Lukas 4 - Vengo (Babungo)

Faŋ Satan nə mɔ̀ŋ Yeso

¹ Yeso nə fì muu mə Nwi fɨ ghɔ Jɔn taa muu mə Jordan, kɨ nii baa ndɔ̀ fɨ yifi, tɨ́ Zwitə Ley Nwi lwaŋ taa fwi ŋwə. Zwitə Nwi kɔ́ yɨsə ŋwə gə toꞌ fɨ tɔɔ waꞌsə.

² Satan, tɨɨ vəzwitə vəbwəvə jwi mɔŋ ŋwə shɔ maa vəshi muu-yinshwe. Maa vəshi vɔ́ vənshə ŋwə nə kee zɨ̀ fa me, jɨŋ za ŋwə.

³ Tɨɨ vəzwitə vəbwəvə jwi gì tɨ́ ŋwə laa, «A kɨ yɨ lùu Wee Nwi, a gì tɨ́ ŋoꞌ nyə̀ laa nyə bəŋnə gù bee.»

⁴ Yeso bəŋsə tɨ́ ŋwə laa, «Ŋkə lùu taa ŋwaꞌlə Nwi laa, wə kee bwey sheꞌ buꞌ fazɨ me.»

⁵ Tɨɨ vəzwitə vəbwəvə kɨ nii ndì ŋwə, ghɔ ŋwə koꞌ gə̀ fuu baŋ yidə, ŋwə də məshɨ mənshə fɨ taa mbi tɨ́ ŋwə maa wee-fɨ-yighee nee,

⁶ gi tɨ́ ŋwə laa, «Mə taa kɔ məshɨ mbə̀ mənshə tɨ́ ghɔ, nə vətɔ vəjəəvə vənshə fɨ tey yi, a kɨ sɔꞌ, kii mbə mənshə. Maa vɨ nə kɔ̀ tɨ́ mə. Kaꞌ mə kɔ̀ tɨ́ wə ntɨə faŋ mə kàw.

⁷ A kɨ luu tuŋ vətɔ vəyəə və nsi, bəŋsə mə, buu mə taa kɔ vətɔ vɔ́ vənshə tɨ́ ghɔ.»

⁸ Yeso bəŋsə tɨ́ ŋwə laa, vɨ nyɔ̀ꞌ taa ŋwaꞌlə Nwi laa, «Kɨ bəŋsə sheꞌ Tɨta Nwi, faŋ lùu Nwi wə. Bàw a kɨ faꞌ sheꞌ tɨ́ ŋwə.»

⁹ Zwitə bwə kɔ́ ndi ŋwə, gə̀ nə ŋwə Jerusalem, tə̀ ŋwə ŋkee joo tɔ ŋii Nwi, gì tɨ́ ŋwə laa, «A kɨ luu luu ŋkee Wee Nwi, a sawnə fɨ feenə, shə̀ŋ nsi,

¹⁰ fɔnə ŋkə lùu taa ŋwaꞌlə Nwi laa, Nwi taa tɔŋ nshiisə-ŋii si, vəŋ kɨ shiinə ghɔ,

¹¹ baa nə laa, vəŋ taa ndwey ghɔ ghɔ vəŋ, laa kɨ ghɔ tuŋ ghuu kə maa ŋoꞌ me.»

¹² Yeso bəŋsə tɨ́ ŋwə laa, «Vɨ nə baa nyɔ̀ꞌ shɔ laa, Kɨ ghɔ kɨ mɔŋ Mɔꞌmbi, Nwi wə me!»

¹³ Zwitə bwə kɔ́ kɨ metə vənu vənshə maa mələəsə ŋwə, ndɔ̀ fɨ yɨ ŋwə maa kuŋtə yighee.

Faŋ Yeso nə zì faꞌ wi

¹⁴ Yeso kɨ nii bə̀ŋ gə̀ shɨ Galilii, tɨ́ wutə Zwitə Nwi nə luu maa ŋwə. Nu ki saynə taa kwiŋ shɨ kɔ́ kənshə.

¹⁵ Ŋwə nəə fɨꞌtə nu Nwi taa ndɔꞌ Nwi vəŋ, vɨɨ vənshə bəŋsə yizii yi.

Faŋ vɨɨ Nazaret nə twèy Yeso

¹⁶ Nɨniŋ, ŋwə gə ziꞌ ntɨꞌ Nazaret nɨzi, faŋ lùu shəŋ ŋkɨə faŋ ŋwə nə tà shɔ nə. Shi zwisə Nwi kuꞌ, ŋwə gə taa ŋii Nwi, faŋ nə luu ŋgunə yi. Ŋwə ŋii, ndɔ̀ yizɔ laa yi tii ŋwaꞌlə Nwi.

¹⁷ Vɨ kɔ ŋwaꞌlə nshiiŋii-sɔghɔ Aysaya tɨ́ ŋwə. Ŋwə ŋaꞌsə ŋwaꞌlə ghɔ́, tìi shəŋ kəmɔ́ꞌ faŋ vɨ nə nyɔ̀ꞌ shɔ laa,

¹⁸ «Zwitə Nwi maa mə, buꞌ laa ŋwə nə yòꞌ mə nə məŋgwə, laa mə kɨ fɨꞌtə ntɔŋ yijəə tɨ́ vɨɨ ŋɨꞌ. Ŋwə nə baa tɔ̀ŋ mə laa mə kɨ fɨꞌtə tɨ́ vəbuꞌ və yighaw, laa vəŋ kuunə nə ŋwaa vəŋ, baa nə laa mə gì tɨ́ vɨɨ sɨ fɨsə, laa vəŋ yenə, baa nə laa mə fuusə vɨɨ faŋ vɨ nəə fiitə vəŋ nsi, laa vəŋ gə duꞌ tɔ vəŋ,

¹⁹ baa nə laa mə kɨ sɔꞌ ŋuꞌ Mɔꞌmbi, faŋ ŋwə ndɔ jwi bweysə vɨɨ.»

²⁰ Faŋ Yeso nə tìi ŋwaꞌlə ghɔ́ mètə, kɔ̀ tɨ́ wuu faꞌ taa ŋii Nwi, dùꞌ nsi. Sɨ vɨɨ vənshə faŋ vəŋ nə luu taa ŋii Nwi, kiasə gə̀ maa ŋwə.

²¹ Ŋwə zi kɨ gisə tɨ́ vəŋ laa, «Nu ŋkɨə faŋ vɨ nə nyɔ̀ꞌ maa shəŋ ŋwaꞌlə kə̀, fàynə ndee, faŋ viŋ nii zɔ nə.»

²² Vɨɨ vənshə biŋ yigi njyə faŋ Yeso nə gi nə, shuu vəŋ yɔŋ maa yigisə yi yijəə njyə faŋ nyə fùu fɨ shuu ŋwə nə. Vəŋ gi laa, «Wə ŋwə̀ kee lùu wee Josef yimu?»

²³ Ŋwə gi tɨ́ vəŋ laa, «Mə kɔꞌ kɨɨ laa viŋ taa gi shee laa, bàw wuu ŋay kɨ gaŋtə nshɨ-tɔ wi. Maa viŋ kəə laa mə kɨ yɨsə vənu vəkwalə mbɨə faŋ viŋ zɔ laa mə nə yɨ̀sə ntɨꞌ Kapernaum, laa mə kɨ yɨsə ntɨꞌ nsiŋ nɨzi.

²⁴ Luu nə, mə gì tɨ́ viŋ ŋkee yinsəŋ laa, vɨ kee yaa kɨ biŋ nshiiŋii-sɔghɔ ntɨꞌ ŋwə me.

²⁵ Maa yinsəŋ, mə naysə tɨ́ viŋ laa, vəki ŋkusə nə luu shɨ Isirayl vəyaŋ maa yighee Elias, faŋ yighuu nə kee sìꞌ maa ŋuꞌsə tia nə yiŋuu ntɔfə me, jɨŋ nə kòo mbi yinshə ŋkee dɨdɨꞌ nə.

²⁶ Luu nə, Nwi nə kee tɔ̀ŋ Elias maa tuu wə fɨ maa vəki ŋkusə vɔ́ fɨ shɨ Isirayl me. Ŋwə nə gə gàŋtə sheꞌ zu ŋku mɔ́ꞌ ntɨꞌ Zarefat fɨ shɨ Sidon.

²⁷ Vɨɨ zatə bwə nə luu vəyaŋ shɨ Isirayl maa yighee nshiiŋii-sɔghɔ Elaysha. Elaysha nə kee shùꞌ tuu wə fɨ vəŋ me, shuꞌ sheꞌ Naaman, wuu shɨ Siria.»

²⁸ Vɨɨ mbɨə faŋ vəŋ nə luu shɔ taa ŋii Nwi ntɨꞌ Nazaret, zɔ yigisə yi yɔ́ tɨ́ nee, fwisə vəŋ shə dɨdɨꞌ.

²⁹ Vəŋ ndɔ yizɔ, jɔ̀ŋ ŋwə fɨ taa shɨ, gə̀ nə ŋwə mbɨɨ kweꞌ, faŋ ntɨꞌ vəŋ nə luu fuu kweꞌ nə, gə shɔ maa məshəŋ ŋwə fɨ fuu kweꞌ yɔ́.

³⁰ Luu nə, ŋwə shɔɔ fɨ nɨntəŋ ŋwaa vəŋ, gə̀ nə bɔŋ yi.

Faŋ Yeso nə fùusə zwitə bwə fɨ maa wə ntɨꞌ Kapernaum

³¹ Yeso kɨ nii siꞌ gə̀ ntɨꞌ Kapernaum fɨ shɨ Galilii, gə kɨ deesə vɨɨ shɔ maa vəshi və zwisə.

³² Shuu vəŋ yɔŋ maa mədeesə wi ghɔ́, buꞌ laa ŋwə nəə deesə vəŋ yaa wə faŋ ŋwə kìi wutə fɨ ghɔ Nwi.

³³ Shi mɔ́ꞌ faŋ ŋwə nəə deesə nu Nwi taa ŋii Nwi, wə mɔ́ꞌ nə luu shɔ, faŋ ŋwə nə kìi zwitə bwə taa ŋwaa ŋwə. Wə ghɔ́ yumə ŋkee nəŋay, gì laa,

³⁴ «Aŋ ghɔ, Yeso, wuu Nazaret, a kìi kə maa məyɨ nə yia? A jwì ndisə yia mu? Mə kɔꞌ kɨɨ nə wə ntɨə faŋ lùu ghɔ; a luu ŋkee wuu ley Nwi.»

³⁵ Yeso shə tɨ́ zwitə bwə kɔ́, gì tɨ́ ŋkə laa, «Shia, fùu fɨ taa ŋwaa wə ŋwə̀!» Zwitə bwə kɔ́ mɔꞌ wə ghɔ́ nsi taa ŋwaa vɨɨ, kɨ nii yifuu fɨ maa ŋwə, kee ndɨ̀əsə ŋwə me.

³⁶ Shuu vɨɨ vənshə yɔŋ, wə nə wə gi tɨ́ liŋ wi laa, «Sii lùu kəŋ yigi fə nə? Ŋwə kìi ŋkee wutə tɨ́ kaꞌ ŋwə kɨ sɔꞌ vəzwitə vəbwəvə, mbə fùu fɨ taa ŋwaa vɨɨ.»

³⁷ Nu kɔ́ saynə, fì vəshəŋ vənshə fɨ kwiŋ yɔ́.

Faŋ Yeso nə gàŋtə vɨɨ vəza

³⁸ Yeso kɨ nii ndɔ̀, fùu fɨ taa ŋii Nwi, gə̀ fu Saymon, zìꞌ yifi, tɨ́ nshu zu Saymon nə lùu shɔ ghɔ nshɨꞌ weꞌ. Vəŋ buꞌ ghɔ tɨ́ Yeso kɔ̀ŋ nu za kɔ́.

³⁹ Ŋwə shəŋtə gə̀ yɨ wəzwi ghɔ́, shə tɨ́ nshɨꞌ kɔ́, ŋkə me. Wəzwi ghɔ́ ndɔ yizɔ yighee muꞌ, toꞌ tìa vəŋ.

⁴⁰ Shɨshwi kɨ fiŋ, vɨɨ vənshə faŋ vəŋ nə kìi vɨɨ vəza, faŋ vəza nə lùu maa vəŋ taŋ taŋ, ndi vɨɨ vəza vɔ́, jwì nə vəŋ tɨ́ ŋwə. Ŋwə mɔꞌ ghɔ ghi maa vəŋ tɔ tɔ, shùꞌ vəza fɨ maa vəŋ.

⁴¹ Vəzwitə vəbwəvə nə fùu fɨ taa ŋwaa vɨɨ vəyaŋ nɨzi, kɨ yumə laa, «A luu ŋkee Wee Nwi.» Ŋwə shə tɨ́ vəzwitə vəbwəvə vɔ́, kee biŋ laa mbə gi me, buꞌ laa mbə nəə kɔꞌ kɨɨ laa ŋwə lùu Kristo.

Faŋ Yeso nə shɔ̀ꞌtə Nwi vətuꞌ, buu kɨ saynə nu ki

⁴² Fu kɨ lee Yeso fuu gə̀ maa shəŋ nɔŋ-nɔŋ, vɨɨ kəə ŋwə, ye ŋwə, kɨ kəə lalə ŋwə, laa kɨ ŋwə ndɔ fɨ yɨ vəŋ, gə shəŋ day me.

⁴³ Ŋwə gi tɨ́ vəŋ laa, «Nu kaŋ lùu laa mə kɨ fɨꞌtə nu yifwàŋ Nwi maa vəshəŋ vəmɔ́ꞌ nɨzi, buꞌ laa lùu ŋiꞌ nu ŋkɨə faŋ Nwi nə tɔ̀ŋ mə shɔ nə.»

⁴⁴ Nɨniŋ, ŋwə gə kɨ fɨꞌtə nu Nwi taa ndɔꞌ Nwi fɨ shɨ Galilii [Judia].