Hibru 3 - Vengo (Babungo)

Faŋ Yeso kwàlə shɔ̀ɔ Mose

¹ Nɨniŋ, vaŋ-nshwi vaŋ faŋ viŋ lèy tɨ́ Nwi nə, faŋ Nwi nə tìi viŋ laa viŋ jwi gù vɨɨ vi nə, viŋ tə sɨ maa Yeso faŋ lùu wuu ntɔŋ Nwi, baa lùu wuu kwalə məfeꞌ Nwi, faŋ nsiŋ bìŋ nu ki nə.

² Ŋwə nə luu wuu yinsəŋ tɨ́ Nwi maa vəfaꞌ vi, faŋ Nwi nə nùŋsə ŋwə maa məfaꞌ vəfaꞌ vi vɔ́, sheꞌ faŋ Mose nə luu wuu yinsəŋ maa vəfaꞌ vi taa nwaa vɨɨ Nwi vənshə.

³ Ŋkə kùꞌnə laa vɨ kɨ kɔ feenə tɨ́ Yeso shɔ̀ɔ Mose, sheꞌ faŋ vɨ kɔ feenə tɨ́ wə ntɨə faŋ ŋwə fia ŋii, shɔ̀ɔ ŋkee ŋii yɔ́.

⁴ Ŋii tɨ̀ me ŋii fìanə wə. Luu nə, wə ntɨə faŋ ŋwə bɔ̀ŋ vətɔ vənshə lùu Nwi.

⁵ Gə̀ fɨ maa Mose, faŋ vɨ nyɔ̀ꞌ laa ŋwə nə luu wuu yinsəŋ maa vəfaꞌ vənshə faŋ ŋwə nə fàꞌ taa ŋii Nwi nə, ŋwə nə yɨsə yuu wuu faꞌ Nwi, fɨꞌtə vənu mbɨə faŋ Nwi nəə kəə laa ŋwə kɨ gisə.

⁶ Jwi maa Kristo, ŋwə lùu ŋkee Wee Nwi faŋ ŋwə shiinə njiinə ŋii. Ŋii yi yɔ́ lùu nsiŋ. Nsiŋ lùu vɨɨ ŋiinə vi, faŋ nsiŋ tə̀ sɨ maa məbwey vəlwaŋ, faŋ nsiŋ kɨꞌ ŋwə nə fwi yimuꞌ nə, tweꞌ shɔ, zìꞌ maa vəndwə nə məŋaytə.

Kɨ nsiŋ kɨ shii faŋ nsiŋ zɔ̀ yigisə Nwi me, buꞌ nsiŋ lee məbwey vəlwaŋ

⁷ Nɨniŋ, nsiŋ zɔ faŋ Zwitə Nwi nə gì laa, «Faŋ viŋ zɔ gɨ Nwi ndee,

⁸ kɨ viŋ fəŋ fwi siŋ me, faŋ vətɨɨ viŋ nəə fəŋ fɨshi nə me, maa yighee njyə faŋ vəŋ nə luu tɔɔ waꞌsə nə, kɨ kəə ghuu Nwi, baa mɔŋ ŋwə.

⁹ Vətɨɨ viŋ nə mɔ̀ŋ Nwi, faŋ vəŋ nə kɔlə yè vənu mbɨə faŋ Nwi nə yɨ̀sə nə maa ŋuꞌsə muu-yinshwe.

¹⁰ Lùu nu ŋkɨə faŋ fwi Nwi nə zà maa vɨɨ vɔ́, ŋwə gi laa, vəŋ ndì jɨɨ, vənu vaŋ kee lùu vəley tɨ́ vəŋ me.

¹¹ Nɨniŋ, fwi Nwi nə zà maa vəŋ, ŋwə lɨꞌtə gì laa, bàw laa kɨ vəŋ ndɔ ŋii shəŋ jəə kaŋ faŋ kaꞌ vəŋ kìi məshəŋ ŋwaa shɔ me.»

¹² Vaŋ-nshwi vaŋ, viŋ kɨ ndɨɨnə laa, kɨ wə luu taa ŋwaa viŋ faŋ ŋwə kìi fwi yibwə faŋ nyə kee bìŋ Nwi me, faŋ ŋwə ndɔ meꞌtə Nwi me. Nwi lùu wuu bwey.

¹³ Viŋ kɨ tɨsə yiŋwaa yiŋ, laa nu bwə kee bwèꞌsə viŋ, ŋìi taa ŋwaa viŋ me, laa ŋkə kee yɨ̀sə viŋ kii tɔ weꞌ me. Viŋ kɨ yɨsə nɨniŋ vəshi vənshə, faŋ kɔ tɔ və-ndee, viŋ kɨ bii zɔ̀ yigi yɔ́ nə.

¹⁴ Viŋ kɨ lumə laa nsiŋ lùu nə fa kəmuꞌ, nsiŋ vɨ Kristo, faŋ nsiŋ taa kɨ nuŋsə vənu mbɨə faŋ nsiŋ nə bìŋ yighee vɨsɨ nə, gə kɔ maa vəndwə.

¹⁵ Vɨ nə nyɔ̀ꞌ taa ŋwaꞌlə Nwi laa, «Faŋ viŋ zɔ̀ gɨ Nwi ndee, kɨ viŋ fəŋ fwi siŋ me, faŋ vətɨɨ viŋ nəə fəŋ fɨshi nə me.»

¹⁶ Sii nə lùu ndə faŋ ŋwə nə zɔ̀ yigisə Nwi baa twey? Maa nə luu vɨɨ vənshə faŋ Mose nə fùusə vəŋ fɨ shɨ Ijip nə.

¹⁷ Sii nə lùu vəndə faŋ fwi Nwi nə zà maa vəŋ ŋuꞌsə muu-yinshwe nə? Maa nə luu vɨɨ mbɨə faŋ vəŋ nə yɨ̀ nu bwə, kùkə taa tɔɔ waꞌsə nə.

¹⁸ Vɨɨ mbɨə faŋ Nwi nə kɔ̀ꞌnə tɨ́ vəŋ laa kɨ vəŋ ndɔ ŋii maa shəŋ jəə ki maa məshəŋ ŋwaa shɔ me, nə luu vəndə? Maa nə luu vɨɨ mbɨə faŋ vəŋ nəə kee zɔnə Nwi nə me.

¹⁹ Nɨniŋ, nsiŋ ye laa nu ŋkɨə faŋ ŋkə nə yɨ̀sə laa kɨ vəŋ ŋii maa shəŋ kɔ́ nə me, luu buꞌ laa vəŋ nə kee bìŋ Nwi me.