Hibru 4 - Vengo (Babungo)

¹ Nwi nə kɔ̀ꞌnə tɨ́ vɨɨ laa vəŋ ndɔ ŋii maa shəŋ jəə ki faŋ kaꞌ vəŋ shə̀ŋ ŋwaa shɔ. Maa ŋkɔꞌnə yɔ́ kee ta yifaynə me; nyə lùu tɨ́ nsiŋ. Nɨniŋ, bàw nsiŋ kɨ faꞌ nə məfee, laa kɨ wə fɨ wiŋ kee ndɔ ndi me.

² Vɨ nàysə ntɔŋ yijəə Nwi tɨ́ nsiŋ sheꞌ faŋ vɨ nə nàysə tɨ́ vɨɨ vɔ́ maa yighee vɨsɨ nə. Luu nə, ntɔŋ yijəə yɔ́ faŋ vɨɨ vɔ́ nə zɔ nə, kee gàŋtə vəŋ me, buꞌ laa vəŋ nə zɔ, kee nùŋ fwi vəŋ shɔ me.

³ Gə fɨ maa nsiŋ, faŋ nsiŋ nùŋ fwi maa ntɔŋ yijəə Nwi yɔ́, nsiŋ ndɔ ŋii shəŋ ŋkɨə faŋ Nwi nùŋsə tɨ́ nsiŋ maa məshəŋ ŋwaa shɔ, sheꞌ faŋ Nwi nə gì nə. Nwi nə gì kɔ̀ŋ vɨɨ mbɨə faŋ vəŋ nə kee bìŋ yigisə yi me laa, «Fwi nyaa shə, mə lɨꞌtə tɨ́ vəŋ laa vəŋ ndɔ kee ŋii shəŋ jəə kaŋ, kɨ shəŋ ŋwaa shɔ me.» Ŋwə nə gì nɨniŋ faŋ faꞌ Nwi nə kɔlə mè maa yighee njyə faŋ ŋwə nə bɔ̀ŋ mbi nə.

⁴ Lùu faŋ vɨ nyɔ̀ꞌ maa shəŋ mɔ́ꞌ taa ŋwaꞌlə Nwi kɔ̀ŋ vəshi lwesə kwatia. Shəŋ kɔ́ lùu laa, «Nwi nə shə̀ŋ ŋwaa fɨ maa vəfaꞌ vi vənshə maa vəshi lwesə kwatia.»

⁵ Taa shəŋ yiŋkii vɨ nyɔ̀ꞌ laa, vəŋ kee ndɔ ŋii shəŋ Nwi kɔ́ maa məshəŋ ŋwaa shɔ me.

⁶ Nɨniŋ, ŋkɔꞌnə Nwi yɔ́ kɨ bii shɔ tɨ́ vɨɨ mɔ́ꞌ, laa vəŋ ndɔ ŋii maa shəŋ məshəŋ ŋwaa kɔ́ nə. Vɨɨ vɨsɨ faŋ vəŋ nə fɔŋ zɔ ŋkɔꞌnə Nwi yɔ́, kee ŋìi shɔ me, buꞌ laa vəŋ nə kee nùŋ fwi vəŋ maa Nwi me.

⁷ Nɨniŋ, Nwi baa tə̀ shi kəmɔ́ꞌ maa məbaa nuŋsə ŋkɔꞌnə yɔ́ vɨsɨ vɨɨ. Faŋ ŋuꞌsə nə shɔ̀ɔ səyaŋ shù fɨ maa yighee yɔ́, Nwi fɨꞌtə yigi yi tɨ́ fwàŋ Deyvid. Lùu yigi njyə faŋ nsiŋ duꞌtə nsiŋ lumə nə laa, «Faŋ viŋ zɔ gɨ Nwi ndee, kɨ viŋ fəŋ fwi siŋ me!»

⁸ Ŋkə nəə toꞌ lùu laa, Jɔshwa nə yɨ̀sə vətɨɨ vaŋ-nsiŋ ŋii maa shəŋ Nwi kɔ́, tɨ́ kaꞌ vəŋ shə̀ŋ ŋwaa shɔ nə, buu Nwi nə kee baa kɨ gisə kɔ̀ŋ shi kəmɔ́ꞌ faŋ ŋkə ndɔ jwi nə me.

⁹ Yigisə yi yɔ́ də̀ tɨ́ nsiŋ laa, yighee njyə faŋ vɨɨ Nwi ndɔ gə shə̀ŋ ŋwaa sheꞌ faŋ Nwi nə shə̀ŋ ŋwaa maa vəshi lwesə kwatia nə, kee ta yikuꞌnə me.

¹⁰ Wə ntɨə faŋ ŋwə ŋìi maa shəŋ məshəŋ ŋwaa ŋkɨə faŋ Nwi kɔꞌnə nə, ndɔ kii məshəŋ ŋwaa, vəfaꞌ vi me, sheꞌ faŋ Nwi nə metə vəfaꞌ vi, kɨ nii shə̀ŋ ŋwaa nə.

¹¹ Faŋ ŋkə lùu nɨniŋ nə, nsiŋ tweꞌ nə wutə, laa nsiŋ ndɔ gə shəŋ Nwi kɔ́, shə̀ŋ ŋwaa shɔ. Kɨ wə luu taa ŋwaa nsiŋ faŋ ŋwə kee zɨzɔnə me, yuu ndɔ ndi me, yaa vətɨɨ vaŋ-nsiŋ faŋ vəŋ nə kee zɔ̀nə me, kee ŋìi taa shəŋ Nwi me.

¹² Nsiŋ kɔꞌ kɨɨ laa yigisə Nwi lùu nu məbwey, kìi wutə, baa shə shɔ̀ɔ baꞌ yighaw faŋ ŋkə lùu kəshəsə nə, shə̀ kwiŋ nshə, tɨ́ kaꞌ nyə ŋii ŋkee taa fwi wə, ŋii ŋkee taa vəyəə və ŋwaa və wə. Nyə baa luu də mbɨꞌtə wə faŋ wə bɨꞌtə fɨ taa fwi ŋwə.

¹³ Fa kee lùu shɔ taa ŋwaa vətɔ faŋ Nwi nə bɔ̀ŋ, faŋ kaꞌ Nwi kee ye me. Vənu vənshə faŋ wə yɨsə, lùu ntee yikəꞌ Nwi, Nwi ye. Nsiŋ ndɔ tɨŋnə vɨsɨ ŋwə shi mɔ́ꞌ, fì tɔ kaŋ-nsiŋ buꞌ vənu vənshə faŋ nsiŋ nə yɨsə nə.

Yeso kwàlə shɔ̀ɔ Aarɔn, faŋ nə luu wuu kwalə məfeꞌ Nwi

¹⁴ Nsiŋ tɨŋ sheꞌ maa nu ŋkɨə faŋ nsiŋ bìŋ yikəꞌ vɨɨ nə, buꞌ laa wuu kwalə məfeꞌ Nwi lùu shɔ, faŋ ŋwə tɨ̀ŋ tɔ nsiŋ. Wuu kwalə məfeꞌ Nwi ghɔ́ lùu Yeso, wee Nwi, faŋ ŋwə nə koꞌ gə̀ yɨ Nwi yizɔ.

¹⁵ Wuu kwalə məfeꞌ Nwi ghɔ́ lùu wə faŋ ŋwə kɔꞌ kɨɨ maa məkee gəŋsə maa nsiŋ maa məbwa ŋwaa-nsiŋ, buꞌ laa ŋwə nə gù wə yaa nsiŋ, kìi məmɔŋ sheꞌ yaa nsiŋ. Luu nə, ŋwə nə kee yɨ̀ tuu nu bwə me.

¹⁶ Nɨniŋ, bàw nsiŋ kii fwi yiweꞌ, kɨ jwi nə məŋaytə maa shəŋ kenə Nwi ŋkɨə faŋ ŋwə kee gəŋsə vɨɨ shɔ nə. Bàw nsiŋ gə maa shəŋ kɔ́ tɨ́ kaꞌ nsiŋ kìi mənɔŋ-bwaŋnə fɨ fuŋ, Nwi taa kɨ kee gəŋ saŋ-nsiŋ, baa gaŋtə nsiŋ maa yighee njyə faŋ nyə kùꞌnə.