Lukas 20 - Vengo (Babungo)

Faŋ vəshɨꞌ nə bìtə nu wutə Yeso tɨ́ ŋwə

¹ Shi mɔ́ꞌ faŋ Yeso nəə deesə nu Nwi tɨ́ vɨɨ taa ŋii Nwi yikwalə, baa fɨꞌtə ntɔŋ yijəə Nwi tɨ́ vəŋ, vɨɨ kwalə məfeꞌ Nwi nə vɨɨ mədeesə ŋwaꞌlə Nwi nə vɨɨ taa fɨ taa ŋii Nwi jwi yɨ ŋwə,

² gì tɨ́ ŋwə laa, «Naysə kəŋ wutə ŋkɨə faŋ a kìi, buu kɨ yɨsə vənu və̀ nee shɔ nə tɨ́ yia. Wə ntɨə faŋ ŋwə kɔ̀ wutə kɔ́ tɨ́ ghɔ lùu ndə?»

³ Ŋwə bəŋsə tɨ́ vəŋ laa, «Mə kìi nu bitə tɨ́ viŋ nɨzi. Viŋ naysə shee laa,

⁴ nu məkɔ muu faŋ Jɔn nə kɔ̀ muu tɨ́ vɨɨ nə, ŋkə nə ndɔ fɨ ghɔ Nwi mu, mu fɨ ghɔ wə mənsaw?»

⁵ Vəŋ bɨꞌtə nu kɔ́ wə nə muꞌ nə muꞌ laa, vəŋ kɨ luu gi laa fɨ ghɔ Nwi, buu ŋwə taa bitə laa, sii yɨ kə vəŋ kee bìŋ ŋwə me.

⁶ Luu nə, vəŋ kɨ luu gi laa fɨ ghɔ wə mənsaw, buu vɨɨ vənshə taa tumə vəŋ nə ŋoꞌsə, buꞌ laa vɨɨ vənshə biŋ laa Jɔn nə luu nshiiŋii-sɔghɔ.

⁷ Nɨniŋ, vəŋ bəŋsə tɨ́ Yeso laa vəŋ kee kɨɨ nə shəŋ yuu ŋkə nə ndɔ fɨ fuŋ me.

⁸ Yeso gi tɨ́ vəŋ laa, «Yuu viŋ bəŋsə tɨ́ nee nə, buu mə kee bee nàysə wutə ŋkɨə yuu mə kii, buu yɨsə vənu vɔ́ shɔ nə, tɨ́ viŋ me.»

Yigisə tii buꞌ vɨɨ faŋ vəŋ nəə faꞌ taa yindɨɨ məluꞌ maa nswii

⁹ Yeso baa tìi yigisə tii yimɔ́ꞌ tɨ́ nwaa vɨɨ vɔ́, gì laa lee, «Wə mɔ́ꞌ nə bìa vətɨ və vətaŋ vəmɔ́ꞌ taa biisə ŋwə, kwàŋ vɨɨ faꞌ shɔ, kɨ nii ndɔ̀ gə̀ tɔŋ, shì shɔ tay.

¹⁰ Yighee kɨ kuꞌ faŋ vətaŋ və vətɨ vɔ́ bay, ŋwə tɔŋ wuu faꞌ wi tɨ́ vɨɨ vɔ́ taa biisə ŋwə, laa vəŋ seenə fɨ maa vətaŋ faŋ vəŋ kwii fɨ taa biisə yɔ́, kɔ̀ tɨ́ yi. Vɨɨ vɔ́ saŋ wuu faꞌ ghɔ́, jɔ̀ŋ ŋwə, ŋwə kuunə nə ghɔ day.

¹¹ Ŋwə baa kɨ tɔŋ wuu faꞌ wi mɔ́ꞌ. Vəŋ saŋ ŋwə nɨzi, ndàsə ŋwə, jɔ̀ŋ ŋwə, ŋwə kuunə nə ghɔ dayday nɨzi.

¹² Ŋwə baa kɨ tɔŋ wuu faꞌ wi, gə ziꞌ maa ghee tia, vəŋ ndɨəsə vədɨꞌ maa ŋwə, jɔ̀ŋ ŋwə, mɔꞌ fu.

¹³ Tɨɨ yindɨɨ ghɔ́ gi laa, «Mə sii taa yɨ kɨkə? - Mə taa tɔŋ ŋwiŋ ŋwaa faŋ mə kàw ŋwə. Vəŋ taa fee ŋwə.»

¹⁴ Nɨniŋ, ŋwə tɔŋ ŋwiŋ wi ghɔ́. Vɨɨ vɔ́ ye ŋwə, kà yighaw, gi sheꞌ vəŋ vəŋ laa, «Luu ŋkee nji-ŋiinə yi nə. Nsiŋ zwi ŋwə, laa vətɔ vɔ́ kɨ nii lùu mbaŋ-nsiŋ.»

¹⁵ Vəŋ jia ŋwə, mɔ̀ꞌ yiba ŋkɔꞌ, zwi ŋwə. - Faŋ vəŋ nə yɨ nɨniŋ nə, tɨɨ yindɨɨ ghɔ́ ndɔ yɨ kɨkə maa vəŋ?

¹⁶ Maa ŋwə ndɔ jwi, zwilə vɨɨ vɔ́, ndì vɨɨ day maa məfaꞌ taa biisə ghɔ́.» Yeso nə nàysə yigisə tii yɔ́, vəshɨꞌ vɔ́ gì laa, «Bey-nə-kia.»

¹⁷ Ŋwə ndeynə vəŋ, gì laa, «Maa vɨ nyɔ̀ꞌ taa ŋwaꞌlə Nwi laa, «Ŋkee ŋoꞌ njyə faŋ vɨɨ məbɔŋ ŋii nə twèy, gù ŋoꞌ maa məbɔŋ mfay ŋii.» Ŋiꞌ shəŋ ŋwaꞌlə Nwi kɔ́ sii lùu laa kə?

¹⁸ Maa vɨ baa nyɔ̀ꞌ shɔ laa, «Wə faŋ ŋwə gù fuu ŋoꞌ yɔ́, sèekə vəway vəway. Ŋoꞌ yɔ́ gu tɔ wə, nyə nyweꞌtə ŋwə.»

¹⁹ Vɨɨ mədeesə ŋwaꞌlə Nwi nə vɨɨ kwalə məfeꞌ Nwi kəə jɨɨ maa məjia ŋwə sheꞌ maa yighee yɔ́, buꞌ laa vəŋ nəə kɔꞌ kɨɨ laa ŋwə tìi yigisə tii yɔ́ kɔ̀ŋ vəŋ. Luu nə, vəŋ nə fèe vɨɨ, kee jia ŋwə me.

Nu məmɔꞌ tasə tɨ́ fwàŋ Kaysa

²⁰ Nɨniŋ, vɨɨ kwalə məfeꞌ Nwi nə vɨɨ Farisii nyɔꞌ Yeso, tɔ̀ŋ ŋkisə maa ŋwə, faŋ vəŋ jwì kɨ boꞌ ŋwə laa vəŋ lùu vɨɨ yinsəŋ, jwi kɨ kɔꞌsə ŋwə maa yigisə yi, tɨ́ kaꞌ vəŋ kɔ ŋwə tɨ́ vɨɨ kwalə nə goməna, kwàŋ ŋwə taa nsɔꞌ.

²¹ Ŋkisə sɔ́ jwi, gì tɨ́ Yeso laa, «Tɨta, yia kɔꞌ kɨɨ laa a gisə, ndɔ deesə sheꞌ nu faŋ ŋkə lùu kəloomə, kee yɨsə nu nə fəntɔ-fə-yisɨ me, deesə jɨɨ Nwi maa yinsəŋ.

²² Naysə tɨ́ yia laa ŋkə kùꞌnə laa vɨ kɨ mɔꞌ tasə tɨ́ fwàŋ kwalə Kaysa mu, mu bey?»

²³ Ŋwə kɨɨ nə mənay vəŋ, gì tɨ́ vəŋ laa,

²⁴ «Viŋ jwi də ka ŋgwə faŋ vɨ mɔꞌ shee.» Vəŋ jwi nə ka tɨ́ ŋwə. Ŋwə gi laa, «Tɔ wə kə, nə yizii nyə̀ fuu ka ŋwə̀ lùu njyə ndə?» Vəŋ laa lùu njyə Kaysa.

²⁵ Ŋwə gi tɨ́ vəŋ laa, «Faŋ ŋkə lùu nɨniŋ, viŋ kɔ fa Kaysa tɨ́ Kaysa, kɔ̀ fa Nwi tɨ́ Nwi.»

²⁶ Nɨniŋ, vəŋ kee kɨɨ jia ŋwə maa yigisə yi taa ŋwaa vɨɨ me. Shuu vəŋ yɔŋ maa nu ŋkɨə faŋ ŋwə bə̀ŋsə tɨ́ vəŋ nə. Vəŋ gu ŋkwəŋ.

Nu faŋ vəŋku-vənsisə ndɔ ywey fɨ shɨ yiku

²⁷ Vɨɨ Sadusii vəmɔ́ꞌ jwi maa Yeso, faŋ vəŋ gisə laa kaꞌ wə kee ywèy fɨ shɨ yiku me.

²⁸ Vəŋ jwi bìtə tɨ́ Yeso laa, «Tɨta, Mose nə nyɔ̀ꞌ taa ŋwaꞌlə Nwi tɨ́ nsiŋ laa, wə kɨ luu ku, mèꞌtə zu wi faŋ wee kee lùu shɔ me, ŋkə bàw laa weenshu wi ndaa zu ŋku ghɔ́, bi wee fɨ fuŋ, nùŋ maa nji-ŋiinə weenshu wi ghɔ́.

²⁹ Nɨniŋ, vaŋ-nshwi nə luu shɔ kwatia. Nshɔɔ vɨsɨ ndaa wəzwi, ku, kee bì wee me.

³⁰ Mbeꞌsə yi ndaa wəzwi ghɔ́, ku, kee bì wee me.

³¹ Tuŋnə ki lwesə vətia yɨ sheꞌ nɨniŋ. Sheꞌ nee, vəŋ kwatia ndaa wəzwi ghɔ́, kùkə, kee bì wee me.

³² Kɨ luu fɨ yiba, wəzwi ghɔ́ ku nɨzi.

³³ Nɨniŋ, wəzwi ghɔ́ ndɔ luu zu ndə maa yighee njyə faŋ vəŋ ndɔ ywey fɨ shɨ yiku, faŋ vəŋ vənshə kwatia nə ndaa wəzwi ghɔ́ nə.»

³⁴ Yeso gi tɨ́ vəŋ laa, «Vaŋ taa mbi nyə̀ yaa kɨ ndaa vəki, vəki ndàa wəndɔŋ.

³⁵ Gə fɨ maa vɨɨ mbɨə faŋ Nwi ndɔ biŋ vəŋ, vəŋ kuꞌnə maa məywey fɨ shɨ yiku, baa kuꞌnə maa məzɨ mbi yinjii, vəŋ kee ndɔ baa ndaa vəki me, vəki kee ndàa vəndɔŋ me.

³⁶ Luu nɨniŋ buꞌ laa kaꞌ vəŋ ndɔ kee baa kùkə me. Vəŋ ndɔ luu sheꞌ yaa nshiisə-ŋiisə Nwi, baa luu ŋkee vaŋ Nwi, buꞌ faŋ Nwi yweysə vəŋ fɨ shɨ yiku nə.

³⁷ Gə fɨ maa nu məywey fɨ shɨ yiku, shəŋ mɔ́ꞌ shɔ taa ŋwaꞌlə Nwi faŋ ŋkə də̀ laa lùu nu yinsəŋ laa Nwi ndɔ yweysə vəŋku və nsisə. Shəŋ ŋwaꞌlə Nwi kɔ́ lùu shəŋ ŋkɨə faŋ vɨ nyɔ̀ꞌ kɔ̀ŋ shuꞌ gay faŋ ŋkə nəə kɨɨ nə. Vɨ nyɔ̀ꞌ shɔ laa Mose nə tii Mɔꞌmbi laa Nwi Abraham, baa nə Nwi Isak, nə Nwi Jeykob, (faŋ vətɨɨ vaŋ-nsiŋ vɔ́ nə kɔlə kùkə fɨshi nə.)

³⁸ Nɨniŋ, Nwi kee lùu Nwi vəŋku və nsisə me, lùu Nwi vɨɨ bweynə, buꞌ laa vɨɨ vənshə dùꞌ yinyay buꞌ ŋwə.»

³⁹ Vɨɨ mɔ́ꞌ fɨ taa ŋwaa vɨɨ mədeesə ŋwaꞌlə Nwi gi laa, «Tɨta, a gì ŋkee nu.»

⁴⁰ Shù fɨ maa yighee yɔ́, wə nə kee baa kìi fwi maa məbitə nu tɨ́ ŋwə me.

Kaꞌ Kristo lùu wee wee fwàŋ Deyvid mu

⁴¹ Yeso baa gi tɨ́ vəŋ laa, «Vɨɨ sii gisə laa Kristo lùu wee wee fwàŋ Deyvid kɨkə?

⁴² Maa nshɨ-tɔ fwàŋ Deyvid nə nyɔ̀ꞌ taa ŋwaꞌlə Sam laa, «Mɔꞌmbi gì tɨ́ tɨta ŋwaa laa ŋwə duꞌ maa kwiŋ maꞌnə wi,

⁴³ gə ziꞌ maa yighee njyə faŋ yi ndɔ nuŋsə vɨɨ mbeenə vi nsi laa ŋwə kɨ təsə ghuu ghi maa vəŋ.»

⁴⁴ Nɨniŋ, faŋ fwàŋ Deyvid nə tìi ŋwə nə tɨta wi, buu ŋwə baa lùu ŋwiŋ wi kɨkə?»

Faŋ Yeso nə tɨ̀ vɨɨ vi maa məshiinə yiŋwaa vəŋ

⁴⁵ Yeso baa kɨ gì tɨ́ vɨɨ məzwetə nu ki, faŋ nwaa vɨɨ vəyaŋ nə luu shɔ, zɔ̀ yigisə yi nɨzi, laa,

⁴⁶ «Viŋ kɨ shiinə yiŋwaa yiŋ fɨ ghɔ vɨɨ mədeesə ŋwaꞌlə Nwi, faŋ vəŋ kàw maa məmɔꞌ njwisə kwalə maa vəŋ, toꞌ nə nsə, kàw laa vɨɨ kɨ shɔꞌtə vəŋ taa təwiŋ. Vəŋ duꞌ fuu vəŋkaw və shaꞌsə taa ndɔꞌ məshəŋtə, duꞌ vɨsɨ taa shəŋ yitianə.

⁴⁷ Vəŋ yɨ nɨniŋ, fi vətɔ və vəki ŋkusə, boꞌ ŋwaa, shɔꞌtə Nwi, tày ŋkee dɨdɨꞌ. Viŋ kɔꞌ kɨɨ laa nsɔꞌ njyə faŋ Nwi ndɔ kwaŋ maa vəŋ, ndɔ weꞌ shɔ̀ɔ ki.»