Lukas 16 - Vengo (Babungo)

Yigisə tii buꞌ wuu məshii ŋii faŋ ŋwə nə luu tɔfə

¹ Yeso nə baa gì tɨ́ vɨɨ məzwetə nu ki laa, «Tɨɨ ka mɔ́ꞌ nə luu shɔ, wuu məshii ŋii wi luu shɔ nɨzi. Vɨɨ jwi nàysə tɨ́ tɨɨ ka ghɔ́ laa wuu məshii ŋii wi ghɔ́ saynə vətɔ vi.

² Wə ghɔ́ tii wuu məshii ŋii wi ghɔ́, gì tɨ́ ŋwə laa, «Sii lùu kə nə faŋ mə zɔ kɔ̀ŋ ghɔ? Ndi ŋwaꞌlə wə, jwì, sɨ saytə vətɔ vaŋ vənshə, faŋ mə nə nùŋsə tɨ́ ghɔ, buꞌ laa a kee baa kuꞌnə maa wuu məshii ŋii nyaa me.»

³ Wuu məshii ŋii ghɔ́ gi fɨ taa fwi ŋwə laa, «Mə sii taa yɨ kɨkə, faŋ tii ŋwaa fi faꞌ məshii ŋii fɨ ghɔ mə nə? - Maa məkɔꞌ soo nsi ghɔꞌ mə. Tɔ kaŋ baa dɨdɨɨ maa məndwaŋ vətɔ.

⁴ Mə kɨɨ nə nu ŋkɨə faŋ mə taa yɨsə laa vɨɨ ndɔ ndi mə taa ndɔꞌ vəŋ maa yighee njyə faŋ tii ŋwaa taa jwi fuusə mə fɨ maa faꞌ məshii ŋii nə.»

⁵ Ŋwə tii vɨɨ təkɔɔ tə tii wi vənshə, vəŋ jwi wə nə muꞌ nə muꞌ. Ŋwə gi tɨ́ mfɔŋ wə laa, «Yikɔɔ tii ŋwaa faŋ nyə lùu ghɔ ghɔ lùu kə?»

⁶ Ŋwə laa vətɔ və məŋgwə waaghɨꞌ. Ŋwə gi tɨ́ wə ghɔ́ laa, «Kɔ ŋwaꞌlə yikɔɔ ghɔ́, jwì nə ŋwə nsi yighee muꞌ, nyɔ̀ꞌ taa tey yi laa muu-ntee.»

⁷ Ŋwə baa gì tɨ́ wuu mɔ́ꞌ laa, yikɔɔ faŋ nyə lùu ghɔ ŋwə lùu kə? Wə ghɔ́ laa vətɔ və bee waaghɨꞌ. Ŋwə gi tɨ́ ŋwə laa ŋwə ndi ŋwaꞌlə yikɔɔ wi, nyɔ̀ꞌ taa tey yi laa muu-yimfɔŋ.

⁸ Ŋwə nə yɨ̀ nɨniŋ, tɨɨ faꞌ wi bəŋsə yitɔfə yi, faŋ ŋwə kɔlə kee lùu wuu yinsəŋ nə me. Maa vɨɨ fɨ taa mbi yibwə nyə̀ kɨɨ yɨsə nu nə yitɔfə ghɔ vəliŋ vəvəŋ, shɔ̀ɔ vɨɨ mbɨə faŋ vəŋ toꞌ fɨ taa məley Nwi.

⁹ Nɨniŋ, mə gì tɨ́ viŋ laa viŋ ndi ka, faŋ lùu fa dayday, faŋ ŋkə lùu ghɔ viŋ nə, kɨ key vɨɨ shɔ, laa viŋ kɨ kii vɨɨmba viŋ fuŋ maa yighee njyə faŋ ka wiŋ ndɔ me, Nwi ndi viŋ, ŋìisə viŋ taa ndɔꞌ ŋgɨə faŋ ŋə gòꞌsə yighee muꞌ.

¹⁰ Wə ntɨə faŋ ŋwə yaa kɨ yɨsə nu bi nə wee-fa, baa yɨsə nu bi faŋ vɨ nuŋsə kəyaŋ ghɔ ŋwə. Wə faŋ ŋwə yɨsə nu mbuulə nə wee-fa, yaa kɨ yɨsə nu bwə nə fa yaŋ nɨzi.

¹¹ Nɨniŋ, viŋ kɨ luu kee yɨ nu faŋ lùu nu bi nə ka mbuulə me, buu kaꞌ Nwi kɔ nu yinsəŋ tɨ́ viŋ kɨkə?

¹² Viŋ kɨ luu kee kii fwi yijəə maa fa faŋ lùu ŋkə wə dɨday me, buu kaꞌ Nwi kɔ̀ ŋkiŋ nu tɨ́ viŋ kɨkə?

¹³ Kaꞌ tuu wuu faꞌ kee kɨ faꞌ tɨ́ vɨɨ vəbɔɔ me. Wə nəə toꞌ yɨ nɨniŋ, buu ŋwə taa bee ŋgwə muꞌ, kaw wuu mɔ́ꞌ, nuŋ fwi yi maa ŋgwə muꞌ, kɨ shiasə wuu mɔ́ꞌ. Nɨniŋ, kaꞌ viŋ kee kɨ faꞌ tɨ́ Nwi, baa nuŋ fwi maa ka me.»

Yigisə Yeso kɔ̀ŋ ntɨsə Nwi

¹⁴ Vɨɨ Farisii zɔ vənu vɔ́ vənshə, shìasə ŋwə, buꞌ laa vəŋ nə luu vɨɨ faŋ vəŋ kàw ka dɨdɨꞌ.

¹⁵ Ŋwə gi tɨ́ vəŋ laa, «Viŋ lùu vɨɨ faŋ viŋ kɨɨ yɨsə laa viŋ luu vɨɨ loomə yikəꞌ vɨɨ. Luu nə, Nwi kɨɨ nə fwi siŋ. Viŋ kɔꞌ kɨɨ laa nu, faŋ luu ŋkee nu kwalə yikəꞌ vɨɨ, luu ŋkee nu bwə tɨ́ Nwi.

¹⁶ Yighee ntɨsə Nwi nə nshiisə-ŋii sɔghɔ nə gə zìꞌ maa nu Jɔn. Zi fɨ maa yighee yɔ́, vɨ kɨ nii fɨ̀ꞌtə ntɔŋ yijəə kɔ̀ŋ nu yifwàŋ Nwi tɨ́ vɨɨ. Vɨɨ vənshə faŋ vəŋ ŋii taa nu yifwàŋ Nwi kɔ́, ŋii nə wutə.

¹⁷ Ŋkə lùu kəyaysə tɨ́ kaꞌ yizɔ ghɔ nsi ndì, fɨ ghɔ wee-mia ntɨ Nwi ndi.

¹⁸ Wə faŋ ŋwə tɨꞌ zu wi, baa ndàa wəzwi day, ŋwə gù ntɨ Nwi. Wə faŋ ŋwə ndàa wəzwi faŋ ndəə wi nə tɨ̀ꞌ ŋwə, gu ntɨsə Nwi nɨzi.»

Nu tɨɨ ka ghɔ Lasarɔs, wuu ŋɨꞌ

¹⁹ Yeso nə baa tìi yigisə tii yimɔ́ꞌ laa, «Tɨɨ ka mɔ́ꞌ nə luu shɔ, mɔꞌ vədalə nə njwisə fusə faŋ nsə bàw shɔ̀ɔ, zɨ ŋkee fazɨ jəə vəshi vənshə.

²⁰ Wuu ŋɨꞌ mɔ́ꞌ nə luu shɔ nɨzi, yizii yi lùu Lasarɔs. Vɨ yaa kɨ mɔꞌ ŋwə shuu ŋii tɨɨ ka ghɔ́, vədɨꞌ lwaŋ maa ŋwə ŋkee dɨdɨꞌ.

²¹ Ŋwə nə kəə laa yi zɨ vəbɨꞌ və fazɨ, faŋ mbə fiŋkə nsi faŋ tɨɨ ka ghɔ́ zɨ. Busə jwi, ndàlə vədɨꞌ fɨ maa ŋwə.

²² Kɨ lùu maa shi mɔ́ꞌ, wuu ŋɨꞌ ghɔ́ ku. Nshiisə-ŋiisə Nwi jwi ndì ŋwə, koꞌ gə̀ nə ŋwə yizɔ, nùŋ ŋwə yɨ tii ŋwaa-nsiŋ Abraham. Tɨɨ ka ghɔ́ baa luu kù nɨzi, vɨ təə ŋwə.

²³ Ŋwə gə zìꞌ shɨ yiku, kɨ ye ŋɨꞌ shɔ dɨdɨꞌ, shàꞌsə tɔ ki yizɔ, yè Abraham fɨ ntaŋ, nə Lasarɔs faŋ ŋwə dùꞌ yɨ ŋwə.

²⁴ Ŋwə yumə nəŋay laa, «Tii ŋwaa, Abraham, kee gəŋ saŋ, tɔ̀ŋ Lasarɔs laa ŋwə shu sheꞌ wee-ghɔ wi taa muu, jwì shu tɔ nditə mə, ŋkə zutə, buꞌ laa ŋɨꞌ nyaa yàŋ dɨdɨꞌ taa wisə ŋwə̀ faŋ ŋwə twaŋ mə nə.»

²⁵ Abraham gi tɨ́ ŋwə laa, «Ŋwiŋ ŋwaa, lumə faŋ a yaa zɨ vətɔ və vəjəəvə maa yighee njyə faŋ a nəə kɨ bii bwey shɨ nsi. Gə fɨ maa Lasarɔs, ŋwə nəə ye ŋɨꞌ. Lùu ndwə vɨ boolə ŋwə feenə, a ye luu ŋɨꞌ.

²⁶ Nu mɔ́ꞌ baa lùu laa, ŋkee ŋkɔŋ kwalə shɔ faŋ ŋkə gaasə nsiŋ, tɨ́ kaꞌ wə kee ndɔ fɨ njɨɨ yia, gə yɨ viŋ me, wə kee ndɔ fɨ njɨɨ viŋ, dee jwì feenə me.»

²⁷ Wə ghɔ́ gi laa, «Faŋ ŋkə lùu nɨniŋ nə, mə buꞌ ghɔ tɨ́ ghɔ, tɨta, laa a tɔŋ ŋwə taa ŋii tii ŋwaa.

²⁸ Mə kii vaŋ-nshwi vaŋ tee. Bàw ŋwə gə, tɨ̀ vəŋ nəŋay, laa kɨ vəŋ ndɔ kɨ jwi, ŋii maa shəŋ ŋɨꞌ kə̀ me.»

²⁹ Abraham gi tɨ́ ŋwə laa, «Vəŋ kìi ŋwaꞌlə Mose ghɔ nshiisə-ŋii sɔghɔ; bàw vəŋ kɨ zɔnə vəŋ.»

³⁰ Ŋwə laa, «Ŋkə kee yikuꞌnə me. Luu nə, wə kɨ luu fuu fɨ shɨ yiku, gə̀ maa vəŋ, buu vəŋ taa kwiinə fwisə vəŋ.»

³¹ Abraham gi tɨ́ ŋwə laa, «Vəŋ kɨ luu kee kɨ zɔnə Mose nə nshiisə-ŋii sɔghɔ me, buu kɨ kaꞌ vəŋ kee biŋ wə faŋ ŋwə ndɔ̀ fɨ shɨ yiku, jwì yɨ vəŋ me.»