Hibru 7 - Vengo (Babungo)

Faŋ Yeso luu ŋkee wuu kwalə məfeꞌ Nwi faŋ ŋwə gòꞌsə yighee muꞌ

¹ Wə wì faŋ vɨ tii ŋwə nə Melkizedek nə, nə luu fwàŋ fɨ shəŋ mɔ́ꞌ faŋ vɨ tii nə Salem. Ŋwə nə baa lùu wuu məfeꞌ Nwi Nshɔɔ-mbi. Ŋkee fɨshi, maa yighee njyə faŋ Abraham nə bə̀ŋ fɨ shəŋ yighaw faŋ ŋwə ghɔ vɨ vɨɨ vi nə tuŋ yighaw, jìatə vəfwàŋ vəyaŋ, Melkizedek ghɔ́ nə gə fàynə ghɔ vɨ vəŋ jɨɨ, tù mənɔŋ-bwaŋnə tɔ ŋwə.

² Maa yighee yɔ́ Abraham nə ndì vətɔ mbɨə faŋ ŋwə nə fì fɨ yighaw, gàasə vəshəŋ yighuŋ, kɔ̀ shəŋ kəmuꞌ tɨ́ Melkizedek. Gə fɨ maa yizii Melkizedek, ŋiꞌ yizii yi lùu laa, «Fwàŋ faŋ vənu vi lùu vəloomə.» Ŋwə nə luu fwàŋ Salem, faŋ lùu laa fwàŋ məduꞌ-nyɔŋ.

³ Vɨ kee nyɔ̀ꞌ yizii tɨɨ Melkizedek taa ŋwaꞌlə Nwi me, tɨꞌnə me yizii nshu wi me. Vɨ kee gì nu kɔ̀ŋ ŋiꞌ ŋii ki me. Vɨ kee kɨ̀ɨ nə yighee njyə faŋ vɨ nə bì ŋwə me, kee kɨ̀ɨ nə yighee njyə faŋ ŋwə nə kù shɔ me. Nɨniŋ, ŋkə kɨ nii lùu laa ŋwə lùu wuu məfeꞌ Nwi faŋ ŋwə gòꞌsə yighee muꞌ. Ŋkə baa lùu laa ŋwə lùu yaa Wee Nwi, faŋ ŋwə gòꞌsə yighee muꞌ nɨzi.

⁴ Maa viŋ ye laa Melkizedek kwàlə shɔ̀ɔ, faŋ Abraham, tɨɨ vɨɨ Isirayl, nə ndɨ̀ vətɔ mbɨə faŋ ŋwə nə fì fɨ shuu yighaw, gàasə vəshəŋ yighuŋ, kɔ̀ shəŋ kəmuꞌ tɨ́ Melkizedek.

⁵ Gə fɨ maa vɨɨ məfeꞌ Nwi mbɨə faŋ nə luu vɨɨ ŋiinə Levi, ntɨsə Mose nə gì laa vəŋ taa kii way kəmuꞌ fɨ taa vəway yighuŋ fɨ taa vətɔ və vɨɨ Isirayl vənshə. Faŋ vəŋ nə yɨ̀ nɨniŋ nə, vəŋ nə fì vətɔ lùu fɨ ghɔ vaŋ-nshwi vəŋ, faŋ vəŋ vənshə nə kɔlə lùu vɨɨ ŋiꞌ ŋii Abraham nə.

⁶ Gə fɨ maa Melkizedek, faŋ nə kɔlə kee lùu wuu ŋiꞌ ŋii Levi me, ŋwə nə kìi way kəmuꞌ fɨ maa vəway yighuŋ fɨ ghɔ Abraham. Ŋwə nə baa tù mənɔŋ-bwaŋnə tɔ Abraham, faŋ nə luu wə ntɨə faŋ Nwi nə kɔ̀ꞌnə vənu tɨ́ ŋwə nə.

⁷ Maa wə ntɨə faŋ ŋwə kɔ mənɔŋ-bwaŋnə, shɔ̀ɔ wə ntɨə faŋ ŋwə fi.

⁸ Gə fɨ maa vɨɨ məfeꞌ Nwi mbɨə faŋ vəŋ lùu vɨɨ ŋiꞌ ŋii Levi nə, faŋ vəŋ kìi way kəmuꞌ fɨ maa vəway vətɔ yighuŋ nə, vəŋ vənshə lùu vɨɨ faŋ vəŋ kukə̀. Luu nə, gə fɨ maa Melkizedek, ŋwə lùu wə faŋ vɨ nyɔ̀ꞌ laa ŋwə kee yiku me.

⁹ Nu mɔ́ꞌ lùu laa, yighee njyə faŋ Abraham nə kɔ̀ way vətɔ vi tɨ́ Melkizedek nə, vɨ nə kee ta bì Levi me. Nɨniŋ, kaꞌ nsiŋ gì laa Levi nə kɔ̀ nɨzi, faŋ ŋwə kɔlə lùu tɨɨ vɨɨ mbɨə faŋ vəŋ fi vətɔ ndwə nə.

¹⁰ Kaꞌ nsiŋ gì nee, buꞌ laa Levi nəə ndɔ fuu fɨ maa ŋiꞌ ŋii Abraham maa yighee njyə faŋ Melkizedek nə gə̀ ye Abraham nə.

¹¹ Nəə toꞌ lùu laa vəfaꞌ və vɨɨ məfeꞌ Nwi fɨ taa ŋiinə Levi, kùꞌnə maa məyɨsə vɨɨ baw tɨ́ Nwi, buu Nwi nə kee nùŋsə wuu məfeꞌ Nwi day, faŋ ŋwə bèꞌsə ghuu Melkizedek, kee kɨ beꞌsə ghuu Aarɔn me. Nu ntɨsə Nwi sənshə fàynə nə nu məfeꞌ Nwi.

¹² Nɨniŋ, faŋ Nwi nə bàꞌsə vɨɨ məfeꞌ Nwi vəmwavə, nùŋsə wuu fi nə, buu ŋkwiinə baa lùu shɔ maa ntɨsə Nwi.

¹³ Gə fɨ maa tɨta ŋwaa-nsiŋ Yeso faŋ lùu wə ntɨə faŋ nsiŋ gisə kɔ̀ŋ ŋwə feenə nə, ŋwə nə kee ndɔ̀ fɨ maa ŋiꞌ ŋii Levi me. Ŋwə nə ndɔ̀ fɨ maa ŋiꞌ ŋii yiday faŋ tuu wə fɨ ŋiꞌ ŋii vəŋ nəə kee ta faꞌ faꞌ wuu məfeꞌ Nwi me.

¹⁴ Maa ŋkə lùu kəley laa tɨta ŋwaa-nsiŋ Yeso nə luu wuu ŋiꞌ ŋii Juda. Mose nə kee gì nu kɔ̀ŋ vɨɨ məfeꞌ Nwi faŋ vəŋ ndɔ̀ fɨ maa ŋiꞌ ŋii kɔ́ me.

¹⁵ Nu ŋkɨə faŋ ŋkə yɨ̀sə laa nu kɔ́ ley tɨ́ nsiŋ, lùu laa wuu məfeꞌ Nwi ŋgwə faŋ Nwi nùŋsə ndwə, lùu yuu Melkizedek, kee lùu yuu vɨɨ məfeꞌ Nwi mbii-wə me.

¹⁶ Ŋwə nə kee gù wuu məfeꞌ Nwi buꞌ ŋiꞌ ŋii laa ŋwə zɨ tɔ wə me. Ŋwə lùu wuu məfeꞌ Nwi buꞌ wutə Nwi faŋ ŋkə kɔ́ məbwey faŋ ŋwə gòꞌsə yighee muꞌ.

¹⁷ Lùu faŋ vɨ nyɔꞌ kɔ̀ŋ ŋwə taa ŋwaꞌlə Nwi laa, «A ndɔ luu wuu məfeꞌ Nwi faŋ ŋwə gòꞌsə yighee muꞌ, yuu Melkizedek.»

¹⁸ Nɨniŋ nə, Nwi bàꞌsə mfɔŋsə ntɨsə, buꞌ laa nsə nə kee kìi wutə maa məgaŋtə vɨɨ me.

¹⁹ Ntɨsə sɔ́ nə kɨ kaꞌ nsə kee yɨ̀sə wə lùu wuu jəə tɨ́ Nwi me. Nwi bee kii jwì nə nu faŋ ŋkə bàw, faŋ nsiŋ nùŋ fwi saŋ-nsiŋ shɔ, tɨ́ kaꞌ nsiŋ shəŋtə yɨ Nwi.

²⁰ Nu mɔ́ꞌ baa lùu laa, Nwi lɨꞌtə laa Yeso lùu wuu məfeꞌ Nwi faŋ ŋwə gòꞌsə yighee muꞌ. Gə fɨ maa vɨɨ məfeꞌ Nwi fɨ taa ŋiꞌ ŋii Levi, vɨ nə kee lɨ̀ꞌtə vəŋ me, faŋ vɨ nùŋsə vəŋ yaa vɨɨ məfeꞌ Nwi.

²¹ Gə fɨ maa Yeso, nə lɨꞌtə nshɨ-tɔ Nwi tɨ́ ŋwə, faŋ ŋkə lùu taa ŋwaꞌlə Nwi laa, «Nwi lɨ̀ꞌtə tɨ́ ghɔ laa a lùu wuu məfeꞌ Nwi faŋ ŋwə gòꞌsə yighee muꞌ. Nwi gì nɨniŋ, yigisə yi kee ndɔ kwiinə me.»

²² Ŋkə də̀ laa Yeso lùu shwenə faŋ ŋkə də̀ tɨ́ nsiŋ laa məkee mbɨə faŋ Nwi gwìa nsiŋ vɨ Nwi nə, lùu yinsəŋ, ŋkə bàw shɔ̀ɔ məkee məmwamə faŋ Nwi nə gwìa tɨ́ vɨɨ Isirayl maa yighee vɨsɨ nə.

²³ Nu mɔ́ꞌ baa lùu laa, vɨɨ məfeꞌ Nwi mbɨə faŋ vəŋ lùu vɨɨ ŋiꞌ ŋii Levi nə, lùu vəyaŋ, buꞌ laa vəŋ kukə mèꞌtə faꞌ məfeꞌ Nwi vəŋ.

²⁴ Gə fɨ maa Yeso, ŋkə lùu nɨŋkwiŋ, ŋwə kìi məbwey faŋ ŋwə gòꞌsə yighee muꞌ, faꞌ məfeꞌ Nwi wi kee ndɔ shɔɔ gə ghɔ wə dɨday me.

²⁵ Lùu nu ŋkɨə faŋ ŋwə kìi wutə maa məbweysə vɨɨ yighee muꞌ, faŋ vəŋ shɔ̀ɔ fɨ ghɔ ŋwə, buu gə yɨ Nwi, buꞌ laa ŋwə kìi məbwey faŋ ŋwə gòꞌsə yighee muꞌ, tɨ́ kaꞌ ŋwə ndwàŋ Nwi tɔ vəŋ ghee nshə.

²⁶ Ŋwə luu ŋkee wuu ley, kee kìi nu bwə me, tɨꞌnə me kìi wee-ndoꞌ maa ŋwə me. Ŋwə kee kìi nu ghɔ vɨɨ bwənə me. Nwi nùŋsə ŋwə ŋkee taa yizɔ, laa ŋwə duꞌ yɨ Nwi. Nɨniŋ, ŋwə kùꞌnə tɨ́ kaꞌ ŋwə lùu wuu kwalə məfeꞌ Nwi tɨ́ nsiŋ.

²⁷ Vɨɨ məfeꞌ Nwi mbii-wə faŋ vəŋ yaa kɨ kɔ Nwi vəshi vəshi nə, vəŋ bɨ feꞌ Nwi buꞌ vənu vəbwəvə vəŋ, baa kɨ nii fèꞌ Nwi buꞌ vənu vəbwəvə və vɨɨ. Gə fɨ maa Yeso, ŋwə kee bee feꞌ maa kəŋ jɨɨ ghɔ́ me. Ŋwə nə fèꞌ Nwi yighee muꞌ, ŋkə kuꞌnə, gòꞌsə nɨniŋ, faŋ nə luu ŋwaa wi faŋ ŋwə nə ndì, fèꞌ shɔ nə.

²⁸ Vɨɨ kwalə məfeꞌ Nwi mbɨə faŋ vɨ nùŋsə maa jɨɨ ntɨsə Mose, lùu vɨɨ faŋ vəŋ yaa kɨ gu nu. Gə fɨ Wee Nwi faŋ Nwi nùŋsə ŋwə fɨ maa məkee mbɨə faŋ mbə nə ndì shəŋ ntɨsə sɔ́, ŋwə fàynə ŋkɨɨ Nwi yinshə, gòꞌsə yighee muꞌ.