Hibru 13 - Vengo (Babungo)

Faŋ bàw viŋ kɨ kaw nə yiŋwaa yiŋ, shi nə nshinə yijəə

¹ Viŋ kɨ kaw nə yiŋwaa yiŋ, kee bwa me.

² Kɨ viŋ ndenə maa məkɨ tii vəndɔ faŋ vəŋ jwi yɨ viŋ me, tɨ́ kaꞌ viŋ vɨ vəŋ shì mɔ́ꞌ. Viŋ kɔꞌ kɨɨ laa vɨɨ mɔ́ꞌ faŋ vəŋ nə yɨ̀sə nɨniŋ, vəŋ nə jìa luu nshiisə-ŋiisə Nwi, faŋ vəŋ nə kɔlə kee yikɨɨ me.

³ Viŋ lumə vɨɨ mbɨə faŋ vəŋ lùu taa ŋii mfiŋ buꞌ nu Nwi. Bàw ŋkə luu tɨ́ viŋ yaa viŋ lùu taa ŋii mfiŋ nɨzi, viŋ vɨ vəŋ. Viŋ baa lumə vɨɨ mbɨə faŋ vəŋ ye ŋɨꞌ, yaa vɨɨ faŋ vəŋ kɨ bii vɨɨ viŋ.

⁴ Bàw vɨɨ vənshə kɨɨ nə nuŋsə məndaa. Bàw wəndɔŋ nə wəzwi kɨ kii fwi yinsəŋ maa wə fɨ vəŋ. Viŋ kɔꞌ kɨɨ laa Nwi ndɔ kwaŋ nsɔꞌ tɔ vɨɨ mbɨə faŋ vəŋ yɨ nu bwə taa məndaa, (faŋ wəndɔŋ jɔŋ zu wi, tɨꞌnə me tii vəki, tɨꞌnə me faŋ wəzwi shi ghɔ wəndɔŋ faŋ kee lùu ŋgwinə me.)

⁵ Viŋ baꞌsə fwi yiŋ fɨ maa məkaw ka, bee kii suꞌsə ŋwaa nsi, laa vətɔ mbɨə faŋ viŋ kii, kuꞌnə tɨ́ viŋ. Viŋ lumə laa nshɨ-tɔ Nwi nə gì laa, «Kaꞌ mə kee ndènə ghɔ me, tɨꞌnə me mèꞌtə ghɔ me.»

⁶ Nɨniŋ, kaꞌ nsiŋ kìi fwi yizutə, gì laa, «Nwi lùu wuu ŋgaŋtə ŋwaa, mə kee ndɔ fee me. Wə mənsaw sii taa kii wutə tɨ́ kaꞌ ŋwə yɨ̀ nu maa mə kɨkə?»

Faŋ ŋkə bàw laa kɨ viŋ biŋ wə bweꞌsə viŋ nə mədeesə fi me

⁷ Viŋ lumə vɨɨ mbɨə faŋ vəŋ nə fɔŋ kìi viŋ, də̀ jɨɨ tɨ́ viŋ, baa fɨ̀ꞌtə yigisə Nwi tɨ́ viŋ. Viŋ ywiitə faŋ nshinə vəŋ nə dùꞌ ziꞌ maa shi yiku vəŋ. Viŋ nuŋ fwi siŋ maa Nwi sheꞌ faŋ vəŋ nəə yɨsə nə.

⁸ Faŋ Yeso Kristo sɨ lùu ywaŋ, ŋwə lùu nɨndɨŋ ndee, goꞌsə yighee muꞌ nɨzi.

⁹ Kɨ viŋ biŋ laa yigisə yifinə faŋ vɨɨ deesə viŋ shɔ nɨŋkwiŋ nɨŋkwiŋ, yɨsə viŋ ndi jɨɨ Nwi me. Yaa kɨ yɨsə nu jəə faŋ ŋkə ndɔ fɨ ghɔ Nwi, yɨsə fwi wə weꞌ. Ntɨsə nsɨə faŋ nsə gì kɔ̀ŋ nu fazɨ, nsə kee kii ŋgaŋtə me; nsə kee gaŋtə vɨɨ mbɨə faŋ vəŋ beꞌsə nsə me.

¹⁰ Shəŋ shɔ faŋ Kristo feꞌ ndey shɔ tɨ́ Nwi. Lùu shəŋ ŋkɨə faŋ ŋwə nə kù tɔ nsiŋ nə. Luu nə, kaꞌ vɨɨ mbɨə faŋ vəŋ faꞌ tɨ́ Nwi maa jɨɨ nuŋsə vɨɨ Isirayl, kee kìi jɨɨ zɨ vətɔ və ndey vɔ́ me.

¹¹ Yighee njyə faŋ wuu kwalə məfeꞌ Nwi vɨɨ Isirayl yaa kɨ feꞌ ndey tɨ́ Nwi maa məsɔ yibɨsə vɨɨ nə, ŋwə ndi sheꞌ mənshi mə nyaasə, gə̀ nə mbə, ŋìi maa shəŋ ley Nwi taa ŋii Nwi. Gə fɨ maa nshɨ-tɔ nyaasə sɔ́, vɨ gə̀ nə nsə fu fɨ taa shɨ, twàŋ shɔ, mèꞌ.

¹² Luu sheꞌ nɨniŋ faŋ Yeso nə yè ŋɨꞌ shɔ, fu fɨ taa shɨ, kù, tɨ́ kaꞌ mənshi mi faŋ ŋwə tùtə nə, sɔ̀ yibɨsə vɨɨ fɨ maa vəŋ.

¹³ Nɨniŋ, bàw nsiŋ ndɔ meꞌtə shiŋii, beꞌsə ŋwə fu, baa luu bìꞌ fɨ maa tɔ dɨɨ ki.

¹⁴ Viŋ kɔꞌ kɨɨ laa nsiŋ kee kìi shiŋii taa mbi nyə̀ faŋ ŋwə gòꞌsə yighee muꞌ me, nsiŋ kəə fɔ ŋgwə faŋ ŋwə ndɔ buu jwi.

¹⁵ Nɨniŋ, nsiŋ shɔɔ fɨ jɨŋ Yeso, kɨ bəŋsə Nwi ghee nshə, buu məbəŋsə Nwi ŋwaa-nsiŋ taa luu yaa ndey, faŋ nsiŋ fèꞌ tɨ́ Nwi. Nsiŋ ndi gɨ saŋ-nsiŋ, bə̀ŋsə yizii yi shɔ ntee.

Faŋ bàw viŋ kɨ zɔnə vɨɨ mbɨə faŋ vəŋ lùu vɨsɨ fɨ taa ŋwaa viŋ

¹⁶ Kɨ viŋ ndenə maa məyɨ jəə tɨ́ vɨɨ mɔ́ꞌ me. Viŋ gaŋtə yiŋwaa yiŋ, viŋ viŋ, buꞌ laa lùu kəŋ ndey mɔ́ꞌ faŋ nyə bàw tɨ́ Nwi.

¹⁷ Viŋ kɨ zɔnə vɨɨ mbɨə faŋ vəŋ luu vɨsɨ taa ŋwaa viŋ. Viŋ yɨ nu ŋkɨə faŋ vəŋ kəə, buꞌ laa vəŋ lùu vɨɨ məshiinə viŋ faŋ vəŋ ndɔ tɨŋ vɨsɨ Nwi, fì tɔ vəŋ shɔ kɔ̀ŋ məshii vəŋ ghɔ́. Viŋ zɔnə vəŋ tɨ́ kaꞌ vəŋ fàꞌ faꞌ vəŋ nə məŋaytə. Fwisə vəŋ kɨ luu kìi məluŋ shɔ, buu ŋkə kee ndɔ gaŋtə viŋ me.

¹⁸ Viŋ kɔꞌ kɨ shɔꞌtə Nwi tɔ yia. Nu ŋkɨə faŋ ŋkə lùu kəley tɨ́ yia, lùu laa fwi sia kee bweꞌsə yia me. Taa vənu vənshə yia kəə kɨ yɨsə sheꞌ vənu mbɨə faŋ mbə lùu vəloomə.

¹⁹ Mə baa kɨsə buꞌ ghɔ tɨ́ viŋ laa, viŋ kɨ shɔꞌtə Nwi tɔ mə, tɨ́ kaꞌ mə baa kìi jɨɨ, bə̀ŋ jwì yɨ viŋ.

Shɔꞌtə

²⁰ Nwi faŋ ŋwə kɔ məduꞌ-nyɔŋ ywèysə tɨta ŋwaa-nsiŋ Yeso Kristo fɨ shɨ yiku. Yeso luu nshii nyaa-nsiŋ faŋ ŋwə shii vɨɨ vənshə. Nə luu mənshi mə Yeso faŋ Nwi nə ndì, yɨ̀sə laa məkee mbɨə faŋ Nwi nə kɔ̀ꞌnə tɨ́ nsiŋ nə, weꞌ gòꞌsə yighee muꞌ.

²¹ Nwi kɔ viŋ nə vətɔ vəjəəvə vənshə faŋ mbə gaŋtə viŋ maa məyɨsə vənu mbɨə faŋ ŋwə kəə laa viŋ kɨ yɨsə. Yeso Kristo faꞌ taa fwisə nsiŋ, laa nsiŋ kɨ shi nə nshinə njyə faŋ nyə bàw too Nwi. Nsiŋ kɨ bəŋsə Yeso ghee nshə. Feenə wi ndɔ goꞌsə yighee muꞌ. Ŋkə lùu nɨniŋ.

²² Vaŋ-nshwi vaŋ, mə buꞌ ghɔ tɨ́ viŋ laa, viŋ jia fwi siŋ, zɔ̀ yigisə nyaa. Ŋwaꞌlə ŋwə̀ faŋ mə nyɔ̀ꞌ tɨ́ viŋ nə, kee lùu də me.

²³ Mə kəə laa viŋ kɨɨ laa vɨ fuusə weenshu ŋwaa-nsiŋ Timoti fɨ mfiŋ. Ŋwə taa jwi, kee betə me, yia ŋwə ndɔ jwi yɨ viŋ mɔ́ꞌ.

²⁴ Viŋ shɔꞌtə vɨɨ taa fɨ taa ŋwaa viŋ vənshə, ghɔ vɨ vɨɨ Nwi vənshə. Vɨɨ Nwi mbɨə faŋ vəŋ nə ndɔ̀ fɨ shɨ Itali, shɔꞌtə viŋ.

²⁵ Nwi tu mənɔŋ-bwaŋnə tɔ viŋ vənshə. [Ŋkə lùu nɨniŋ.]