Lukas 5 - Vengo (Babungo)

Faŋ Yeso nə yɨ̀sə Saymon Pita koo susə səyaŋ, shoꞌ ŋwə laa ŋwə gu wuu məbaytə vɨɨ tɨ́ Nwi

¹ Shi mɔ́ꞌ Yeso nə luu mbɨɨ maghia Genesaret. Vɨɨ tɨŋ yɨ ŋwə maa məzɔ nu Nwi.

² Yeso ye vəbay vəbɔɔ mbɨɨ muu, tɨ́ vɨɨ məkoo susə fuu fɨ taa vəbay vɔ́, kɨ sɔ ghuu susə vəŋ.

³ Ŋwə ŋii taa bay ŋkə kəmuꞌ, buꞌ vɨɨ vɔ́ faŋ vəŋ nəə fiitə ŋwə nə. Bay kɔ́ nə luu ŋkə Saymon. Yeso buꞌ ghɔ tɨ́ Saymon laa ŋwə suꞌtə bay kɔ́ fɨ tɔɔ. Ŋwə kɨ nii dùꞌ taa bay, kɨ deesə vɨɨ.

⁴ Faŋ ŋwə nə mètə yigisə yi, gì tɨ́ Saymon laa vəŋ suꞌtə nə bay maa shəŋ gə, buu mɔ̀ꞌ ghuu maa məkoo susə.

⁵ Saymon bəŋsə tɨ́ ŋwə laa, «Yia nii sàŋ ŋwaa wia vətuꞌ ŋkwəŋ ndee, kee bee kòo fa me. Luu nə, mə taa mɔꞌ ghuu ghɔ́ buꞌ laa gì ghɔ.»

⁶ Vəŋ yɨsə nɨniŋ, kòo susə, nsə lwaŋ taa ghuu. Ghuu ghɔ́ sanə.

⁷ Vəŋ katə vəliŋ vəvəŋ fɨ taa bay day, laa vəŋ jwi gàŋtə vəŋ. Vəŋ jwi lwèsə vəbay vəvəŋ nə susə, mbə tey kɨ siꞌ taa muu.

⁸ Faŋ Saymon Pita nə yè nɨniŋ, gu ghuu Yeso, gì laa, «Ndɔ fɨ yɨ mə, tɨta, mə lùu wuu bwə.»

⁹ Ŋwə nə gì nɨniŋ, buꞌ laa shuu wi yɔ̀ŋ maa susə nsɨə faŋ vəŋ koo nə. Ŋwə fee ghɔ vɨ vəliŋ vi vənshə.

¹⁰ Jeyms nə Jɔn, vaŋ Zebedii, nə luu taa ŋwaa vəliŋ və Saymon vɔ́. Vəŋ nəə fee nɨzi. Yeso gi tɨ́ Saymon laa, «Kɨ ghɔ fee me! Zì fɨ ndee, a taa kɨ baytə vɨɨ tɨ́ Nwi, yuu a nə baytə susə taa ghuu nə.»

¹¹ Vəŋ koꞌ nə vəbay vəvəŋ fɨ taa muu, kɨ nii mèꞌtə vətɔ vənshə, bèꞌsə Yeso.

Faŋ Yeso nə gàŋtə wuu zatə bwə

¹² Shi mɔ́ꞌ faŋ Yeso nə lùu taa ntɨꞌ yimɔ́ꞌ, wuu zatə bwə mɔ́ꞌ jwi, faŋ zatə bwə nə luu maa ŋwaa wi nshə. Wə ghɔ́ jwi, yè Yeso, gù nsi, tùŋ yikəꞌ yi nsi, bùꞌ ghɔ tɨ́ Yeso, gì laa, «Tɨta, a kəə gaŋtə mə, a kìi wutə maa məyɨ laa mə ley.»

¹³ Yeso nesə ghɔ ki, kɔ̀ŋ ŋwə, gì laa, «Mə kəə nɨniŋ, ŋkə me fɨ maa ghɔ, a ley.» Sheꞌ yighee yɔ́, zatə bwə kɔ́ mè fɨ maa wə ghɔ́.

¹⁴ Yeso twey tɨ́ ŋwə laa kɨ ŋwə naysə tɨ́ wə me. Ŋwə baa gì tɨ́ ŋwə laa bàw ŋwə gə də̀ ŋwaa wi tɨ́ wuu məfeꞌ Nwi, kɔ̀ vəkɔ və Nwi faŋ Mose nə tə̀ laa wə kɔ faŋ ŋwaa wi ley nə. Bàw ŋwə yɨsə nɨniŋ yaa shwenə tɨ́ vɨɨ vənshə.

¹⁵ Luu nə, faŋ Yeso nə kɔlə gì nɨniŋ nə, təgi kɔ̀ŋ Yeso baa metə sɨsaynə shɨ kənshə, vɨɨ vəyaŋ baytə maa məzɔ yigisə yi, baa nə maa məshuꞌ vəza vəvəŋ.

¹⁶ Luu nə, ŋwə fi ŋwaa, gə taa tɔɔ waꞌsə maa məshɔꞌtə Nwi.

Faŋ Yeso nə gàŋtə wə faŋ way ŋwaa wi kù muꞌ

¹⁷ Shi kəmɔ́ꞌ faŋ Yeso nəə deesə nu Nwi shəŋ mɔ́ꞌ, vɨɨ Farisii nə vɨɨ mədeesə ŋwaꞌlə Nwi duꞌ shɔ, faŋ vəŋ nə ndɔ̀ fɨ maa ntɨꞌsə ntɨꞌsə fɨ shɨ Galilii, nə fɨ shɨ Judia, baa nə ŋkee fɨ ntɨꞌ Jerusalem. Wutə Nwi nə luu maa ŋwə maa məshuꞌ vəza.

¹⁸ Vɨɨ mɔ́ꞌ jwi nə wə faŋ way ŋwaa wi kù muꞌ, shàꞌ ŋwə fuu kɨŋ, kɨ kəə jɨɨ maa məŋii taa ŋii, nùŋsə ŋwə vɨsɨ Yeso.

¹⁹ Faŋ vəŋ nə kee kìi jɨɨ ŋìi nə me, buꞌ vɨɨ vəyaŋ nə, vəŋ koꞌ tɔ ŋii, tɔ̀ ŋɔŋ tɔ ŋii, shaꞌ wə ghɔ́, sùꞌsə ŋwə taa ŋii yɔ́ fuu kɨŋ kɔ́ sheꞌ nɨntəŋ nwaa vɨɨ vɔ́, nùŋsə ŋwə vɨsɨ Yeso.

²⁰ Faŋ Yeso nə yè yuu vəŋ nə nùŋ fwisə vəŋ maa ŋwə nə, ŋwə gi tɨ́ wə ghɔ́ laa, «Wuumba ŋwaa, vənu vəbwəvə və mè.»

²¹ Vɨɨ mədeesə ŋwaꞌlə Nwi nə vɨɨ Farisii zɔ nu kɔ́, kwàꞌtə fɨ taa fwisə vəŋ, ndɔ kɨ gisə vəŋ vəŋ laa, «Wə ŋwə̀ sii lùu ndə? Maa ŋwə tàw Nwi. Kaꞌ ndenə sheꞌ Nwi ndènə yibɨsə vɨɨ.»

²² Yeso nəə kɔꞌ kɨɨ nə mbɨꞌtə vəŋ, gì tɨ́ vəŋ laa, «Viŋ sii bɨ̀ꞌtə kə fɨ taa fwisə viŋ?

²³ Sii yàysə kə, maa məgi tɨ́ wə faŋ way ŋwaa wi kù muꞌ nə, laa vənu vəbwəvə vi mè, mu maa məgi tɨ́ ŋwə laa, «Ndɔ yizɔ, tɨŋnə kɨ toꞌ.»

²⁴ Ŋkə bàw viŋ kɨɨ laa Nwi nùŋsə Wuu yinsəŋ Nwi laa ŋwə kɨ ndisə yibɨsə vɨɨ fɨ shɨ nsi.» Ŋwə kɨ nii gì tɨ́ wə ntɨə faŋ ŋwaa wi nə kù way muꞌ nə laa, «Ndɔ yizɔ, ndì kɨŋ kə, gə shiŋii!»

²⁵ Sheꞌ yighee yɔ́, wə ghɔ́ ndɔ yizɔ, tòꞌ sɨ vɨɨ vənshə, ndì kɨŋ ki, faŋ ŋwə nii nɔ̀ŋ fuu yi nə, gə̀ fu ŋwə, kɨ bəŋsə yizii Nwi.

²⁶ Nu kɔ́ ghɔꞌ vɨɨ vənshə, vəŋ bəŋsə yizii Nwi, fèe dɨdɨꞌ, gì laa vəŋ ye ŋkee nu shuu yɔŋ ndee.

Faŋ Yeso nə tìi Levi

²⁷ Yiŋkii kɨ mè, Yeso fuu fu, kɨ toꞌ, yè wuu məsa vətɔ faŋ ŋwə nə dùꞌ shuu ŋii məsa vətɔ. Yizii yi luu Levi. Yeso gi tɨ́ ŋwə laa, «Beꞌsə mə!»

²⁸ Wə ghɔ́ meꞌtə vətɔ vənshə, bèꞌsə ŋwə.

²⁹ Vəŋ kɨ nii gə̀ fu Levi. Levi tia ŋwə ŋkee jəə. Vɨɨ məsa vətɔ nə vɨɨ vəmɔ́ꞌ nə luu shɔ vəyaŋ, ghɔ vɨ vəŋ duꞌ shəŋ muꞌ, kɨ zɨ.

³⁰ Vɨɨ Farisii ghɔ vɨ vɨɨ mədeesə ŋwaꞌlə Nwi lulə tɨ́ vɨɨ məzwetə nu Yeso, gì laa, «Sii yɨ̀ kə viŋ duꞌ viŋ vɨ vɨɨ məsa vətɔ nə vəyɨ-kəbwə, viŋ vɨ vəŋ zɨ, ndɔ nu?»

³¹ Yeso zɔ yigisə vəŋ yɔ́, bəŋsə tɨ́ vəŋ laa, «Maa vɨɨ mbɨə faŋ vəŋ lùu vətaa, kee yaa kɨ kəə wuu fɔ me. Kəə sheꞌ vɨɨ mbɨə faŋ vəŋ zɨzasə kəə wuu fɔ.

³² Sheꞌ nɨniŋ, mə nə kee jwì maa məkəə vɨɨ mbɨə faŋ vənu vəvəŋ lùu vəloomə me. Mə kəə luu vəyɨ-kəbwə, laa vəŋ kwiinə fwisə vəŋ.»

Yigi kɔ̀ŋ nu məbaŋ fazɨ

³³ Vɨɨ Farisii vɔ́ gi tɨ́ Yeso laa, «Sii yɨ̀ kə, vɨɨ məzwetə nu Jɔn yaa kɨ zwisə nə jɨŋ, shɔꞌtə Nwi, sheꞌ yuu vɨɨ məzwetə nu vɨɨ Farisii yaa kɨ yɨsə nə. Gə fɨ maa mbɨɨnə vɨɨ, vəŋ zɨzɨ, ndɔ nu.»

³⁴ Yeso gi tɨ́ vəŋ laa, «Nə kaꞌ vɨɨ məzɨ məndaa zwìsə nə jɨŋ, faŋ ghɔ vɨ wuu məndaa dùꞌ mɔ́ꞌ mu?

³⁵ Vəshi ndɔ kuꞌ, faŋ vɨ ndɔ baꞌsə wəndɔŋ məndaa fɨ yɨ vəŋ, buu vəŋ ndɔ zwisə nə jɨŋ maa vəshi vɔ́.»

Ŋkə kee baw maa məwasə nshinə yimwa taa nu Kristo me

³⁶ Yeso baa fɨ̀ꞌtə yigisə tii yimɔ́ꞌ tɨ́ vəŋ laa, «Kaꞌ wə kee sà waytə njwi fɨ maa njwi yifi, tà maa njwi yimwa me. Wə nəə toꞌ yɨ nɨniŋ, buu ŋwə taa sa njwi yifi yɔ́. Njwi yimwa yɔ́ nɨzi kee bàw me, buꞌ laa waytə njwi yifi kɔ́ kee kùꞌnə maa njwi yimwa yɔ́ me.

³⁷ Sheꞌ nɨniŋ, wə kee yaa kɨ ndi məluꞌ məfimə, kwaŋ taa ntiasə məluꞌ səmwasə me. Kɨ ghaŋ ŋwə yɨ nɨniŋ, buu məluꞌ mbɔ́ taa twelə ntiasə sɔ́, fùu ndì day. Ntiasə sɔ́ bɨ nɨzi.

³⁸ Məluꞌ məfimə bàw sheꞌ taa ntiasə fisə.

³⁹ Wə kee lùu shɔ faŋ kaꞌ ŋwə nù məluꞌ məmwamə, baa kàw məfimə me, buꞌ laa ŋwə taa gi laa məmwamə bàw tɨ́ yi.»