Lukas 14 - Vengo (Babungo)

Faŋ Yeso nə zɨ̀ taa ŋii wuu Farisii, baa shùꞌ wə faŋ ŋwaa wi nə mwàkə

¹ Nə luu shi zwisə Nwi mɔ́ꞌ faŋ Yeso nə gə ŋìi taa ŋii wuu kwalə mɔ́ꞌ fɨ taa nwaa vɨɨ Farisii maa məzɨ bee, vɨ nyɔꞌ ŋwə.

² Wə mɔ́ꞌ nə luu shɔ vɨsɨ ŋwə, faŋ zatə ŋwaa mwakə nə jia ŋwə.

³ Yeso ye wə ghɔ́, bìtə tɨ́ vɨɨ mədeesə ŋwaꞌlə Nwi nə vɨɨ Farisii laa, «Ŋkə kuꞌnə maa məshuꞌ za maa shi zwisə Nwi mu?»

⁴ Vəŋ gay. Ŋwə ndi wə ghɔ́, yɨ̀sə za kɔ́ me fɨ maa ŋwə, mèꞌtə ŋwə, ŋwə gə.

⁵ Ŋwə kɨ nii gì tɨ́ vɨɨ vɔ́ laa, «Sii lùu ndə taa ŋwaa viŋ, faŋ ŋwiŋ wi, tɨꞌnə me mbaw wi, fìŋ taa yibɨɨ muu maa shi zwisə Nwi, ŋwə kee gə fùusə yighee muꞌ me?»

⁶ Vəŋ kee kɨɨ nə nu maa məgi maa nu kɔ́ me.

Nu faŋ Yeso nə gì buꞌ nu məduꞌnə vɨsɨ

⁷ Yeso kɨ nii baa gì yigisə tii yimɔ́ꞌ tɨ́ vɨɨ mbɨə faŋ vɨ nə shoꞌ vəŋ maa yitianə yɔ́ nə, buꞌ faŋ ŋwə nə ye laa vəŋ jwi, kəə shəŋ vɨsɨ maa məduꞌ shɔ. Ŋwə gi tɨ́ vəŋ laa,

⁸ «Kɨ luu wə shoꞌ ghɔ fɔ məndaa, kɨ gə, kee bɨ gə dùꞌ fuu ŋkaw kwalə me, buꞌ yighee mɔ́ꞌ wə mɔ́ꞌ taa baa jwi, faŋ vɨ yaa shoꞌ ŋwə nɨzi, faŋ lùu wuu kwalə shɔ̀ɔ ghɔ.

⁹ Wə ntɨə faŋ ŋwə tii viŋ ŋwə mɔ́ꞌ nə, jwi gì tɨ́ ghɔ laa, «Shəŋtə, kɔ̀ shəŋ tɨ́ wə ŋwə̀.» A kɨ nii ndɔ nə tɔ dɨɨ, gə̀ dùꞌ yiba.

¹⁰ Kɨ luu vɨ shoꞌ ghɔ, a gə dùꞌ yiba, tɨ́ kaꞌ wə ntɨə faŋ ŋwə tìi ghɔ kɨ jwi, ŋwə jwi, gì tɨ́ ghɔ laa, «Wuumba ŋwaa, koꞌtə jwi,» buu lùu nu kwalə tɨ́ ghɔ taa ŋwaa vɨɨ vənshə, faŋ viŋ vɨ vəŋ zɨ mɔ́ꞌ.

¹¹ Wə tɨ̀ me wə faŋ ŋwə koꞌsə ŋwaa wi, vɨ taa suꞌsə ŋwə nsi. Gə fɨ maa wə ntɨə faŋ ŋwə suꞌsə ŋwaa wi nsi, vɨ koꞌsə ŋwə yizɔ.»

Bàw maa mətia vɨɨ ŋɨꞌ

¹² Yeso baa gì nu tɨ́ wə ntɨə faŋ ŋwə nə tii ŋwə nə laa, «A kɨ luu naysə fazɨ maa mətia vɨɨ nə shɨshwi, tɨꞌnə me vətuꞌ, kɨ ghɔ tii vɨɨmba və me, tɨꞌnə me vaŋ-nshwi və me, tɨꞌnə me yikuu yə me, tɨꞌnə me vɨɨ fɨ kwiŋ fu viŋ faŋ lùu vɨɨ ka me, buꞌ laa vəŋ ndɔ baa tii ghɔ, bə̀ŋsə nu kɔ́ tɨ́ ghɔ.

¹³ A kəə kɨ tia vɨɨ, a tìi luu mbəəsə, nə vəndwey, nə vɨɨ sɨ fɨsə,

¹⁴ buu mənɔŋ-bwaŋnə lùu tɨ́ ghɔ, buꞌ laa kaꞌ vəŋ kee bə̀ŋsə tɨ́ ghɔ me. A yɨ̀ nɨniŋ, buu Nwi ndɔ bəŋsə tɨ́ ghɔ maa yighee njyə faŋ ŋwə ndɔ yweysə vɨɨ mbɨə faŋ vənu vəvəŋ lùu vəloomə, fɨ shɨ yiku.»

Yigisə tii buꞌ wə faŋ ŋwə nə shòꞌ vɨɨ maa yitianə yi

¹⁵ Wə muꞌ fɨ taa ŋwaa vɨɨ vɔ́, faŋ ghɔ vɨ vəŋ nə dùꞌ mɔ́ꞌ kɨ zɨ nə, zɔ nu kɔ́, gì laa, «Mənɔŋ-bwaŋnə tɨ́ wə ntɨə faŋ ŋwə ndɔ ŋii nu yifwàŋ Nwi, zɨ̀ fazɨ fɨ fuŋ!»

¹⁶ Yeso gi yigisə tii yimɔ́ꞌ tɨ́ ŋwə laa, «Wə mɔ́ꞌ nə nàysə fazɨ kəyaŋ maa mətia vɨɨ shɔ, tɨ́ ŋwə tii vɨɨ ŋkee vəyaŋ.

¹⁷ Yighee məzɨ yitianə yɔ́ kuꞌ, ŋwə tɔŋ wuu faꞌ maa mətii vɨɨ mbɨə faŋ ŋwə nə shoꞌ vəŋ nə, laa vəŋ jwi, fazɨ bi.

¹⁸ Luu nə, vɨɨ vɔ́ vənshə baytə nə shuu muꞌ, tay-shuꞌ. Wə muꞌ gi laa, «Mə ywàŋ shəŋ faꞌ kəmɔ́ꞌ. Nu ghɔꞌ mə laa mə gə ndèynə. Mə buꞌ ghɔ laa a meꞌtə me.»

¹⁹ Wuu mɔ́ꞌ gi laa yi ywàŋ vəmbaw vəbɔɔ vəbɔɔ vəshəŋ tee, bàw yi gə mɔ̀ŋ vəŋ maa faꞌ. Nɨniŋ, ŋwə bùꞌ ghɔ nɨzi laa vɨ meꞌtə yi.

²⁰ Wə mɔ́ꞌ gi ŋkii laa vɨ bɨ kɨ nɨndaasə wəzwi tɨ́ yi, məjwi ghɔ̀ꞌ yi.

²¹ Wuu faꞌ ghɔ́ bəŋ jwi, nàysə vənu vɔ́ tɨ́ tɨɨ faꞌ wi. Fwi tɨɨ fu ghɔ́ za. Ŋwə gi tɨ́ wuu faꞌ ghɔ́ laa ŋwə ndɔ titi, gə kɨ toꞌ fɨ maa jɨɨsə kwalə, nə sətɨtiꞌ fɨ taa shɨ, tii mbəəsə nə vəndwey, nə vɨɨ sɨ fɨsə, jwi viŋ vɨ vəŋ feenə.

²² Wuu faꞌ ghɔ́ gə yɨ̀ nɨniŋ, baa bə̀ŋ jwì, nàysə tɨ́ ŋwə laa, «Tɨta, mə gə̀ yɨ̀sə vənu mbɨə faŋ a gì nə. Luu nə, shəŋ məduꞌnə kɨ bii.»

²³ Tɨɨ fu ghɔ́ gi tɨ́ ŋwə laa ŋwə gə fùu fɨ taa shɨ, gə̀ taa jɨɨsə kwalə nə mbɔꞌsə jɨɨ, tìi vɨɨ mbɨə faŋ vəŋ shɔɔ fɨ fuŋ. «Bàw a dɔɔ vɨɨ laa vəŋ jwi, tɨ́ kaꞌ ŋii nyaa lwaŋ.»

²⁴ Viŋ zɔ! Mə gi tɨ́ viŋ laa tuu ŋkee wə muꞌ fɨ taa ŋwaa vɨɨ mbɨə faŋ mə nə fɔŋ shòꞌ vəŋ nə, kee ndɔ zɨ yitianə nyaa me.»

Nu wə ntɨə faŋ ŋwə kəə beꞌsə Yeso

²⁵ Maa yighee yɔ́ nwaa vɨɨ vəyaŋ nə bèꞌsə Yeso. Ŋwə kiasə ŋwaa wi, gì tɨ́ vɨɨ vɔ́ laa,

²⁶ «Kɨ luu wə nə jwi yɨ mə, maa kàw mə shɔ̀ɔ tii wi, nə nshu wi, nə zu wi, nə vaŋ vi, nə vaŋ-nshwi vi, baa nə ŋkee nshɨ-tɔ wi me, buu kaꞌ ŋwə kee lùu wuu məzwetə nu kaŋ me.

²⁷ Wə kɨ luu kee kɨ shaꞌ fəŋkɔꞌ fə ŋkɨꞌsə fi, (kɨ beꞌsə mə ŋkee maa shəŋ ŋɨꞌ,) buu kee lùu wuu məzwetə nu kaŋ me.

²⁸ Viŋ zɔ! Nu wə faŋ ŋwə kəə beꞌsə mə, lùu yaa nu wə faŋ ŋwə kəə bɔŋ ŋii yi. Sii lùu ndə fɨ taa ŋwaa viŋ, faŋ ŋwə kəə bɔŋ ŋii yidə, faŋ ŋwə kee bɨ duꞌ nsi, bɨ̀ꞌtə ka wi, laa ŋwə taa kuꞌnə maa faꞌ ŋii yidə yɔ́ yimu?

²⁹ Ŋwə kɨ luu kee yɨ̀sə nɨniŋ me, bɔŋ sheꞌ shɨ ŋii kɔ́, kee metə ŋii yɔ́ me, buu vɨɨ vənshə faŋ vəŋ ye, taa shɨꞌ ŋwə,

³⁰ gì laa, «Wə ŋwə̀ nə bùꞌ ŋii maa məbɔŋ, kee mètə me.»

³¹ Gə fɨ maa nu fwàŋ mɔ́ꞌ faŋ ŋwə gə yighaw maa fwàŋ mɔ́ꞌ, maa ŋwə bɨ duꞌ nsi, bɨꞌtə ghɔ vɨ vɨɨ vi laa, nə kaꞌ yi gə shɔ ghɔ vɨ vɨɨ ŋkaŋsə yighuŋ, gə tùŋ yighaw yɔ́ ghɔ vɨ fwàŋ ŋgwii-wə, faŋ ŋwə kìi vɨɨ ŋkaŋsə muu-mbɔɔ mu?

³² Kɨ luu laa ŋkə ghɔꞌ ŋwə maa məgə nɨniŋ, ŋwə tɔ̀ŋ ntɔŋ maa yighee njyə faŋ fwàŋ ŋgwii-wə kɨ bii ntaŋ, bùꞌ ghɔ tɨ́ ŋwə laa bàw ghɔ ŋwə sɔꞌ nsɔꞌ yɔ́ fɨ taa bwaŋnə.

³³ Gə fɨ maa nu wuu məzwetə nu kaŋ, wə tɨ̀ me wə fɨ taa ŋwaa viŋ faŋ ŋwə kee meꞌ vətɔ vi vənshə me, buu kaꞌ ŋwə kee lùu wuu məzwetə nu kaŋ me.»

Nu fəŋway faŋ mfə kee baa nɨndɨŋ me

³⁴ Yeso baa gì laa, «Vɨɨ vaŋ lùu yaa fəŋway. Fəŋway lùu fa jəə. Luu nə, mfə kìasə kee baa kɨ ndɨŋ me, buu sii kaꞌ vɨ yɨ kə laa mfə baa ndɨ̀ŋ?

³⁵ Mfə kee baa kùꞌnə ŋkee maa məmɔꞌ taa biisə me, tɨꞌnə me taa yikwə vəbu me. Vɨ mèꞌ sheꞌ dayday. - Wə ntɨə faŋ ŋwə kìi tuulə ghi zɔ, ŋwə zɔ!»