Hibru 5 - Vengo (Babungo)

¹ Nwi yaa kɨ shoꞌ vɨɨ kwalə məfeꞌ Nwi fɨ taa ŋwaa vɨɨ vi. Vɨ shoꞌ vɨɨ vɔ́ tɨ́ kaꞌ vəŋ kɨ faꞌ tɨ́ Nwi maa yizii vɨɨ vənshə. Vəŋ feꞌ Nwi nə vətɔ baa nə nyaasə, tɨ́ kaꞌ Nwi ndenə yibɨsə vɨɨ.

² Wuu kwalə məfeꞌ Nwi lùu wuu zutə faŋ ŋwə kɨɨ gaŋtə vɨɨ mbɨə faŋ vəŋ kee kɨ̀ɨ nə jɨɨ me, tɨꞌnə me ndì jɨɨ. Kaꞌ ŋwə gàŋtə vɨɨ buꞌ laa nshɨ-tɔ wi kɨɨ nə vənu və məmɔŋ, faŋ kaꞌ wə gù shɔ nə.

³ Ŋwə yaa kɨ gu nu nɨzi, gə feꞌ Nwi buꞌ ŋkii nu bwə, sheꞌ faŋ ŋwə yaa kɨ feꞌ Nwi maa vənu vəbwəvə və vɨɨ nə.

⁴ Kaꞌ wə kee shòꞌ ŋwaa wi laa ŋwə luu wuu kwalə məfeꞌ Nwi, vɨ kɔ̀ feenə tɨ́ ŋwə me. Shoꞌ sheꞌ Nwi shoꞌ wə laa ŋwə lùu wuu kwalə məfeꞌ Nwi, sheꞌ faŋ Nwi nə tìi Aarɔn yighee vɨsɨ, laa ŋwə luu wuu kwalə məfeꞌ Nwi nə.

⁵ Ŋkə nə luu sheꞌ nɨndɨŋ maa Kristo; ŋwə nə kee kòꞌsə ŋwaa wi laa ŋwə gu wuu kwalə məfeꞌ Nwi me. Nə gì Nwi tɨ́ ŋwə laa, «A lùu ŋwiŋ ŋwaa. Bì mə bì ghɔ ndee.»

⁶ Ŋwə nə baa gì maa shəŋ mɔ́ꞌ laa, «A lùu wuu kwalə məfeꞌ Nwi ŋkee yaa Melkizedek. A ndɔ goꞌsə yighee muꞌ.»

⁷ Faŋ Yeso nə luu shɨ nsi, ŋwə nə shɔ̀ꞌtə Nwi shɔ̀ꞌtə, yùmə ŋkee nəŋay, mənsɨ fiŋkə fɨ sɨ ŋwə, ŋwə buꞌ ghɔ tɨ́ Nwi faŋ ŋwə kìi wutə maa məgaŋtə ŋwə fɨ ghɔ yiku. Nwi nə zɔ̀ məshɔꞌtə wi, buꞌ laa ŋwə nə luu wuu məfee Nwi.

⁸ Faŋ ŋwə nə kɔlə lùu Wee Nwi nə, ŋwə nə zwètə maa məzɔnə Tii wi, faŋ ŋwə nə fì ŋɨꞌ yi nə.

⁹ Faŋ ŋwə nə mètə faꞌ wi nshə, ŋwə gù wuu məgaŋtə vɨɨ vənshə faŋ vəŋ zɔnə ŋwə, laa vəŋ ndɔ zɨ məbwey vəlwaŋ faŋ ŋwə gòꞌsə yighee muꞌ.

¹⁰ Lùu nu ŋkɨə faŋ Nwi tìi ŋwə nə wuu kwalə məfeꞌ Nwi yaa Melkizedek.

Faŋ bàw viŋ ta taa nu Nwi

¹¹ Yigi kɨ bii yiyaŋ faŋ yia kəə naysə tɨ́ viŋ kɔ̀ŋ nu Kristo yaa wuu məfeꞌ Nwi kwalə, luu nə, ŋkə lùu kəweꞌ maa mətwelə tɨ́ viŋ, buꞌ laa vənu kee yasə lèy tɨ́ viŋ me.

¹² Yighee kùꞌ tɨ́ kaꞌ viŋ deesə vɨɨ mɔ́ꞌ, buꞌ laa viŋ yaa zwetə fɨshi. Luu nə, viŋ kee bee ta kɨɨ nə nu me! Viŋ bəə wə faŋ ŋwə jwi deesə viŋ nə mfɔŋsə vənu kɔ̀ŋ ntɔŋ Nwi. Viŋ kee ta lùu vɨɨ tɨ́ kaꞌ viŋ zɨ̀ fazɨ vɨɨ taanə me. Vɨ bee kii kɔ̀ məməŋ tɨ́ viŋ faŋ lùu fazɨ vaŋmbwaa nə.

¹³ Wə ntɨə faŋ ŋwə nyɔŋ sheꞌ yiməŋ lùu weembwa wuubwa, faŋ ŋwə kee ta kɨ̀ɨ nə yigi kɔ̀ŋ jɨɨ yiloomə me.

¹⁴ Wə ntɨə faŋ ŋwə duꞌtə ŋwə ta, ŋwə zɨ ŋkee fazɨ. Ŋwə duꞌtə ŋwə zwetə maa məbɨꞌtə nu, tɨ́ kaꞌ ŋwə kɨɨ nə nu bwə, baa nə nu jəə.