Hibru 2 - Vengo (Babungo)

Kɨ nsiŋ manə ntɔŋ yikwalə Nwi me

¹ Faŋ ŋkə lùu nɨniŋ nə, bàw nsiŋ ywiitə yigi njyə faŋ nsiŋ nə zɔ̀ nə, tɨ́ kaꞌ nsiŋ kee ndì jɨɨ me, buꞌ faŋ nsiŋ kee nùŋ tɔ shɔ nə me.

² Nsiŋ kɔꞌ kɨɨ laa ntɔŋ njyə faŋ nshiisə-ŋiisə Nwi nə jwi fɨꞌtə tɨ́ nsiŋ nə, lùu yinsəŋ. Wə tɨ̀ me wə faŋ ŋwə twèy ntɔŋ yɔ́, kee kɨ zɔnə ntɔŋ yɔ́ me, buu Nwi kɔ ŋɨꞌ tɨ́ ŋwə faŋ nyə kùꞌnə.

³ Faŋ ŋkə lùu nɨniŋ nə, gə̀ fɨ maa nsiŋ, faŋ nsiŋ zɔ ntɔŋ yimɔ́ꞌ faŋ nyə kwàlə shɔ̀ɔ, kɔ̀ jɨɨ məbwey vəlwaŋ tɨ́ vɨɨ, sii kaꞌ nsiŋ fùu fɨ taa nsɔꞌ kɨkə, faŋ nsiŋ kee zɔnə ntɔŋ yinjii me? Ntɔŋ yɔ́ nə fɔŋ fùu taa mbi faŋ tɨta Yeso nə fɨ̀ꞌtə tɨ́ vɨɨ nə. Vɨɨ mbɨə faŋ vəŋ nə zɔ̀ ntɔŋ yɔ́, lèsə tɨ́ nsiŋ laa lùu nu yinsəŋ.

⁴ Nwi baa luu də̀ laa lùu nu yinsəŋ, faŋ ŋwə nə ndì wutə ki, də̀ vəshwenə, baa yɨsə vənu və shuu yɔŋvə. Ŋwə baa luu kɔ̀ vəkɔ faŋ ŋwə kàw tɨ́ vɨɨ, faŋ mbə ndɔ̀ fɨ yiba Zwitə Ley.

Yeso lùu wuu məbweysə ŋwaa-nsiŋ faŋ ŋwə nə jwì mbi yaa wə

⁵ Kee lùu nshiisə-ŋiisə Nwi faŋ Nwi nùŋsə laa vəŋ kɨ sɔꞌ mbi njyə faŋ nyə ndɔ jwi, njyə faŋ yia gisə kɔ̀ŋ nyə ndwə nə me.

⁶ Vɨ bee kii nyɔ̀ꞌ maa shəŋ mɔ́ꞌ taa ŋwaꞌlə Nwi laa, «Wə mənsaw sii lùu kə laa a kɨ bɨꞌtə kɔ̀ŋ ŋwə mɔɔ Nwi? Wee wə kɔlə kee lùu nu me, a ndeynə ŋwə.

⁷ A sùꞌsə ŋwə maa wee-fɨ-kwitə yighee, nùŋ ŋiꞌ nshiisə-ŋiisə Nwi, buu a baa luu ndì ŋwə, kɔ̀ yifwàŋ tɨ́ ŋwə nə feenə.

⁸ A nə baa nùŋsə vətɔ vənshə ŋiꞌ ghuu ŋwə.» Faŋ vɨ nə nyɔ̀ꞌ laa vətɔ vənshə lùu ŋiꞌ ghuu ŋwə, ŋkə lùu laa tuu fa kee baa lùu shɔ faŋ ŋkə kee lùu ŋiꞌ ghuu ŋwə me. Luu nə, maa yighee ndwə kaꞌ nsiŋ kee ta ye laa vətɔ vənshə lùu ŋiꞌ ŋwə me.

⁹ Nsiŋ kɔꞌ kɨɨ nə Yeso faŋ Nwi nə yɨ̀sə nshiisə-ŋiisə Nwi luu vɨsɨ fɨ ghɔ ŋwə maa kuŋtə yighee, faŋ ŋwə nə yè ŋɨꞌ ku, buu Nwi kɔ yifwàŋ nə feenə tɨ́ ŋwə nə. Nɨniŋ nə, ŋwə nə kù tɔ vɨɨ vənshə, buꞌ faŋ Nwi nə kèe gəŋsə vɨɨ nə.

¹⁰ Nə bɔ̀ŋ Nwi bɔ̀ŋ vətɔ vənshə. Vətɔ vənshə baa lùu shɔ sheꞌ buꞌ ŋwə. Ŋkə nə bàw tɨ́ Nwi laa Yeso ye ŋɨꞌ, buu mètə bàw shɨlə. Nɨniŋ laa ŋwə lùu wə ntɨə faŋ ŋwə jwì nə nu məbweysə vɨɨ, yɨ̀sə vɨɨ vəyaŋ luu vaŋ vi, ŋìi taa məley wi.

¹¹ Yeso yɨsə vɨɨ duꞌ vəley vɨsɨ Nwi. Vɨɨ mbɨə faŋ Yeso yɨ̀sə vəŋ duꞌ vəley nə, ghɔ nshɨ-tɔ Yeso kìi Tɨɨ vəŋ muꞌ. Lùu ŋiꞌ nu ŋkɨə faŋ Yeso tii vəŋ nə vaŋ-nshwi vi. Tɔ ki kee dɨ̀ɨ shɔ me.

¹² Nɨniŋ, ŋwə nə gì laa, «Mə taa kɨ fɨꞌtə yizii Nwi tɨ́ vaŋ-nshwi vaŋ, ndɔ̀ tɨŋ nɨntəŋ nwaa vɨɨ Nwi, bə̀ŋsə Nwi.»

¹³ Ŋwə nə baa gì laa, «Mə taa nuŋ fwi nyaa sheꞌ maa Nwi,» baa gì laa, «Ye mə nə, yia vaŋ vaŋ faŋ Nwi nə kɔ̀ shee nə.»

¹⁴ Vaŋ vi vɔ́ lùu vɨɨ faŋ ghɔ vɨ Yeso fàynə. Sheꞌ nɨniŋ, Yeso nə jwì yuu wə, gù yaa vəŋ nɨzi, tɨ́ kaꞌ ŋwə kù, zwì wutə Satan, tɨɨ vəzwitə vəbwəvə, faŋ ŋwə kìi wutə yiku nə.

¹⁵ Nɨniŋ, ŋwə yɨsə laa vɨɨ vənshə faŋ nə luu vəbuꞌ tɨ́ Satan, buꞌ faŋ vəŋ nəə fɨfee yiku ghee nshə nə, nyɨ̀ŋkə fɨ ghɔ Satan vənshə.

¹⁶ Ŋkə luu ŋkee kəley laa kee lùu nshiisə-ŋiisə Nwi, faŋ ŋwə nə jwi gàŋtə me. Ŋwə nə bee kii jwì maa məgaŋtə ŋiꞌ ŋii Abraham.

¹⁷ Ŋwə nə gù yaa vaŋ-nshwi vi maa jɨɨsə sənshə, tɨ́ kaꞌ ŋwə kèe gəŋsə vəŋ, gù yaa wuu kwalə məfeꞌ Nwi, faŋ ŋwə faꞌ tɨ́ Nwi nə fwi yimuꞌ, laa ŋwə sɔ yibɨsə vɨɨ faŋ vəŋ nə yɨ̀sə nə.

¹⁸ Kaꞌ ŋwə gàŋtə vɨɨ mbɨə faŋ vəŋ kìi məmɔŋ, luu buꞌ laa nshɨ-tɔ wi nə yè ŋɨꞌ nə məmɔŋ nɨzi.