Hibru 9 - Vengo (Babungo)

Faŋ vəfaꞌ və vɨɨ məfeꞌ Nwi və vɨɨ Jus kee yikuꞌnə me

¹ Yia kɔꞌ kɨɨ laa ntɨsə nə luu shɔ taa məkee məmwamə nɨzi, faŋ nsə dəsə jɨɨ tɨ́ vɨɨ, tɨ́ kaꞌ vɨ kɨ bəŋsə Nwi. Shəŋ mɔ́ꞌ nə luu shɔ nɨzi nsi, faŋ vɨ yaa kɨ feꞌ Nwi shɔ.

² Shəŋ kɔ́ nə luu vəbee və Nwi faŋ vɨ nəə feꞌ Nwi shɔ nə. Vəbee və Nwi vɔ́ nə luu ŋkee vəkwalə, kìi njɨɨsə səbɔɔ. Njɨɨ njyə fu, vɨ nə tii nə shəŋ ley Nwi. Lùu shəŋ ŋkɨə faŋ vɨ tə kiꞌ shɔ, nə teybələ faŋ vɨ yaa kɨ nuŋsə bee məkɔ Nwi shɔ nə.

³ Njɨɨ njii-wə faŋ vɨ shitə shuu wi nə njwi nə, vɨ tii nə shəŋ ŋkɨə faŋ ŋkə ley tɨ́ Nwi shɔ̀ɔ vəshəŋ vənshə.

⁴ Maa shəŋ kɔ́, vɨ kìi shəŋ mɔ́ꞌ faŋ vɨ twaŋ vəndiŋ shɔ, mbə luŋsə vəjəə tɨ́ Nwi. Vɨ nə bɔ̀ŋ shəŋ kɔ́ nə goolə. Ŋwaꞌ məkee Nwi lùu maa shəŋ kɔ́ nɨzi. Vɨ nə lii nshətə ŋwaꞌ ghɔ́ nə mbɨɨ yi yinshə nə goolə. Taa ŋwaꞌ ghɔ́ vɨ nə nùŋ ntɨɨ shɔ faŋ vɨ bɔ̀ŋ nə goolə, nə fazɨ ŋkɨə faŋ ŋkə nə ndɔ̀ fɨ ghɔ Nwi, faŋ vɨ tii nə mana taa tey yi. Mbay Aarɔn faŋ nyə nə sɔꞌ nə, lùu taa tey yi nɨzi, baa nə ŋoꞌsə sì səbɔɔ, faŋ Nwi nə nyɔ̀ꞌ ntɨ si fuu yi nə.

⁵ Fuu ŋwaꞌ ghɔ́ mənyia nshiisə-ŋiisə Nwi lùu shɔ, faŋ vɨ tii nə Kerubim. Mbə lùu shɔ maa mədəsə tɨ́ vɨɨ laa Nwi lùu shɔ. Mbə ŋaꞌsə ghalə, shìtə ŋwaꞌ ghɔ́ nshə. Luu nə, yia kee kəə gi kɔ̀ŋ vətɔ vɔ́, twèlə mbə vənshə ndwə me.

⁶ Maa shəŋ kɔ́ faŋ vɨ lootə nee nə, vɨɨ məfeꞌ Nwi yaa kɨ gə shɔ ghee nshə maa shəŋ kɔ́ njɨɨ fu, faŋ vəŋ gə faꞌ faꞌ Nwi shɔ nə.

⁷ Gə fɨ maa njɨɨ tɨəŋ, kaꞌ ŋii sheꞌ wuu kwalə məfeꞌ Nwi shɔ. Ŋwə ŋii shɔ sheꞌ yighee muꞌ taa ŋuꞌ. Yighee yɔ́ ŋwə bɨ ndi mənshi mə nyaa, feꞌ Nwi shɔ buꞌ yibɨsə yi, baa fèꞌ Nwi buꞌ vənu vəbwəvə faŋ vɨɨ nə yɨ̀sə, buu kaꞌ ŋwə ŋìi taa njɨɨ yɔ́.

⁸ Faŋ nsiŋ ywiitə vənu vɔ́ nə, Zwitə Ley Nwi də̀ tɨ́ nsiŋ laa, yighee njyə faŋ mfɔŋ shəŋ məkɔ Nwi, faŋ nə bɔ̀ŋ vɨɨ nə, kɨ bii tɨŋnə, jɨɨ kee lùu shɔ, laa vɨɨ shɔɔ ŋìi maa shəŋ ŋkɨə faŋ Nwi lùu shɔ maa yinsəŋ me.

⁹ Nɨniŋ, shəŋ məkɔ Nwi kəmwa kɔ́ lùu yaa shwenə tɨ́ nsiŋ maa məkɨɨ nə ŋiꞌ vənu və Kristo ndee. Vəkɔ nə ndeysə faŋ wə fèꞌ tɨ́ Nwi nə, kee kìi wutə maa məyɨsə laa fwi wə ntɨə faŋ ŋwə faꞌ tɨ́ Nwi nə, ley shɨlə tɨ́ Nwi faŋ Nwi kəə laa ŋwə duꞌ me.

¹⁰ Ndeysə nə vəkɔ luu sheꞌ vətɔ və shɨ nsi. Mbə luu sheꞌ yaa nuŋsə yimɔ́ꞌ kɔ̀ŋ vətɔ vəzɨvə, nə vətɔ və mənu, nə ŋgunə məsɔ vətɔ. Nuŋsə yinshə lùu vənu və shɨ nsi faŋ mbə dùꞌ sheꞌ maa kuŋtə yighee, zìꞌ maa yighee njyə faŋ Nwi taa də jɨɨ yiday faŋ nyə bàw shɔ̀ɔ nuŋsə yɔ́.

Faŋ vəfaꞌ və Kristo bàw shɔ̀ɔ vəfaꞌ və vɨɨ məfeꞌ Nwi

¹¹ Luu nə, gə fɨ maa Kristo, ŋwə nə jwì yaa wuu kwalə məfeꞌ Nwi faŋ ŋwə faꞌ faꞌ wi maa shəŋ ŋkɨə faŋ ŋkə kwalə shɔ̀ɔ shəŋ məkɔ Nwi fɨ shɨ nsi nyə̀, faŋ ŋkə baa lùu kəjəə shɔ̀ɔ ŋkə shɨ nsi. Nə kee bɔ̀ŋ vɨɨ bɔ̀ŋ shəŋ kɔ́ me; shəŋ kɔ́ kee bee lùu shɨ nsi nyə̀ me. Kristo jwì yaa wuu məkɔ Nwi kwalə tɨ́ kaꞌ vɨɨ ndɔ zɨ məbwey vəlwaŋ.

¹² (Yighee vɨsɨ vɨɨ kwalə məfeꞌ Nwi yaa kɨ ŋii shəŋ ley Nwi taa njɨɨ tɨəŋ nə mənshi mə yɔꞌ nə mənshi mə wee-nyaandaw.) Gə fɨ maa Kristo, ŋwə nə kee ndì mənshi mə bi, tɨꞌnə me mbə nyaa me. Ŋwə nə gə̀ nə mbii mənshi, gə̀ ŋìi shəŋ ŋkɨə faŋ Nwi lùu shɔ, ŋii shɔ sheꞌ yighee muꞌ. Nɨniŋ, ŋwə fùusə nsiŋ fɨ ghɔ zwitə bwə yighee muꞌ, kɔ̀ məbwey vəlwaŋ tɨ́ nsiŋ.

¹³ Yighee vɨsɨ vɨɨ nəə ndi mənshi mə bi nə nyaa, nə vəbu və nyaa-ndaw faŋ vɨ twaŋ, kwitə maa vɨɨ faŋ vəŋ nə kee lùu vəley vɨsɨ Nwi me, buu vəŋ kɨ nii lùu vəley.

¹⁴ Nɨniŋ, faŋ mənshi mə nyaa mbɔ́ kìi wutə maa məyɨsə laa vɨɨ ley, buu mənshi mə Kristo weꞌ shɔ̀ɔ yimbii, sɔ̀ yibɨsə nyaa-nsiŋ, yɨ̀sə laa fwi saŋ-nsiŋ ley. Zwitə Nwi nə kɔ̀ wutə tɨ́ Kristo laa ŋwə ndi ŋkee ŋwaa wi, faŋ nu bwə nə kee bee lùu maa ŋwə nə me, fèꞌ ndey shɔ buꞌ nsiŋ, laa ŋwə yɨ̀sə fwi saŋ-nsiŋ ley, tɨ́ kaꞌ nsiŋ kee baa yɨ̀sə vənu vəbwəvə, faŋ mbə jwi nə yiku nə me. Nɨniŋ laa nsiŋ faꞌ tɨ́ Nwi faŋ lùu Nwi məbwey.

Faŋ Kristo nə jwì nə məkee məfimə fɨ ghɔ Nwi

¹⁵ Ŋkə də̀ laa Yeso lùu wə ntɨə faŋ ŋwə tɨŋ nɨntəŋ ŋwaa nsiŋ vɨ Nwi. Ŋwə nə jwì nə məkee məfimə, laa vɨɨ mbɨə faŋ Nwi tìi vəŋ laa vəŋ lùu mbii vɨɨ nə, jwi fì məbwey vəlwaŋ, faŋ Nwi nə kɔ̀ꞌnə maa məkɔ tɨ́ vəŋ nə. Kristo nə lòotə məkee məfimə mbɔ́ faŋ ŋwə nə kù tɔ nsiŋ nə. Yiku yi fuusə vɨɨ fɨ taa vənu vəbwəvə vəŋ faŋ vəŋ nə yɨ̀sə maa yighee njyə faŋ məkee məmwamə nəə kɨ bii sɔ̀ꞌ vəŋ nə.

¹⁶ Yighee njyə faŋ wə yaa kɨ tɨsə yiku yi, faŋ ŋwə kəə ku, wə ghɔ́ taa ku ŋkəə, buu vɨ yɨsə vənu mbɨə faŋ ŋwə gì buu ku nə.

¹⁷ Maa yighee njyə faŋ wə kɨ bii bwey, kaꞌ wə kee zɨ tɔ ki me. Ŋkə taa jwi ziꞌ maa yighee njyə faŋ ŋwə kù, buu nu ŋkɨə faŋ ŋwə nə tə̀, kìi wutə. Nu məkee luu sheꞌ nɨniŋ.

¹⁸ Yighee njyə faŋ Nwi nə gwìa mfɔŋ məkee ghɔ vɨ vɨɨ nə, vɨ nə shɔ̀ɔ fɨ taa mənshi nɨzi, buu məkee mbɔ́ tɨŋnə.

¹⁹ Mose nə fɔŋ nàysə ntɨsə sənshə tɨ́ vɨɨ, faŋ Nwi nə nàysə laa vɨ yɨ nə, kɨ nii ndì njwi yibay nə gay mɔ́ꞌ faŋ vɨ tii nə Isop, shù taa mənshi mə vaŋ-nyaasə nə bisə, baa nə taa muu, ndì, fɔ̀ꞌ maa ŋwaꞌlə ŋgwə faŋ vɨ nyɔ̀ꞌ ntɨsə taa tey yi nə, baa nə maa vɨɨ vənshə.

²⁰ Faŋ ŋwə nə fɔ̀ꞌ mənshi mbɔ́ maa vɨɨ nə, ŋwə gi nə gɨ yishaꞌsə laa, «Lùu mənshi mbɨə faŋ Nwi gwìa məkee shɔ tɨ́ viŋ.»

²¹ Sheꞌ maa jɨɨ yɔ́, Mose nə fɔ̀ꞌ mənshi mbɔ́ maa shəŋ məkɔ Nwi, baa nə maa vətɔ mbɨə faŋ vɨ yaa kɨ faꞌ faꞌ Nwi nə mbə nə.

²² Yinsəŋ, maa jɨɨ ntɨsə sɔ́, vətɔ kee gòꞌ vəyaŋ faŋ vɨ kee ndì mənshi, sɔ̀ shɔ, tɨ́ kaꞌ mbə lèy tɨ́ Nwi me. Jɨɨ yiday kee lùu shɔ, tɨ́ kaꞌ Nwi ndenə nu bwə me, tɨ̀ lɨꞌ laa mənshi shəŋ nsi me.

²³ Nɨniŋ, Nwi nə tə laa vɨ ndi mənshi, fɔ̀ꞌ maa vətɔ mbɨə faŋ vɨ faꞌ faꞌ Nwi shɔ nə, faŋ mbə lùu vəshwenə vətɔ fɨ yizɔ nə, laa mbə luu vəley vɨsɨ Nwi. Gə fɨ maa ŋkee vətɔ mbɨə faŋ mbə lùu yizɔ, kaꞌ mənshi mə nyaasə kee bee kùꞌnə shɔ me. Fa ŋkɨə faŋ vɨ feꞌ shɔ, kwàlə shɔ̀ɔ vəkɔ fɨ shɨ nsi.

²⁴ Kristo nə ŋìi maa shəŋ ŋkɨə faŋ Nwi lùu shɔ yizɔ. Ŋwə tɨŋ vɨsɨ Nwi maa yizii nyaa-nsiŋ ndwə. Ŋwə nə kee bee ŋii taa vəbee və Nwi faŋ fìanə wə mənsaw me, faŋ luu sheꞌ shwenə shəŋ faŋ Nwi lùu shɔ nə.

²⁵ Wuu kwalə məfeꞌ Nwi fɨ shɨ Isirayl yaa kɨ ŋii ŋuꞌ tɨ̀ me ŋuꞌ taa njɨɨ tɨəŋ taa vəbee və Nwi. Yighee njyə faŋ ŋwə ŋìi shɔ nə, ŋwə ndì mənshi mə nyaa, faŋ kee bee lùu mbii mənshi me, buu ŋii shɔ. (Gə fɨ maa Kristo, ŋwə ŋìi maa shəŋ ŋkɨə faŋ Nwi lùu shɔ sheꞌ yighee muꞌ, kɔ̀ tɔ ki tɨ́ Nwi sheꞌ yighee muꞌ.)

²⁶ Ŋkə nəə toꞌ kee lùu nɨniŋ me, buu ŋwə nə yè ŋɨꞌ ghee yaŋ, zì fɨ maa yighee njyə faŋ mbi nə tèy. Yinsəŋ ŋwə nə fùu taa mbi sheꞌ yighee muꞌ, faŋ lùu ndwə, faŋ mbi kəə me nə. Ŋwə nə ndì ŋkee ŋwaa wi, fèꞌ ndey shɔ tɨ́ Nwi maa məndisə nu bwə wə mənsaw yighee muꞌ.

²⁷ Nu ŋkɨə faŋ ŋkə lùu kəley, lùu laa wə tɨ̀ me wə ndɔ ku shi mɔ́ꞌ, buu Nwi kɨ nii shìa nsɔꞌ tɔ ŋwə maa vənu mbɨə faŋ ŋwə nəə yɨsə.

²⁸ Sheꞌ nɨniŋ, Kristo nə fɔŋ jwì kù yighee muꞌ, laa ŋwə yɨsə vɨɨ vəyaŋ nyɨŋ fɨ taa nu bwə vəŋ, baa nə laa ŋwə ndɔ baa bəŋ jwi mbi nyə̀, lwesə ghee bɔɔ. Maa yighee yɔ́ ŋwə ndɔ kee baa jwi maa məsɔ nu bwə vɨɨ me; ŋwə ndɔ bee kii jwi maa məkɔ məbwey vəlwaŋ tɨ́ vɨɨ vi faŋ vəŋ kɨꞌ ŋwə nə.