Ŋwaꞌlə Jɔn Vənu faŋ Jɔn nə nyɔ̀ꞌ kɔ̀ŋ Yeso Kristo 10 - Vengo (Babungo)Yigisə tii kɔ̀ŋ bisə-njɨɨ 1 Yeso baa kɨ gì tɨ́ vəŋ laa, «Viŋ zɔ! Mə naysə ŋkee nu yinsəŋ tɨ́ viŋ laa, wə ntɨə faŋ ŋwə kee shɔ̀ɔ fɨ shuu ŋkɔꞌ bisə-njɨɨ, buu ŋii taa ŋkɔꞌ me, luu nə, koꞌ fɨ tɔ ŋkɔꞌ, ŋìi taa ŋkɔꞌ bisə yɔ́, buu wə ghɔ́ lùu ndɔꞌ. 2 Wə ntɨə faŋ ŋwə ŋìi taa ŋkɔꞌ fɨ shuu ŋkɔꞌ lùu wuu məmɔꞌ bisə-njɨɨ. 3 Wə ntɨə faŋ ŋwə shii shuu ŋkɔꞌ bisə, ŋaꞌsə tɨ́ ŋwə; bisə si kɨɨ nə ŋwə, kɨ̀ɨ nə gɨ yi faŋ ŋwə tii nsə maa yizii, ndi nsə, fuu nə nsə fu. 4 Faŋ ŋwə fùusə bisə si fu, ŋwə shɔɔ vɨsɨ, nsə kɨ beꞌsə ŋwə, buꞌ laa nsə kɨɨ nə gɨ yi. 5 Gə̀ fɨ maa wə dɨday faŋ ŋwə jɨjwi, nsə kee bèꞌsə ŋwə me, nsə kii bee nyɨnyɨŋ fɨ ghɔ ŋwə, buꞌ laa nsə kee kɨɨ nə ŋwə me, kee kɨɨ nə gɨ yi me.» 6 Yeso nə gì yigisə tii nyə̀ tɨ́ vəŋ, vəŋ kee kɨ̀ɨ nə ŋiꞌ yigisə tii yɔ́ me. Faŋ Yeso lùu shuu ŋkɔꞌ yifwàŋ Nwi 7 Nɨniŋ, Yeso baa kɨ gì tɨ́ vəŋ laa, «Viŋ zɔ! Mə gì tɨ́ viŋ yinsəŋ laa, mə lùu yaa shuu ŋkɔꞌ bisə ghɔ́. 8 Vɨɨ vənshə faŋ vəŋ nə jwì vɨsɨ mə, lùu vəndɔꞌ, bisə-njɨɨ nə kee zɔnə vəŋ me. 9 Mə lùu yaa shuufɔ, wə tɨ̀ me wə faŋ ŋwə shɔ̀ɔ fɨ maa mə, ndɔ bwey. Ŋwə ndɔ kɨ ŋii baa fuu faŋ ŋwə kàw, yè gay jəənə maa məkwə. 10 Ndɔꞌ yaa kɨ ŋii sheꞌ maa məshaw, nə maa məzwi, baa nə maa məbɨsə vətɔ. Gə̀ fɨ maa mə, mə nə jwì laa vɨɨ kii məbwey vəlwaŋ faŋ ŋwə kee yaa kɨ me me.» Faŋ Yeso lùu yaa nshii bisə yijəə 11 «Mə lùu yaa nshii bisə yijəə. Nshii bisə yijəə yaa kɨ ku tɔ bisə si. 12 Gə̀ fɨ maa wə ntɨə faŋ ŋwə faꞌ faꞌ maa ka, faŋ ŋwə kee lùu tɨɨ bisə me, kɨ ghaŋ kəŋ wə ghɔ́ ye nyaa yibwə nə jwì, buu ŋwə taa nyɨŋ, mèꞌtə bisə sɔ́, nyaa yɔ́ jiatə bisə sɔ́, sàynə nsə. 13 Wə ghɔ́ faŋ ŋwə faꞌ luu ka wi nə, kee shə̀ŋ maa bisə sɔ́ me, buꞌ faŋ kee kìi ŋwə me, nu bisə sɔ́ kee za ŋwə me. 14 Mə luu nshii bisə yijəə. Mə kɨɨ nə bisə saŋ, bisə saŋ kɨɨ nə mə. 15 Luu sheꞌ faŋ Tii ŋwaa kɨ̀ɨ nə mə; mə baa kɨ̀ɨ nə Tii ŋwaa. Nɨniŋ, mə bìŋ maa məku tɔ bisə saŋ maa məbweysə nsə. 16 Mə baa kìi bisə səmɔ́ꞌ faŋ nsə kee lùu taa nwaa bisə taa ŋkɔꞌ yɔ́ me. Bàw laa mə ndi bisə yinsii nɨzi, kɨ shiinə nsə. Nsə taa zɔ gɨ nyaa nɨzi. Bisə sənshə taa faynə shəŋ muꞌ, gù fa kəmuꞌ, nshii bisə yimuꞌ kɨ shii. 17 Ŋiꞌ nu ŋkɨə faŋ Tii ŋwaa kaw mə, luu buꞌ faŋ mə bìŋ yiku, ndɔ̀ baa kìi məbwey fɨ yighee yiba. 18 Ŋkə kee lùu laa wə ndɔ baꞌsə məbwey fɨ ghɔ mə nə wutə ki me. Ndɔ biŋ mə biŋ yiku ŋgɨɨ-mə. Mə kìi wutə maa məbiŋ yiku, baa nə wutə maa məywey fɨ shɨ yiku. Nə kɔ̀ Tii ŋwaa kɔ ntɨ nyə̀ nə wutə kɔ́ shee.» 19 Vɨɨ Jus zɔ yigi yɔ́, baa kii gaasə vəway vəbɔɔ buꞌ ŋwə. 20 Vɨɨ vəyaŋ gi laa zwitə bwə taa ŋwaa ŋwə, ŋwə ghɨghenə, baa nə laa, «Viŋ sii zɔ vənu mbɨə faŋ ŋwə gisə tɨ́ kə?» 21 Vɨɨ mɔ́ꞌ gi laa, «Kee lùu yigisə wuu zwitə bwə nə me, kaꞌ zwitə bwə yɨ̀sə sɨ wuu sɨ fɨsə yènə mu?» Faŋ vɨɨ kwalə vɨɨ Jus nə twèy Yeso 22 Kɨ luu maa vəshi mbɨə faŋ vɨɨ Jus yaa kɨ lumə shi ŋkɨə faŋ vɨ nə baa ŋàꞌsə shuu ŋii Nwi yikwalə shɔ ntɨꞌ Jerusalem. Nə luu maa yighee gwə. 23 Yeso nə toꞌ fɨ taa tɔ-fesə, faŋ vɨ nəə tii nə tɔ-fesə Solomon, taa ŋii Nwi yikwalə. 24 Vɨɨ kwalə vɨɨ Jus jwi yɨ ŋwə, kìa ŋwə, gì tɨ́ ŋwə laa, «A sii taa tay kɨkə, buu naysə wə ntɨə faŋ a lùu tɨ́ yia. Kɨ luu laa a luu Kristo, wə ntiə faŋ Nwi fɔ̀ɔlə ŋwə, a nàysə tɨ́ yia ntee.» 25 Yeso bəŋsə tɨ́ vəŋ laa, «Mə duꞌtə mə naysə wə ntɨə faŋ mə lùu tɨ́ viŋ. Luu nə, viŋ kee bìŋ yigisə nyaa me. Vənu mbɨə faŋ mə yɨsə maa yizii Tii ŋwaa, mbə dəsə wə ntɨə faŋ mə lùu tɨ́ viŋ. 26 Viŋ kee kaw biŋ mə me, buꞌ laa viŋ kee lùu vɨɨ vaŋ me. 27 Gə̀ fɨ maa vɨɨ vaŋ, vəŋ lùu yaa bisə-njɨɨ faŋ nsə zɔ gɨ nshii vəŋ. Mə luu nshii vəŋ. Vəŋ zɔ gɨ nyaa. Mə kɨɨ nə vəŋ. Vəŋ bèꞌsə mə. 28 Mə kɔ məbwey tɨ́ vəŋ faŋ ŋwə kee ndɔ mè me. Vəŋ kee ndɔ kukə me. Kaꞌ wə kee baa shaw vəŋ fɨ ghɔ mə me. 29 Tii ŋwaa, faŋ ŋwə nə kɔ̀ vəŋ shee, kwàlə shɔ̀ɔ vɨɨ vənshə. Kaꞌ wə kee lùu shɔ, tɨ́ kaꞌ ŋwə fi vəŋ fɨ ghɔ ŋwə me. 30 Tii ŋwaa nə mə lùu fa kəmuꞌ.» 31 Vɨɨ Jus zɔ yigi Yeso yɔ́, baa kɨ bwilə ŋoꞌsə fɨ nsi maa mətumə ŋwə shɔ. 32 Ŋwə gi tɨ́ vəŋ laa, «Viŋ duꞌtə viŋ ye vənu vəjəəvə vəyaŋ faŋ mə yɨ̀sə maa wutə Tii ŋwaa. Fɨ taa vənu vɔ́, viŋ sii kəə tumə mə nə ŋoꞌsə buꞌ ŋkɨə nu fɨ taa vənu vɔ́, yuu mə yɨ̀ nə?» 33 Vɨɨ Jus vɔ́ bəŋsə tɨ́ ŋwə laa, «Kee luu buꞌ vənu vəjəəvə faŋ a yɨ̀, faŋ yia kəə tumə ghɔ nə ŋoꞌsə me. Yia tumə ghɔ nə ŋoꞌsə, buꞌ laa a ndà Nwi, faŋ a ndì nshɨ-tɔ wə yaa Nwi, faŋ a lùu sheꞌ wə mənsaw.» 34 Yeso bəŋsə tɨ́ vəŋ laa, «Maa vɨ nə nyɔ̀ꞌ taa ŋwaꞌlə nuŋsə yiŋ laa, Nwi gì laa, viŋ lùu vənwi? 35 Viŋ kɔꞌ kɨɨ laa yigi fɨ taa ŋwaꞌlə Nwi lùu yigisə yinsəŋ faŋ nyə gòꞌsə yighee muꞌ. Nɨniŋ, ŋwaꞌlə Nwi tii vɨɨ mbɨə faŋ vəŋ nə nùŋsə yigisə Nwi yɔ́, nə vənwi. 36 Nɨniŋ, sii yɨ̀ kə viŋ gi laa mə ndà Nwi, buꞌ faŋ mə gì laa mə faŋ Tii ŋwaa nə shòꞌ mə, baa tɔ̀ŋ mə taa mbi nyə̀, mə lùu Wee Nwi. 37 Kɨ luu laa mə kee faꞌ faꞌ ŋgwə faŋ kɔ̀ Tii ŋwaa shee me, kɨ viŋ biŋ mə me. 38 Luu nə, mə kɨ luu kɨ faꞌ faꞌ Tii ŋwaa, bàw viŋ biŋ. Viŋ kee kɔlə bìŋ mə maa nu ŋkɨə faŋ mə gì me, kaꞌ viŋ bìŋ mə buꞌ nu ŋkɨə faŋ mə yɨ̀sə, tɨ́ kaꞌ ŋkə taa lèy tɨ́ viŋ, laa Tii ŋwaa lùu fɨ yiba jɨŋ mə, mə lùu fɨ yiba jɨŋ Tii ŋwaa.» 39 Vɨɨ vɔ́ nə baa kəə jia Yeso, luu nə, Yeso fi ŋwaa wi fɨ ghɔ vəŋ, gə̀. Faŋ vɨɨ vəyaŋ nə nùŋ fwisə vəŋ maa Yeso fɨ yiba muu mə Jordan 40 Yeso kɨ nii bəŋ gə̀ tɔ̀ŋ muu mə Jordan, gə̀ zìꞌ maa shəŋ ŋkɨə faŋ Jɔn nə fɔŋ duꞌ shɔ, kɨ kɔ muu mə Nwi tɨ́ vɨɨ. Yeso gòꞌ yifi, shi shɔ. 41 Vɨɨ vəyaŋ jwi yɨ ŋwə, kɨ gisə laa, «Jɔn nəə kee yɨ vənu və shuu yɔŋvə me. Luu nə, vənu vənshə faŋ ŋwə nə gi kɔ̀ŋ wə ŋwə̀, lùu yinsəŋ.» 42 Nɨniŋ, vɨɨ vəyaŋ jwi, nùŋ fwisə vəŋ maa Yeso maa shəŋ kɔ́. |
© 1993, Wycliffe Bible Translators, Inc. All rights reserved.