Lukas 24 - Vengo (Babungo)

Faŋ Yeso nə ywèy fɨ shɨ yiku

¹ Shi zwisə kɨ shɔɔ, fu lee ŋkee taa nshia-ndoo-mbisɨ, vəki vɔ́ ndi lamenda luŋsə ghɔ́ faŋ vəŋ yaa nàysə nə, gə̀ nə ŋwə yɨ swi yɔ́.

² Vəŋ gə zìꞌ yɨ swi yɔ́, ye, tɨ́ vɨ baꞌsə ŋoꞌ fɨ shuu swi yɔ́.

³ Vəŋ ŋii shɔ, kee yè ŋku tɨta Yeso me.

⁴ Tɔ vəŋ shii maa nu kɔ́. Vɨɨ vəbɔɔ gwəkə tɨ̀ŋnə yɨ vəŋ, tɨ́ vəŋ mɔꞌ njwisə ndwaꞌlə.

⁵ Vəŋ fee, tùŋ yitɔ vəŋ nsi. Vɨɨ vɔ́ gi tɨ́ vəŋ laa, «Viŋ sii kəə wuu yinyay fɨ taa ŋwaa vəŋku və nsisə buꞌ kə?

⁶ Ŋwə kee lùu feenə me, ŋwə ywèy. Viŋ lumə nu ŋkɨə faŋ ŋwə nə gì tɨ́ viŋ faŋ ŋwə nəə kɨ bii shɨ Galilii.

⁷ Maa ŋwə nə nàysə tɨ́ viŋ laa vɨ ndɔ kɔ Wuu yinsəŋ Nwi taa ghɔ vɨɨ bwənə, baa nə laa vɨ bey ŋwə fuu fəŋkɔꞌ fə ŋkɨꞌsə, vəshi kɨ ziꞌ vətia, ŋwə ywey.»

⁸ Vəŋ baa lùmə təgi ti tɔ́,

⁹ bə̀ŋ fɨ taa swi yɔ́, kùunə, nàysə vənu vɔ́ vənshə tɨ́ vɨɨ ntɔŋ Yeso njɔ-yimuꞌ nə, nə tɨ́ vɨɨ Yeso vəmɔ́ꞌ vənshə.

¹⁰ Vəki vɔ́ nə luu Meri Madalin, nə Joana, nə Meri nshu Jeyms, baa nə vəki vəmɔ́ꞌ faŋ ghɔ vɨ vəŋ nə luu mɔ́ꞌ. Vəŋ naysə vənu vɔ́ tɨ́ vɨɨ ntɔŋ Yeso,

¹¹ yigi yɔ́ fɨnə yigi dayday tɨ́ vəŋ, vəŋ kee bìŋ yigisə vəki vɔ́ me. [

¹² Pita ndɔ yizɔ, nyɨŋ gə shuu swi yɔ́, gə̀ gùŋnə, ndèynə taa swi ghɔ́, ye sheꞌ njwisə fusə faŋ vɨ nùŋsə shɔ. Ŋwə bəŋ kùunə, shuu wi yɔŋ maa nu ŋkɨə faŋ ŋkə gày nə.]

Faŋ Yeso nə fuu yikəꞌ vɨɨ məzwetə nu ki vəbɔɔ faŋ vəŋ nəə gə Amaws

¹³ Nə lùu maa shi kɔ́, vɨɨ vəbɔɔ fɨ taa ŋwaa vəŋ fuu fɨ ntɨꞌ Jerusalem, gə maa ntɨꞌ yimɔ́ꞌ faŋ yitoꞌ yɔ́ maa məziꞌ shɔ lùu yaa vəkilomita njɔsə-bɔɔ. Yizii ntɨꞌ yɔ́ lùu Amaws.

¹⁴ Vəŋ nə toꞌ gisə kɔ̀ŋ vənu mbɨə faŋ mbə nə gày nə, sheꞌ vəŋ vəŋ.

¹⁵ Faŋ vəŋ nəə toꞌ gisə gə, nshɨ-tɔ Yeso shəŋtə jwì yɨ vəŋ, kɨ toꞌ ghɔ vɨ vəŋ.

¹⁶ Luu nə, Nwi tɨɨsə sɨ vəŋ, vəŋ kee kɨ̀ɨ nə ŋwə me.

¹⁷ Ŋwə gi tɨ́ vəŋ laa, «Sii lùu yigisə yikə faŋ viŋ toꞌ gisə viŋ viŋ nə?» Vəŋ tɨŋnə, yikəꞌ vəŋ gu.

¹⁸ Wə muꞌ fɨ taa ŋwaa vəŋ, faŋ yizii yi lùu Kliopas, bəŋsə tɨ́ ŋwə laa, «Luu sheꞌ ghɔ fɨ taa ŋwaa vətɔŋ mbɨə faŋ vəŋ shi ntɨꞌ Jerusalem, faŋ a kee kɨ̀ɨ nə nu ŋkɨə faŋ ŋkə gày shɔ maa vəshi və̀ yimu?»

¹⁹ Ŋwə bitə tɨ́ vəŋ laa lùu ŋkɨə nu? Vəŋ gi tɨ́ ŋwə laa, «Lùu nu Yeso, wuu Nazaret, faŋ nə luu nshiiŋii-sɔghɔ, wèꞌ maa vənu vi faŋ ŋwə nəə yɨsə, nə mbɨə faŋ ŋwə nəə gisə vənshə, vɨsɨ Nwi nə vɨɨ vənshə.

²⁰ Vɨɨ kwalə məfeꞌ Nwi nə vəshɨꞌ via jia ŋwə, kwaŋ taa nsɔꞌ. Vɨ sɔꞌ nu ki, shìa laa vɨ zwi ŋwə, buu vɨ kɨ nii bèy ŋwə fuu fəŋkɔꞌ fə ŋkɨꞌsə.

²¹ Luu nə, yia nəə bɨꞌtə laa ŋwə lùu wə ntɨə faŋ ŋwə ndɔ bweysə vɨɨ Isirayl. Vənu vɔ́ gày, ŋkə lùu ndee yaa vəshi vətia.

²² Vəki vəmɔ́ꞌ fɨ taa ŋwaa yia nii twàŋ shuu wia. Vəŋ nii gə̀ shuu swi yɔ́ taa nshia-ndoo-mbisɨ,

²³ kee yè ŋku ki me, kùunə, gì laa vəŋ ye nshiisə-ŋiisə Nwi. Vəŋ gi laa ŋwə bwèy.

²⁴ Vɨɨ mɔ́ꞌ fɨ taa ŋwaa yia gə shuu swi yɔ́ nɨzi, yè nu kɔ́ sheꞌ nɨniŋ, sheꞌ faŋ vəki vɔ́ nii gì. Lùu fɨ maa ŋwə, vəŋ kee ye ŋwə me.»

²⁵ Yeso gi tɨ́ vəŋ laa, «Aŋ viŋ, tɔ kiŋ kee ta ley maa nu kɔ́ yimu? Fwi siŋ bwà maa məbiŋ vənu vənshə faŋ nshiisə-ŋii sɔghɔ nə nàysə nə mu?

²⁶ Maa nə luu nu Kristo, wuu məbweysə vɨɨ, maa məye ŋɨꞌ yɔ́, buu zɨ nu yifwàŋ ki.»

²⁷ Ŋwə gi tɨ́ vəŋ nɨniŋ, kɨ nii zì kɨ twelə ŋiꞌ təgi tənshə fɨ taa ŋwaꞌlə Nwi faŋ ntə kɔ̀ŋ wuu məbweysə vɨɨ ghɔ́, zì fɨ taa ŋwaꞌlə Mose, shɔ̀ɔ fɨ taa vəŋwaꞌlə və nshiisə-ŋii sɔghɔ vənshə.

²⁸ Vəŋ kɨ ziꞌ nshənə fɨ maa ntɨꞌ njyə faŋ vəŋ nəə gə shɔ nə, Yeso fɨnə yaa ŋwə taa shɨshɔɔ.

²⁹ Vəŋ buꞌ ghɔ tɨ́ ŋwə dɨdɨꞌ laa ghɔ vɨ vəŋ shi, buꞌ laa yighee duꞌtə nyə shɔ̀ɔ, fu kɨ nii fɨfəŋ. Nɨniŋ, ŋwə gə laa ghɔ vɨ vəŋ shi.

³⁰ Vəŋ gə ŋìi taa ŋii, dùꞌ nsi maa məzɨ, ŋwə ndi bee, shɔ̀ꞌtə Nwi, bɨꞌ, kɔ̀ tɨ́ vəŋ.

³¹ Sɨ vəŋ kɨ nii yiley, vəŋ kɨɨ nə ŋwə. Luu nə, ŋwə ndi fɨ yikəꞌ vəŋ.

³² Vəŋ gi vəŋ vəŋ laa, «Maa fwi saŋ-nsoo nii lùu səndɨŋ, faŋ ŋwə nii gì tɨ́ nsoo jɨɨ, baa twelə ŋiꞌ ŋwaꞌlə Nwi tɨ́ nsoo nə?»

³³ Vəŋ ndɔ fɨ nsi sheꞌ maa yighee yɔ́, bə̀ŋ gə̀ Jerusalem, yè vɨɨ ntɔŋ Yeso njɔ-yimuꞌ nə, faŋ vəŋ nə bàytə shəŋ muꞌ, nə vɨɨ mbɨə faŋ ghɔ vɨ vəŋ nə luu mɔ́ꞌ.

³⁴ Vɨɨ vɔ́ gi tɨ́ vəŋ laa Nwi ywèysə tɨta Yeso maa yinsəŋ, ŋwə fuu yikəꞌ Saymon.

³⁵ Vəŋ kɨ nii nàysə nu ŋkɨə faŋ ŋkə gày jɨɨ nə, baa nə faŋ vəŋ nii kɨ̀ɨ nə Yeso buꞌ məbɨꞌ bee wi.

Faŋ Yeso nə fùu yikəꞌ vɨɨ məzwetə nu ki vənshə

³⁶ Sheꞌ faŋ vəŋ nəə kɨ bii gisə kɔ̀ŋ vənu vɔ́, Yeso fuu taa ŋwaa vəŋ, gì laa, «Mənɔŋ-bwaŋnə tɔ viŋ!»

³⁷ Fwisə vəŋ shianə, vəŋ fee, kɨ bɨꞌtə laa vəŋ yè luu ŋgɔlə wə.

³⁸ Ŋwə gi tɨ́ vəŋ laa, «Sii yɨ kə buu fwi siŋ ghaysə viŋ? Yɨ kə buu yigisə məbitə vənu koꞌ taa fwisə viŋ?

³⁹ Viŋ ye ghɔ ŋaa nə ghuu ŋaa, ye, luu ŋkee nshɨ-tɔ ŋwaa. Viŋ mɔmə mə. Maa mbasə nə ghutə kee lùu maa ŋgɔlə wə me, faŋ viŋ ye laa ŋkə lùu maa mə.» [

⁴⁰ Ŋwə gi nɨniŋ, də̀ ghɔ ghi nə ghuu ghi tɨ́ vəŋ.]

⁴¹ Vəŋ ŋaytə dɨdɨꞌ, shuu vəŋ yɔŋ. Luu nə, məŋaytə vəŋ ghɔ́ fəŋ vəŋ maa məbiŋ laa lùu ŋwə. Nɨniŋ, ŋwə bitə tɨ́ vəŋ laa fazɨ ghɔ vəŋ feenə mu?

⁴² Vəŋ kɔ kuŋtə su yikay tɨ́ ŋwə.

⁴³ Ŋwə fi, kwə vɨsɨ vəŋ,

⁴⁴ kɨ nii gì tɨ́ vəŋ laa, «Maa yigisə nyaa, faŋ mə nə gì tɨ́ viŋ, faŋ nsiŋ nə luu mɔ́ꞌ nə, lùu laa vənu vənshə faŋ mbə lùu taa ŋwaꞌlə ntɨsə Mose, nə taa vəŋwaꞌlə və nshiisə-ŋii sɔghɔ, nə taa ŋwaꞌlə Sam, kɔ̀ŋ mə, ndɔ gay vənshə.»

⁴⁵ Nɨniŋ, ŋwə nə ŋaꞌsə fwisə vəŋ maa məkɨɨ nə yigisə Nwi.

⁴⁶ Ŋwə gi tɨ́ vəŋ laa, «Vɨ nə nyɔ̀ꞌ taa ŋwaꞌlə Nwi laa nu Kristo, wuu məbweysə vɨɨ, lùu laa ŋwə ye ŋɨꞌ, vəshi kɨ ziꞌ vətia, ŋwə ywey fɨ shɨ yiku,

⁴⁷ baa nə laa vɨ ndɔ kɨ fɨꞌtə nu ki tɨ́ vɨɨ vənshə fɨ taa mbi, laa vəŋ kwiinə fwisə vəŋ, buu Nwi ndenə yibɨsə vəŋ buꞌ yizii yi. Nɨniŋ, viŋ ndɔ kɨ fɨꞌtə nu kɔ́, tèy fɨ ntɨꞌ Jerusalem.

⁴⁸ Viŋ lùu vɨɨ mbɨə faŋ vəŋ nə yè vənu vaŋ nə yisɨ, faŋ viŋ ndɔ kɨ fɨꞌtə tɨ́ vɨɨ nə.

⁴⁹ Viŋ zɔ! Mə taa tɔŋ Zwitə Ley Nwi faŋ Tii ŋwaa nə kɔ̀ꞌnə nə, tɨ́ viŋ. Viŋ duꞌ taa shɨ, zìꞌ maa shi ŋkɨə faŋ Nwi ndɔ kwaŋ wutə maa viŋ, faŋ ŋkə ndɔ fɨ yizɔ.»

Faŋ Nwi nə koꞌsə Yeso yizɔ

⁵⁰ Ŋwə nə gì nɨniŋ, ndì vəŋ, ghɔ vɨ vəŋ fuu, tòꞌ gə̀ zìꞌ ntɨꞌ Betani. Ŋwə shaꞌsə ghɔ ghi, tù mənɔŋ-bwaŋnə tɔ vəŋ.

⁵¹ Faŋ ŋwə nə tù mənɔŋ-bwaŋnə tɔ vəŋ nə, kɨ nii yindɔ fɨ yɨ vəŋ. Nwi koꞌsə ŋwə yizɔ.

⁵² Vəŋ gukə nsi vɨsɨ ŋwə, gwènə ŋwə, kɨ nii bə̀ŋ gə̀ Jerusalem, kɨ ŋaytə ŋkee dɨdɨꞌ.

⁵³ Vəŋ gə, gòꞌ sheꞌ taa ŋii Nwi yikwalə, kɨ bəŋsə Nwi.