Ŋwaꞌlə Jɔn Vənu faŋ Jɔn nə nyɔ̀ꞌ kɔ̀ŋ Yeso Kristo 9 - Vengo (Babungo)Faŋ Yeso nə shùꞌ wuu sɨ fɨsə, vɨɨ Farisii twey nu ki 1 Yeso nəə toꞌ fɨ jɨɨ, yè wuu sɨ fɨsə mɔ́ꞌ faŋ sɨ ghi nə fɨ shù fɨ nə faŋ vɨ nə bì ŋwə. 2 Vɨɨ məzwetə nu Yeso bitə tɨ́ ŋwə laa, «Tɨta, nə yɨ̀ ndə yɨ̀ nu bwə, buu sɨ wə ŋwə̀ fɨ? Nə yɨ̀ ŋwə mu, mu nə yɨ̀sə vətɨɨ vi?» 3 Yeso bəŋsə tɨ́ vəŋ laa, «Sɨ fɨsə ghi nə kee jwì fɨ maa nu bwə ki me, tɨꞌnə me fɨ ghɔ nu bwə vətɨɨ vi me. Ŋkə nə gày sheꞌ laa vɨɨ ndɔ ye nu shuu yɔŋ ŋkɨə faŋ Nwi taa ndi wutə ki, yɨ̀ maa ŋwə. 4 Bàw nsiŋ faꞌ vəfaꞌ və wə ntɨə faŋ ŋwə nə tɔ̀ŋ mə, faŋ fu kɨ bii. Fu jɨjɨ, faŋ fu jɨ, wə taa kee baa kìi yighee kɨ faꞌ me. 5 Yighee njyə faŋ mə kɨ bii taa mbi nyə̀, mə lùu məley taa mbi.» 6 Yeso nə gì yigi yɔ́, shèꞌ mənti nsi, tɔ̀tə shɔꞌ nə wee-ghɔ wi, ndì, fìꞌsə sɨ wə ghɔ́ faŋ sɨ ghi fɨ̀ nə. 7 Ŋwə kɨ nii gì tɨ́ wə ghɔ́ laa ŋwə gə taa wee-fɨ-maghia faŋ vɨ tii nə Saylom, gə̀ sɔ̀ sɨ ghi shɔ. Ŋiꞌ yizii Saylom lùu laa, «Wə faŋ vɨ tɨtɔŋ.» Wə ghɔ́ gə sɔ̀ sɨ ghi, bə̀ŋ jwì, kɨ ye vədɨꞌ. 8 Vɨɨ njɨɨsə vi nə vɨɨ faŋ vəŋ nə kɨ̀ɨ nə ŋwə faŋ ŋwə nəə ndwaŋ vəndwaŋ, gi laa, «Kee lùu wə ntɨə faŋ ŋwə nə dùꞌ kɨ ndwaŋ vətɔ yimu?» 9 Vɨɨ mɔ́ꞌ gi laa ɔŋ, lùu ŋwə. Vɨɨ mɔ́ꞌ twey laa, kee lùu ŋwə me, laa luu sheꞌ wə faŋ ŋwə fɨ̀nə ŋwə. Nɨniŋ, nshɨ-tɔ wə ghɔ́ gi laa lùu yi. 10 Vəŋ bitə tɨ́ ŋwə laa sii yɨ̀ kə buu ŋwə kɨ ye vədɨꞌ? 11 Ŋwə bəŋsə tɨ́ vəŋ laa, «Wə wì faŋ vɨ tii ŋwə nə Yeso nə, tɔ̀tə shɔꞌ, fìꞌsə sɨ mə, gì laa mə gə taa wee-fɨ-maghia faŋ vɨ tii nə Saylom, gə̀ sɔ̀ sɨ ŋaa shɔ. Mə gə shɔ, gə̀ sɔ̀ sɨ ŋaa, kɨ nii yè vədɨꞌ sheꞌ yighee yɔ́.» 12 Vəŋ bitə tɨ́ ŋwə laa, «Wə ghɔ́ bə?» Ŋwə gi laa yi kee yikɨɨ me. 13 Vəŋ ndi wə ghɔ́ faŋ sɨ ghi nə fɨ̀ nə, gə̀ nə ŋwə tɨ́ vɨɨ Farisii. 14 Shi ŋkɨə faŋ Yeso nə tɔ̀tə shɔꞌ, ndɔ̀ yɨ̀ wuu sɨ fɨsə ghɔ́ yenə nə, nə luu shi zwisə Nwi. 15 Vɨɨ Farisii vɔ́ baa kɨ bitə tɨ́ wə ghɔ́ laa nu kɔ́ nə gày kɨkə, buu ŋwə kɨ ye vədɨꞌ. Ŋwə baa nàysə tɨ́ vəŋ laa Yeso nə tɔ̀tə shɔꞌ, fìꞌsə sɨ yi, yi sɔ sɨ ghi, kɨ nii yè vədɨꞌ. 16 Vɨɨ mɔ́ꞌ fɨ taa ŋwaa vɨɨ Farisii gi laa, «Kaꞌ wə ŋwə̀ kee ndɔ̀ fɨ ghɔ Nwi me, buꞌ faŋ ŋwə kee nùŋsə nuŋsə shi zwisə Nwi me.» Vɨɨ mɔ́ꞌ gi laa, «Sii kaꞌ wuu məyɨ vənu vəbwəvə yɨsə nu shuu yɔŋ nee kɨkə?» Nɨniŋ, vəŋ gaasə yiŋwaa vəway vəbɔɔ. 17 Vəŋ bitə tɨ́ wə ghɔ́ faŋ sɨ ghi nə fɨ̀ nə, laa ŋwə gì ŋkii laa kə, laa wə ntɨə faŋ ŋwə yɨsə sɨ ghi yenə nə, lùu kɨkə? Wə ghɔ́ gi laa lùu nshiiŋii-sɔghɔ. 18 Vɨɨ kwalə vɨɨ Jus kɨ nii tìi vətɨɨ və wə ghɔ́, buꞌ laa vəŋ nə kee biŋ laa sɨ wə ghɔ́ nə fɨ̀ buu baa ley me. 19 Vəŋ tii vətɨɨ və wə ghɔ́, bìtə tɨ́ vəŋ laa, lùu wee vəŋ faŋ vəŋ gì laa sɨ ghi nə fɨ̀ shù fɨ faŋ vɨ nə bì ŋwə nə mu? «Sii yɨ̀ kə buu ŋwə kɨ ye vədɨꞌ?» 20 Vətɨɨ vi bəŋsə tɨ́ vəŋ laa, «Yia kɔꞌ kɨɨ laa ŋwə lùu ŋwiŋ wia, baa nə laa vɨ nə bì ŋwə nə sɨ ghi fɨsə. 21 Luu nə, yia kee kɨɨ faŋ ŋwə yɨsə buu kɨ ye vədɨꞌ me. Yia kee kɨ̀ɨ nə wə ntɨə faŋ ŋwə yɨ̀sə buu ŋwə kɨ ye vədɨꞌ me. Viŋ bitə tɨ́ ŋwə. Ŋwə lùu wəndɔŋ, kaꞌ ŋwə nàysə nu ki tɨ́ viŋ.» 22 Vətɨɨ vi nə gì nɨniŋ, buꞌ laa vəŋ nəə fee vɨɨ Jus vɔ́, buꞌ laa vɨɨ Jus vɔ́ nə duꞌtə vəŋ tə laa, wə faŋ ŋwə taa biŋ ntee, ndɔ gì ntee laa Yeso lùu wə ntɨə faŋ Nwi shòꞌ, buu vəŋ taa fuusə ŋwə fɨ taa ŋii məshəŋtə vəŋ yighee muꞌ. 23 Lùu ŋiꞌ nu ŋkɨə faŋ ŋkə nə yɨsə laa vətɨɨ vi gi laa vɨ bitə tɨ́ ŋwə, ŋwə lùu wuu taa. 24 Nɨniŋ, vəŋ baa tìi wə ghɔ́ faŋ sɨ ghi nə fɨ̀ nə, lwesə ghee bɔɔ, gì tɨ́ ŋwə laa, «Bàw a fee Nwi, gì nu yinsəŋ vɨsɨ Nwi! Yia kɔꞌ kɨɨ laa wə ntɨə faŋ a gì laa ŋwə ŋàꞌsə sɨ ghə nə, lùu wuu məyɨ vənu vəbwəvə.» 25 Wə ghɔ́ gì laa, «Ŋwə lùu wuu bwə mu, mu lùu wuu jəə? Mə kee kɨɨ me. Mə kɨɨ sheꞌ nu kəmuꞌ laa, sɨ ŋaa nə fɨ̀, luu ndwə, mə ye vədɨꞌ.» 26 Vəŋ bitə tɨ́ ŋwə laa, Yeso nə yɨ̀ kə maa ŋwə, baa nə laa ŋwə nə yɨ̀ sɨ ghi ley kɨkə? 27 Ŋwə bəŋsə tɨ́ vəŋ laa, «Mə duꞌtə mə naysə tɨ́ viŋ. Viŋ kee kaw zɔ me. Viŋ sii kəə laa mə baa nàysə kə tɨ́ viŋ? Viŋ kəə kɨ beꞌsə ŋwə nɨzi mu?» 28 Vəŋ ndasə ŋwə, gì laa, «A lùu wuu məbeꞌsə nu wə ghɔ́ lee! Gə̀ fɨ maa yia, yia beꞌsə nu Mose. 29 Yia kɔꞌ kɨɨ laa ŋkee fɨshi Nwi nə gì tɨ́ Mose. Gə̀ fɨ maa wə ŋwə̀, yia kee kɨɨ nə fɔɔ faŋ ŋwə ndɔ̀ fɨ fuŋ me.» 30 Wə ghɔ́ gi laa, «Mə zɔ ŋkee nu shuu yɔŋ mɔɔ! Wə wì nii ŋàꞌsə sɨ ŋaa; viŋ gi laa viŋ kee kɨɨ fɔɔ faŋ ŋwə ndɔ̀ fɨ fuŋ me lee? 31 Nsiŋ kɔꞌ kɨɨ laa Nwi kee yaa kɨ zɔ məshɔꞌtə vɨɨ vənu vəbwəvə me. Nwi zɔ sheꞌ məshɔꞌtə wə ntɨə faŋ ŋwə bəŋsə Nwi, yɨ nu ŋkɨə faŋ Nwi kàw. 32 Shù fɨ nə faŋ mbi nə zì, vɨ nə kee ta zɔ laa, wə faŋ vɨ nə bì ŋwə nə sɨ ghi fɨsə, wə yɨ̀sə ŋwə ye vədɨꞌ me. 33 Yeso nə toꞌ kee ndɔ̀ fɨ ghɔ Nwi me, buu kaꞌ ŋwə kee yɨ̀ kəŋ nu ghɔ́ me.» 34 Vəŋ bəŋsə tɨ́ ŋwə laa, «A lùu wə faŋ vənu vəbwəvə lùu tɔ ghɔ, shù fɨ faŋ vɨ nə bì ghɔ. A kəə lùu yaa wuu mədeesə wia lee?» Vəŋ gi nɨniŋ, jɔ̀ŋ ŋwə fɨ taa ŋii məshəŋtə vəŋ. 35 Yeso zɔ laa vɨ jɔŋ wə ghɔ́, ŋwə jwi ye wə ghɔ́, bìtə tɨ́ ŋwə laa ŋwə bìŋ Wuu yinsəŋ Nwi mu? 36 Wə ghɔ́ bəŋsə tɨ́ ŋwə laa, «Wuu yinsəŋ Nwi ghɔ́ lùu ndə? Naysə shee, tɨta, tɨ́ kaꞌ mə nùŋ fwi nyaa maa ŋwə!» 37 Yeso gi tɨ́ ŋwə laa, «A duꞌtə a ye ŋwə. Kɨ gisə ŋwə tɨ́ ghɔ.» 38 Ŋwə gi laa, «Tɨta, mə bìŋ, nùŋ fwi nyaa maa ghɔ,» kɨ nii tùŋ vətɔ vəyəə vi nsi vɨsɨ Yeso. 39 Yeso gi laa, «Mə nə jwì mbi nyə̀ maa məgaasə vɨɨ, laa vɨɨ faŋ vəŋ kee yɨyenə me, yenə; vɨɨ faŋ vəŋ yɨyenə, sɨ vəŋ fɨ.» 40 Vɨɨ Farisii vəmɔ́ꞌ faŋ vəŋ nə luu maa shəŋ kɔ́, zɔ yigi yɔ́, bìtə tɨ́ Yeso laa, «A kəə gì laa sɨ ghia luu fɨsə nɨzi mu?» 41 Ŋwə bəŋsə tɨ́ vəŋ laa, «Viŋ nii toꞌ biŋ laa sɨ ghiŋ fɨ, buu nu bwə kee lùu maa viŋ me. Luu nə, viŋ gì laa, viŋ yɨyenə. Nɨniŋ, nu bwə gòꞌsə maa viŋ.» |
© 1993, Wycliffe Bible Translators, Inc. All rights reserved.