Hibru 6 - Vengo (Babungo)

Ŋkə bàw laa kɨ viŋ kɨ bəŋ nə yiba me

¹ Faŋ ŋkə lùu nɨniŋ nə, bàw nsiŋ kɨ gə vɨsɨ nə nu ŋkɨə faŋ lùu nu wə faŋ ŋwə ta kùꞌnə. Nsiŋ kee baa kɨ gisə kɔ̀ŋ mfɔŋsə vənu və Kristo me, faŋ lùu laa vɨɨ kwiinə fwisə vəŋ, kee baa kɨ yɨsə vənu vəbwəvə faŋ mbə jwi nə yiku nə me, baa nə laa vɨɨ nuŋ fwi vəŋ maa Nwi. Viŋ duꞌtə viŋ kɨɨ nə vənu vɔ́. Kaꞌ vɨ kee bɔ̀ŋ shɨ ŋii ghee bɔɔ me.

² Kɨ yia baa tey kɨ twelə tɨ́ viŋ kɔ̀ŋ nu məfi muu mə Nwi nə məmɔꞌ ghɔ tɔ vɨɨ, baa nə nu ŋkɨə faŋ Nwi ndɔ yweysə vɨɨ fɨ shɨ yiku, ndɔ baa kɨ shia nsɔꞌ tɔ vɨɨ maa yighee shə me.

³ Nsiŋ yɨsə nɨniŋ, gə̀ maa nu wə faŋ ŋwə ta kùꞌnə, faŋ Nwi taa biŋ.

⁴ Viŋ kɔꞌ kɨɨ laa, wə kɨ luu kɨ̀ɨ nə nu Nwi, kɨ̀ɨ nə Yeso, wuu məbweysə ŋwaa-nsiŋ, baa fì Zwitə Ley Nwi,

⁵ zɔ̀ yigisə Nwi yisɨꞌsə, kɨɨ nə wutə ŋkɨə faŋ ŋkə ndɔ luu shɔ taa mbi yifi nə,

⁶ kɨ ghaŋ laa kəŋ wə ghɔ́ faŋ ŋwə kɨ̀ɨ nə vənu vɔ́ nə, baa kìasə fwi yi, twèy vənu vɔ́, buu jɨɨ kee baa lùu shɔ tɨ́ ŋwə, laa ŋwə baa kwiinə fwi yi, nùŋ maa Nwi me. Lùu nɨniŋ buꞌ laa, kəŋ wə ghɔ́ gù wə faŋ ŋwə baa bèy Wee Nwi fuu fəŋkɔꞌ fə ŋkɨꞌsə, baa shìasə ŋwə ntee.

⁷ Viŋ ndɨ yindɨɨ maa shwenə, faŋ nsi yaa kɨ nyɔŋ yighuu, faŋ nyə siꞌ fuu nsi ghee ghee nə, vətɔ ta fuu nsi yɔ́, faŋ vɨɨ bìa nə. Vətɔ vɔ́ gàŋtə vɨɨ vɔ́. Maa ŋkə də̀ laa Nwi tù mənɔŋ-bwaŋnə maa nsi yɔ́.

⁸ Kɨ luu nə ta sheꞌ təndɨꞌ nə nyawsə fɨ taa nsi yɔ́, buu nsi yɔ́ kee kii ŋgaŋtə me. Yighee luu nshənə vɨ ndɔ twaŋ yindɨɨ yɔ́. (Lùu faŋ Nwi taa yɨsə nə vɨɨ mətwey nu ki.)

Viŋ kɨ toꞌ maa jɨɨ Nwi nə wutə

⁹ Vaŋ-nshwi vaŋ, faŋ yia kɔlə gì nee, yia kɔꞌ kɨɨ yinsəŋ laa viŋ taa beꞌsə jɨɨ yiloomə tɨ́ kaꞌ viŋ kìi məbwey vəlwaŋ.

¹⁰ Nwi kee lùu wuu məseesə mbi me. Kaꞌ ŋwə kee ndenə vənu vəjəəvə viŋ faŋ viŋ nəə yɨsə nə me, faŋ viŋ nə də ŋkawnə yiŋ tɨ́ vɨɨ ley Nwi, gàŋtə vəŋ maa yizii Nwi, nə faŋ viŋ kɨ gɨgaŋtə vəŋ nə.

¹¹ Yia kəə sheꞌ laa wə tɨ́ me wə fɨ taa ŋwaa viŋ kɨ faꞌ nə wutə, gə ziꞌ maa vəndwə, kee bwa me, tɨ́ kaꞌ viŋ ndɔ kii məbwey vəlwaŋ faŋ viŋ tə̀ sɨ shɔ nə.

¹² Yia kee kəə laa viŋ kɨ bəə ŋay me, yia kəə laa viŋ kɨ beꞌsə vɨɨ mbɨə faŋ vəŋ nùŋ fwisə vəŋ maa Nwi, twèꞌ shɔ, tɨ́ kaꞌ vəŋ ndɔ zɨ məbwey vəlwaŋ faŋ Nwi kɔ̀ꞌnə maa məkɔ tɨ́ vɨɨ vi nə.

Faŋ ŋkɔꞌnə Nwi lùu nu yinsəŋ

¹³ Nwi nə kɔꞌnə tɨ́ Abraham ŋkee ywaŋ-vɨsɨ, ndi ŋkee yizii yi, lɨ̀ꞌtə laa yi taa yɨsə nu ŋkɨə faŋ yi kɔ̀ꞌnə nə. Nwi nə kɔ̀ꞌnə maa yizii yi buꞌ laa wə kee lùu shɔ faŋ ŋwə kwàlə shɔ̀ɔ Nwi me.

¹⁴ Maa yighee yɔ́ Nwi nə kɔꞌnə tɨ́ Abraham, gì laa, «Yinsəŋ mə taa yɨsə ŋkee jəə maa ghɔ, mə taa baa yɨsə ŋgwisə yə luu ŋkee yiyaŋ.»

¹⁵ Buꞌ ŋkɔꞌnə Nwi yɔ́, Abraham jia fwi yi, kɨ kɨꞌ, kee bwa me, buu kii fa ŋkɨə faŋ Nwi kɔꞌnə maa məkɔ tɨ́ ŋwə nə.

¹⁶ Faŋ vɨɨ yaa kɨ lɨꞌtə nu, vəŋ lɨꞌtə maa yizii wə faŋ ŋwə kwàlə shɔ̀ɔ vəŋ. Nɨniŋ, məlɨꞌtə vəŋ ghɔ́ weꞌ, kee baa kɨ kii ntaysə me.

¹⁷ Sheꞌ nɨniŋ, Nwi nəə kəə də̀ tɨ́ vɨɨ mbɨə faŋ Nwi nə kɔꞌnə vəŋ nə, laa yi taa kɔ fa ŋkɨə faŋ yi kɔ̀ꞌnə tɨ́ vəŋ nə, kee kwìinə fwi yi me. Nɨniŋ, ŋwə lɨꞌtə nu ŋkɨə faŋ ŋwə kɔ̀ꞌnə nə.

¹⁸ Nɨniŋ nə, Nwi də̀ maa jɨɨsə səbɔɔ laa ŋkɔꞌnə yi lùu yinsəŋ. Kaꞌ Nwi kee sɨ̀ɨ ba shɔ me. Ŋkɔꞌnə Nwi yɔ́ nə məlɨꞌtə ghɔ́ kɔ̀ wutə tɨ́ nsiŋ, tɨ́ kaꞌ nsiŋ jìa fwi nɨzi, kɨ tə sɨ maa nu ŋkɨə faŋ Nwi kɔ̀ꞌnə tɨ́ nsiŋ nə.

¹⁹ Nu ŋkɨə faŋ nsiŋ tə̀ sɨ shɔ, nə nu ŋkɨə faŋ ŋkə yɨ laa nsiŋ kìi fwi yiweꞌ, tɨŋnə weꞌ, lùu faŋ nsiŋ ndɔ ŋii shəŋ ŋkɨə faŋ Nwi lùu shɔ nə.

²⁰ Lùu shəŋ ŋkɨə faŋ Yeso nə ŋìi shɔ ŋkəə, buu nshɨ-tɔ ŋwaa-nsiŋ ndɔ ŋii shɔ nɨzi. Yeso nə ŋìi shɔ tɔ yia yaa wuu kwalə məfeꞌ Nwi yaa Melkizedek. Ŋwə lùu wuu kwalə məfeꞌ Nwi ŋwaa-nsiŋ yighee muꞌ.