, gə̀ kɔ̀ tɨ́ vəŋ shee, baa nə maa nshɨ-tɔ wə.»