Hibru 8 - Vengo (Babungo)

Faŋ Yeso lùu wuu kwalə məfeꞌ Nwi ŋwaa-nsiŋ

¹ Nu ŋkɨə faŋ ŋkə shɔ̀ɔ vənu vənshə taa yigisə yia, lùu laa nsiŋ kìi kəŋ wuu kwalə məfeꞌ Nwi faŋ ŋwə dùꞌ maa kwiŋ maꞌnə Nwi, faŋ ŋwə kìi wutə kənshə yizɔ. Wuu kwalə məfeꞌ Nwi ghɔ́ lùu Yeso.

² Ŋwə lùu wuu faꞌ maa shəŋ ley faŋ Nwi lùu shɔ. Shəŋ ley Nwi kɔ́ lùu shəŋ ley Nwi yinsəŋ, faŋ nə nàysə tɨta Nwi. Ŋkə kee lùu yaa shəŋ ley ŋkɨə faŋ ŋkə lùu taa ŋii Nwi faŋ vɨɨ məkɔ Nwi yaa kɨ ŋii shɔ, kɔ̀ Nwi, faŋ nàysə vɨɨ me.

³ Vəfaꞌ mbɨə faŋ vɨɨ kwalə məfeꞌ Nwi vənshə faꞌ, lùu laa vəŋ kɨ fi vətɔ, kɔ Nwi shɔ. Vəŋ baa feꞌ Nwi nɨzi. Sheꞌ nɨniŋ, Yeso faŋ ŋwə lùu wuu kwalə məfeꞌ Nwi ŋwaa-nsiŋ nə, nə kɔ̀ Nwi nɨzi.

⁴ Yeso nii toꞌ lùu shɨ nsi ndwə, buu ŋwə kee lùu wuu məfeꞌ Nwi me, buꞌ laa vɨɨ məfeꞌ Nwi vəmɔ́ꞌ lùu shɔ taa mbi nyə̀, faŋ vəŋ beꞌsə ntɨsə Mose, buu kɨ kɔ Nwi shɔ nə.

⁵ Faꞌ ŋgwə faŋ vɨɨ məfeꞌ Nwi vɔ́ faꞌ nə, luu sheꞌ maa jɨɨ faŋ nyə fɨ̀nə vənu mbɨə faŋ mbə lùu yizɔ. Vətɔ mbɨə faŋ vəŋ faꞌ nə mbə nə, luu sheꞌ yaa ndɨɨlə vətɔ fɨ yizɔ. Mbə kee luu ŋkee vətɔ me; mbə luu sheꞌ ndɨɨlə vətɔ fɨ yizɔ. Vɨɨ nə nàysə vətɔ vɔ́ sheꞌ faŋ Nwi nə də̀ tɨ́ Mose. Maa yighee njyə faŋ Mose nəə kəə fianə vəbee və Nwi nə, Nwi nə gì tɨ́ ŋwə laa, «Kɨ tɔfə laa a naysə vətɔ vənshə, mbə kuꞌnə maa vətɔ mbɨə faŋ mə nə də̀ tɨ́ ghɔ fuu baŋ nə.»

⁶ Nɨniŋ, nsiŋ ye laa Nwi kɔ̀ faꞌ tɨ́ Yeso, faŋ ŋwə kwàlə shɔ̀ɔ ŋgwə vɨɨ məfeꞌ Nwi vənshə. Yeso baa luu jwì nə məkee məfimə faŋ Nwi nə gwìa tɨ́ vɨɨ. Məkee məfimə mbɔ́ bàw shɔ̀ɔ məkee məmwamə buꞌ vənu vəjəəvə faŋ Nwi kɔ̀ꞌnə tɨ́ nsiŋ nə.

⁷ Nəə toꞌ lùu laa məkee məmwamə kuꞌnə maa məyɨsə laa wə luu loomə vɨsɨ Nwi, buu ŋwə nə kee baa kɨ kəə naysə məfimə me.

⁸ Vɨɨ Isirayl nə gù maa ntɨsə məkee mbɔ́. Nɨniŋ, vɨ nyɔ̀ꞌ taa ŋwaꞌlə Nwi laa, «Viŋ zɔ! Yighee ndɔ jwi faŋ mə taa naysə məkee məfimə, yia vɨ vɨɨ Isirayl nə vɨɨ Juda.

⁹ Məkee mbɔ́ kee ndɔ luu yuu mbɨə faŋ mə nə gwìa yia vətɨɨ viŋ maa yighee njyə faŋ mə nə ndì vəŋ, fùusə vəŋ fɨ shɨ Ijip me. Vəŋ nə kee nùŋsə məkee mbɨə faŋ yia vɨ vəŋ nə gwìa nə me. Nɨniŋ, mə shìasə vəŋ nɨzi.» Lùu faŋ Nwi nə gì tɨ́ vɨɨ Isirayl nə.

¹⁰ Ŋwə baa luu gì tɨ́ vəŋ laa, «Məkee mbɔ́ faŋ yia vɨɨ Isirayl ndɔ gwia maa vəshi vɔ́, lùu laa mə ndɔ yɨsə vəŋ kɨɨ nə ntɨsə saŋ, nùŋ fwi vəŋ shɔ, kɨ zɔnə ntɨsə sɔ́ nə fwi yimuꞌ. Mə taa luu Nwi vəŋ, vəŋ luu vɨɨ vaŋ.

¹¹ Wə kee ndɔ baa lùu shɔ, tɨ wuu shɨ wi, tɨꞌnə me wuu ŋiinə wi me, laa ŋwə kɨ zwetə nu Nwi me. Lùu nɨniŋ buꞌ laa vɨɨ vənshə ndɔ kɨɨ nə mə. Vaŋmbwaa ghɔ vɨɨ taanə vənshə ndɔ kɨɨ nə mə.

¹² Mə ndɔ kee gəŋsə maa vənu vəbwəvə vəŋ, kee baa kɨ lumə yibɨsə vəŋ me.»

¹³ Faŋ Nwi nə gì kɔ̀ŋ məkee məfimə nə, ŋkə də̀ laa ŋwə yɨ̀sə njyə mfɔŋ gù yimwa. Nsiŋ kɔꞌ kɨɨ laa fa tɨ̀ me fa faŋ ŋkə dwàŋ, fɨkɨꞌ ŋkə taa ndi.