Lukas 8 - Vengo (Babungo)

Nu vəki faŋ vəŋ nə bèꞌsə Yeso

¹ Nu kɔ́ kɨ mè, Yeso ndɔ kɨ toꞌ fɨ taa ntɨꞌsə nə məshɨ, toꞌ fɨ̀ꞌtə nu Nwi shɔ, jwi nə ntɔŋ yijəə kɔ̀ŋ nu yifwàŋ Nwi tɨ́ vɨɨ, toꞌ nɨniŋ, ghɔ vɨ vɨɨ vi njɔsə-bɔɔ luu mɔ́ꞌ.

² Vəki vəmɔ́ꞌ faŋ ŋwə nə fùusə vəzwitə vəbwəvə nə vəza fɨ maa vəŋ, nə beꞌsə ŋwə nɨzi. Meri, faŋ vɨ tii ŋwə nə wuu Madalin, faŋ vəzwitə vəbwəvə kwatia nə fùu fɨ maa ŋwə, nə luu taa ŋwaa vəŋ,

³ nə Joana, zu Shusa faŋ nə luu wuu məndeynə vətɔ və fwàŋ Herod, nə Susana, nə vəki vəmɔ́ꞌ vəyaŋ. Vəki vɔ́ gaŋtə Yeso nə vɨɨ vi nə vətɔ vəvəŋ.

Yigisə tii buꞌ wuu məmɔꞌ say ghinə

⁴ Shi mɔ́ꞌ vɨɨ nə baytə yɨ Yeso ŋkee vəyaŋ, faŋ vəŋ nə ndɔ̀ fɨ taa ntɨꞌsə sənshə. Yeso naysə yigisə tii yimɔ́ꞌ tɨ́ vəŋ, gì laa,

⁵ «Wuu məmɔꞌ say ghinə nə fuu gə̀ maa məmɔꞌ say ghinə, kɨ mɔꞌ nɨniŋ, ghɨmɔ́ꞌ fiŋkə jɨɨ, vɨɨ jeꞌtə, mənwə faŋ mbə vɨɨlə fɨ taa yizɔ, jwi shwə̀tə.

⁶ Way mɔ́ꞌ fiŋkə taa nsi yighɔsə, nyɔꞌ, yɔŋ buꞌ laa nsi nə kee lùu yiyoonə me.

⁷ Way mɔ́ꞌ fiŋkə taa nyawsə, nyɔꞌ, ghɔ nyawsə sɔ́ ta mɔ́ꞌ, nyawsə sɔ́ ndiŋtə say ghɔ́, ŋə ku.

⁸ Way mɔ́ꞌ fiŋkə taa shɔꞌ jəə, ta, mbuu yisay kii say waaghɨꞌ waaghɨꞌ.» Yeso metə yigisə tii yɔ́, baa gì nə gɨ yishaꞌsə laa, «Wə ntɨə faŋ ŋwə kìi tuulə ghi zɔ, ŋwə zɔ!»

Faŋ Yeso nə twèlə ŋiꞌ nu wuu məmɔꞌ say ghinə

⁹ Vɨɨ məzwetə nu Yeso bitə tɨ́ ŋwə laa, ŋiꞌ yigisə tii yɔ́ lùu laa kə?

¹⁰ Ŋwə gi tɨ́ vəŋ laa, «Nwi yɨ̀sə viŋ kɨɨ nə ŋiꞌ nu yifwàŋ ki. Vɨɨ mɔ́ꞌ zɔ ŋkə-vəŋ sheꞌ maa yigisə tii, laa vəŋ kɨ yɨye, kee ye me, zɨzɔ, kee kɨɨ nə ŋiꞌ ki me.

¹¹ Viŋ zɔ! Ŋiꞌ yigisə tii yɔ́ lùu tɨ́ nee: Ŋgwisə say ghinə ghɔ́ faŋ vɨ mɔ̀ꞌ nə, luu yigisə Nwi. Nsi yɔ́ faŋ vɨ mɔ̀ꞌ ŋə shɔ nə, lùu vɨɨ.

¹² Say ŋgɨə faŋ ŋə fìŋkə jɨɨ nə, lùu yaa nu vɨɨ mbɨə faŋ vəŋ yaa kɨ zɔ, tɨɨ vəzwitə vəbwəvə jwi fùusə fɨ taa fwi vəŋ, laa kɨ vəŋ nuŋ fwisə vəŋ maa Nwi, Nwi bweysə vəŋ me.

¹³ Say ŋgɨə faŋ ŋə fìŋkə taa yighɔsə nə, lùu yaa nu vɨɨ mbɨə faŋ vəŋ zɔ̀ nu Nwi, bìŋ nə məŋaytə, luu nə, kee kìi ghay me. Vəŋ biŋ sheꞌ maa wee-fɨ-yighee nee, ŋɨꞌ taa kɨ ŋii vəŋ, vəŋ nyɨŋkə fɨ maa məbiŋ vəŋ ghɔ́.

¹⁴ Gə fɨ maa say ŋgɨə faŋ ŋə fìŋkə taa nyawsə, lùu yaa nu vɨɨ mbɨə faŋ vəŋ zɔ̀ nu Nwi, luu nə, vəŋ taa kɨ bəŋ gə, kɨ kɔŋ ŋwaa vəŋ buꞌ nu vətɔ və shɨ nsi. Nɨniŋ, vənu və ka, nə nu məzɨ ŋwaa bweꞌsə vəŋ, say vəŋ ku nɨniŋ, ŋgwisə yi kee yifuu me.

¹⁵ Gə fɨ maa say ŋgɨə faŋ ŋə fìŋkə taa shɔꞌ jəə nə, lùu yaa nu vɨɨ mbɨə faŋ vəŋ zɔ̀ yigisə Nwi, jìa jəə taa fwisə vəŋ, twèꞌ shɔ, kɨ yɨsə vənu vəjəəvə.»

Faŋ Yeso nə fɨ̀ꞌnə nu Nwi nə kiꞌ

¹⁶ (Yeso baa tìi yigisə tii yimɔ́ꞌ laa,) «Kaꞌ wə kee shùꞌ kiꞌ baa ndì ntɨɨ, kùsə shɔ me, tɨꞌnə me ndì kiꞌ ghɔ́, kwaŋ ŋiꞌ fwaŋ me. Maa ŋwə taa tə fuu fa mətə kiꞌ, laa vɨɨ mbɨə faŋ vəŋ ŋìi taa ŋii, ye vədɨꞌ vəley. Sheꞌ nɨniŋ, wə faŋ ŋwə nùŋ fwi yi maa Nwi, bàw ŋwə yɨsə vɨ ye.

¹⁷ Kaꞌ nu Nwi kee goꞌ taa vəndenə me; ŋkə ndɔ fuu ntee. Kaꞌ vɨ kee ndɨ̀ə nu yinsəŋ Nwi me; ŋkə taa fuu taa shɨshwi, vɨɨ kɨ kɨɨ.

¹⁸ Viŋ kɨ tɔfə faŋ viŋ zɔ yigisə nyaa nə. Wə ntɨə faŋ ŋwə kìi, vɨ ndɔ kuꞌsə tɨ́ ŋwə, ŋwə baa kìi shɨshɔɔ. Wə ntɨə faŋ ŋwə kee yikii me, vɨ ndɔ fɨfi ŋkee tɨtiꞌ ŋgwə faŋ ŋwə kii fɨ ghɔ ŋwə.»

Nu faŋ Yeso nə gi kɔ̀ŋ vaŋ-nshwi vi yinsəŋ

¹⁹ Nə luu maa yighee yɔ́, nshu Yeso ghɔ vaŋ-nshwi Yeso jwi yɨ ŋwə, kee bee ta ziꞌ ŋkee yɨ ŋwə me, buꞌ vɨɨ vəyaŋ faŋ vəŋ nə bàytə, shìtə ŋwə.

²⁰ Vɨɨ mɔ́ꞌ gi tɨ́ ŋwə laa, «Nshu wə ghɔ vaŋ-nshwi və lùu fu, kəə ghɔ.»

²¹ Ŋwə bəŋsə tɨ́ vəŋ laa, «Nshu ŋwaa nə vaŋ-nshwi vaŋ lùu vɨɨ mbɨə faŋ vəŋ zɔ yigisə Nwi, biŋ, toꞌ nɨniŋ.»

Faŋ Yeso nə bwàsə fɨŋ

²² Kɨ luu shi mɔ́ꞌ, Yeso gə ŋìi taa bay, ghɔ vɨ vɨɨ məzwetə nu ki. Ŋwə gi tɨ́ vəŋ laa, «Nsiŋ tɔŋ maghia, gə̀ njɨɨ yi.» Vəŋ gə,

²³ kii gə, mbweysə koo Yeso, ŋwə bwey taa bay. Fɨŋ kɨ nii yikoꞌ, shɔ̀ɔ fɨ fuu muu yɔ́, muu ŋii taa bay kɔ́, vəŋ nə kəə ndi.

²⁴ Vɨɨ məzwetə nu Yeso gə yə̀ŋ ŋwə fɨ mbweysə, gì laa, «Tɨta, tɨta, nsiŋ taa ndi!» Ŋwə yenə fɨ mbweysə, ndɔ̀ yizɔ, shə̀ tɨ́ fɨŋ kɔ́ nə tɨ́ vəba və muu, mbə bwa, vədɨꞌ zu.

²⁵ Ŋwə gi tɨ́ vəŋ laa, «Viŋ kee nùŋ fwi siŋ maa Nwi yimu?» Vəŋ fee. Shuu vəŋ yɔŋ. Vəŋ gi wə nə wə laa, «Sii bee lùu ndə nə, faŋ ŋwə sɔꞌ fɨɨ nə muu, mbə zɔnə ŋwə?»

Faŋ Yeso nə fuusə vəzwitə vəbwəvə fɨ maa wuu Gerasa

²⁶ Yeso ghɔ vɨ vɨɨ məzwetə nu ki tɔŋ muu, gə̀ zìꞌ shɨ Gerasa, faŋ ŋkə bɔ̀ŋsə vɨsɨ shɨ Galilii nə.

²⁷ Yeso fuu fɨ taa bay, koꞌ mbɔꞌ-bia, ghɔ wə mɔ́ꞌ faynə faŋ ŋwə nə jwì fɨ taa shɨ yɔ́, faŋ vəzwitə vəbwəvə nə luu taa ŋwaa ŋwə. Ŋkə duꞌtə ŋkə tay, wə ghɔ́ kee shùŋ njwi me, kee shi taa ŋii me, toꞌ shi taa təswi tə vɨɨ.

²⁸ Wə ghɔ́ ye Yeso, yùmə, gù vɨsɨ Yeso, gì tɨ́ ŋwə ŋkee nəŋay laa, «Nsoo kìi kə, Yeso, Wee Nwi Nshɔɔ-mbi? Mə bùꞌ ghɔ tɨ́ ghɔ laa, kɨ ghɔ yɨnə mə me.»

²⁹ Ŋwə nə gì nɨniŋ, buꞌ laa Yeso nəə kəə kɨ sɔꞌ zwitə bwə kɔ́ laa ŋkə fuu fɨ taa ŋwaa wə ghɔ́, buꞌ laa zwitə bwə kɔ́ nəə ghaysə ŋwə shù fɨshi. Vɨ nəə ka ŋwə nə vəsumə və bwey, kwaŋ mfiŋ fəŋ ŋwə, shiinə ŋwə dɨdu. Ŋwə shiatə mfiŋsə sɔ́ ghee ghee, zwitə bwə kɔ́ suŋ ŋwə, ŋwə ndɔ gə taa tɔɔ.

³⁰ Yeso kɨ nii bìtə tɨ́ wə ghɔ́ laa, «Yizii yə lùu kə?» Ŋwə laa Ŋkaŋsə, buꞌ laa vəzwitə vəbwəvə nə ŋìi taa ŋwaa ŋwə vəyaŋ.

³¹ Vəzwitə vəbwəvə vɔ́ buꞌ ghɔ tɨ́ Yeso laa, kɨ ŋwə tɔŋ mbə taa wee-nsi yibay me.

³² Maa yighee yɔ́ nwaa vəŋkwinyaa vəyaŋ nə luu shɔ mbɨɨ kweꞌ, zɨ fɨ fuŋ. Vəzwitə vəbwəvə vɔ́ buꞌ ghɔ tɨ́ Yeso laa ŋwə meꞌtə vəŋ gə ŋìi taa ŋwaa vəŋkwinyaa vɔ́. Ŋwə biŋ.

³³ Vəzwitə vəbwəvə vɔ́ fuu fɨ taa ŋwaa wə ghɔ́, gə̀ ŋìi taa ŋwaa vəŋkwinyaa vɔ́, mbə nyɨŋ, tùŋnə, siꞌ gə̀ gùkə taa muu, nù muu kukə.

³⁴ Vɨɨ mbɨə faŋ vəŋ nəə shii vəŋkwinyaa vɔ́, ye nu kɔ́, nyɨŋ gə̀ kɨ fɨꞌtə nu kɔ́ taa shɨ, nə taa təfu tə tɔɔ.

³⁵ Vɨɨ fuu gə maa məye nu ŋkɨə faŋ ŋkə nii gày shɔ nə. Vəŋ jwi yɨ Yeso, yè wə ntɨə faŋ vəzwitə vəbwəvə fùu fɨ taa ŋwaa ŋwə nə, tɨ́ ŋwə duꞌ ghuu Yeso, shùŋ njwi si, tɔ ki ley. Vəŋ fee.

³⁶ Vɨɨ mbɨə faŋ vəŋ nə ye, naysə tɨ́ vəŋ faŋ Yeso nə bwèysə wuu vəzwitə vəbwəvə ghɔ́ nə.

³⁷ Vɨɨ vɔ́ vənshə fɨ nsi Gerasa zɔ nu kɔ́, gì tɨ́ Yeso laa bàw ŋwə fuu fɨ shɨ vəŋ, buꞌ laa vəŋ nə fee ŋkee dɨdɨꞌ. Nɨniŋ, Yeso baa ŋìi taa bay maa məbəŋ gə̀.

³⁸ Wə ntɨə faŋ vəzwitə vəbwəvə nii lùu taa ŋwaa ŋwə nə, buꞌ ghɔ tɨ́ Yeso laa, ghɔ ŋwə kɨ toꞌ mɔ́ꞌ. Yeso twey tɨ́ ŋwə, gì laa,

³⁹ bàw ŋwə bəŋ gə̀ fɔ vəŋ, kɨ fɨꞌtə nu kwalə ŋkɨə faŋ Nwi yɨ̀sə maa ŋwə nə, tɨ́ vɨɨ. Wə ghɔ́ gə nə ŋwaa ŋgwinə, gə̀ kɨ fɨꞌtə nu ŋkɨə faŋ Yeso nə yɨ̀sə maa ŋwə nə, taa shɨ yɔ́ kənshə.

Faŋ Yeso nə ywèysə wee Jayrəs, shùꞌ wəzwi faŋ ŋwə nəə zɨzasə tày

⁴⁰ Yeso ghɔ vɨ vɨɨ vi bə̀ŋ jwì (shɨ Galilii), nwaa vɨɨ vəyaŋ kɔ bwaŋnə tɨ́ ŋwə, buꞌ laa vəŋ nəə kɨꞌ ŋwə.

⁴¹ Wə mɔ́ꞌ jwi shɔ, faŋ nə luu wuu kwalə taa ŋii Nwi. Yizii yi luu Jayrəs. Ŋwə jwi gu ghuu Yeso, bùꞌ ghɔ tɨ́ ŋwə laa ŋwə jwi taa ŋii yi,

⁴² buꞌ laa ŋwiŋ wi zɨzasə, kəə ku. Wə ghɔ́ nə kii sheꞌ ŋwiŋ wi ghɔ́ muꞌ, faŋ nə luu wee-wəzwi. Wee ghɔ́ nə luu yaa ŋuꞌ njɔsə-bɔɔ. Yeso biŋ, ghɔ wə ghɔ́ gə. Faŋ vəŋ nə gə̀ nɨniŋ nə, nwaa vɨɨ vəyaŋ fiitə Yeso.

⁴³ Wəzwi mɔ́ꞌ nə luu shɔ taa ŋwaa vɨɨ vɔ́ faŋ ŋkwii nəə jwi fɨ maa ŋwə ŋuꞌ njɔsə-bɔɔ, kee shìa me. Ŋwə ndisə ka wi nshə, tuu wə muꞌ nə kee lùu shɔ, shùꞌ za kɔ́ fɨ maa ŋwə me.

⁴⁴ Wəzwi ghɔ́ nyɔꞌtə jwì fiiba, jwì kɔ̀ŋ tɔ njwi Yeso. Ŋkwii yɔ́ me yighee muꞌ.

⁴⁵ Yeso bitə laa, «Kɔ̀ŋ ndə kɔ̀ŋ mə?» Vɨɨ vənshə twey. Pita gi laa, «Maa vɨɨ kia ghɔ, fiitə ghɔ.»

⁴⁶ Yeso gi laa wə mɔ́ꞌ nii kɔ̀ŋ yi, yi zɔ faŋ wutə mɔ́ꞌ fùu fɨ maa yi.

⁴⁷ Wəzwi ghɔ́ ye laa kaꞌ yi kee ndenə fɨ ghɔ Yeso me, ndɔ̀ jwì nə məlaꞌ, gù nsi vɨsɨ Yeso, nàysə nu ŋkɨə faŋ ŋkə yɨ̀sə buu yi kɔŋ ŋwə, baa nə faŋ zatə ki kɔ́ mè yighee muꞌ nə. Vɨɨ vənshə zɔ nu kɔ́.

⁴⁸ Yeso gi tɨ́ wəzwi ghɔ́ laa, «Ŋwiŋ ŋwaa, məbiŋ wə yɨ̀sə a bwaŋnə. Gə nə mənɔŋ-bwaŋnə!»

⁴⁹ Sheꞌ faŋ ŋwə kɨ bii gisə, wə mɔ́ꞌ jwi fɨ taa ŋii tɨɨ ŋii Nwi ghɔ́, jwi gì tɨ́ tɨɨ ŋii Nwi ghɔ́ laa, «Ŋwiŋ wə ku, kɨ baa ghaysə tɨta ŋwaa-nsiŋ me.»

⁵⁰ Yeso zɔ nu kɔ́, gì tɨ́ Jayrəs laa, «Kɨ ghɔ fee me! Nuŋ sheꞌ fwi yə maa Nwi, buu ŋwə taa bwey.»

⁵¹ Yeso ziꞌ fu wə ghɔ́, kee biŋ ghɔ vɨɨ ŋii taa ŋii mɔ́ꞌ me, tɨ̀ lɨꞌ sheꞌ Pita, nə Jɔn, nə Jeyms, baa nə tɨɨ wee ghɔ́ nə nshu wi.

⁵² Vɨɨ vənshə nə gwia, luŋ wee ghɔ́. Yeso gi laa, «Kɨ viŋ baa gwia me. Wee ghɔ́ kee yiku me, ŋwə bɨbwey.»

⁵³ Vəŋ shɨꞌ ŋwə, buꞌ laa vəŋ nəə kɔꞌ kɨɨ laa wee ghɔ́ duꞌtə ŋwə ku.

⁵⁴ Ŋwə gə yɨ wee ghɔ́, jìa kwiŋ wi, tii ŋwə laa, «Weembwa, ndɔ yizɔ!»

⁵⁵ Fwi wee ghɔ́ bəŋ, ŋwə ndɔ yizɔ yighee muꞌ. Yeso gi laa vɨ kɔ fazɨ, wee ghɔ́ zɨ.

⁵⁶ Shuu tii wi ghɔ nshu wi yɔŋ. Ŋwə gi tɨ́ vəŋ laa, kɨ vəŋ naysə nu ŋkɨə faŋ ŋkə nii gày nə, tɨ́ wə me.