Matiu 10 - Vengo (Babungo)

Faŋ Yeso nə tɔ̀ŋ vɨɨ məzwetə nu ki maa məfɨꞌtə nu Nwi, baa nə maa məshuꞌ vɨɨ vəza

¹ Yeso kɨ nii tìi vɨɨ məzwetə nu ki njɔsə-bɔɔ, vəŋ jwi yɨ ŋwə. Ŋwə kɔ wutə tɨ́ vəŋ, tɨ́ kaꞌ vəŋ kɨ fuusə vəzwitə vəbwəvə, nə vəza vənshə nə vəndoꞌ vənshə fɨ maa vɨɨ.

² Təzii tə vɨɨ vi vɔ́ njɔsə-bɔɔ nə, lùu nee: Saymon faŋ vɨ tii ŋwə nə Pita, nə Andru weenshu wi, nə Jeyms wee Zebedii, nə Jɔn weenshu wi,

³ nə Filip, nə Bartolomi, nə Tɔmas, nə Matiu wuu məfi tasə, nə Jeyms wee Alfeɔs, nə Tadeɔs,

⁴ nə Saymon wuu Kanahan, nə Judas Iskariot faŋ ŋwə nə fìŋ Yeso nə.

⁵ Yeso tɔŋ vɨɨ vɔ́ njɔsə-bɔɔ nə, gì tɨ́ vəŋ laa, «Kɨ viŋ shɔɔ fɨ maa jɨɨ faŋ nyə gə shɨ vɨɨ faŋ vəŋ kee kɨ̀ɨ nə Nwi me, kee ŋìi shɨ vɨɨ Samaria nɨzi me.

⁶ Viŋ gə luu fɨ yiba jɨŋ vɨɨ Isirayl, faŋ vəŋ lùu yaa nwaa bisə-njɨɨ faŋ nsə ndì.

⁷ Viŋ taa kii toꞌ nɨniŋ, viŋ kɨ naysə tɨ́ vɨɨ laa nu yifwàŋ yizɔ luu nshənə.

⁸ Viŋ kɨ fuusə vəza fɨ maa vɨɨ vəza, yweysə vɨɨ fɨ shɨ yiku, yɨsə zatə bwə me fɨ maa vɨɨ, fuusə vəzwitə vəbwəvə fɨ maa vɨɨ. Viŋ nə fì wutə fɨ ghɔ Nwi dayday, viŋ kɨ kɔ dayday nɨzi.

⁹ Kɨ viŋ kwaŋ tuu mbuu fa ka taa vəmba vəkɔtə viŋ me.

¹⁰ Kɨ viŋ ndi mba yitoꞌ me, kee ndi njwi yimɔ̀ꞌ səbɔɔ me, kee ndi gɔsə nə mbay me, buꞌ laa ŋkə kùꞌnə laa, wə kɨ zəsə wuu faꞌ wi.

¹¹ Viŋ kɨ luu ŋìi taa ntɨꞌ yikwalə, tɨꞌnə me yitɨtiꞌ, viŋ kəə wə faŋ ŋwə kùꞌnə, kɨ shi fu ŋwə, zìꞌ maa shi ŋkɨə faŋ viŋ taa kuunə.

¹² Viŋ kɨ luu ŋìi taa ŋii wə mɔ́ꞌ, viŋ shɔꞌtə vɨɨ taa ŋii yɔ́.

¹³ Kɨ luu vɨɨ fɨ taa ŋii yɔ́ saylə maa viŋ, buu zwitə mənɔŋ-bwaŋnə kiŋ taa ŋii taa ŋwaa vəŋ. Luu nə, vəŋ kɨ luu kee saylə me, buu mənɔŋ-bwaŋnə wiŋ bəŋ jwì maa viŋ.

¹⁴ Kɨ luu vɨɨ kee biŋ nu kiŋ me, kee kɨ zɔ yigisə yiŋ me, viŋ fuu fɨ taa ŋii yɔ́, tɨꞌnə me fɨ taa ntɨꞌ yɔ́, tɔ̀ŋsə ghuu ghiŋ nsi maa shwenə tɨ́ vəŋ.

¹⁵ Mə naysə nu yinsəŋ tɨ́ viŋ laa, nsɔꞌ njyə faŋ nyə ndɔ jia ntɨꞌ yɔ́, weꞌ shɔ̀ɔ njyə shɨ Sodom ghɔ shɨ Gomora maa shi məshia nsɔꞌsə ŋkə yiba.»

Faŋ Yeso nə nàysə tɨ́ vɨɨ ntɔŋ vi laa vɨɨ ndɔ kɔ ŋɨꞌ tɨ́ vəŋ buꞌ nu Nwi

¹⁶ Yeso nə baa nàysə tɨ́ vɨɨ ntɔŋ vi laa, «Viŋ kɔꞌ kɨɨ laa mə tɔŋ viŋ taa mbi sheꞌ yuu vɨ tɔŋ bisə-njɨɨ taa ŋwaa nyaasə bwəsə. Nɨniŋ, viŋ kɨ tɔfə yaa zɔsə, duꞌ nshi yaa vəbɔŋsə.

¹⁷ Viŋ kɨ ndɨɨnə fɨ ghɔ vɨɨ taa mbi, buꞌ laa vəŋ ndɔ kɔ viŋ taa ghɔ vɨɨ məshia nsɔꞌ, baa sàŋ viŋ nə vəmfa taa ndɔꞌ Nwi vəŋ.

¹⁸ Vɨ ndɔ gə nə viŋ vɨsɨ vəgoməna nə vəfwàŋ buꞌ mə. Nɨniŋ, viŋ ndɔ kɨ fɨꞌtə nu Nwi tɨ́ vəŋ, nə tɨ́ vɨɨ faŋ vəŋ kee ta kɨ̀ɨ nə Nwi me.

¹⁹ Vɨ ndɔ kɨ jia viŋ, gə nə viŋ nɨniŋ, kɨ viŋ bɨŋ maa təgi faŋ viŋ taa gi me, tɨꞌnə me buꞌ nu faŋ viŋ taa gi me. Nwi ndɔ kɨ kɔ nu ŋkɨə faŋ viŋ taa gi tɨ́ viŋ sheꞌ maa yighee yɔ́.

²⁰ Nɨniŋ, ndɔ kee kɨ gisə viŋ me; ndɔ kɨ gisə Zwitə tɨta Nwi, Tii wiŋ, faŋ ŋkə lùu taa fwisə viŋ.

²¹ Ndɔ luu maa yighee yɔ́, wə ndɔ kɨ fiŋ weenshu wi tɨ́ yiku, tɨɨ wee kɨ fiŋ ŋwiŋ wi nɨzi, vaŋ kɨ ndɔ jiatə vətɨɨ vəvəŋ nə vənshu vəvəŋ, yɨsə vɨɨ kɨ zwilə vəŋ.

²² Vɨɨ vənshə ndɔ kɨ bee viŋ buꞌ mə. Luu nə, wə ntɨə faŋ ŋwə ndɔ jia fwi yi, zìꞌ maa vəndwə və vənu vɔ́, ndɔ kii məbwey vəlwaŋ.

²³ Vɨ ndɔ kɨ shoꞌ ghuu ghiŋ fɨ taa ntɨꞌ yimɔ́ꞌ, viŋ nyɨŋ gə shəŋ day. Mə naysə nu yinsəŋ tɨ́ viŋ laa viŋ kee ndɔ kia shɨ Isirayl, mètə ntɨꞌsə sənshə me, buu Wuu yinsəŋ Nwi ndɔ bəŋ jwì me.

²⁴ Wuu məzwetə nu kee shɔ̀ɔ wuu mədeesə wi me. Buꞌ kee shɔ̀ɔ tii wi me.

²⁵ Ŋkə kùꞌnə tɨ́ wuu məzwetə nu laa ŋwə lùu yaa wuu mədeesə wi, baa kùꞌnə tɨ́ buꞌ, laa ŋwə lùu yaa tii wi. Vɨ nə tìi mə nə tɨɨ vəzwitə vəbwəvə, faŋ mə lùu tɨɨ fu tɨ́ viŋ nə. Nɨniŋ, vɨ nə taa tii viŋ vaŋ nə kə?»

Faŋ Yeso nə nàysə tɨ́ vɨɨ ntɔŋ vi laa vəŋ jia fwisə vəŋ

²⁶ «Luu nə, kɨ viŋ kɨ fee vəŋ me. Kaꞌ fa kee dùꞌ taa shəŋ mfiŋsə, maa laa ŋkə ndɔ fuu ntee me. Kaꞌ fa kee ndènə maa vɨ ndɔ kɨɨ me.

²⁷ Nu ŋkɨə faŋ mə naysə tɨ́ viŋ taa mfiŋsə, viŋ kɨ naysə taa shɨshwi. Nu ŋkɨə faŋ mə naysə tɨ́ viŋ taa shuŋ, viŋ koꞌ tɨŋnə tɔ ŋii, buu kɨ fɨꞌtə.

²⁸ Kɨ viŋ kɨ fee vɨɨ mbɨə faŋ kaꞌ vəŋ zwìlə yiŋwaa yiŋ, kee kɨɨ zwi zwitə kiŋ me. Viŋ fee sheꞌ Nwi faŋ kaꞌ ŋwə zwì zwitə kiŋ nə ŋwaa wiŋ maa shəŋ vəŋku və nsisə vəbwəvə taa wi.

²⁹ Maa vɨ fìŋ vəndwaŋ vəbɔɔ maa vəfɨlaŋ tee. Luu nə, kaꞌ tuu ndwaŋ kəmuꞌ kee fìŋ nsi maa laa Nwi, Tii wiŋ, yibiŋ me.

³⁰ Gə fɨ maa viŋ, ŋwə say ŋkee nyuŋsə tɔ siŋ sənshə.

³¹ Nɨniŋ, kɨ viŋ kɨ fee me; viŋ shɔ̀ɔ vəndwaŋ ŋkee jəə.

³² Viŋ zɔ! Wə tɨ̀ me wə faŋ ŋwə bìŋ mə ntee vɨsɨ vɨɨ, buu mə ndɔ biŋ ŋwə nɨzi vɨsɨ Tii ŋwaa faŋ ŋwə lùu yizɔ.

³³ Gə fɨ maa wə ntɨə faŋ ŋwə twèy mə vɨsɨ vɨɨ, mə ndɔ twey ŋwə nɨzi vɨsɨ Tii ŋwaa faŋ ŋwə luu yizɔ.

³⁴ Kɨ viŋ bɨꞌtə laa mə nə jwì maa məkɔ məduꞌ-nyɔŋ shɨ nsi me. Mə nə kee jwì maa məkɔ məduꞌ-nyɔŋ me; mə nə jwì maa məkɔ ŋgaasə.

³⁵ Mə nə jwì maa məgaasə wə ghɔ tii wi, gàasə wee-wəzwi ghɔ nshu wi, gàasə wəzwi məndaa ghɔ nshu ndəə wi.

³⁶ Vɨɨ fɨ fu wə kiasə gù vɨɨ mbeenə vi.

³⁷ Wə ntɨə faŋ ŋwə kàw tii wi, tɨꞌnə me nshu wi, shɔ̀ɔ mə, kee kùꞌnə shee me. Wə faŋ ŋwə kàw ŋwiŋ wi wəndɔŋ, tɨꞌnə me wəzwi, shɔ̀ɔ mə, kee kùꞌnə shee me.

³⁸ Wə ntɨə faŋ ŋwə kee bìŋ maa məshaꞌ fəŋkɔꞌ fə ŋkɨꞌsə fi, kɨ beꞌsə mə (ŋkee maa shəŋ ŋɨꞌ) me, buu ŋwə kee kùꞌnə shee me.

³⁹ Wə ntɨə faŋ ŋwə kəə bweysə ŋwaa wi, ndɔ ndisə ŋwaa wi. Gə fɨ maa wə ntɨə faŋ ŋwə ndisə ŋwaa wi buꞌ mə, ŋwə ndɔ bweysə ŋwaa wi, zɨ̀ məbwey vəlwaŋ.»

Wə ntɨə faŋ ŋwə jìa vɨɨ ntɔŋ Yeso, jia luu nshɨ-tɔ Yeso

⁴⁰ Wə ntɨə faŋ ŋwə jìa viŋ jəə, jìa luu mə nɨniŋ. Wə ntɨə faŋ ŋwə jìa mə jəə, jìa luu nshɨ-tɔ Nwi faŋ ŋwə nə tɔ̀ŋ mə nə.

⁴¹ Wə faŋ ŋwə jìa nshiiŋii-sɔghɔ jəə, buꞌ laa lùu nshiiŋii-sɔghɔ, ndɔ zɨ vəkeynə və faꞌ və nshiiŋii-sɔghɔ. Wə ntɨə faŋ ŋwə jìa wuu loomə jəə, buꞌ laa lùu wə faŋ vənu vi luu vəloomə, ndɔ zɨ vəkeynə və faꞌ və wuu loomə.

⁴² Kɨ luu wə kɔ ndaw muu məyoonə tɨ́ wə faŋ ŋwə kee lùu nu me, buu wə ghɔ́ ndɔ kii vəkeynə vi maa yinsəŋ.»