Lukas 2 - Vengo (Babungo)

Faŋ vɨ nə bì Yeso

¹ Nə luu maa ŋuꞌsə mbi sɔ́, Kaysa Ogɔstɔs nə luu fwàŋ kwalə, sɔꞌ məshɨ məyaŋ, sɔꞌ laa vɨ say vɨɨ məshɨ məshɨ.

² Nə luu ŋkee mfɔŋ yighee maa məsay vɨɨ fɨ taa mbi. Yighee yɔ́ Kirenɔs nə luu goməna fɨ shɨ Siria.

³ Nɨniŋ, vɨɨ vənshə waꞌkə, gə̀ taa məshɨ məvəŋ, tɨ́ kaꞌ vɨ say vəŋ.

⁴ Josef baa luu ndɔ̀ fɨ ntɨꞌ Nazaret shɨ Galilii, gə̀ ntɨꞌ Betelehem fɨ Judia, faŋ nə luu ntɨꞌ Deyvid. Ŋwə nə gə Betelehem, buꞌ laa ŋwə nə luu wuu ŋiꞌ ŋii fwàŋ Deyvid.

⁵ Ŋwə nə gə̀ shɔ laa vɨ say ŋwə ghɔ zu wi Meri, faŋ ŋwə nə luu gɔsə.

⁶ Faŋ vəŋ nə luu Betelehem, yighee jwi kùꞌ yuu Meri bi.

⁷ Ŋwə bi mfɔŋ ŋwiŋ wi, luu wee-wəndɔŋ, ndìŋtə ŋwə taa vəway və njwisə, nùŋ ŋwə taa ŋkɨŋ fazɨ nyaasə taa ta nyaasə. Vəŋ nə shi taa ta nyaasə, buꞌ laa shəŋ nə kee lùu shɔ taa ŋii tɨ́ vəŋ maa məshi shɔ me.

Faŋ nshiisə-ŋiisə Nwi nə jwi nàysə tɨ́ nshiisə bisə laa vɨ bì Yeso

⁸ Maa ntɨꞌ yɔ́, nshiisə bisə nə luu shɔ maa yighee yɔ́, shii bisə-njɨɨ vəŋ vətuꞌ taa tɔɔ.

⁹ Nshii-ŋii Nwi gwəkə fuu vɨsɨ vəŋ, məley Nwi bee kia vəŋ, vəŋ fee ŋkee dɨdɨꞌ.

¹⁰ Nshiiŋii Nwi yɔ́ gi tɨ́ vəŋ laa, «Kɨ viŋ baa fee me! Viŋ zɔ! Mə jwi naysə ntɔŋ yijəə tɨ́ viŋ, faŋ luu ŋkee nu məŋaytə tɨ́ vɨɨ vənshə.

¹¹ Vɨ bì wuu məbweysə wiŋ ndee ntɨꞌ Deyvid. Ŋwə lùu Kristo, Tɨɨ-mbi.

¹² Shwenə ki faŋ kaꞌ viŋ taa kɨɨ nə ŋwə fuŋ, lùu laa viŋ taa ye wee faŋ vɨ ndiŋtə ŋwə taa vəway və njwisə, ndɔ̀ nùŋ ŋwə taa ŋkɨŋ fazɨ nyaasə.»

¹³ Sheꞌ fɨkɨꞌ nee, nwaa butə vɨɨ fɨ yizɔ gwəkə fuu yɨ nshiiŋii Nwi yɔ́, kɨ bəŋsə Nwi laa,

¹⁴ «Nsiŋ kɨ bəŋsə Nwi fɨ yizɔ, məduꞌ-nyɔŋ shɨ nsi tɨ́ vɨɨ gəŋsə Nwi.»

¹⁵ Nshiisə-ŋiisə Nwi sɔ́ ndɔ fɨ yɨ nshiisə bisə sɔ́, nshiisə bisə sɔ́ duꞌ, shuu vəŋ faynə gɨ yimuꞌ, vəŋ gi laa, «Nsiŋ tɔŋ gə ziꞌ Betelehem, yè nu ŋkɨə faŋ ŋkə gày shɔ, faŋ Nwi yɨsə laa nsiŋ kɨɨ nə.»

¹⁶ Vəŋ kɔꞌlə gə, ye Meri ghɔ Josef, nə wee faŋ ŋwə nɔ̀ŋ taa ŋkɨŋ fazɨ nyaasə.

¹⁷ Vəŋ ye nɨniŋ, naysə yigi njyə faŋ nshiiŋii Nwi yɔ́ nii nàysə tɨ́ vəŋ kɔ̀ŋ wee ghɔ́.

¹⁸ Vɨɨ vənshə faŋ vəŋ nə zɔ̀ yigi yɔ́, shuu vəŋ yɔŋ maa nu ŋkɨə faŋ nshiisə bisə sɔ́ nàysə tɨ́ vəŋ nə.

¹⁹ Meri ndi yigi yɔ́ yinshə, nùŋ taa fwi ŋwə, kɨ kwaꞌtə.

²⁰ Nshiisə bisə sɔ́ bəŋ, kɨ bəŋsə Nwi dɨdɨꞌ maa nu ŋkɨə faŋ vəŋ nii zɔ, ndɔ ye yuu vɨ nii nàysə tɨ́ vəŋ nə.

Faŋ vɨ nə sɨ̀ɨtə Yeso, gə̀ nə ŋwə taa ŋii Nwi yikwalə

²¹ Vəshi kɨ ziꞌ yifɔŋ, vɨ sɨɨtə wee ghɔ́, shu yizii yi laa Yeso, faŋ nshiiŋii Nwi nə nàysə tɨ́ Meri maa yighee njyə faŋ ŋwə nə kee ta gɔ̀ ŋwə me.

²² Yighee kɨ nii kùꞌ tɨ́ vəŋ maa məgə Jerusalem, yɨsə vənu mbɨə faŋ Mose nə nùŋsə laa vɨɨ Isirayl kɨ yɨsə, tɨ́ kaꞌ vəŋ baa luu vəley vɨsɨ Nwi. Vəŋ ndi wee ghɔ́, gə̀ nə ŋwə Jerusalem maa mədə ŋwə tɨ́ Nwi.

²³ Nuŋsə vəŋ nə luu nɨniŋ, buꞌ laa vɨ nə nyɔ̀ꞌ taa ŋwaꞌlə Nwi laa, «Kii Nwi kii mfɔŋsə vaŋ-vəndɔŋ vənshə faŋ vɨ bi.»

²⁴ Vəŋ gə̀ nɨniŋ, kɔ̀ Nwi nə vətɔ mbɨə faŋ vɨ nuŋsə taa ŋwaꞌlə Nwi, faŋ luu vəbɔŋsə vəbɔɔ, tɨꞌnə me vaŋ-vəbɔŋsə vəbɔɔ.

Faŋ Saymon ghɔ Ana nə bə̀ŋsə Nwi buꞌ Yeso

²⁵ Maa yighee yɔ́ wə mɔ́ꞌ nə luu shɔ ntɨꞌ Jerusalem, yizii yi luu Saymon. Ŋwə nəə yɨsə vənu faŋ mbə lùu vəloomə, kɔ feenə tɨ́ Nwi, kɨꞌ sheꞌ wə ntɨə faŋ Nwi nə kɔ̀ꞌnə maa mətɔŋ maa məzwisə fwisə vɨɨ Isirayl. Zwitə Nwi luu maa ŋwə.

²⁶ Zwitə Nwi nə duꞌtə ŋkə gi tɨ́ ŋwə laa, ŋwə ndɔ ye wuu ŋkɔꞌnə Nwi ghɔ́ ŋkəə, buu yiku ndi ŋwə.

²⁷ Maa shi ŋkɨə faŋ vɨ nə jwì nə Yeso Jerusalem nə, Zwitə Nwi yɨsə Saymon ghɔ́ ndɔ fɨ nsi, gə̀ taa ŋii Nwi yikwalə. Ŋwə nə luu shɔ, nshu Yeso nə tii wi jwi nə Yeso maa məyɨsə nu ŋkɨə faŋ nuŋsə gì nə, maa ŋwə.

²⁸ Saymon fi wee ghɔ́, shàꞌ ghɔ ŋwə, bəŋsə Nwi laa,

²⁹ «Tɨta Nwi, a yɨ̀ nu ŋkɨə faŋ a nə kɔ̀ꞌnə shee nə. A meꞌtə mə ndwə, faŋ mə lùu wuu faꞌ wə nə, laa mə taa ku, gə̀ nə mənɔŋ-bwaŋnə,

³⁰ buꞌ laa sɨ ŋaa yè wə ntɨə faŋ ŋwə kɔ məbwey vəlwaŋ tɨ́ vɨɨ.

³¹ A nùŋsə məbwey ghɔ́ sɨ ŋgwisə vɨɨ vənshə.

³² Wee ŋwə̀ lùu yaa kiꞌ faŋ ŋwə də jɨɨ tɨ́ vɨɨ tətɔŋ fu, laa vəŋ ndɔ kɨɨ nə Nwi. Ŋwə ndɔ baa yɨsə vɨ bəŋsə vɨɨ Isirayl, faŋ lùu vɨɨ və nə.»

³³ Tɨɨ Yeso ghɔ nshu wi zɔ yigi yɔ́, shuu vəŋ yɔŋ maa vənu vɔ́ faŋ Saymon nə gi kɔ̀ŋ wee ghɔ́ nə.

³⁴ Saymon tu mənɔŋ-bwaŋnə maa vəŋ, gì tɨ́ Meri, nshu wee ghɔ́ laa, «Ye mɔɔ, Nwi nùŋ wee ŋwə̀ laa vɨɨ vəyaŋ fɨ taa ŋwaa vɨɨ Isirayl ndɔ ndi buꞌ faŋ vəŋ kee nuŋ fwi vəŋ maa ŋwə me, vəmɔ́ꞌ ndɔ bwey buꞌ ŋwə. Ŋwə ndɔ luu shwenə fɨ ghɔ Nwi, faŋ vɨɨ vəyaŋ taa kɨ twey ŋwə.

³⁵ Nu kɔ́ ndɔ yɨsə ŋkitə vɨɨ vəyaŋ fuu ntee. Nu mɔ́ꞌ ndɔ gay maa ŋwə faŋ ŋkə yɨsə fwi yə za, sheꞌ yaa vɨ ndì baꞌ yighaw, tɔ̀ fwi yə shɔ. Nu kɔ́ ndɔ yɨsə ŋkitə vɨɨ vəyaŋ fuu ntee.»

³⁶ Nshiiŋii-sɔghɔ mɔ́ꞌ nə luu shɔ nɨzi, faŋ nə luu wəzwi, yizii yi luu Ana. Ŋwə luu wee Fanuel, wuu ŋiꞌ ŋii Asha. Ŋwə nə dwàŋ dɨdɨꞌ. Ndəə wi nə ku fɨshi. Ŋwə nə ta, ndàa ndəə wi, shì ghɔ ŋwə sheꞌ maa ŋuꞌ kwatia, ndəə wi kɨ nii yiku.

³⁷ Ŋwə kɨ nii shì yaa zu ŋku ziꞌ ŋuꞌ njɔsə-yishwe muu-yimfɔŋ. Ŋwə nə shì sheꞌ taa ŋii Nwi yikwalə, kee baa fùu fɨ fuŋ me, zwisə nə jɨŋ, shɔꞌtə Nwi vətuꞌ nə shɨshwi. Nə luu faꞌ wi tɨ́ Nwi nɨniŋ.

³⁸ Wəzwi ghɔ́ shəŋtə jwì yɨ wee ghɔ́ maa yighee yɔ́ nɨzi, bəŋsə Nwi, baa gì kɔ̀ŋ wee ghɔ́ tɨ́ vɨɨ vənshə, faŋ vəŋ nəə kɨꞌ laa Nwi ndɔ bweysə shɨ Jerusalem.

³⁹ Nshu Yeso ghɔ tii wi yɨsə vənu vənshə, faŋ nuŋsə Nwi naysə nə, kɨ nii baa ndɔ̀ fɨ ntɨꞌ Jerusalem, bə̀ŋ gə shɨ Galilii, taa ntɨꞌ vəŋ, Nazaret.

⁴⁰ Wee ghɔ́ ta, weꞌ, yitɔfə Nwi lwaŋ tɔ ŋwə. Mənɔŋ-bwaŋnə fɨ ghɔ Nwi nə luu maa ŋwə.

Faŋ Yeso nə luu ŋuꞌ njɔsə-bɔɔ, gə Jerusalem

⁴¹ Tɨɨ Yeso nə nshu wi yaa kɨ gə Jerusalem ŋuꞌ nə ŋuꞌ maa shi zwisə Pasa.

⁴² Yeso kɨ ziꞌ ŋuꞌ njɔsə-bɔɔ, vɨ baa koꞌ gə, gə nə ŋwə Jerusalem faŋ nə luu nuŋsə shi zwisə kɔ́.

⁴³ Vəshi vɔ́ kɨ shɔɔ, vəŋ bəŋ kɨ kuunə. Yeso faŋ ŋwə nəə kɨ bii weembwa wuubwa nə, goꞌ Jerusalem, tii wi ghɔ nshu kee kɨɨ me,

⁴⁴ bee kɨ kii bɨꞌtə laa ŋwə lùu taa nwaa vɨɨ yitoꞌ. Nɨniŋ, vəŋ toꞌ shi ŋkwəŋ, kəə ŋwə fɨ taa ŋwaa vɨɨ yikuu vəŋ nə vɨɨmba vəŋ.

⁴⁵ Faŋ vəŋ nə kee yè ŋwə me, bəŋ gə Jerusalem, kɨ kəə ŋwə fɨ fuŋ.

⁴⁶ Fu lee, vəŋ gə taa ŋii Nwi yikwalə, yè ŋwə yifi. Ŋwə nə dùꞌ taa ŋwaa vɨɨ mədeesə ŋwaꞌlə Nwi, zɔ vənu faŋ vəŋ gisə, bitə vənu tɨ́ vəŋ.

⁴⁷ Ŋkə nə ghɔ̀ꞌ vɨɨ vənshə faŋ vəŋ nə zɔ̀ yigisə yi. Shuu vəŋ yɔŋ buꞌ yitɔfə yi, nə nu ŋkɨə faŋ ŋwə bəŋsə.

⁴⁸ Tii wi ghɔ nshu wi ye ŋwə, shuu vəŋ yɔŋ. Nshu wi gi tɨ́ ŋwə laa, «Ŋwiŋ ŋwaa, a sii yɨ nu kə̀ nee maa yia buꞌ kə? Maa a ye faŋ yia tii wə kəə ghɔ nə mənsɨ sɨ yia.»

⁴⁹ Ŋwə gi tɨ́ vəŋ laa, «Viŋ nii kəə mə nɨniŋ buꞌ kə? Viŋ nii kee yikɨɨ laa nu kaŋ lùu laa mə kɨ duꞌ taa ŋii Tii ŋwaa yimu?»

⁵⁰ Ŋwə nə gì nɨniŋ, vəŋ kee kɨ̀ɨ nə ŋiꞌ nu ŋkɨə faŋ ŋwə gì tɨ́ vəŋ nə me.

⁵¹ Ŋwə kɨ nii ndɔ̀, ghɔ vɨ vəŋ siꞌ bəŋ gə Nazaret, ŋwə nə zɔnə vəŋ. Nshu wi nuŋsə vənu vɔ́ vənshə taa fwi ŋwə.

⁵² Yeso nə ta, yitɔfə yi gə vɨsɨ vɨsɨ. Ŋwə baw tɨ́ Nwi nə vɨɨ.