Lukas 17 - Vengo (Babungo)

Bàw nsiŋ ndenə yibɨsə vɨɨ, kee kɨ kɔꞌsə vɨɨ me

¹ Yeso nə baa gì tɨ́ vɨɨ məzwetə nu ki laa, «Nu vɨɨ vənshə lùu laa vəŋ ŋii məmɔŋ maa məyɨ nu bwə. Luu nə, ndwaŋ tɔ wə ntɨə faŋ ŋwə yɨsə laa wə mɔ́ꞌ yɨ nu bwə.

² Ŋkə nə bàw tɨ́ ŋwə laa vɨ ndi yiti bee, gày me ŋwə, mɔ̀ꞌ ŋwə ŋkee taa mamuu, shɔ̀ɔ fɨ ghɔ vɨ meꞌtə ŋwə, ŋwə gə mɔŋ sheꞌ wuu tɨtiꞌ muꞌ, yɨsə laa ŋwə yɨ nu bwə.

³ Viŋ shiinə yiŋwaa yiŋ! Kɨ luu laa weenshu wə gù nu, a tɨ ŋwə. Ŋwə kɨ luu kwiinə fwi yi, a ndenə nu kɔ́.

⁴ Ŋwə kɔlə gù maa ghɔ ghee kwatia maa shi kəmuꞌ, jwi yɨ ghɔ, gì laa yi lùŋ maa nu kɔ́, bàw a ndenə yibɨsə yi ghee nshə.»

Wə faŋ ŋwə nùŋ fwi yi maa Nwi, kii wutə

⁵ Vɨɨ ntɔŋ tɨta Yeso gi tɨ́ ŋwə laa ŋwə kuꞌsə wutə maa vəŋ, tɨ́ kaꞌ vəŋ nùŋ fwisə vəŋ maa Nwi, wèꞌ shɔ.

⁶ Tɨta Yeso gi tɨ́ vəŋ laa, «Viŋ nii toꞌ nuŋ fwi siŋ maa Nwi sheꞌ tɨtiꞌ, sheꞌ yaa ŋɨꞌ fulɨsɨgaa, buu kaꞌ viŋ gì tɨ́ tɨ yɔŋ kə̀ laa, muꞌnə viŋ ghay ghə fɨ feenə, gə bìa ŋwaa wə taa mamuu, buu tɨ kɔ́ taa zɔnə viŋ.»

Bàw nsiŋ kɨ faꞌ faꞌ Nwi, kee kɨ kɨꞌ vəndɔꞌnə me

⁷ (Yeso baa gì laa,) «Wə lùu shɔ taa ŋwaa viŋ faŋ ŋwə kìi buꞌ wi, faŋ ŋwə faꞌ taa biisə, tɨꞌnə me shii bisə, gì tɨ́ ŋwə maa yighee njyə faŋ ŋwə bə̀ŋ fɨ taa biisə, laa ŋwə jwi duꞌnə nsi, zɨ mu? Bey.

⁸ Maa wə bee kii gì tɨ́ buꞌ wi laa ŋwə naysə fazɨ, lòotə ŋwaa wi, jwì kɔ̀ tɨ́ yi, yi zɨ, ndɔ nu, buu nshɨ-tɔ buꞌ ghɔ́ zɨ, ndɔ nù nɨzi.

⁹ Maa ŋwə kee yaa kɨ kɔ bwaŋ-wee tɨ́ buꞌ wi ghɔ́, buꞌ faŋ ŋwə zɔnə ŋwə, yɨ nu ŋkɨə faŋ ŋwə naysə tɨ́ ŋwə nə me.

¹⁰ Gə fɨ maa viŋ, faŋ viŋ yɨ̀sə vənu vənshə faŋ Nwi nùŋsə tɨ́ viŋ, bàw viŋ kɨ nii gì laa, «Yia luu sheꞌ vəbuꞌ, yɨ sheꞌ nu ŋkɨə faŋ vɨ nàysə tɨ́ yia, faŋ lùu faꞌ wia nə.»

Faŋ Yeso nə shùꞌ vɨɨ zatə bwə yighuŋ

¹¹ Yeso kii toꞌ fɨ jɨɨ, gə ntɨꞌ Jerusalem, shɔ̀ɔ fɨ nɨntəŋ məshɨ mə Samaria nə Galilii.

¹² Faŋ ŋwə nə ŋìi maa wee-ntɨꞌ mɔ́ꞌ, ghɔ vɨɨ zatə bwə yighuŋ faynə, faŋ vəŋ tɨ̀ŋnə ntaŋ.

¹³ Vəŋ shaꞌsə gɨsə vəŋ, gì laa, «Tɨta Yeso, kee gəŋ sia!»

¹⁴ Ŋwə ye vəŋ, gì tɨ́ vəŋ laa, «Viŋ gə, də̀ yiŋwaa yiŋ tɨ́ vɨɨ məfeꞌ Nwi.» Faŋ vəŋ yaa gə, yiŋwaa yivəŋ kiasə ley.

¹⁵ Wə muꞌ fɨ taa ŋwaa vəŋ ye laa ŋwaa wi lèy, bəŋ kɨ bəŋsə Nwi nə gɨ yishaꞌsə.

¹⁶ Ŋwə jwi gù vɨsɨ Yeso, tùŋ yikəꞌ yi nsi, kɔ bwaŋ-wee. Wə ghɔ́ nə luu wuu Samaria.

¹⁷ Yeso gi laa, «Maa vɨɨ nii lùu yighuŋ faŋ yiŋwaa yivəŋ kìasə ley. Vɨɨ mbə buumuꞌ sii bə?

¹⁸ Wə mɔ́ꞌ kee baa lùu shɔ, faŋ ŋwə bəŋ jwì, bə̀ŋsə Nwi me, tɨ̀ lɨꞌ sheꞌ njwinjwi ŋwə̀ mu?»

¹⁹ Ŋwə nə gì nɨniŋ, baa gi tɨ́ wuu Samaria ghɔ́ laa, «Ndɔ fɨ nsi, gə̀ nə ŋwaa ŋgwunə. A bwèy buꞌ laa a nùŋ fwi yə maa Nwi.»

Nu yifwàŋ Nwi ndɔ jwi ndəəkə?

²⁰ Vɨɨ Farisii bitə tɨ́ Yeso laa nu yifwàŋ Nwi ndɔ jwi ndəəkə? Ŋwə bəŋsə tɨ́ vəŋ laa, «Nu yifwàŋ Nwi kee jwi, tɨ́ kaꞌ wə ye nə yisɨ me.

²¹ Vɨ kee ndɔ kɨ gisə laa, ye ŋkə feenə, tɨꞌnə me fiŋnə me. Viŋ zɔ! Nu yifwàŋ Nwi luu nu faŋ ŋkə duꞌtə ŋkə lùu taa ŋwaa viŋ.»

²² Ŋwə baa kɨ nii gì tɨ́ vɨɨ məzwetə nu ki laa, «Ndɔ luu shi mɔ́ꞌ, viŋ kɨ kəə maa məye mə sheꞌ maa shi kəmuꞌ, kee bee ye me.

²³ Vɨ ndɔ kɨ gisə tɨ́ viŋ laa, viŋ ye ŋwə feenə, tɨꞌnə me fiŋnə, kɨ viŋ ndɔ gə shɔ me, kee shə̀ŋ shɔ me.

²⁴ Shi ŋkɨə faŋ Wuu yinsəŋ Nwi ndɔ bəŋ jwi shɔ, ŋkə ndɔ luu sheꞌ yaa yibay faŋ nyə ndwaꞌlə fɨ yizɔ, bee shù fɨ kwiŋ nyə̀, gə ziꞌ kwiŋ yì.

²⁵ Luu nə, ŋwə taa bɨ ye ŋɨꞌ yiyaŋ, ŋgwi nyə̀ twey ŋwə.

²⁶ Maa yighee njyə faŋ ŋwə ndɔ bəŋ jwi nə, nu vɨɨ ndɔ luu sheꞌ yaa ŋkə nə luu maa yighee Noa.

²⁷ Maa yighee Noa, vɨɨ nə zɨ, nu, ndaa, gə̀ məndaa, gə̀ ziꞌ tɨ́ shi ŋkɨə faŋ Noa nə ŋìi taa bay kwalə ki nə. Muu kɨ nii fùu, zwìlə vəŋ vənshə.

²⁸ Nə baa luu sheꞌ nɨniŋ maa yighee Lɔt. Vɨɨ nə zɨ, nu, ywàŋ vətɔ, fìŋ vətɔ, bìa vətɔ, fìanə ndɔꞌ,

²⁹ zìꞌ maa shi ŋkɨə faŋ Lɔt nə fùu fɨ shɨ Sodom. Wisə kɨ nii fùu fɨ yizɔ, twàŋ vəŋ vənshə, zwìlə.

³⁰ Ŋkə ndɔ luu sheꞌ nɨniŋ maa shi ŋkɨə faŋ Wuu yinsəŋ Nwi ndɔ baa fuu ntee.

³¹ Ndɔ luu maa shi kɔ́, kɨ wə faŋ ŋwə duꞌ fu, nə vətɔ vi taa ŋii, kee baa kɨ ŋii laa yi ŋii, ndì vətɔ vi me. Gə̀ fɨ maa wə faŋ ŋwə ndɔ luu taa biisə, kɨ ŋwə kiasə ŋwaa wi laa yi gə ndi fa fɨ shiŋii me.

³² Viŋ lumə zu Lɔt, faŋ ŋwə nə kìasə ŋwaa wi, ndèynə yiba, gù maa ŋoꞌ fəŋway.

³³ Wə ntɨə faŋ ŋwə kəə bweysə ŋwaa wi, ndɔ ndi. Luu nə, wə ntɨə faŋ ŋwə ndisə ŋwaa wi, ndɔ bweysə ŋwaa wi.

³⁴ Mə naysə tɨ́ viŋ laa, ndɔ luu maa vətuꞌ shi kɔ́, vɨɨ vəbɔɔ nɔŋ fuu fwaŋ kəmuꞌ, Nwi shoꞌ ŋgwə muꞌ, bə̀ wuu mɔ́ꞌ.

³⁵ Vəki vəbɔɔ kɨ gɔ bee shəŋ muꞌ, vɨ ndi ŋgwə muꞌ, mèꞌtə wuu mɔ́ꞌ.

³⁶ Vɨɨ vəbɔɔ luu taa biisə, vɨ ndi ŋgwə muꞌ, mèꞌtə wuu mɔ́ꞌ.»

³⁷ Yeso metə yigi yɔ́, vɨɨ məzwetə nu ki bitə tɨ́ ŋwə laa, «Vənu vɔ́ ndɔ gay nee fə?» Ŋwə gi tɨ́ vəŋ laa, «Shəŋ ŋkɨə faŋ ŋku nyaa nɔ̀ŋ shɔ, lùu shəŋ ŋkɨə faŋ vəbaba-ŋkɔŋ-me taa luu shɔ nɨzi.»