Lukas 7 - Vengo (Babungo)

Nu tɨɨ vəsogeꞌ fɨ ntɨꞌ Kapernaum

¹ Yeso kɨ metə yigisə yi yɔ́ yinshə tɨ́ vɨɨ vɔ́ faŋ vəŋ nə tɨ̀ŋnə yifi, kɨ zɔ yigisə yi nə, ŋwə kɨ nii bə̀ŋ gə ntɨꞌ Kapernaum.

² Tɨɨ vəsogeꞌ mɔ́ꞌ nə luu shɔ faŋ ŋwə nə kìi buꞌ wi faŋ ŋwə nə kàw. Buꞌ ghɔ́ nə zɨzasə, luu shuu yiku.

³ Tɨɨ vəsogeꞌ ghɔ́ nə zɔ kɔ̀ŋ Yeso, tɔ̀ŋ vəshɨꞌ və vɨɨ Jus tɨ́ ŋwə, laa vəŋ gə bùꞌ ghɔ tɨ́ ŋwə laa ŋwə jwi bwèysə buꞌ wi ghɔ́.

⁴ Vɨɨ ntɔŋsə vɔ́ gə ziꞌ yɨ Yeso, bùꞌ ghɔ tɨ́ ŋwə ŋkee dɨdɨꞌ, gì laa, «Tɨɨ vəsogeꞌ ghɔ́ kùꞌnə tɨ́ kaꞌ a yɨ̀ nu ŋkɨə faŋ ŋwə bitə tɨ́ ghɔ nə,

⁵ buꞌ laa ŋwə lùu wə faŋ ŋwə kàw nsiŋ. Ŋwə nə bɔ̀ŋ ŋii məshəŋtə nyaa-nsiŋ tɨ́ nsiŋ.»

⁶ Yeso biŋ, ghɔ vɨ vəŋ gə. Vəŋ gə ziꞌ nshənə fɨ fu tɨɨ vəsogeꞌ ghɔ́, tɨɨ vəsogeꞌ ghɔ́ tɔŋ vɨɨmba vi, laa vəŋ gə gì tɨ́ Yeso laa, «Tɨta, kɨ baa bɨŋ me, buꞌ laa mə kee kùꞌnə tɨ́ kaꞌ a ŋìi taa ŋii mə me.

⁷ Lùu ŋiꞌ nu ŋkɨə faŋ ŋkə nii yɨ̀ mə kee jwì nə nshɨ-tɔ ŋwaa yɨ ghɔ me. Bàw a gi sheꞌ nə shuu wə, buu wuu faꞌ ŋwaa taa bwey.

⁸ Maa nshɨ-tɔ ŋwaa lùu wə faŋ wə mɔ́ꞌ lùu vɨsɨ fɨ ghɔ mə, vɨɨ mɔ́ꞌ baa lùu shɔ faŋ mə sɔꞌ vəŋ. Mə gì tɨ́ ŋgwə muꞌ laa ŋwə gə, buu ŋwə taa gə, baa gì tɨ́ wuu mɔ́ꞌ laa ŋwə jwi, buu ŋwə taa jwi. Mə gì tɨ́ buꞌ ŋwaa laa ŋwə yɨ nee, ŋwə yɨ̀.»

⁹ Vɨɨ ntɔŋsə vɔ́ naysə yigi yɔ́ tɨ́ Yeso, shuu wi yɔŋ, ŋwə kiasə ŋwaa wi, gì tɨ́ nwaa vɨɨ mbɨə faŋ vəŋ nəə beꞌsə ŋwə nə laa, «Yinsəŋ, mə nə kee ta yè kəŋ məbiŋ ŋwə̀, faŋ wə ŋwə̀ nùŋ fwi yi maa mə shɨ Isirayl me.»

¹⁰ Vɨɨ ntɔŋ vɔ́ bəŋ kɨ ziꞌ taa ŋii, yè buꞌ ghɔ́, tɨ́ ŋwə bwaŋnə.

Faŋ Yeso nə ywèysə wee-wəndɔŋ ntɨꞌ Nayin

¹¹ Nu kɔ́ kɨ mè, Yeso ndɔ gə̀ maa ntɨꞌ yimɔ́ꞌ, yizii ntɨꞌ yɔ́ luu Nayin. Vɨɨ məzwetə nu ki nə nwaa vɨɨ vəyaŋ beꞌsə ŋwə.

¹² Ŋwə kɨ ziꞌ ntɨꞌ yɔ́, yè vɨɨ faŋ vəŋ nə shàꞌ ŋku wə, fùu nə ŋkə fɨ taa shɨ. Wee ghɔ́ faŋ ŋwə nə ku nə, nə luu sheꞌ muꞌ ghɔ nshu wi. Wəzwi ghɔ́ baa lùu zu ŋku. Vɨɨ vəyaŋ fɨ taa ntɨꞌ yɔ́ nə luu yɨ wəzwi ghɔ́.

¹³ Tɨta Yeso ye wəzwi ghɔ́, kèe gəŋsə maa ŋwə, gì tɨ́ ŋwə laa kɨ ŋwə baa gwia me.

¹⁴ Ŋwə shəŋtə jwì, kɔ̀ŋ ŋwaꞌ ŋgwə faŋ ŋku zawə ghɔ́ nə luu tey yi nə. Vɨɨ mbɨə faŋ vəŋ nə shàꞌ ŋwaꞌ ghɔ́, tɨŋnə. Ŋwə gi tɨ́ ŋku wə ghɔ́ laa, «Zawə, mə gì tɨ́ ghɔ laa a ndɔ yizɔ!»

¹⁵ Wə ghɔ́ ywey, ndɔ tɨŋnə yizɔ, zì kɨ gisə. Yeso kɔ ŋwə tɨ́ nshu wi.

¹⁶ Vɨɨ vənshə fee, bəŋsə Nwi, gì laa, «Ŋkee nshiiŋii-sɔghɔ kwalə fùu taa ŋwaa nsiŋ,» baa nə laa, «Nwi jwì kèe gəŋsə vɨɨ vi.»

¹⁷ Nu ki kɔ́ saynə shɨ Judia kənshə nə taa məshɨ məmɔ́ꞌ faŋ mbə kìa shɨ Judia.

Faŋ Jɔn nə tɔ̀ŋ vɨɨ ntɔŋ tɨ́ Yeso

¹⁸ (Jɔn, wuu məkɔ muu mə Nwi, faŋ ŋwə nə luu taa ŋii mfiŋ maa yighee yɔ́, zɔ vənu və Yeso vɔ́ nɨzi.) Vɨɨ məzwetə nu Jɔn nə naysə vənu vɔ́ vənshə tɨ́ ŋwə. Ŋwə tii vɨɨ vəbɔɔ fɨ taa ŋwaa vɨɨ məzwetə nu ki,

¹⁹ tɔŋ vəŋ tɨ́ tɨta Yeso maa məbitə tɨ́ ŋwə laa ŋwə lùu wə ntɨə faŋ Nwi nə kɔ̀ꞌnə laa ŋwə ndɔ jwi nə mu, mu bàw vɨ kɨ kɨꞌ wuu day?

²⁰ Vɨɨ ntɔŋ vɔ́ jwi yɨ Yeso, gì tɨ́ ŋwə laa, «Jɔn, wuu məkɔ muu mə Nwi, tɔ̀ŋ yia maa ghɔ, laa yia jwi bìtə tɨ́ ghɔ laa, lùu ghɔ lùu wə ntɨə faŋ Nwi nə kɔ̀ꞌnə laa ŋwə ndɔ jwi nə mu, mu yia kɨꞌ wuu mɔ́ꞌ?»

²¹ Maa yighee yɔ́ faŋ vɨɨ ntɔŋ vɔ́ nə jwi yɨ Yeso nə, ŋwə nə shùꞌ vɨɨ vəyaŋ fɨ maa vəza, nə fɨ maa ŋɨꞌ, nə fɨ maa vəzwitə vəbwəvə, gàŋtə vɨɨ sɨ fɨsə vəyaŋ, yɨ̀sə vəŋ yenə.

²² Nɨniŋ, ŋwə bəŋsə tɨ́ vɨɨ ntɔŋ vɔ́ laa, «Viŋ gə fɨꞌtə nu ŋkɨə faŋ viŋ yè, nə nu ŋkɨə faŋ viŋ zɔ̀, tɨ́ Jɔn. Viŋ naysə tɨ́ ŋwə laa vɨɨ sɨ fɨsə yɨyenə, vəndwey tɨtoꞌ, zatə bwə me fɨ maa vɨɨ, vənshii tuulə zɔnə, vəŋku və vɨɨ ywey, mbəəsə zɔ ntɔŋ yijəə Nwi.

²³ Mənɔŋ-bwaŋnə tɨ́ wə ntɨə faŋ njyoꞌ yi kee lìa buꞌ mə me.»

Faŋ Yeso nə twèlə ŋiꞌ nu Jɔn tɨ́ vɨɨ

²⁴ Vɨɨ ntɔŋ Jɔn kii gə, Yeso tey kɨ gisə tɨ́ vɨɨ kɔ̀ŋ Jɔn, wuu məkɔ muu mə Nwi. Ŋwə nə gì tɨ́ vəŋ laa, «Yighee njyə faŋ viŋ nə gə̀ tɔɔ waꞌsə maa məye Jɔn, viŋ nə gə̀ maa kə? Viŋ nə gə̀ maa məye gay faŋ fɨɨ shɔɔ nə̀ꞌsə mu?

²⁵ Viŋ sii nə fuu fɨ taa shɨ maa məgə yè kə? Viŋ nə gə̀ yè wə faŋ ŋwə mɔ̀ꞌ njwisə jəəsə mu? Maa vɨɨ mbɨə faŋ vəŋ mɔꞌ njwisə jəəsə, baa zɨ shɨ, kee shi taa tɔɔ waꞌsə me. Kəŋ vɨɨ vɔ́ lùu taa ntoꞌsə vəfwàŋ.

²⁶ Nɨniŋ, viŋ nə fùu maa məye kə? Viŋ nə kee gə maa məye nshiiŋii-sɔghɔ yimu? Ŋkee maa yinsəŋ, mə naysə tɨ́ viŋ laa, Jɔn nə luu wə faŋ ŋwə shɔ̀ɔ nshiisə-ŋii sɔghɔ.

²⁷ Ŋwə nə luu ŋkee wə ntɨə faŋ vɨ nyɔ̀ꞌ kɔ̀ŋ ŋwə taa ŋwaꞌlə Nwi laa Nwi gi laa, «Viŋ zɔ! Mə ndɔ tɔŋ wuu ntɔŋ ŋwaa vɨsɨ ghɔ, laa ŋwə kɨ lootə jɨɨ tɨ́ ghɔ.»

²⁸ Mə naysə tɨ́ viŋ laa wə kee lùu shɔ, faŋ nə bì wəzwi, faŋ kaꞌ ŋwə kwàlə shɔ̀ɔ Jɔn me. Luu nə, ŋkee wuu tɨtiꞌ faŋ ŋwə ndɔ ŋii nu yifwàŋ Nwi, kwalə shɔ̀ɔ ŋwə.

²⁹ Vɨɨ vənshə, nə ŋkee vɨɨ məsa vətɔ, faŋ vəŋ nə zɔ̀ yigisə Jɔn, biŋ Nwi, buꞌ faŋ vəŋ nə fì muu mə Nwi fɨ ghɔ Jɔn.

³⁰ Luu nə, vɨɨ Farisii ghɔ vɨ vɨɨ mədeesə ŋwaꞌlə Nwi nə twèy nu jəə ŋkɨə faŋ Nwi nùŋsə tɨ́ vɨɨ nə, buꞌ faŋ vəŋ nə kee fì muu fɨ ghɔ ŋwə me.»

Faŋ Yeso nə fɨ̀ꞌnə nu wuu taa nə weembwa

³¹ Yeso nə baa gì laa, «Bàw mə baa fɨꞌnə nu vɨɨ ndee və̀ nə kə? Vəŋ fɨnə kə?

³² Viŋ zɔ! Vəŋ fɨnə vaŋmbwaa, faŋ vəŋ ghɨghay taa yiwiŋ, gisə vəŋ vəŋ laa, «Yia taw yisaw tɨ́ viŋ, viŋ kee bɨbəŋ me. Yia gwia yiku, viŋ kee gàŋtə yia me.»

³³ Yighee njyə faŋ Jɔn, wuu məkɔ muu mə Nwi, nə jwi, viŋ yɨ sheꞌ yaa vaŋ vɔ́. Ŋwə nə kee zɨ bee me, kee nu məluꞌ me. Viŋ kee biŋ yigisə yi me, gi laa, zwitə bwə taa ŋwaa ŋwə.

³⁴ Gə fɨ maa Wuu yinsəŋ Nwi, ŋwə jwi kɨ zɨ, ndɔ nu. Viŋ kɨ nii gì laa ŋwə lùu waa-mfii-ndaa nə nu məluꞌ, baa nə laa ŋwə lùu wuumba vɨɨ məsa vətɔ nə vɨɨ bwənə.

³⁵ Luu nə, kaꞌ vɨ kɨ̀ɨ laa yitɔfə Nwi lùu nu yinsəŋ, buꞌ vɨɨ mbɨə faŋ vəŋ biŋ yitɔfə Nwi yɔ́.»

Faŋ wəzwi məyɨ vənu vəbwəvə nə kwìinə fwi yi

³⁶ Wuu Farisii mɔ́ꞌ nə tìi Yeso laa ŋwə jwi, ghɔ ŋwə zɨ fazɨ. Yeso gə ŋìi taa ŋii wuu Farisii ghɔ́, duꞌ nsi kɨ zɨ.

³⁷ Wəzwi mɔ́ꞌ faŋ ŋwə nə luu ntɨꞌ yɔ́, faŋ nə luu yɨ-kəbwə, zɔ laa ŋwə lùu taa ŋii wuu Farisii ghɔ́, zɨzɨ. Ŋwə ndi ndaw lamenda, jwi nə nyə,

³⁸ jwì tɨ̀ŋ yɨ ghuu Yeso fɨ yiba, kɨ gwia, mənsɨ mi fiŋkə ghuu Yeso, ŋwə ndɔ tɔŋsə nə nyuŋsə tɔ si, nyɔŋ ghuu ghi, ndɔ zwisə nə lamenda ghɔ́.

³⁹ Wuu Farisii ghɔ́ faŋ ŋwə nə tìi Yeso taa ŋii ŋwə nə, ye, bɨ̀ꞌtə fɨ taa fwi ŋwə laa, Yeso nii toꞌ lùu nshiiŋii-sɔghɔ, buu ŋwə kɨ̀ɨ nə wəzwi ŋwə̀, faŋ ŋwə kɔ̀ŋ ŋwə nə, baa kɨ̀ɨ nə ŋiꞌ ki laa lùu wuu məyɨ vənu vəbwəvə.

⁴⁰ Yeso kɨɨ nə mbɨꞌtə yi yɔ́, gi tɨ́ ŋwə laa, «Saymon, mə kəə naysə nu tɨ́ ghɔ.» Ŋwə laa, «Ɔŋ, tɨta.»

⁴¹ Yeso gi laa, «Tɨɨ ka mɔ́ꞌ nə kìi vɨɨ təkɔɔ vi vəbɔɔ, wuu mɔ́ꞌ nə kìi ŋwə ŋkaŋsə muu-ntee, wuu mɔ́ꞌ ŋkaŋsə tee.

⁴² Faŋ vəŋ nə kee kìi ka ndɔ̀ꞌ tɨ́ ŋwə me, ŋwə meꞌtə vəŋ, ndènə nu təkɔɔ tɔ́. Nɨniŋ, mə bitə tɨ́ ghɔ laa, fɨ taa ŋwaa vəŋ vəbɔɔ, wə ntɨə faŋ ŋwə taa kaw tɨɨ ka ghɔ́ shɔ̀ɔ liŋ wi lùu ndə?»

⁴³ Saymon bəŋsə laa, «Maa lùu wə ntɨə faŋ yikɔɔ yi nə lùu yiyaŋ nə.» Yeso gi tɨ́ ŋwə laa, lùu nɨniŋ,

⁴⁴ kɨ nii kìasə ŋwaa wi maa wəzwi ghɔ́, baa gì tɨ́ Saymon laa, «A yè wəzwi ŋwə̀ mu? - Zɔ mɔɔ! Mə nii ŋìi taa ŋii ghɔ, a kee kɔ̀ muu shee maa məsɔ ghuu ŋaa me. Gə fɨ maa wəzwi ŋwə̀, ŋwə shù ghuu ŋaa nə mənsɨ mi, ndɔ̀ tɔ̀ŋsə nə nyuŋsə tɔ si.

⁴⁵ A kee nyɔ̀ŋ fəə ŋaa me. Luu nə, ŋwə kee bwà fɨ maa mənyɔŋ ghuu ŋaa me, shù fɨ maa yighee njyə faŋ ŋwə nii ŋìi taa ŋii.

⁴⁶ A kee zwìsə lamenda tɔ mə me. Ŋwə zwìsə lamenda ghuu mə.

⁴⁷ Nɨniŋ, mə naysə tɨ́ ghɔ laa vənu vəbwəvə vi faŋ mbə nə luu vəyaŋ nə, mbə mè buꞌ ŋkawnə yi faŋ nyə lùu yiyaŋ. Gə fɨ maa wə ntɨə faŋ vənu vəbwəvə vi, faŋ vɨ ndènə, lùu vətɨtiꞌ, ŋkawnə yi baa lùu yitɨtiꞌ.»

⁴⁸ Yeso mètə yigi yɔ́, kɨ nii kìasə, gì tɨ́ wəzwi ghɔ́ laa, «Vənu vəbwəvə və mè vɨsɨ Nwi.»

⁴⁹ Vɨɨ mbɨə faŋ ghɔ vɨ vəŋ nəə zɨ mɔ́ꞌ nə, lulə vəŋ vəŋ laa, «Sii lùu ndə nə, faŋ kaꞌ ŋwə ndə̀nə yibɨsə vɨɨ?»

⁵⁰ Ŋwə baa gì tɨ́ wəzwi ghɔ́ laa, «Məbiŋ wə gàŋtə ghɔ, gə nə mənɔŋ-bwaŋnə!»