Lukas 15 - Vengo (Babungo)

Yigisə tii buꞌ bi-njɨɨ faŋ nyə nə ndì

¹ Vɨɨ məsa vətɔ ghɔ vəyɨ-kəbwə vənshə nə bàytə yɨ Yeso maa məzɔ nu ki.

² Vɨɨ Farisii ghɔ vɨ vɨɨ mədeesə ŋwaꞌlə Nwi ye, lùlə, kɨ gisə laa, «Ebee, wə ŋwə̀ ndì vɨɨ məyɨ vənu vəbwəvə, ghɔ vɨ vəŋ nə zɨ.»

³ Vəŋ lùlə nɨniŋ, Yeso tii yigisə tii yimɔ́ꞌ tɨ́ vəŋ, gi laa lee,

⁴ «Wə fɨ taa ŋwaa viŋ lùu shɔ, faŋ bisə-njɨɨ lùu ghɔ ŋwə waaghɨꞌ, njyə yimuꞌ ndi, ŋwə kee mèꞌtə nsə njɔsə-buumuꞌ muu-buumuꞌ taa tɔɔ, gə̀ kɨ kəə njyə yimuꞌ, njyə faŋ nyə ndì nə yimu? Maa ŋwə taa kɨ kəə nə wutə, kɔ̀ tɨ́ yighee njyə faŋ ŋwə ye.

⁵ Ŋwə kɨ ye bi-njɨɨ yɔ́, shaꞌ, ghɔ nyə gə, kɨ ŋaytə,

⁶ taa kɨ ziꞌ fu ŋwə, tìi vɨɨmba vi nə vɨɨ njɨɨsə vi, gì tɨ́ vəŋ laa, «Nsiŋ kɨ ŋaytə buꞌ laa mə yè bi-njɨɨ nyaa yì faŋ nyə yaa ndi nə.»

⁷ Viŋ zɔ! Mə naysə tɨ́ viŋ laa vɨ ŋaytə yizɔ sheꞌ nɨniŋ buꞌ yɨ-kəbwə muꞌ, faŋ ŋwə kwìinə fwi yi, shɔ̀ɔ faŋ vɨ ŋaytə maa vɨɨ njɔsə-buumuꞌ muu-buumuꞌ faŋ vənu vəvəŋ lùu vəloomə, faŋ nu kee ghɔꞌ vəŋ laa vəŋ kwiinə fwisə vəŋ me.»

Yigisə tii buꞌ ka faŋ ŋwə nə ndì

⁸ Yeso nə baa gi tɨ́ vəŋ laa, «Viŋ zɔ nu mɔ́ꞌ! - Wəzwi mɔ́ꞌ nə luu shɔ faŋ ŋwə kìi vəfɨlaŋ ŋkaŋsə tee, yiwa tee ndi. Ŋwə shuꞌ kiꞌ, jìasə taa ŋii, kiꞌsə laa yi taa ghaa ye.

⁹ Ŋwə kɨ ye, tìi vɨɨmba vi nə vɨɨ njɨɨsə vi, gì tɨ́ vəŋ laa, «Nsiŋ kɨ ŋaytə, buꞌ laa mə yè ka ŋwaa wì faŋ ŋwə nii ndì nə.»

¹⁰ Mə naysə tɨ́ viŋ laa, nshiisə-ŋiisə Nwi ŋaytə sheꞌ nɨniŋ maa wuu məyɨ nu bwə muꞌ faŋ ŋwə kwiinə fwi yi.»

Yigisə tii buꞌ wə faŋ ŋwə kee gəŋsə vaŋ vi

¹¹ Yeso baa gì laa, «Wə mɔ́ꞌ nə luu shɔ faŋ ŋwə nə kìi vaŋ vi vəndɔŋ vəbɔɔ.

¹² Shi mɔ́ꞌ ŋwiŋ wi wuu bwa jwi, gì tɨ́ tii wi laa, «Tɨta, kɔ vətɔ vaŋ faŋ mbə ndɔ luu maanə shee yighee muꞌ.» Tii wi seenə vətɔ vi, kɔ̀ tɨ́ ŋwə.

¹³ Vəshi kee shɔ̀ɔ vəyaŋ me, ŋwiŋ wi ghɔ́ baytə vətɔ vi vənshə, gə tɔŋ ntaŋ, gə kɨ zɨ ka wi, kee bəsə me, bɨsə ka wi nshə.

¹⁴ Vətɔ vi vɔ́ kɨ me, jɨŋ yibwə koo shɨ yɔ́, ŋwə tey kɨ ye ŋɨꞌ.

¹⁵ Ŋwə ndɔ, gə̀ fu wə mɔ́ꞌ fɨ taa shɨ yɔ́, bùꞌ ghɔ dɨdɨꞌ laa vɨ gaŋtə yi. Wə ghɔ́ ndi ŋwə, nùŋsə laa ŋwə kɨ zəsə vəŋkwinyaa.

¹⁶ Ŋwə nə kəə kɨ zɨ taŋ tɨ kəmɔ́ꞌ, faŋ nə luu fazɨ vəŋkwinyaa, vɨ kee bee kɔ̀ tɨ́ ŋwə me.

¹⁷ Ŋwə duꞌ, ywìitə nu ki, kɨɨ laa ŋkə lùu kəbwə. Ŋwə gi fɨ taa fwi ŋwə laa, «Vɨɨ faꞌ tii ŋwaa vəyaŋ kìi fazɨ shɔ̀ɔ faŋ vəŋ zɨ, mə nə ku jɨŋ feenə.

¹⁸ Mə taa bəŋ gə, gə gì tɨ́ tii ŋwaa laa, «Tɨta, mə yɨ̀ nu bwə maa Nwi fɨ yizɔ baa nə maa ghɔ.

¹⁹ Mə kee baa kùꞌnə laa a tii mə nə ŋwiŋ wə me. Nuŋsə mə yaa wuu faꞌ wə mɔ́ꞌ.»

²⁰ Ŋwə gi nɨniŋ, ndɔ̀ gə̀ yè tii wi, kɨ ziꞌ ntaŋ fɨ yɨ tii wi, tii wi ye ŋwə, kee gəŋ si, nyɨ̀ŋ titi, gə̀ bàynə ŋwə, nyɔ̀ŋ fəə ghi.

²¹ Ŋwiŋ wi ghɔ́ gi tɨ́ ŋwə laa, «Tɨta, mə nə yɨ̀ nu bwə maa Nwi fɨ yizɔ nə ghɔ nɨzi, mə kee baa kùꞌnə laa a tii mə nə ŋwiŋ wə me.»

²² Luu nə, tii wi gi tɨ́ vəbuꞌ vi laa vəŋ gə titi, ndi ŋkee njwi yimɔ́ꞌ yijəə, jwì mɔ̀ꞌ maa ŋwə, swàa fəŋkwiŋkwi ghɔ ŋwə, swàa gɔsə ghuu ŋwə,

²³ ndì ŋkee wee-nyaa kwalə, zwi, tɨ́ kaꞌ nsiŋ kwə kɨ ŋaytə.

²⁴ Ŋwiŋ ŋwaa ŋwə̀ nə kù, baa bwèy ndwə. Ŋwə nə ndì, vɨ baa yè ŋwə. Nɨniŋ, vəŋ tey kɨ ŋaytə.

²⁵ Faŋ vəŋ nə yɨ̀ nɨniŋ nə, mfɔŋ wee wə ghɔ́ nə luu taa biisə. Ŋwə kɨ bəŋ jwì, ziꞌ mbɨɨ fɔ vəŋ, zɔ̀ faŋ vɨ buꞌ vəbəŋ, ndɔ bəŋ.

²⁶ Ŋwə tii fɨ maa wuu faꞌ tii wi muꞌ, bìtə nu ŋkɨə faŋ ŋkə gày nə.

²⁷ Wuu faꞌ ghɔ́ gi tɨ́ ŋwə laa, «Weenshu wə jwi. Tii wə zwi ŋkee wee-nyaa kwalə, buꞌ faŋ ŋwə yè ŋwə taa nə.»

²⁸ Fwi weenshu wi ghɔ́ shə. Ŋwə twey fɨ ŋii fu vəŋ. Tii wi fuu fu, bòolə ŋwə.

²⁹ Ŋwə bəŋsə tɨ́ tii wi laa, «Maa mə nə faꞌ tɨ́ ghɔ maa ŋuꞌsə səyaŋ, kee ta bɨ̀ꞌ fəntɨ fə me, a kee ta kɔ sheꞌ wee-bi shee me, tɨ́ kaꞌ mə yɨsə vəlɔꞌ shɔ, yia vɨɨmba vaŋ.

³⁰ Luu nə, ŋwiŋ wə wì jwì, faŋ ŋwə nə ndɔ̀ fɨ yɨ ghɔ, gə̀ zɨ̀ ka wə ghɔ vəki sakə, bə̀ŋ jwì, a zwi ŋkee wee-nyaa kwalə tɨ́ ŋwə.»

³¹ Tii wi gi tɨ́ ŋwə laa, «Ŋwiŋ ŋwaa, a luu yɨ mə ghee nshə, vətɔ vənshə faŋ mə kìi, kìi ghɔ.

³² Luu nə, ŋkə kuꞌnə maa məyɨsə məŋaytə, buꞌ laa weenshu wə ŋwə̀ nə ku, baa bwèy ndwə. Ŋwə nə ndì, vɨ baa yè ŋwə ndwə.»