Lukas 3 - Vengo (Babungo)

Faŋ Jɔn, wuu məkɔ muu mə Nwi nə fɨ̀ꞌtə nu Nwi, ŋìi mfiŋ

¹ Nə luu maa yighee njyə faŋ fwàŋ Tiberiɔs nə dùꞌ fuu ŋkaw yifwàŋ, gə ziꞌ ŋuꞌsə njɔsə-tee, Nwi tii Jɔn, wee Zakaraya fɨ tɔɔ waꞌsə, tɔ̀ŋ ŋwə nə ntɔŋ tɨ́ vɨɨ Isirayl. Nə luu maa yighee njyə faŋ Pɔntiɔs Pilate nə luu goməna fɨ shɨ Judia, Herod nə luu fwàŋ fɨ shɨ Galilii, weenshu wi Filip nə luu fwàŋ fɨ Ituria nə Trakonitis, Lisanias nə luu fwàŋ fɨ Abilene.

² Maa yighee yɔ́, Anas ghɔ Kayafas nə luu vɨɨ kwalə məfeꞌ Nwi. Nə luu maa yighee yɔ́ faŋ ntɔŋ Nwi jwì maa Jɔn, wee Zakaraya, taa tɔɔ waꞌsə nə.

³ Ŋwə gə tòꞌ fɨ kwiŋ muu mə Jordan, naysə tɨ́ vɨɨ maa vəshəŋ vənshə, laa vəŋ kwiinə fwisə vəŋ, fì muu mə Nwi, laa Nwi ndenə yibɨsə vəŋ.

⁴ Ŋwə nəə yɨsə sheꞌ faŋ vɨ nyɔ̀ꞌ taa ŋwaꞌlə yigisə Aysaya, nshiiŋii-sɔghɔ. Aysaya nə ŋwàꞌlə kɔ̀ŋ Jɔn ghɔ́ laa, «Gɨ wə luꞌ fɨ tɔɔ waꞌsə laa, Viŋ təŋ jɨɨ Mɔꞌmbi, lòotə ghuu jɨɨ ki kəneꞌtə.

⁵ Vɨ lwesə vəshəŋ və boꞌtə vənshə, sùꞌsə baŋsə nə təkweꞌ tənshə, nèꞌtə jɨɨ yigɨŋkə, ghèesə jɨɨ faŋ nyə kee lùu yigheesə me.

⁶ Wə tɨ̀ me wə ndɔ kɨ ye faŋ Nwi bweysə vɨɨ.»

⁷ Ŋkee ŋgwisə vɨɨ vəyaŋ fuu fɨ taa shɨ, kɨ gə ye Jɔn, laa ŋwə kɨ kɔ muu mə Nwi tɨ́ vəŋ. Ŋwə gi tɨ́ vəŋ laa, «Aŋ viŋ, vaŋ-ŋkakɨ, gì ndə tɨ́ viŋ laa viŋ kɨ kii jɨɨ maa məfuu fɨ taa nsɔꞌ Nwi faŋ Nwi ndɔ kwaŋ tɔ vɨɨ nə?

⁸ Viŋ kɨ yɨsə vənu faŋ mbə kùꞌnə tɨ́ vɨɨ faŋ vəŋ kwiinə fwisə vəŋ! Kɨ viŋ tey kɨ bɨꞌtə fɨ taa fwisə viŋ laa viŋ kùꞌnə tɨ́ Nwi buꞌ faŋ viŋ lùu vaŋ vaŋ Abraham nə me. Mə naysə tɨ́ viŋ laa, kaꞌ Nwi kiasə ŋoꞌsə sə̀, nsə gu vaŋ Abraham.

⁹ Viŋ zɔ! Vɨ duꞌtə vɨ nuŋ njaŋ fuu ghay tɨ. Tɨ tɨ̀ me tɨ faŋ ŋkə kee kwaanə vətaŋ vəjəəvə me, vɨ gwia, mɔ̀ꞌ taa wi.»

¹⁰ Nwaa vɨɨ vɔ́ zɔ nɨniŋ, bitə tɨ́ ŋwə laa, baw vəŋ taa yɨ kə?

¹¹ Ŋwə bəŋsə tɨ́ vəŋ laa, «Wə ntɨə faŋ ŋwə kìi njwisə səbɔɔ, ŋwə gaa, kɔ̀ wə ntɨə faŋ ŋwə kee kìi tuu yimuꞌ me. Wə ntɨə faŋ ŋwə kìi fazɨ, baw ŋwə yɨsə sheꞌ nɨniŋ.»

¹² Vəgaa-njɔŋsə jwi nɨzi maa məfi muu mə Nwi, bìtə tɨ́ ŋwə laa, «Tɨta, bàw yia yɨ kə?»

¹³ Ŋwə gi tɨ́ vəŋ laa, kɨ vəŋ fi fa shɔ̀ɔ faŋ vɨ shìa tɨ́ vəŋ me.

¹⁴ Vəsogeꞌ nɨzi bitə tɨ́ ŋwə laa sii kaꞌ vəŋ yɨ kə? Ŋwə gi tɨ́ vəŋ laa, kɨ vəŋ fi fa wə nə wutə me, tɨꞌnə me sɨ̀ɨ ba tɔ wə me, baa nə laa vəŋ goꞌsə sheꞌ nə ka faꞌ vəŋ faŋ vɨ ndɔꞌ vəŋ shɔ nə.

¹⁵ Maa yighee yɔ́, vɨɨ nə dùꞌ kɨ kɨꞌ wuu məbweysə vəŋ faŋ ŋwə ndɔ fɨ ghɔ Nwi. Nɨniŋ, vəŋ vənshə kwaꞌtə fɨ taa fwisə vəŋ buꞌ nu Jɔn, laa yighee mɔ́ꞌ ŋwə lùu Kristo, wə ntɨə faŋ Nwi shoꞌ nə mu lee?

¹⁶ Jɔn bəŋsə tɨ́ vəŋ vənshə, gì laa, «Mə mɔꞌ lùu muu tɔ viŋ. Luu nə, wə ntɨə faŋ ŋwə weꞌ shɔɔ mə, ndɔ jwi kɨ kwaŋ luu Zwitə Ley Nwi maa viŋ, baa nə nsɔꞌ Nwi faŋ nyə twaŋ yibɨsə yinshə yaa wi. Ŋwə kwàlə shɔ̀ɔ mə. Mə kee bee kuꞌnə maa məfaꞌ vəfaꞌ və vəbuꞌ tɨ́ ŋwə, yaa məkeꞌtə kuu gɔsə wi me.

¹⁷ Ŋwə lùu yaa wuu məfetə ŋɨŋee, faŋ nsi məfetə ŋɨŋee lùu ghɔ ŋwə, ŋwə ndɔ fetə ŋɨŋee wi, nuŋsə ŋkee jəə taa ŋii, ndɔ shəŋtə vəghɔ vi, twàŋ taa wi, faŋ ŋwə kee yaa kɨ ndɨɨnə me.»

¹⁸ Jɔn nəə baa tɨsə vɨɨ nə vənu vəyaŋ, fɨ̀ꞌtə ntɔŋ yijəə tɨ́ vəŋ.

¹⁹ Ŋwə baa kɔ̀ yigi tɨ́ fwàŋ Herod buꞌ nu Herodias, buꞌ faŋ fwàŋ Herod nə ndaa zu weenshu wi, nə kɔ̀ŋ vənu vəbwəvə vəmɔ́ꞌ faŋ fwàŋ Herod nə yɨ̀sə.

²⁰ Nɨniŋ, fwàŋ Herod kwaŋ Jɔn taa ŋii mfiŋ, kuꞌsə vənu vəbwəvə vi shɔ nɨniŋ.

Faŋ Yeso nə fì muu mə Nwi

²¹ Nə luu maa yighee yɔ́ faŋ vɨɨ vənshə nə fì muu mə Nwi fɨ ghɔ Jɔn nə, Yeso baa luu jwì, fì muu nɨzi, kii shɔꞌtə Nwi, shuu yizɔ ŋaꞌnə.

²² Zwitə Ley Nwi siꞌ, tɨ̀ŋnə tɔ ŋwə yaa bɔŋsə. Gɨ Nwi gi fiizɔ laa, «A lùu ŋwiŋ ŋwaa, faŋ mə kàw. A bàw shee dɨdɨꞌ.»

Nu ŋiꞌ ŋii Yeso

²³ Nshɨ-tɔ Yeso nə kɨ zi faꞌ wi, tɨ́ ŋwə shi ŋuꞌ muu-ntia. Vɨɨ nəə bɨꞌtə laa lùu wee Josef, faŋ nə luu wee Heli.

²⁴ Heli nə luu wee Matat, wee Levi, wee Melki, wee Janay, wee Josef,

²⁵ wee Matatias, wee Amɔs, wee Nahum, wee Esli, wee Nagay,

²⁶ wee Maat, wee Matatias, wee Semeyn, wee Josek, wee Joda,

²⁷ wee Joana, wee Resa, wee Zerubabel, wee Salatiel, wee Neri,

²⁸ wee Melki, wee Adi, wee Kɔsam, wee Elmadan, wee Er,

²⁹ wee Jɔshwa, wee Elieser, wee Jorim, wee Matat, wee Levi,

³⁰ wee Simiɔn, wee Juda, wee Josef, wee Jonam, wee Eliakim,

³¹ wee Melea, wee Mena, wee Matata, wee Natan, wee Deyvid,

³² wee Jesse, wee Obed, wee Boaz, wee Salmɔn, wee Nashɔn,

³³ wee Aminadab, wee Admin, wee Arni, wee Hezrɔn, wee Perez, wee Juda,

³⁴ wee Jeykob, wee Isak, wee Abraham, wee Tera, wee Nahor,

³⁵ wee Seruk, wee Reyu, wee Peleg, wee Iiba, wee Shela,

³⁶ wee Kaynam, wee Arfasad, wee Shem, wee Noa, wee Lamek,

³⁷ wee Metusala, wee Enok, wee Jared, wee Mahalalel, wee Kenan,

³⁸ wee Enos, wee Set, wee Adam, faŋ nə luu mfɔŋ wə faŋ Nwi nə bɔ̀ŋ.