Matiu 14 - Vengo (Babungo)

Faŋ fwàŋ Herod nə zwì Jɔn, wuu məkɔ muu mə Nwi

¹ Kɨ luu sheꞌ maa yighee yɔ́, fwàŋ Herod zɔ kɔ̀ŋ vənu və Yeso,

² gi tɨ́ nshiisə-ŋii si laa, «Luu Jɔn, wuu məkɔ muu mə Nwi nə, faŋ ŋwə ywèy fɨ shɨ yiku. Lùu nu ŋkɨə faŋ ŋkə yɨ̀ buu ŋwə kii wutə kɔ́ maa məfaꞌ vənu vəkwalə vɔ́.»

³ Ŋwə nə gì nɨniŋ, buꞌ laa nshɨ-tɔ fwàŋ Herod nə jia Jɔn, kwàŋ taa ŋii mfiŋ, buꞌ nu Herodias, zu weenshu wi Filip.

⁴ Fwàŋ Herod nə kwàŋ Jɔn taa ŋii mfiŋ buꞌ faŋ Jɔn nə gì tɨ́ ŋwə laa, ŋkə kee yikuꞌnə laa ŋwə kìi zu weenshu wi me.

⁵ Fwàŋ Herod nəə kəə zwi Jɔn, luu nə, fèe vɨɨ, buꞌ laa vɨɨ nə bìŋ Jɔn laa lùu nshiiŋii-sɔghɔ.

⁶ Luu nə, faŋ shi məbi Herod nə kùꞌnə, wee Herodias bəŋ bəŋ vɨsɨ vɨɨ, ŋkə baw too fwàŋ Herod.

⁷ Nɨniŋ, ŋwə kɔꞌnə nə məlɨꞌtə maa məkɔ fa ŋkɨə faŋ wee-wəzwi ghɔ́ taa bitə fɨ ghɔ ŋwə. Ŋwə nə gì laa wee ghɔ́ kɔlə taa bitə kə, yi taa kɔ tɨ́ ŋwə.

⁸ Wee ghɔ́ gi laa, «Kɔ tɔ Jɔn, wuu məkɔ muu mə Nwi, shee taa nsi.» Ŋwə nə gì nɨniŋ, buꞌ laa nshu wi nə tɨ ŋwə nɨniŋ.

⁹ Fwàŋ kìi məluŋ, luu nə, buꞌ ŋkɔꞌnə yi yɔ́, nə vɨɨ mbɨə faŋ vəŋ nə luu yɨ ŋwə nə, ŋwə gi laa vɨ kɔ tɨ́ wee ghɔ́.

¹⁰ Ŋwə tɔŋ laa vɨ gə shìa tɔ Jɔn fɨ taa ŋii mfiŋ.

¹¹ Nɨniŋ, vɨ shìa tɔ Jɔn, kwàŋ taa nsi, jwì kɔ̀ tɨ́ wee-wəzwi ghɔ́. Wee ghɔ́ gə kɔ̀ tɨ́ nshu wi.

¹² Vɨɨ məzwetə nu Jɔn kɨ nii gə̀ ndì ŋku ki, gə̀ təə, ndɔ̀ gə̀ nàysə tɨ́ Yeso.

Faŋ Yeso nə zə̀ vɨɨ ŋkaŋsə tee

¹³ Yeso zɔ nu kɔ́, ndɔ̀ ŋìi bay, tɔ̀ŋ muu, gə njɨɨ yi maa shəŋ vəndenə sheꞌ ghɔ vɨ vɨɨ vi. Vɨɨ vəyaŋ zɔ, fùu fɨ taa ntɨꞌsə vəŋ, beꞌsə ŋwə fɨ ghuu mbɔꞌ muu.

¹⁴ Nɨniŋ, ŋwə kɨ fuu fɨ taa bay, yè nwaa vɨɨ vəyaŋ, kèe gəŋsə vəŋ, fùusə vəza fɨ maa vɨɨ vəza vəvəŋ.

¹⁵ Kɨ lùu bwafu, vɨɨ məzwetə nu ki jwi yɨ ŋwə, gì laa, «Shəŋ kə̀ luu ŋkee taa tɔɔ waꞌsə, yighee baa shɔ̀ɔ nɨzi, bàw a yɨsə vɨɨ və̀ waꞌkə, gə̀ taa ntɨꞌsə, ywàŋ fazɨ vəŋ.»

¹⁶ Yeso gi tɨ́ vəŋ laa, «Vəŋ sii gə buꞌ kə? Bàw viŋ kɔ fazɨ tɨ́ vəŋ.»

¹⁷ Vəŋ gi tɨ́ ŋwə laa fa kee lùu shɔ ghɔ vəŋ feenə me. Luu sheꞌ yighɨsə bee tee nə vaŋ-susə vəbɔɔ.

¹⁸ Ŋwə gi laa, «Viŋ jwi nə mbə shee!»

¹⁹ Vəŋ jwi kɔ̀ tɨ́ ŋwə. Ŋwə gi tɨ́ nwaa vɨɨ vɔ́ laa vəŋ duꞌ nsi fuu gay. Ŋwə kɨ nii ndì yighɨsə bee yɔ́ tee, nə vaŋ-susə vɔ́ vəbɔɔ, ndèynə yizɔ, bə̀ŋsə Nwi, bɨ̀ꞌtə bee kɔ́, kɔ̀ tɨ́ vɨɨ məzwetə nu ki, vəŋ kɔ tɨ́ vɨɨ vɔ́.

²⁰ Vɨɨ vɔ́ vənshə zɨ zwə̀kə. Vɨ kɨ nii bàytə vəbɨꞌ vəbee faŋ mbə nə gòꞌ, mbə lwaŋ taa ŋkɔɔsə njɔsə-bɔɔ.

²¹ Vɨɨ mbɨə faŋ vəŋ nə zɨ nə, nə luu yaa vəndɔŋ ŋkaŋsə tee. Vɨ nə kee sày vəki ghɔ vɨ vaŋmbwaa me.

Faŋ Yeso nə tòꞌ fɨ fuu muu

²² Yeso kɨ nii yɨ̀sə laa vɨɨ məzwetə nu ki ŋii taa bay, tɔ̀ŋ muu, gə vɨsɨ njɨɨ yi, ŋwə kɔ bwey-jəə tɨ́ vɨɨ vɔ́.

²³ Faŋ ŋwə nə kɔ̀ bwey-jəə tɨ́ vɨɨ vɔ́ nɨniŋ nə, kòꞌ fuu baŋ nɨnɔŋ maa məshɔꞌtə Nwi. Fu kɨ bwa ŋwə kɨ nii lùu yifi nɨnɔŋ,

²⁴ tɨ́ bay kɔ́ ndɔ fɨ mbɔꞌ muu, gə ntaŋ dɨdɨꞌ. Vəba və muu ghaysə vəŋ, buꞌ laa fɨɨ nəə fəŋ vəŋ.

²⁵ Kɨ lùu ntaw ŋkɨꞌ, Yeso jwi yɨ vəŋ, kɨ toꞌ luu fɨ fuu muu.

²⁶ Vɨɨ məzwetə nu ki ye ŋwə, yè faŋ ŋwə toꞌ fɨ fuu muu, vəŋ fee, gì laa luu ŋgɔlə wə, yumə fee.

²⁷ Yeso gi tɨ́ vəŋ yighee muꞌ laa, «Viŋ jia fwi, lùu mə! Kɨ viŋ baa fee me!»

²⁸ Pita bəŋsə tɨ́ ŋwə laa, «Tɨta, kɨ luu laa lùu ghɔ, a gi mə jwi yɨ ghɔ fuu muu.»

²⁹ Yeso gi laa ŋwə jwi. Pita fuu fɨ taa bay, tòꞌ fɨ fuu muu, gə yɨ Yeso.

³⁰ Luu nə, faŋ ŋwə nə toꞌ nɨniŋ, yè fɨɨ, fee, tey kɨ ŋii taa muu, yùmə gì laa, «Tɨta, bweysə mə!»

³¹ Yeso nesə ghɔ ki yighee muꞌ, jia ŋwə, gì tɨ́ ŋwə laa, «A kee nùŋ fwi yə maa Nwi yimu? Sii yɨ̀ kə buu a fee?»

³² Vəŋ kɨ nii ŋìi taa bay, fɨɨ kɔ́ bwa yighee muꞌ.

³³ Vɨɨ fɨ taa bay kɔ́ tuŋ vətɔ vəyəə vəvəŋ nsi vɨsɨ ŋwə, bə̀ŋsə ŋwə, gì laa, «A lùu wee Nwi ŋkee maa yinsəŋ!»

Faŋ Yeso nə gaŋtə vɨɨ vəza nsi Genesaret

³⁴ Nɨniŋ, vəŋ tɔ̀ŋ mamuu ghɔ́, fùu mbɔꞌ muu, zìꞌ nsi Genesaret.

³⁵ Vəndɔŋ fɨ shəŋ kɔ́ kɨɨ nə ŋwə, tɔ̀ŋ ntɔŋ taa ntɨꞌsə kwiŋ yɔ́ sənshə. Vɨ kɨ nii jwì nə vɨɨ vəza tɨ́ ŋwə vənshə,

³⁶ buꞌ ghɔ tɨ́ ŋwə laa ŋwə biŋ vəŋ kɔŋ sheꞌ tɔ njwi yi yindiŋ. Ŋwə biŋ. Vɨɨ vənshə faŋ vəŋ nə kɔ̀ŋ, bwaŋnə.